***
Hərdən susuram balıq kimi, hərdən isə quş kimi qanadlanıram. Səbəbkarı Sənsən!
***
Quş harada qanad açar? - Havada. Sən mənim üçün havasan. Sonsuz məkansan. Uçmaq üçün ən gözəl bir yer…
***
Bu gecə gözlərimdən soruşdum: - "Nə üçün yumulmursan?" Gözlərim cavab verdi: görmürsənmi sevdiyimin xəyalı yanımdadır?"
***
Hər səhər yuxudan durub güzgüyə baxıram. Güzgüdən bir qadın boylanır mənə tərəf -sevdiyinin xəyalına qovuşmuş bir qadın. Onun üzündə həm xoşbəxtlik ifadəsi var, həm də küskünlük.
***
Kim mənim qədər ağlasaydı, çoxdan kor olardı. Mən isə heç kor olmaram, gözlərimin Səni görmək həsrəti o qədər böyükdür ki…
***
Bircə dəfə gözlərinə doyunca baxa biləydim… Bircə dəfə gözlərim sevinəydi… Onda gözlərimin nuru bütün dünyaya bəs edərdi.
***
Hər gecə xəyalın qonağım olur. Hər gecə. Xəyalın gecəni mənimlə keçirir. Xəyalın dodağımdan öpür, saçlarımı sığallayır. Gözümün yaşını öpüşü ilə qurudur. Səhərlər ayılanda xəyalının əlləri dəyən yerləri bir daha nəzərdən keçirirəm. Əllərinin izini axtarıram. Görə bilməyəndə aldandığımı başa düşüb ağlayıram. Göz yaşlarımı heç kəs silmir.
***
Ürəyim bomboşdur; ümidlərim tərk edib ürəyimi.
***
Bax, elə bu an Sən ürəyimdən çıxıb getdin. Bir an ürəyim döyünmədi. Döyünə bilmədi.
***
Hər gün səni bir az itirirəm. Mənə dediyin hər acı söz ürəyimdə cücərən neçə şirin sözümü dəfn edir.
***
Səni unutmaq istədim. Səni necə unutmaq üçün yollar aramaq üçün xəyala getdim… Bir də gördüm ki, Sən yadımdasan, mən isə özümü unutmuşam.
***
Gözlər ürəyin tərcüməçisidir, dodaqlar isə dilin.
***
Bəzən susmuş dodaqlar daha çox danışır. Bircə baxışın dediyini min sözlə demək olmur.
***
Yerlə göyün arasında sıxıla-sıxıla qalmışam. Ya gəl məni göylərə qaldır, ya da ki, birdəfəlik yerə çırp!
***
Allahım! Deyirlər ki, Sən nə verirsənsə geri alırsan. Elə isə al mənə verdiyin dərdləri!
***
Ey Allah! Sualıma cavab ver! Bilmək istəyirəm ki, mən ömrümün baharını yaşayıram, yoxsa qışını? Mənim ömrümün yayı arxada qalıb, yoxsa qışı?
***
Nə vaxtdır ki, ruhumu axtarıram. Tapa bilmirəm. Ruhundan soruş. Bəlkə o bilər ruhumun yerini.
***
Sevgi dolu ürəyimə həsrət sarınıb. Həsrət-ürəyimin nişan üzüyü. Qaşı ayrılıqdan. Ürəyimin nişan üzüyü sıxır ürəyimi. Sevgimin gücü çatmır onu qırmağa.
***
Səni ürəyimdən çıxarmaq üçün gərək ürəyimi köksümdən çıxaram. Gəl, ürəyimi köksümdən qopar! Gəl, özünü ürəyimdən qopar! Bacararsanmı? Sən sevgimdən zəifsən, gücün çatmaz ona.
***
Ən şirin vüsal sevən xəyalların vüsaldır. Nə qədər qovuşsalar da vüsala yetişmirlər. Ən şirin vüsal - xəyalların vüsalı. Sonu olmayan vüsal!
***
İnsan cismən qovuşanda bircə anlıq da olsa vüsaldan doyur… Xəyalən qovuşanda doymaq olmur. Cismən qovuşmaq istəmirəm Sənə.
