|
HƏYATIN ÇIXMAYAN TƏBII BOYALARI…
Buxarlanan pəncərəyə toxunan əlim Orda hisslərimin şəklini çəkdi… Gözlərim boyadı o şəkilləri, Sonra da əlimi şüşədən çəkdim. Kənardan baxdım alıcı gözüylə buxarlı pəncərənin hisslər əsərinə - mənzərə gözəldi ,amma deyəsən artıq işlənmiş boya süzüldü yerə. Mən də dizlərimi yerə qoyaraq, süzülmüş boyanı əlimə siyirdim. Daha sonra boyanı yerinə qaytarıb bəlkə yenə də lazım olar dedim. Gözlərim isə mənim dediklərimi təkzib edib, özünə haqq qazandırdı: "Hisslərə qapalıb boyanı zay etməkdənsə səbirlə işləyərdin qalanı qalardı" - dedi. -amma haqlı da idi. Gözlərimin dediyini düşünənədək pəncərəyə toxunan əllər onu sildi Amma o qədər də heyfislənmədim. Çünki şüşədən təmiz boyalarla, səbirlə işlənmiş həyat görünürdü…
İNCƏ QƏLBLƏR
İnsan sevilməyə məhkum bir quldur - çiçək sevilməsə, çox vaxtsız solur… Ömür pəncərədən görünən yoldur - amma pəncərə də pərdəsiz olmur… Yolun ucundakı yaşıl işıqlar üstünə yağış çilənmiş çəmənə bənzər. O bir çəməndir ki orda gəzilər, amma ehmalca, yoxsa əzilər… İnsan qəlbi də belədir zərif, incədir şirin sözlər zərif qəlbin ürəyincədir sevilməyə məhkum bu incə qəlblər sevənin həm hüzur, həm əmrindədir.
ÖZÜNSƏN
Qələmin vərəqə toxunduğu an Hələ yazmaq sayılmaz. Kibrit samanlığa düşübsə əgər Qorxmağa tələsmə Bəlkə də yaşdı yanmaz… Insan var bir damcı suda boğulur düşüncə inanılmaz Insan da var istərək dənizə qərq olur cana heç nə olmaz Görəsən nədir bu sandığın içində sirrlərini bilmirik Açarını əlimizdə tutmuş gözlərkən qıfılın itiririk Dünya bir sandıqdır içinə girmək üçün qıfıl tapılmalı açarı salmaq üçün bir insan beyni onu tapmağa qadir lakin onu tapmağı bizə ALLAH əmr edir məhz bunu üçün də ağıllı beyin kortəbi şəkildə yaşlanmaq istəməz. Elm dəryasının yanından keçib, Artıq bilirəm deyib müşriklik etməz. Odur ki ,ey insan ayaqlarınla addımladığın yolu ömr xəritən bil əgər ki bunları bilirəm desən , nə açara, nə qıfıla olar ehtiyac, çünki sirrlərin açarı insan beynindədir.
SÖZÜM SAHIBIMƏDIR
duz oldum aydınla gözündən süzülüb yanağına, dodağına iz alıb keçdim ağrını,acını canından çıxardım onları çiynimə yük alıb getdim rahat sandım əvvəl getdiyim yolu ta ki çənənə çatmışdı bu rahatlığım dedim addım saxlayım, bir az dincəlim, əllərin qoymadı çənəndə qalım. əvvəl əlinin üstü kəsdi yolumu əlində, ovcunda quruyub getdim hələ bu hərəkət yetməmiş kimi, barmaqların da izimi sildi mən bittim bircə kirpiklər qalmışdı vəfalı mənə əllərin gedərkən onun üstünə tikan tək batırdı o əllərinə yenə qəddarlıq elədin hissiyatsızsan tikan əllərinə batır sən anlamırsan mənsə çox sadiqəm etdiklərinə gözə dedim yumub keçdi, etmədi inad səndən ancaq sevinərkən çıxmaq istərəm bu acı soğandan ötrü etmə narahat.
GƏLƏCƏYİN KEÇMİŞİ
Vaxtı keçmişə buraxdım, yanında uşaqla gəldi dönüb gələcəyə baxdım qoca bağban , gözlərini əkdiklərinə baxaraq gözləyirdi mənə bənzəyirdi bir az amma saçları ağ idi üzündə həyat yolları alnındakı cığır idi hey dikirdi gözlərini əkdikləri ağaclara barlarını gözləyirdi nübar edə sevinc dada günlər aylar belə keçir ağacları bar verirdi, hey dadırdı o barları sevindikcə sevinirdi şirin idi həyat ona xəmrindəki şirinlik tək sevinirdi qoca gözlər mən yuxudan duranadək isti ocaq kənarında kitabımı oxuyarkən qəflət yuxusuna gedib ömrümü səhifələmişəm amma bir az təəccüblüyəm ki, o qədər sevincləri , xoş günləri görmək üçün görən çoxmu işləmişəm, çoxmu əziyyət çəkmişəm düşünürəm düşündükcə işləyirəm işlədikcə gecə -gündüz hey çalışıb gördüklərimi gözlərim açıqda da görmək üçün tər tökürəm ümüdlərə sabah barın görüm deyə o sevinci dadım deyə ömrümü həsr edəcəyəm gələcəyin keçmişinə.
|
|