|
Cib şəhəri
Bu şəhərdə adamlar Bir-birinin cibində. Yatır dostlar, qohumlar Ciblərinin dibində
Ciblər gəlir üz-üzə, Ciblər adam daşıyır. Bu şəhərdə adamlar, Ciblərində yaşayır.
Əl çıxarıb cibindən, Salam alan kim idi? Kimə salam vərəsən Salam xəzəl kimidi.
Bu şəhərin adı var- Bu şəhər cib şəhəri. Qaranlığı cib salar, Ciblər açar səhəri.
***
Pəncərə-pəncərə böyüyən şəhərin Küçələri addım-addım kiçilən adamlarla dolu. Qartopu baxışları atır bir-birinə, rastlaşan gözlər. Qızışır yaxın dodaqlarla qulaqlar arasındakı söz tenisi. Çalınır Çoxunun içindəki dərdinin "do" notu. Ölmüş ümüdlərini daşıyan adamların Çiynindən asılıb yellənir qolları. Qısalır Bir daşın altında bitəçək bu insan yolları. Uzanır Bu yolları gedən adamların yaşamaq həvəsi. Və yayın istisi. Bəlkə də şəhəri akvariumda görən Dükan vitrinlərindəki manikenlərin Yazığı gəlir bizə...
Aclığın fəlsəfəsi
Pələng kimi baxar qarnı tox pişik, Bilməz pələngliyi haçanacandı? Hasarı şiş qaya bilən pişiyin Pələngliyi elə acanacandı.
Kiminsə yolları bitir əlində, Başlayır kiminsə yolu saçından. Toxların yadına düşməz tanrısı, Aclar ümüd yeyib, ölər açından
Başın nə günahı, qarın başdısa?! Asılan qarnından asılsın gərək. Bir qarnın üstündə fırlanır dünya, Acların tanrısı tapılsın gərək.
Görmədiyimiz görüntülər
Biz hələ görmürük pis olan nədir, Nədi yaxşı olan bu yer üzündə? Bir qırıq güzgüyə dönə bilmirik, Bizləri göstərir hər şey özündə.
Bizik bir iylənmiş insan meyiti, Bir ev xarabası, bir ocaq külü. Bizik bir uşaqdan gələn süd iyi, Bir evin kölgəsi bir dibçək gülü.
Dərənin dibində dərə görünməz Adamlar günahda günah axtarır. Özünü itirən bu yer üzündə, Baxıb göy üzünə allah axtarır.
*** Başımı qaldırıb Üzümü göylərin üzünə söykədim. Uçan baxışımla Gözümü göylərə göndərdim, İlahi. İlahi, mən səni yoxluqda axtardım, özümü itirdim . Qayıtdı baxışım... Mən səni gözümün yaddaşında tapdım.
*** Bulvarda portretə dönür bu gün: Sahildə adamlar üzür, Gəzir dənizdə balıqlar. Sahildə uçur özünü qağayılara bənzədən yarpaqlar. Qağayılar dənizə tökülür. Ağaclar sahildə lövbər salıb. Bitib dənizdə gəmilər. Dənizdə günəş var bu gün, Sahildə günəşi batmış bir adam.
|
|