***
Öləndə vəsiyyət edəcəm ki, mənə iki başdaşı qoysunlar. Birinə özümün şəklimi vursunlar… O birinə isə Sənin xəyalının şəklini… Mənim cismimdə həm də Sənin xəyalın var olub axı…
***
Səhərəcən oyaq qaldım. Öz gözlərimlə gördüm ki, gecə öz yerini səhərə necə verdi. Gecənin göz yaşını, səhərin sevincini gördüm. Ümidim artdı.
***
Səni sevdim… həyatı sevdim… Səni tanıdım… həyatı tanıdım… Səndən küsdüm… Həyatdan küsdüm. Sən həyatın özüsənmiş…
***
Dünyada ən güclü şey sevgidir. Ən zəif olan da sevgidir. Ən zərif olan da.
***
Hərdən mənə elə gəlir ki, heç vaxt gülməmişəm. Sanki kədərim mənimlə birgə doğulub.
***
O gün uzaqdan gördüm Səni. Baxdım… Baxdım… Doyunca baxa bilmədim… Gözlərim doldu… Heç yanı görə bilmədim. Getdim… Yollara yağış səpələndi…
***
Bir vaxtlar ən xoşbəxt idim… Hər gün Səni görürdüm, səsini eşidirdim… Sonra xoşbəxtliyim bir az azaldı… Yalnız səsini eşitdim… İndi isə xoşbəxtliyimin dərəcəsi sıfıra çatıb… Nə Səni görürəm, nə də səsini eşidirəm.
***
Əgər bilsəydim ki, bu an, bu saat Sən də məni düşünürsən… Sevincimdən ürəyim partlayardı… Kaş ürəyim partlayaydı…
***
Günəş gecənin qaranlığını öpdü… Qucaqlaşdılar… Onların səhər adlı övladları dünyaya gəldi. Öp məni… Qoy ömrümün səhər adlı övladı dünyaya gəlsin…
***
Hərdən Günəşdən də hərarətli oluram… Günəşə nə var ki.. Hərarətini bütün dünyaya paylayıb bir az soyuyur… Mənim odum isə içimdə qalır…
***
Ey insan! Bütün dünyanı gəzib gözəllik axtarma! Bircə sevgini axtar! Onu tapsan, hər şey gözlərinə gözəl görünəcək…
***
Sən milyonlarlasan! Hara baxıramsa Səni görürəm. Gecələr Aya baxanda Səni görürəm. Gündüzlər Günəşə baxıb Səni görürəm. Sən ulduzların sayı qədərsən! Gördüyüm ağacların, güllərin, yarpaqların sayı qədərsən. Milyonlarlasan Sən! Əfsus! Milyonlarla olan Səndən heç biri mənim qismətim deyil… deyil…!
***
Həyatın ən şirin neməti yaşayır mənim qəlbimdə. Bundan da böyük səadət varmı?
***
Allaha minnətdaram - atamı, anamı yaradıb. Atamla anama minnətdaram - dünyaya gəldiyimə görə. Amma taleyimə daha çox minnətdaram - məni Səninlə rastlaşdırdığı üçün! Sənə isə ən çox, ən çox minnətdaram - qəlbimdə əbədi ocaq qaladığın üçün!
***
Duyğular, yağış kimi yağın üstümə! İsladın məni! Ağladın məni! Dəli kimi güldürün, dərviş kimi çöllərə salın məni! Mən şairəm - duyğuların quluyam! İncimərəm sizdən, yağış kimi yağın üstümə!
***
Yalnız ilk dəfə Səni görəndə hiss etdim ki, qadınam. Duyğularım ilk dəfə Səni görüb oyandı.
***
Ölümdən qorxmuram. Doğulduğumuz andan ölümə doğru yol gedirik. Qorxmuram ölümdən. Bircə ondan qorxuram ki, mən öləndə xəyallarımdakı Sən də öləcəksən.
***
Ürəyimdəki sevgim göz yaşlarımda boğulur. Sən onu xilas edərsənmi?
***
Heç nə, heç kəs məni özünə tabe edə bilməz. Mən yalnız eşqin qulu ola bilərəm!
***
Nə pisdir ağ rəng - hər rəngə boyamaq olur. Bəlkə də qara rəng yaxşıdır - heç bir rəngə boyanmır.
***
Xəyallarımdakı Səni görsən, Sən də vurularsan özünə. Xəyallarımda yaratdığım Sən bir az Sənə oxşayır.
***
Tanrım məni quş yaratdı. Ürəyimi nəğmə ilə doldurdu, amma o nəğmələri açıq səmada oxumağı mənə qismət etmədi. