|
Aclığın fəlsəfəsi
Pələng kimi baxar qarnı tox pişik, Bilməz pələngliyi haçanacandı? Hasarı şiş qaya bilən pişiyin Pələngliyi elə acanacandı.
Kiminsə yolları bitir əlində, Başlayır kiminsə yolu saçından. Toxların yadına düşməz tanrısı, Aclar ümüd yeyib, ölər açından.
Başın nə günahı, qarın başdısa?! Asılan qarnından asılsın gərək. Bir qarnın üstündə fırlanır dünya, Acların tanrısı tapılsın gərək.
***
Biz hələ görmürük pis olan nədir, Nədi yaxşı olan bu yer üzündə? Bir qırıq güzgüyə dönə bilmirik, Bizləri göstərir hər şeyi özündə.
Bizik bir iylənmiş insan meyidi, Bir ev xarabası, bir ocaq külü. Bizik bir uşaqdan gələn süd iyi, Bir evin kölgəsi bir dibçək gülü.
Dərənin dibində dərə görünməz . Adamlar günahda günah axtarır. Özünü itirən bu yer üzündə, Baxıb göy üzünə allah axtarır.
***
Bülvarda portretə dönür bu günün Sahildə adamlar üzür, Gəzir dənizdə balıqlar. Sahildə uçur Özünü qağayılara bənzədən yarpaqlar. Qağayılar dənizə tökülür. Ağaclar sahildə lövər salıb. Bitib dənizdə gəmilər. Dənizdə günəş var bu gün, Sahildə günəşi batmış bir adam.
***
Geçədən keçib. Yatıram... Səhər oyanam, görəm ki, yaz gəlib. Çiçək açıb ağaçlar. Yenə qaranquş yuva qurub Eyvanımızda. Sərçələr isti qumda çimirlər yenə. Bir geşəcin yuxusuyla üstündən keçəm bu qışın. Barı bircə qış görməyəm Zibil yeşiyinin altına girən pişik balasının əsdiyini. Ayaqqabısının çırığından Ayağı islanmış balaca Baharın məktəbdən evə tələsdiyini. Evi daman Xanım nənənin əlində vedrə, ləyən gəzdiyini. Barı bircə qış... Səhər oyanam, görəm ki, yaz gəlib.
***
Pəncərə-pəncərə böyüyən şəhərin Küçələri addım-addım kiçilən adamlarla dolu. Qartopu baxışları atır bir-birinə, rastlaşan gözlər. Qızışır yaxın dodaqlarla qulaqlar arasındakı söz tenisi. Çalınır Çoxunun içindəki dərdinin "do" notu. Ölmüş ümüdlərini daşıyan adamların Çiynindən asılıb yellənir qolları. Qısalır Bir daşın altında bitəçək bu insan yolları. Uzanır Bu yolları gedən adamların yaşamaq həvəsi. Və yayın istisi. Bəlkə də şəhəri akvariumda görən Dükan vitrinlərindəki manikenlərin Yazığı gəlir bizə...
***
Belimə çırpılan ay işığından qorxub Qarşımda üzü üstə yerə yıxılıb kölgəm. Yıxılanda dizi yaralanmış uşaq kimi Kölgəmi qucağıma alıb Qaçmaq istiyirəm Bu küçədən, Bu şəhərdən. Qaçıb gizlənmək istiyirəm səhərin arxasında. Atası açıqlananda Qaçıb anasının arxasında gizlənən uşaq kimi.
|
|