|
HƏSRƏTLƏRİN GÖRÜŞÜ
Bakı Sumqayıt yolunda işğal
olunmuş rayonlarımızın adına
restoran açıb al-ver edillər
Dayanır yol üstə naşı yolçular,
Reklama çevrilmiş adlar önündə.
Bu gün reklam olmuş bu doğma yurdlar
Özləri tapdanır yadlar önündə.
"Qəriblər" nə gəzir bu dar şəhərdə?
Bunu dünya bizdən soruşur axı.
Bu qədər " həsrətli" görüşən yerdə,
Torpaq tonqal olar alışar axı.
Uzaqda oturub torpaq deyənlər,
Torpağın alveri ən böyük günah.
"Laçın" da oturub kabab yeyənlər,
Altmış min tikəni görmürlər, Allah!
Əl çək kef - damaqdan, ay qonaq, əl çək!
Burada dərdlərimin qoşadır adı.
Ilahi, körpələr elə biləcək,
Qubadlı, Cəbrayıl, Şuşa buradır.
Ay qardaş, hər yandan şəkıl asırsan,
Qaçqının damağı çağ nəyə lazım?!
Ürəkdən asılmış dağımız varsa,
Gözdən asılmağa dağ nəyə lazım?!
Belə kiçildəndə uca dağları,
Fırçası sinmazmı rəssam əlinin,
Bir dənə göl şəkli çəkin ki, barı,
Bağrı yarılmasın Göyçə gölünün.
"Elə xoşbəxtlikdən yazırıq ancaq,
Elə kəlməlrdə alışırıq biz".
Bir milyon soydaşım qaçqın olubsa,
Hansı xoşbəxtlikdən danışırıq biz?!
Dayanır yol üstə naşı yolçular,
Reklama çevrilmiş adlar önündə.
Bu gün reklkam olmuş bu doğma yurdlar,
Özləri tapdanır yadlar önündə.
QAYIDA BİLMƏRƏM
Deyirsən qayıt gəl ocaq başına,
Qayıda bilmirəm məni bağışla.
Cəsarət toplayıb uşaq başıma,
Qayıda bilmirəm məni bağışla.
Ürəyim açılmır sevgiyə birdə,
Əllərim uzanmır kimsəyə birdə,
Zirvədən düşmüşəm zirvəyə birdə,
Qayıda bilmirəm məni bağışla,
O qədər tədbirli ayıq deyiləm,
Sularda batmayan qayıq deyiləm,
Çayyuxarı üzən balıq deyiləm,
Qayıda bilmirəm məni bağışla.
Yoxsul olanların qiyməti yox ki...
Ötəri sevginin hörməti yox ki...
Məndə bir qaranquş qüdrəti yox ki...
Qayıda bilmərəm məni bağışla.
Üzündə yol açan damlayan indi,
Qaralan ocağam, mən nəyəm indi?!
Hədəfə dəyməyən gülləyəm mən indi,
Qayıda bilmərəm məni bağışla.
|
|
