|
Mən İsmayıl Şıxlının şəxsiyyətində, yaradıcılığında, ümumən fəaliyyətində mükəmməl bir hissin təsiri altında, əbədi dünyanın təzahürünü görürəm.
Nizami Cəfərov
"Ölən dünyam" (1995) romanının "Müəl-lifdən" adlı giriş sözündə İ.Şıxlı yazırdı: "Mən "Dəli Kür" romanını yazdıqdan sonra Azərbaycanda 20-ci illərdə baş verən inqilab tariximizdən yazmaq qərarına gəldim, müəy-yən materiallar topladım, hətta əsərin adını da oxuculara çatdırdım. "Qanlı təpə" adlanacaq bu əsər 20-ci illərin mürəkkəb və ziddiyyətli həyatını əhatə etməli idi". Lakin İ.Şıxlı həmin romanı yazmır. Ona görə ki, siyasi qadağalar şəraitində həqiqəti axıra qədər deyə biləcəyinə əmin ola bilmir. Bu şəraitdə yazacağı romanın tariximizin həmin dövründən bəhs edən məlum əsərlərdən bir o qədər də fərqlənməyəcəyini duyur. Yazmaq xatirinə yazmaq isə onu təmin etmir. İyirminci əsrin 80-90-cı illərində ictimai-siyasi proseslərin sürətlə dəyişməsi, milli özünüdərkin cəmiyyət həyatına nüfuzu, milli müstəqilliyin əldə edilməsi onu düşündürən konkret tarixi mərhələ və onun problemləri ilə bağlı öz sözünü demək üçün yazıçının qarşısında yeni üfüqlər açır. O, yeni romanını yazmaq qərarına gəlir və yazır. Müəllifin romana yazdığı giriş sözündə oxuyuruq: "… Mən yeni roman üzərində işləməyi qərara aldım. Əsərin ruhu və məzmunu tamam yeni oldu, əsərin adı da dəyişdi. Mən romanımı "Ölən dünyam" adlandırdım". "Ölən dünyam" mürəkkəb süjet və kompozisiya strukturuna malikdir. Məlumdur ki, dünya ədəbiyyatında müxtəlif dövrlərə, zaman kəsiyinə aid hadisələri paralel süjet xətti və mürəkkəb kompozisiya sistemi ilə bir ideya, müəllif mövqeyi ətrafında birləşdirən roman ənənəsi mövcuddur. Q.Q.Markesin, M.Bul-qakovun, Ç.Aytmatovun yaradıcılığında əyaniləşən bu struktura Azərbaycan ədəbiy-yatında da rast gəlirik. Y.Səmədoğlunun "Qətl günü", Elçinin "Ölüm hökmü" romanlarında bu ənənə uğurla davam etdirilib. İ.Şıxlı da "Ölən dünyam" romanında vermək istədiyi tarixi materialın bədii ifadəsi üçün müxtəlif zaman kəsiyində cərəyan edən hadisələri əks etdirən paralel süjetlərin bir mürəkkəb kompozisiya sistemində yerləşdirilməsi üsulundan məharətlə yararlanıb. Fikrimizcə, İ.Şıxlının romanda ənənəvi strukturdan imtinası "dəb", "yenilik" duyğusundan yox, daha çox inikas olunmalı materialın təbiətindəki mürəkkəbliklə bağlı sənətkar axtarışlarından güc alıb. Başqa sözlə, "Ölən dünyam"dakı problematikanın mürəkkəbliyi özü mürəkkəb struktur doğurub. Romanda bədii təsvirin mərkəzində 20-ci illərin hadisələri durur. Roman qəhrəmanları ilə ilk tanışlıqlar ailə-məişət hadisələri çərçivəsində baş verir. Lakin romanın məişət süjeti də kifayət qədər dramatikdir. İlkin planda önə çəkilən və əslində axıra qədər izlənilən mənəvi-əxlaqi kontekstin açılmasında bu süjet xətti aparıcı rol oynayır. Alqazaxlılar nəslindən olan Həsənağa ov zamanı bilmədən Çıraqlılar nəslindən olan dostu, qardaşının qaynı, yaxınlarda toyu olacaq Ələddini öldürür. Hadisə hər iki tərəfin çox ciddi narahatlığına səbəb olur. Hər iki tərəfi narahat edən həm də odur ki, bu iki nəsil arasında vaxtı ilə düşmənçilik olub. Çıraqlılar gənc Ələddinin ölümünə nə qədər yansalar da, onları daha çox narahat edən budur ki, görəsən, burada qisas hissi, xəyanət var, yoxsa yox? Alqazaxlıları isə qorxudan budur ki, Çıraqlılar işin əslini öyrənməsələr, düşmənçilik yenidən qızışa bilər. İnsanların qəlbini didən, onları gərgin psixoloji anlar yaşamağa məcbur edən bu hadisə yazıçının qələmində obrazların daxili aləminə nüfuz etməyin açarına çevrilir. Alqazaxlıların ağbirçəyi Güllü arvad, Çıraqlılar nəslinin ağsaqqalı Ömər koxa yazıçının romanında yaratdığı möhtəşəm obrazlardır. Güllü arvad da, Ömər koxa da dünyanın hər üzünü görmüş, böyük həyat təcrübəsi toplamış müdrik insanlardır. Onlar həyatın mənasını namusla yaşamaqda görürlər. Romanda Güllü arvadın da, Ömər koxanın da həyatı üç mərhələdə izlənir: I. Çar höküməti dövründə; II. Sovet hökümətinin ilk illərində; III. Sinfi mübarizənin kəskinləşdiyi və gərginləşdiyi illərdə - 20-ci illərin sonu və 30-cu illərdə. Əsas süjet xətti qəhrəmanların həyatının son illərini əhatə edən ikinci və üçüncü mərhələ ilə bağlıdır. Onların sovet hökümətinə qədərki həyat yollarını bütövlükdə bədii təsvirin obyektinə çevirmək müəllif məqsədinə daxil deyil. Obrazların həyatının əvvəlki