Bu il Fəzail İsmayılın 50 yaşı tamam olur. Bu münasibətlə qələm dostumuzu təbrik edir, ona uğurlar arzulayırı
Dördlüklər
Dolandım dağları dərdim azalsın
Dərdimin üstünə dərd dərdi dağlar
Dərdimi dağlara sərdim azalsın
Dərdlərim kök atıb cücərdi dağlar.
Xalq var ki, məruzdur işgəncələrə
Xalq var ki, işgəncə verib həzz alır.
Dalmışam nə ağır düşüncələrə
Onsuz da şairlər vaxtsız qocalır.
Kimsəsizə arxa duran kimsəyəm
Həzz alıram təmənnasız sağ oldan.
Mən hələlik yazılmamış “Xəmsə”yəm
Nizamim də gəlib keçdi bu yoldan.
Gəlirəm haqqımı tələb etməyə,
Görürsən üzümdə abır həyanı
Deyirsən öyrənib gəlib-getməyə
Demirsən bəs mənim vicdanım hanı?
Deyirəm nə ola mən deyən ola
Sinəmdə dərd, düyün əriyən ola.
Ana döşlərinə həsrət körpə tək
Payını əmənlər kiriyən ola.
Yaxşı ki, dünyanın qəlbi sınmayıb,
Yaxşı ki, dünyada mən varam hələ.
Odur ki, dünyamız alovlanmayıb,
Odur ki, insanlar dönməyib külə.
Dəli könlüm saf eşqimi götürüb,
Yubanma, Bakıdan dağlara qayıt.
Ömrü-günü məhəbbətlə ötürüb,
Sevdiyin o gözəl çağlara qayıt.
Dağılıb xəyalım asiman kimi,
Hər səmtə, hər yana, Yer kürəsinə,
Hopacaq torpağa o leysan kimi,
Dönəcək baharın cücərtisinə.
Yamanlar yolumu kəssə də tək-tək,
Min-min yaxşı insan çatar köməyə.
Bir də ki, düzünü söyləyim gərək,
Vurğunam tikanlı yol yeriməyə.
Azğınlar xor baxdı bu can yanğıma,
Sınmaz sadəliyin səmimiyyəti.
Baş əydi ağsaçlı qartal xalqıma,
Gör nələr yaradıb onun fitrəti!..
 |
