Martın 3-də Yazıçılar Birliyində (AYB) birliyə yeni qəbul olunanların üzvlük vəsiqəsinin təqdim olunması mərasimi keçirildi. Mərasimi giriş sözi ilə açan AYB-nin gənclərlə iş üzrə katibi Rəşad Məcid gənclərin birliyə üzv qəbul olmasından doğan məmnunluğunu ifadə etdi: "25 nəfər istedadlı gəncin birliyə üzv qəbul olunmasına çox sevinirəm. Bu gənclərin əksəriyyəti artıq altı aydır ki, fəaliyyət göstərən Gənc Ədiblər Məktəbinin üzvüdür. Onların əksəriyyətinin yaradıcılığı ilə tanışam. İnanıram ki, 50-60 ildən sonrakı Azərbaycan ədəbiyyatının əsasını indiki gənclərin əsərləri təşkil edəcək və xalqımız onlarla qürur duyacaq. Yəqin ki, bugünkü tarix gənclərin yaddaşında uzun müddət qalacaq". Tədbirdə çıxış edən birliyin sədri, xalq yazıçısı Anar AYB-yə üzv qəbul olunmağın şərəfli olduğundan danışaraq gənclərə həmişə qızğın yaradıcılıq ehtirası arzuladı : "Ədəbiyyatda yazanlar və yazıçılar var. Yazanlardan fərqli olaraq yazıçılar yazmadan yaşaya bilmirlər. Yazmaq yazıçıların həyat tərzidir. Mən üzvlüyə qəbul olunan gənclərə əsl yazıçı olmağı, hər zaman yazmaq ehtirası ilə yaşamağı arzulayıram". AYB-nin katibi, xalq yazıçısı Çingiz Abdullayev üzvlüyə qəbul olunan gənclərin bəxtinin gətirdiyini yumorla vurğuladı: " Belə təntənə ilə birliyin üzvlük vəsiqəsini almaq özü də bir tarixdir. Vallah, heç mən üzvlüyə belə təmtəraqla keçməmişəm". "Prezident təqaüdünə namizəd təqdim etmək üçün gənc siyahısı axtaranda 35 yaşadək olan gənc tapa bilməmişdik. Yaşı qırxacan olan on nəfərin adının daxil olduğu siyahını da birtəhər tərtib etmişdik. Onda artıq hiss olunurdu ki, Yazıçılar Birliyinin tərkibi gəncləşməlidir. Çox sevindiricidir ki, indi bu qədər gənc birliyin üzvü olur. Bildiyimə görə onların içərisində hətta məktəb şagirdləri də var. Mən bunun üçün xüsusilə birliyin gənclərlə iş üzrə katibi Rəşad Məcidə təşəkkür edirəm. Ona görə ki, son zamanlar yeni ədəbi nəslin doğru istiqamətlənməsində onun rəhbərlik etdiyi Gənc Ədiblər Məktəbinin də rolu böyükdür. Rəşad Məcid bu gənclərə çox qayğı ilə, humanistcəsinə yanaşaraq gələcəkdə yaranacaq böyük ədəbiyyatımızın təəssübkeşliyini edir. O, öz işinin öhdəsindən çox uğurla gələrək Yazıçılar Birliyinin gəncləşməsinə şərait yaratdı". Bu fikirlərsə AYB-nin katibi Arif Əmrahoğluya məxsusdur. AYB-nin katibi xalq şairi Fikrət Qoca, birliyin sədr müavini Nazim İbrahimov, yazıçı -dramaturq Elçin Hüseynbəyli gənclərə uğurlar arzulayaraq onların gələcəkdə böyük yazıçı və şair nəsli kimi yetişəcəyinə inamlarını ifadə etdi. Sonda AYB-nin sədri Anar tədbirdə iştirak edən Qismət Rüstəmov, Elxan Qaraqan, Sevinc Mürvətqızı, Əli Əlioğlu, Feyziyyə Hacıyeva, Xalid Mahmud, Aysel Əlizadə, Ülviyyə Heydərova, Elnura Cavadzadə, Orxan Muxtarlı, Orxan Ömər, Zərdüşt Şəfizadə, Seyfəddin Hüseynli, Nahid Hacıyev, Ayxan Kiçikbəy, Mirbəhram Əzimbəyli, Xatirə Vaqif və başqalarına birliyin vəsiqəsini təqdim etdi.
|