mərhələsi Güllü arvad və Ömər koxanın keçmişlə bağlı xatirələrində - retrospeksiya yolu ilə oxuculara çatdırılır, həm də bütövlükdə yox, fraqmentlər şəklində. Əslində müəllifin məqsədi ayrı-ayrı fərdlərin həyat yolunu izləmək deyil. Nə Güllü arvad, nə də Ömər koxa fərdi xarakterin ümumiləşdirilmiş obrazı kimi yaradılmayıb. Baxmayaraq ki, Güllü arvadın da, Ömər koxanın da xarakteri çox aydın və parlaq cizgilərlə cızılmış, özünəməxsus fərdi keyfiyyətləri olan obrazlar kimi oxucu yaddaşında silinməz izlər buraxırlar. Bununla belə, Güllü arvadın və Ömər koxanın simasında cəmləşdirilən keyfiyyətlər daha çox sovetləşmədən əvvəlki dövrün mənəvi-əxlaqi mühitini səciyyələndirmək missiyası daşıyır. Müəllifi xarakterlərin fərdi taleyi deyil, dəyişən, bir-birini əvəz edən zamanların səciyyəsi maraqlandırır. Bu mənada Güllü arvad da, Ömər koxa da milli-tarixi varlığın simvolları olmaqla, bu tarixi gerçəkliyə məxsus ən əlamətdar keyfiyyətlərin daşıyıcısı kimi bədii təsvirin mərkəzinə çəkilirlər. Əks cinsdən olmalarına baxmayaraq, hər birisi bir nəslin başçısı kimi təqdim olunsalar da, geniş planda bu obrazlar bir-birinin davamıdır. Həyat yollarının romana gətirilən ilk mərhələsində onların hər ikisi milli xarakterin bir-birini tamamlayan bədii təcəssümü kimi maraq doğurursa, sonrakı mərhələlərdə obrazların simvolik - metaforik yükü dəyişir. Ömər koxa uzun illər ömür sürdüyü bu dünyadan narahat gedir. Həm də ona görə yox ki, bir az da yaşamaq istəyir. Yox. Ömər koxa əcəlinin gəldiyini bilir, onun gəlməsindən narazı da deyil. Çünki uzun bir ömür sürüb. O, bütün yaxınları ilə görüşüb halallaşır və yatağına uzanıb canını tapşırır: "…Ömər koxa oğlu Şamilin gözü qabağında elə bil yuxuya getdi. Şamil yorğan-döşəkdə yatan bu pilə saqqallı, bəyaz sifətli kişinin atasımı, yoxsa müqəddəs bir məxluqmu olduğunu xeyli müddət ayırd edə bilmədi". Bu, təbii bir ölümdür. Öz evində, qohum-əqrəbasının, oğul-uşağının əhatəsində "dövranını çoxdan sürən" qoca ölümü haqq işi kimi qəbul edərək dünyasını dəyişir. Məntiqə görə, dini və milli inama görə, o, bu dünyadan rahat getməli idi. Bəs, Ömər koxa niyə bu dünyadan narahat gedir? Oğluna vəsiyyətləri onun bu narahatlığını doğuran səbəbləri aydınlaşdırır: "Sənə iki vəsiyyətim var. Biri odur ki, mən öləndən sonra çalış, araya qan düşməsin. Onsuz da dünya qana çalxalanır. Belə getsə, de-yəsən, adamları bir-birinin üstünə qaldırıb üz-göz edəcəklər, araya qırğın salacaqlar. Divan-dərəyə lotu-potular yığılıb, bala, ehtiyatlı olun. Bir-birinizdən göz-qulaq olun…". Ömər koxanın sözləri dünyanın dəyişməsinə işarədir. Böyük həyat təcrübəsi və iti düşüncəsi, ağsaqqal fəhmi ilə o, baş verənləri və verəcəkləri düzgün qiymətləndirir. Ömər koxanın yaşadığı həyat namus, kişilik qanunu ilə idarə olunur. Bu mühitdə sözübütöv, igid, təmiz, namuslu insanlara xüsusi dəyər verilir. Belə insanlara böyük ehtiram göstərilir. Ömər koxanın yaşadığı mühitdə ağsaqqal, böyük sözünə nəhayətsiz ehtiram var. Böyüyün, kiçiyin, qadının, kişinin, oğulun, qızın, atanın milli əxlaq qanunları ilə tənzimlənən davranış tərzləri var. Kimsə bilərəkdən bu qanunları poza bilməz. Pozarsa, cəzasını alar, həm də bu cəza etirazla qarşılanmaz. Bu cəmiyyətdə şəxsiyyətə- yerini, hərəkətini,oturuşunu, duruşunu bilən insana böyüklüyündən və kiçikliyindən asılı olmayaraq dərin ehtiram var, namussuzluq və xəyanətə isə güzəşt yoxdur. Güllü arvadın çox-çox illər qabaq Ömər koxa ilə bağlı xatırladığı bir əhvalat o zamanın səciyyəsini başa düşmək üçün çox maraqlıdır. Güllü arvad xatırlayır ki, hələ balaca qız olduğu vaxtlarda Ömər koxanın gəlinlərinin biri alt paltarını itirmişdi: "Bu biabırçılıq idi. Qızın, ya gəlinin alt tumanını itirməsi, namusunu itirməsi demək idi. Namusunu itirənin eybini isə yalnız qara torpaq örtməli idi". Bu hadisə bütün tayfanı lərzəyə gətirir. Tayfanın ağsaqqalı dərdin ağırlığından iki gün dilinə çörək vurmur, alaçığın çırağı yandırılmır. Kimsənin nəfəsini çəkməyə, ona söz deməyə iqtidarı olmur. Yalnız təsadüfən paltarın camış tərəfindən yeyilməsi bilinəndə "kişinin (Ömər koxanın - T.S.) qan sağılmış gözləri elə bil işıqlandı, deyəsən, sifəti də açıldı. Dodaqlarında gülüşə bənzər bir şey sezildi". Ömər koxa özünə məxsus beş camışın üçünü bir-bir doğratdırıb onların mədəsində itmiş paltarı axtarır. İtmiş paltar isə ücüncü camışın mədəsindən çıxır. Ağsaqqal dərindən nəfəs alır, rahatlanır. "Elə o gecə gəlini atası evinə yola saldılar. El yaylaqdan arana dönəndən bir az sonra isə onun meyidini Gəmiqa-yanın alt tərəfindən, çiləkənin yanından tapdılar". Ömər koxa nə üçün bu qədər narahat olur? Gəlini elə əvvəldən qovmaq, yaxud öldürmək olmazdımı? Yox! Namus qanunu tələb edir ki, cəzalananın günahı sübut olunmalıdır. Digər tərəfdən əgər paltar oğurlanıbsa, deməli, kiminsə tayfaya sataşmaq niyyəti olub. Bu isə qan düşmənçiliyi demək idi, neçə-neçə adamın ölümü demək idi. Ömər koxa isə həqiqəti bilənə qədər, günahkarı tapana qədər qan tökmək istəmir. Mərdlik qanunu bunu tələb edir. Ahıl vaxtında - çox illər keçəndən sonra Ömər koxa yenidən böyük çətinlik qarşısında qalıb. Ələddinin - öldürülən nəvəsinin bir təsadüf, qəza işinin, yoxsa xəyanətin qurbanı olduğunu müəyyənləşdirə bilmir. Ömər koxanı ən çox qorxudan odur ki, nəvəsi namərd gülləsinin qurbanı olar. Lakin Alqazaxlılar nəslinə dərindən bələdliyi, "onların düşmənlə düş-mən", "dostla dost" olduqlarına əmin olması Ömər koxanı Həsən ağanın namərdlik etmədiyi qənaətinə gətirir. Ömər koxa Həsən ağanı bağışlayır. Mərdlik, kişilik qanunu da bunu tələb edir. Ölüm qəsdən deyilsə, bilərəkdən edilməyibsə, bağışlana bilər. Alqazaxlılar nəslinin də bu ölüm hadisəsinə münasibəti olduqca ibrətamizdir. Güllü arvadın göstərişi ilə meyit yuyulub kəfənə tutulur, cənazə tabuta qoyulur. Hər şey hazır olandan sonra bütün Alqazaxlılar nəsli cənazəni çiyninə alaraq Çıraqlıların evinə üz tutur. Həm də silahsız gedirlər. Cavanlar silah götürmək istəyirsə də Güllü arvad qoymur: "Əli yalın gedəcəyik, - dedi - düşmən üstünə ha getmirik, qıranda da qıracaqlar". Məişət süjetinin bu dramatik məqamı oxucunu çox ciddi gərginlik altında saxlayır. Çıraqlılar bu hadisəyə necə münasibət göstərəcəklər? - sualı oxucunu bir an da rahat buraxmır. Cənazəni qarşılayan Çıraqlıların keçirdiyi gərginlik oxucuya sirayət edir. Yazıçı bu məqamı təsvirdən əlavə, həm də çox ustalıqla həll edir: "Ömər koxanın dodağı səyridi. Dümağ pilə kimi saqqalı titrədi. İndi hər şey onun bircə işarəsindən asılı idi. Ömər Koxa geri qanrılıb boğuq səslə dilləndi: - A bala, yer hazırlayın!" Roman müəllifinin təqdir etdiyi həqiqət budur ki, ağsaqqalın bir anda qəbul etdiyi düzgün qərar iki nəslin həyatını xilas edir. Bütün ağrılarına, daxili təlatüm və yanğısına rəğmən, Ömər koxa ona uzanan əli kəsməyi kişilik qanunundan kənar hesab edir. (Çünki əl sahibinin namərdlik etmədiyinə əmindir). Oxucunu düşündürən və həm də heyrətləndirən ağsaqqal sözünə olan ehtiram və inamın dərəcəsidir. Bütün Çıraqlılar nəsli, nə olur-olsun, Ömər koxanın bir sözünü iki etmirlər və etməyi ağıllarına da gətirmirlər. Alqazaxlılar Güllü arvadın sözünü qanun saydıqları kimi. İ.Şıxlı romanda ağsaqqal sözünü, göstərişini cəmiyyəti idarə edən qanun səviyyəsində təqdim və təqdir edir. Həm də bu təqdimetmə müəllif fantaziyasının məhsulu deyil, sovetləşmədən qabaqkı milli həyatın gerçəkliyi idi. Ömər koxanın ölümqabağı keçirdiyi narahatlıq hissi ondan doğur ki, o min illər ərzində formalaşmış, daşlaşıb qanun şəklinə düşmüş milli adət-ənənələrin, milli yaşam tərzinin başı üstündə böyük təhlükə dayandığını görür, zamanın sürətlə dəyişməyə doğru getdiyini və bu dəyişmənin heç də xeyirli olmayacağını başa düşür. Buna görə də oğlu Şamilə son dərəcə ehtiyatlı olmağı vəsiyyət edir. Əslində Ömər koxanın oğlu Şamilə ehtiyatlı olmağı tapşırması yalnız dəyişən zamana münasibətin nəticəsi deyil, yalnız dünyanın "qana çalxalanması", "divan-dərəyə lotu-potuların yığılması" ilə bağlı sərvaxtlığının ifadəsi deyil, bu həm də zamanın "uşaqları"na - elə oğlu Şamilə də axıra qədər bel bağlaya bilməməsi ilə bağlıdır. Müəllif milli əxlaq, yaşam tərzinə, başqa sözlə, patriarxal həyat tərzinin qanun və qaydalarına baxışda yaşlı və gənc nəslin münasibətlərindəki fərqi riyazi dəqiqliklə əks etdirir. Eyni hadisəyə - Ələddinin öldürül-məsinə həm Çıraqlıların, həm də Alqazaxlıların yaşlı və cavan nəslinin münasibətindəki fərqlər bunu aydın göstərir. Baş verən hadisə zamanı yaşlı nəslin - Ömər koxanın, Güllü arvadın göstərdiyi təmkin, müdriklik, vəziyyətdən çıxmaq üçün tökdükləri tədbirlərin səmərəliliyi diqqətdən yayınmır. Lakin bir cəhət də diqqəti