|
GƏLMƏ BAHAR!..
Gəlmə, bahar!..
Soyuq fəsillərdə
yaşamaq istəyirəm.
İçimdəki soyuqluğu
duymayım deyə
üşümək istəyirəm...
Gəlmə, bahar!..
Gəlişinlə güclənir
darıxma hissim,
daha çox yarpaqlanır
onun yoxluğu.
Üç aylıq ömrün üçün
dəyməz bir ömrü
məhv etməyə.,
Gəlmə, bahar,
bu dəfə gəlmə!..
Saxla bu gəlişini
mənsiz zamana...
***
Elə qırmısan ki, qanadlarımı,
Ömürlük uçmağa həsrət qalmışam.
Göylərdən üzülüb qara torpağa
Deyəsən əbədi məhkum olmuşam.
Bəlkə bu ağrıdan keyləşib ruhum,
Kilidli qalıbdır içimdə duyğum.
Bəlkə bəhanədir Tükənib sevgim -
Daha o istəklə Sevmirəm Səni!
Səni yalan yerə doğma bilmişəm…
Bəlkə də unudub dönərkən evə
Sevgimi şəhərdə qoyub gəlmişəm.
Bir də qayıtmaram Mən o şəhərə …
"BİZ"siz şəhər, şəhərsiz "BİZ"...
Bu şəhər incidir,
incidir məni...
Heç bir küçəsində
görmürəm "bizi"…
Özümü aldatmaq
gəlmir əlimdən,
mən elə boş yerə
gəzirəm "biz"i...
De, hansı küçədə
tutdun əlimdən,
Yayınıb hər kəsdən
öpdün gözümdən?!
hansı dayanacaqda
gözlədin məni,
Hansı gecəsində
ötürdün evə?!
De, bu şəhərin
hansı parkının,
hansı ağacına
birgə ad yazdıq?!
Saçımı elə hey
külək oxşadı,
Sənin əllərinə
Möhtacdı yazıq.
Nə şəhər "biz"ə tanış,
Nə "biz" şəhərə...
Bəs, niyə umuram
"biz"i şəhərdən?
|
|