çəkir ki, Ömər koxanın, Güllü arvadın "buyurduqları" sözsüz yerinə yetirilsə də, gənc nəslin psixologiyasında bu "buyruqlara" bir etiraz jesti də var. Cənazəni apararkən Alqazaxlıların cavanlarının silah götürmək istəmələri (yalnız nəslin ağbirçəyinin qəti göstərişi ilə silahsız gedirlər), Şamilin atası Ömər koxaya daxili bir hiddət, qəzəb, hətta etiraz notları ilə köklənmiş "məsləhətin nədi, ata, uşağın qanı batsın?" - sözləri yaşlı və gənc nəslin dünya-örüşü arasındakı fərqin dərinləşməyə doğru getdiyini göstərir. Bu fərq nədən doğur? Ömər koxa ilə oğlu Şamil, Güllü arvadla oğlu Həsən ağa eyni günlərdə yaşasalar da əslində onlar fərqli zamanların insanlarıdır. Ömər koxa və Güllü arvadın ömrünün böyük hissəsi patriarxal qanunların işlək olduğu zamanda keçib. Onların qocalıq günləri milli həyat tərzi və əxlaq qanunlarının işləklikdən düşməyə doğru getdiyi zamana düşüb. Həsən ağa və Şamil isə patriarxallığın pozulmağa başladığı zamanlarda dünyaya gəlib, onun sürətlə pozulmağa doğru getdiyi zamanda yaşayırlar. Həsən ağanın və Şamilin xarakterindəki saflıq, cəsarət, igidlik, ölümdən qorxmamaq, ağsaqqal, ağbirçək sözünə ehtiram və s. kimi təqdir olunası keyfiyyətlər yaşadıqları mühitdən çox, aldıqları tərbiyədən, gen yaddaşından gəlir. Biz Həsən ağanın Ələddinin meyidi yanında "başını əlləri arasına alıb, için-için, korun-korun ağlaması"nda nəhayətsiz könül saflığı, mənəvi ləyaqət görürük.
Şamilin oğlunun ölümü ilə bağlı yaşadığı dəhşətli əzaba rəğmən, özünü ələ ala bilmək bacarığını təqdir edirik. Lakin Ömər koxa, Güllü arvadla müqayisədə, "atalar"la müqayisədə "oğullar"ın mənəvi dünyasındakı haçalaşmanı da görürük. Diqqətimizi cəlb edir ki, Ömər koxanın hadisəyə yanaşması (Ələddinin ölümünə) bütövlükdə patriarxal qanunlar çərçivəsindədir. Lakin Şamilin münasibəti bu çərçivədən kənara çıxır. Ömər koxa Həsən ağanın xəyanət etmədiyinə əmin olaraq onu bağışlamağa öz içində güc tapır. Milli əxlaq qanunlarına söykənən təbiəti ona bu imkanı verir. Şamilin xarakterində isə "dualizm" var. Şamil də, Həsən ağa da ikiləşmiş xarakterlərdir. Şamilin və Həsən ağanın xarakterindəki ikiləşmə yaşadıqları zamanın "hava"sından güc alır. Ələddinin ölümündə xəyanət motivinin olub-olmadığını önə çəkən atasından - Ömər koxadan fərqli olaraq Şamil hadisəyə zamanın prizmasından baxır. Ata ilə oğul arasında dialoqa diqqət yetirək: - Ağlın nə kəsir, bu işdə bir namərdlik olmaz ki? - Nə bilim, olanda da olar, onlardan nə desən çıxar. Diqqət yetirilsə, görmək çətin deyil ki, Ömər koxa ölüm faktını yox, onun motivini önə çəkir. Şamili isə ölüm faktı, oğlunun öldürülməsi maraqlandırır. Onun üçün ölümün motivi o qədər də maraqlı deyil. Onun suala verdiyi cavabda Alqazaxlılara və əslində insana (mərdlik qanunu ilə yaşayan insana belə, çünki biz Ömər koxanın düşüncələrindən Alqazaxlıların "dosta dost, düşmənə düşmən" olduqlarını bilirik) inamsızlığı aşkar görünür. Ata ilə oğul arasında yuxarıdakı dialoqun davamı Şamilin patriarxal qaydalara, milli yaşam qanunlarına axıra qədər sadiq qala bilmədiyini ortaya qoyur. Əks təqdirdə o, dəlillər gətirib Həsən ağanın namərdliyini sübut etməli idi: "- Axı, nədən ötəri, Ələddin onlara nə pislik eləmişdi? Şamil çiynini çəkdi. İstədi papağını çıxardıb fikirdən ağrıyan başını ovxalasın. Atasının yanında oturduğunu başa düşəndə əlini çəkdi". Atasının iradəsinə rəğmən, Şamilin varlığına hakim kəsilən, içinə dolan intiqam ehtirası (motivi, nə olur-olsun) yeni nəslin simasında patriarxal qaydaların öz gücünü itirməyə doğru getməsinin və Ömər koxaların gücsüzləşməsinin göstəricisidir: "Otaqda yenidən tüstü laylandı. Kişi gözünün altından bu laylar arxasından sifəti güclə görünən oğluna baxdı. Onun dodaqları kip bağlanmışdı. Həmişə sığallı olan dən düşmüş bığı codlaşmışdı. Əli xəncərin dəstəyində idi. Özünün də xəbəri olmadan tiyəni tez-tez qınından çıxarırdı. Ömər koxa başa düşdü ki, oğlu bir himə bənddir, əgər ona bir balaca işarə etsə, bütün Çıraqlıları ayağa qaldırar və qan su yerinə axar". Ömər koxanın ölümü milli yaşam tərzi və əxlaq qanunlarının gücdən düşməsinin simvolu kimi düşünülə bilər. Ömər koxanın sağlığında hər şeyin sakit gəlib-keçəcəyini bilən Həsən ağanın arxayınlığı patriarxal qanunların işləkliyini (tam gücü ilə olmasa da), Ömər koxanın ölümündən sonra varlığını çulğalayan narahatlıq hissi isə patriarxal qanunların sürətlə gücdən düşdüyünü işarələyir. Hətta Şamil və Çıraqlıların onunla barışmalarına rəğmən, ürəklərində gəzdirdikləri kindən dolayı "içəridən qovrulub yanmaları" ilə Keçəl Xondulunun "nə vaxta qədər belə səksəkəli dolanacaqsan? Əlindən xata çıxıb, get üç-dörd ay yat, sonra gəl, rahat dolan" sözləri arasında tərəflərin mövqeyi baxımından yaxınlıq aydın görünür. Bu Ömər koxalardan sonrakı nəslin zamanın havasına köklənməsidir və yaxud zamanın havasının bu nəsillərə təsirinin güclənməsidir; bu təsirin sürətlə artmasına işarədir. Zamanın mərdlik, kişilik qanununa yer qoymayan ovqatı Şamilin içindəki patriarxallığı zəiflədir, onda "yeni dünya" qanunları ilə yaşamaq ovqatı yaradır. Şamillərin içindəki patriarxallıq duyğusu zəiflədikcə, həsən ağalar bu mühitdə yaşamaq imkanını itirib və deməli, müqavimət duyğusunu itirib, "kənar dünya"lara üz tutduqca, şəmiddinlərin ölümü çoxaldıqca keçəl xonduluların gücü və hökmü artır. Keçəl xondulular hər vəchlə və hər yerdə kişilik, mərdlik toxumlarının cücərməsinə mane olur, onları məhv etməyə girişirlər. Romanın sonrakı süjeti Güllü arvadın tale yolu ilə davam etdirilir. Əslində Güllü arvadın Ömər koxanın ölümündən sonrakı həyatı milli xarakterin sovetləşmə dövründəki faciəsini ümumiləşdirir. Məhz bu həyat yolu kontekstində müəllif sovetləşmə dövrünün ən acı həqiqətlərini oxucuya çatdırır. İ.Şıxlının ən böyük uğurlarından biri yaşanılan və yaşanmaqda olan həyatı qarşılaşdırması, müqayisə müstəvisinə gətirməsidir. Oxucu Ömər koxanın və Güllü arvadın, həmçinin Çıraqlıların və Alqazaxlıların inqilabaqədərki həyat tərzi ilə inqilabdan sonrakı həyat tərzinin ən səciyyəvi məqamları ilə tanış olur. Yazıçı süjetə müdaxilə etmir, hadisələrə tendensiyalı münasibət göstərmir. Sadəcə epik təhkiyəni davam etdirir, iki nəslin xoşbəxt, təbii bir həyat yaşamaq imkanını itirib faciəli bir tale yaşamasını, bu yaşantının ürək göynədən təfsilat və detallarını təsvir edir. Bu təhkiyə və təsvirlər sovetləşmə dövründə itirdiklərimiz, daha çox isə mənəvi itkilərimizlə bağlı çəkilməz, dözülməz ağrıların təsvirinə yol açır, sonralar üzləşdiyimiz milli faciələrimizin kökünü görməyə istiqamət verir. Müəllifin "ölən dünyam" ifadəsini nə üçün sərlövhəyə çıxarmasının səbəblərini açıqlayır. Sinfi mübarizənin kəskinləşdiyi və gərginləşdiyi illərin - 20-ci illərin sonu-30-cu illərin təsvirini verən hissələrdə ictimai problematika önə çəkilir. Müəllif sinfi mübarizə prosesini milli varlığı böyük faciələrə düçar edən sosial bəla kimi təqdim edir. İnqilab uğrunda mübarizənin xalq, millət mənafeyinə olmadığını, ictimai zərurətdən doğmadığını, rus müstəmləkə siyasətinin başqa bir üzü kimi və tələm-tələsik icra edildiyini, insanlara olmazın bəla gətirdi-yini bütün dəhşətləri ilə birlikdə açıb göstərir. Romanda təcrübəsiz, dünyagörüşü məhdud və şura təbliğatı ilə böyüyən gənc müəllim Mürsəl "inqilab yaratmaq lazımdır" deyib, öz fikrini "zorakılıq olmasa, uşaq dünyaya gəlməz" deyimi ilə əsaslandıranda dünyagörmüş qoca müəllim ona çox məntiqli cavab verir: "Yarımçıq doğulan uşaq da çox yaşamaz: ya anadan olan kimi ölər, ya da ağıldan naqis olar. Təbiətin də, cəmiyyətin də öz əbədi və əzəli dəyişməz qanunları var. Yaz qışı, yay yazı, payız da yayı əvəz etdiyi kimi cəmiyyət də embrioloji mərhələlərdən keçməlidir". Kənddə "Uçitel" ləqəbi ilə tanınan qocaman müəllimin dedikləri eyni zamanda müəllif mövqeyinin ifadəsidir. Romanda inqilab cəmiyyətin "əbədi və əzəli dəyişməz qanunları"na zidd olan zorakı ictimai hadisə kimi rədd edilir. Müəllifin yaratdığı milli-tarixi varlıqdan güc alan heç bir qəhrəman - (Ömər koxa, Güllü arvad, Çapıq Əmrah, Həsən ağa, Şəmiddin, Halay bəy və b.) inqilabı qəbul etmir. Onun xalqın taleyində oynaya biləcəyi rola vaxtı ilə aralarında möhkəm dostluq olan Halay bəylə Kabı Kəsəmənlinin münasibəti maraqlıdır. Kabı Kəsəmənli inqilab tərəfdarıdır. İnqilab uğrunda, "yeni dünya" qurmaq uğrunda əldə silah gecə-gündüz dayanmadan çalışır, ölüm-dirim savaşına girir. Halay bəy isə müəllimdir, başını aşağı salıb uşaqlara böyük həvəslə riyaziyyatı öyrədir. Halay bəy cəmiyyətin maarifçilik yolu ilə inkişafının tərəfdarıdır. Qori müəllimlər seminariyasında oxuyarkən Kabı Kəsəmənli Halay bəyi də inqilab yoluna çəkmək istəmişdir. Lakin Halay bəy yolundan dönməmişdir. Çekanın müəyyənləşdirdiyi "troyka"nın nümayəndəsi Fətullayev "üçlü"yün qərarına salıb Halay bəyi güllələtmək istəyir. Kabı Kəsəmənli günahsız olduğu üçün onu müdafiə edir. Lakin Fətullayev Halay bəyə ölüm cəzası kəsir və qərar yerinə yetirilir. Bu yolla Fətullayev F.Köçərlini də məhv etməyə nail olub. Kəndin aşı-ğını qaçaqların məclisində çaldığı üçün, kasıb bir kəndlini qalada yatan Halay bəyə çörək apardığı üçün "troyka"nın qərarına salıb güllələtmək istəyir. Fətullayevin əlində "troyka"nın iki ayrı üzvü tərəfindən imzalanmış "sənəd" var. O, kimi məhv etmək istəyirsə, "sənəd"ə üçüncü imzanı atıb atacağı addımı qanuniləşdirir. Fətullayevin hərəkətləri onunla eyni cəbhədə çalışanları da dəhşətə gətirir. Romanda oxuyuruq: "Kəsəmənli bir xeyli fikirli-fikirli, gözləri yol çəkirmiş kimi lal-dinməz oturdu… Onu fikir götürmüşdü. Çekanın mərkəzdən göndərdiyi Fətullayev hər yerdə, hər adamın simasında müzür ünsür görürdü. Kim əlinə keçirdisə, ən ağır cəza verməyə çalışırdı. Qəzada qaçaqların sayı getdikcə çoxalırdı". Müəllif tarixi dövrün həqiqətlərini realist qələmlə açır. Həm də bu zaman siyasi rejimin öz müstəmləkəçilik siyasətini pərdələmək üçün ortalığa atdığı "sinfi mübarizə"nin heç bir ictimai əsası olmadığını da sübut edir. "Sinfi düşmənə kömək edən müzür ünsürlər qırılmalıdı, vəssalam" qənaəti Fətullayevin düşüncəsinə müstəmləkəçi dövlətin qərar və təlimatlarından gəlir. Siyasi rejimin səciyyəsi birbaşa onun üzərinə köçürüldüyü üçün (metaforik obraz olaraq) Fətullayev insanlara fərdi münasibət göstərmək iqtidarında deyil. Qəza firqə özəyinin sədri Abdal kişi, İnqilabi Şura sədri Kabı Kəsəmənli isə inqilab mücahidləri olsalar da xarakterlərinin milli varlığa bağlılığı onların insanlara total münasibətini mümkünsüz edir. Fətullayevin (oxu: inqilabın, sovet hökümətinin) "müzür ünsür", "sinfi düşmən" elan etdiyi hər bir insanın fərdi taleyinə, əməl və xarakterinə yaxşı bələd olan Abdal kişilərdə, Kabı dayılarda, inqilaba olan əvvəlki rəğbət və inamlarına rəğmən, bir tərəddüd, təəssüf, inamsızlıq psixologiyası yaranır. Firudin bəy Köçərlinin ölümü yadına düşəndə Abdal kişi "odsuz-ocaqsız yanır", "belə bir kişini qoruya bilmədiyi üçün özünü danlamaqdan yorulmurdu". Hələlik, nə qədər ki, qəti qərara gəlməyiblər (o mənada ki, rejimin antimilli xarakterini tam dərk edə bilməyiblər) Abdal kişilər, Kabı Kəsəmənlilər, şura sədri Mustafalar "troyka"nın "güllələnmə" siyahısına salınmış Aşıq Qarnetləri, Çoban Kərəməliləri, bacısına sataşdığına görə şura sədri Qəzənfəri "düz qaşının ortasından vuran" kənd uşağını ölümün cəngindən qurtarmaqla, tutulmaq qorxusundan silah götürüb dağlara çəkilmiş günahsız insanları üzə çıxarmaqla təsəlli tapırlar. Sovet hökumətinin sinfi mübarizə adı altında həyata keçirdikləri heç bir insanlıq ölçüsünə sığışmır, hökumətin müstəsna səlahiyyət verdiyi fətullayevlər, keçəl xondulular bütün müqəddəs inamlara tüpürür, insanları gedər-gəlməzə göndərərək, onların illər boyu düzəltdikləri ev-eşiyə, var-dövlətə sahib çıxmaq ehtirası ilə alışıb yanırlar. Romanda Abdal kişi, Kabı Kəsəmənli kimi insanların inqilab uğrunda mübarizəsi də tarixi gerçəkliyə uyğun verilmişdir. Fətullayevin Halay bəyi güllələməsini eşidən Kabı Kəsəmənlinin tapançasındakı bütün güllələri onun bədəninə boşaltması, təkcə intiqam hissini ifadə etmir. Onun əndazədən çıxan hərəkəti Kabı Kəsəmənlinin içindəki tərəddüdə son qoyur, onun yeni hökumətə olan inamını heçə endirir. Kabı Kəsəmənli illərdən bəri uğrunda mübarizə apardığı işə arxa çevirir. Ona görə ki, o Halay bəy, Firidun bəy kimi insanları bir anda məhv etməyə hazır olan bu quruluşa inamını itirir. Xalqın içindən çıxıb inqilaba qoşulan Kabı Kəsəmənli yenidən xalqın içinə qayıdır. Bu həqiqi milli xarakterin heç vaxt və heç bir vəchlə öz təbiətindən çıxa bilməyəcəyinə olan yazıçı inamını ifadə edir. Romanın bu konteksti Abdal kişinin də, Mustafanın da Kabı Kəsəmənlinin yolu ilə gedəcəyinə inamı əks etdirir. Xalqın içindən çıxıb ona arxa çevirən, yediyi qaba tüpürən Keçəl Xondulunun son aqibətinin şərəfsiz ölüm olması da olduqca mənalı detal kimi oxucunu düşündürür. Romanın təsdiq pafosu ilə inkar pafosu süjet kəsişmələri və bir-birini tamamlaması, xarakterlərin və hadisələrin assosiativ müqayisəsi fonunda müəllif mövqeyini qabardır. Bircə dəfə gördüyü və bütün qəlbi ilə bağlandığı nişanlısı Ələddinin faciəli ölümündən sonra yaşamaq istəməyən və yaşaya bilməyən Qaratelin qara yazılan taleyində, çoxdan arzuladığı oğul həsrətinə son verib, arzusuna çatan, təzə anadan olan oğlunu böyütmək sevinci ilə yaşayan Şəmiddinin "müzür ünsür" kimi güllələnib dərə aşağı yuvarlandırılması epizodlarında insanın içini məhəbbətlə dolduran hisslərlə nifrət hissləri eyni vaxtda üz-üzə gəlir. Qəzavü-qədərin, təsadüfi açılan güllənin Qaratelin qəlbində açdığı yaranın ağrısı, göynərtisi başa düşüləndir. Mahiyyətcə siyasi sifarişin nəticəsi olan Şəmiddinin ölümü isə - yenicə doğulan oğluna görə sonsuz bir sevinc yaşayan insanın öldürülməsi isə insanlığa xəyanətin ən dəhşətli faktı kimi bağışlanmazdır. Şəmiddinin ölümü faciəvi məzmun daşıyır. Qardaşı Həsən ağa kimi o da qaçıb dağlara çəkilə bilərdi. Övlad sevgisi ona bu addımı atmağa imkan vermir. Əslində Şəmiddin bilərəkdən özünü ölümün ağuşuna atır. Yazıçı Şəmiddinin içindəki bu böyük insan sevgisini fətullayevlərin, keçəl xonduluların və onların şəxsində siyasi sistemin antihumanist təbiətinə qarşı qoyur. Romanın Alqazaxlılar və Çıraqlıların sürgünə göndərilməsini təsvir edən epizodlarını da həyəcansız oxumaq mümkün deyil (Ümumiy-yətlə, romanı həyəcansız oxumaq mümkün deyil). Bu epizodlar yalnız insana antihuma-nist münasibətin bədii ifadəsi kimi yox, həm də insanlıq ləyaqətinin ucalığına inamın ifadəsi kimi oxucu yaddaşında silinməz izlər buraxır. Yük vaqonlarına doldurulub sürgünə göndərilən insanların insanlıq ləyaqəti ilə onlara göstərilən qeyri-insani münasibətin yaratdığı təzad sovet siyasi rejimi haqqında ən sərt həqiqətləri əks etdirir. Ağla sığmayacaq dərəcədə dözülməz şəraitdə Güllü arvadın nümayiş etdirdiyi təmkin, dözüm, mətanət, bu şəraitdə belə şərəf və ləyaqət haqqında düşüncələri, əməli hərəkətlərində bunun təsdiqi milli-tarixi varlıqdan gələn xarakterin gücünü göstərir. Ən dözülməz şəraitdə - gecə-gündüz yol gedən yük qatarında Güllü arvadın bir an da gözünü qırpmadan ətrafındakı insanların təhlükəsizliyi üçün keçirdiyi narahat-lıq hissləri milli və bəşəri dəyər kimi insanlığın qüdrətinə, bütün olub keçənlərə rəğmən, inamımızı sarsıtmır, bu inamı bir daha qüvvətləndirir. Sosializmin ideoloqları aşağı və yuxarı təbəqə arasındakı antaqonist ziddiyyətlər olduğunu və sinfi mübarizənin qnesioloji əsasını da bu ziddiyyətlərin təşkil etdiyini dönə-dönə təkrar etmiş və demək lazımdır ki, ictimai şüurda bunun kök salmasına nail ola bilmişlər.
İ.Şıxlı milli birliyə nail olmaq üçün bu yanlış tendensiyanın ictimai şüurdan çıxarılmasını zəruri hesab edir və məhz buna görə də romanda milli birlik idealının bədii təcəssümünə xüsusi diqqət yetirir. Romanın çoban Kərəməli-Halay bəy xəttində biz bunun aydın ifadəsini görürük. Aclıq illərində heç bir təmənna güdmədən, insanlıq borcu kimi Halay bəy çoban Kərəməlinin ailəsinə, qohum-əqrəbasına əl tutur, onların aclığın amansız girdabında boğulmasına imkan vermir. Neçə illər keçəndən sonra Halay bəy hökumətdən qaçaq düşəndə isə çoban Kərəməli öz həyatını böyük təhlükə qarşısında qoyaraq (Fətullayev onu məhz bu hərəkətinə görə "troyka"nın qərarına salıb güllələtmək istəyir) dağda-daşda gününü keçirən Halay bəyə çörək aparır. "Kabı dayı, o elə yaxşı adamdı ki, onun yolunda adam ölümə də gedər. O mənə elə yaxşılıq eləyib ki, özüm də, balalarım da ona ömrümüz boyu borcluyuq" - çoban Kərəməlinin dilindən çıxan bu sözlər yalnız milli-tarixi gerçəklikdə sinfi ayrı-seçkiliyin işlək olmadığının göstəricisi deyil, həm də insanlıq qanunlarının hələ də yaşarı olduğunu, insanlar arasındakı münasibət-lərin (sinfi mənsubiyyətindən asılı olmayaraq) qarşılıqlı hörmətə əsaslandığını sübut edir. Sovet hökumətinin sinfi mübarizə siyasəti məhz o mənada qorxulu idi ki, insanlar arasında nifaq, düşmənçilik toxumu səpir, onları bir-birinə qarşı qoyurdu. Roman qəhrəmanları sovet hökumətinin sinfi ayrı-seçkilik siyasətinin mahiyyətini düz başa düşürlər. Çoban Kərəməli bunu tam aydınlığı ilə dərk etməsə də, içindəki milli ləyaqət onu təhtəlşüur da olsa bu siyasətə qarşı kökləyir. Müsavat hökumətinin keçmiş zabiti, sovet hökumətindən qaçaq düşmüş Çapıq Əmrah isə sovetləşmənin müstəmləkəçi, antimilli, anti insani məqsədlərini çox aydın başa düşür. Fətullayevin dəstəsi tərəfindən tutulanda isə o öz iradəsi ilə əks tərəfin canına qorxu salır, oxucunun gözləri qarşısında bütün varlığı mənəvi ləyaqətdən və dəyanətdən yoğrulmuş insanın aydın siması canlanır. Çapıq Əmrahın düşmən qarşısında göstərdiyi ləyaqət onu milli əzəmi obraza çevirir: Fətullayev gözaltı onu süzdü və hirslə ayağa qalxdı: - Gəncədə döyüşdünüz. İnsan qırğınından başqa nə qazandınız? Çapıq Əmrah da ayağa durdu və Fətullayevlə döş-döşə dayandı: - Mərdlik! Cəsarət. Bəs, siz nə qazandınız? Camaatı qorxaqlığa, xəyanətə öyrətdiniz. Hamını qırdınız, tökdünüz, elədiniz gözüqıpıq… İndi buraya nəyə gəlmisiniz? Rus əsgərlərini nəyə gətirmisiniz? Fətullayev cavab verəndə ki, "bizim yaratdığımız cəmiyyət kamil insan cəmiyyəti olacaq", Çapıq Əmrah deyir: - "Cəmiyyət də insan kimidir. Axtalanmış adamdan kişi çıxmadığı kimi, axtalanmış cəmiyyətdən də kamil cəmiyyət ola bilməz". Çapıq Əmrahın sözləri sovet rejiminin antihumanst, faşist təbiətini açmaqla bərabər milli-mənəvi əxlaqa, genefonda endirilən zərbələrin çəkilməsi mümkün olmayan ağrılarını da ifadə edir. Bu həmin o ağrılardır ki, İ.Şıxlı - bu mütəfəkkir sənətkar onu həyatı boyu öz ürə-yində gəzdirməli olmuşdu. Çapıq Əmrahın xatirələri vasitəsilə sovet işğalına qarşı milli müqavimət hərəkatının əsas tarixi məqamları da romanda özünə yer almışdır. Müəllif Gəncə hadisələrinin, XI Qızıl Ordunun Gəncəni ələ keçirməsinin müfəssəl təsvirini vermişdir. O, aparılan mübarizələrdə milli hökumətin məğlubiyyətini Azərbaycan xalqının tarixi taleyinin qara səhifəsi kimi əks etdirə bilir. Qəhrəmanların tragik taleyindəki lirik yaşantılar romanın oxunaqlılığını artırmaqla bərabər, milli kaloriti qat-qat gücləndirir. Əsərdə Kür şərti-metaforik obraz səviyyəsinə qədər yüksəlir. Roman qəhrəmanlarında Kürə əsatiri bir inam vardır. Ölümə gedən də, xoşbəxtlik axtaran da üzünü Kürə tutur: "Bu kəndin qaydası idi: ilin-ayın axır çərşənbəsində köhnə ili yola salanda, baharın gəldiyini xəbər verən Novruzun ilk günündə dan yeri qızarar-qızarmaz axar suya - Kürə tökülüşərdilər. Su bumbuz olub adamı qılınc kimi kəssə də çimişər, ağırlıqlarını - uğurluqlarını yuyar, təzə ilə tərtəmiz gələrdilər". Maraqlıdır ki, insanların içi həyat eşqi ilə dolanda da, ölüm varlığına hakim kəsiləndə də Kürə üz tutur, onun suyunda təmizlənib ruhani paklığa (məhz ruhani, cismani yox) qovuşur, alınlarına qəza ölüm yazıbsa, ölümə tərəf, xoşbəxtlik yazıbsa, xoşbəxtliyə tərəf gedirlər. Roman qəhrəmanlarının içində elə, obaya, yaşadığı evə, yurd yerinə, onun otuna, ağacına, hər qarış torpağına qarşısıalınmaz bir məhəbbət var. Ölümlə üz-üzə qalan, sürğünə göndərilən bu insanlar ölümdən çox, yurd itkisinin, doğma ocaq, torpaq ayrılığının acısını duyur, yaşayırlar. Ahıl çağında sürğün həyatı yaşamağa məcbur olan Güllü arvadın yurd həsrətinin bir məqamını müəllif aşağıdakı kimi təsvir edir: "Əlini belinə qoyub Kürün sahilinə enən yaşıllıqlara, əyri-üyrü cığırlara, suya enən qız-gəlinə tamaşa etdi. Körpəlikdən gəzib dolaşdığı bu yerlərin ətrini elə bil sinəsinə doldurub saxlamağa çalışdı. Su yolunda, yar-ğanların altında qızlarla deyib güldüyü günləri xatırladı… Gözündə gilələnən yaşı sinəsinə axıtdı".
***
"Ölən dünyam" həqiqi roman təfəkkürünün məhsuludur. Burada hər epizod, hər təsvir, təfsilat və detal, obraz insan xəyalını çəkib uzaqlara aparır, onun düşüncəsinin alt və üst qatlarını oyadır. Ömər koxanın əvvəllər "maral bu-ğasının heykirtisi", "düyələrin mələşməsi eşidilən meşələr"dən indi "çaqqal - tülkü vaqqıltısından qulaq tutulması" ilə bağlı narahatlığında, Alanın (itin) insanlara sədaqətində, canavarlara qoşulub uzun müddət meşədə yaşasa da öz əslini qorumasında, uzun illərin yurd həsrətindən sonra Həsən ağanın obaya dönüb yurdlarında salamat qalmış və vaxtilə öz əlləri ilə əkdiyi qoca palıdın altında canını tapşırmasında İ.Şıxlının "ölən dünya"sının bizim üçün tam açılması çətin olan çox həqiqətlər gizlənir.
***
Milli ideologiyanın formalaşmasında mədəniyyətin və təbii ki, bədii ədəbiyyatın rolu danılmızdır. "Ölən dünyam"da "milli siyasət üçün arsenala" çevrilə biləcək, ideologiyamızı milli-tarixi dəyərlər istiqamətində formalaşdırmağa stimul verən çox mətləblər var. Əsərin müasirliyini və deməli, yaşarılığını şərtləndirən keyfiyyətlərdən biri də budur.
|
|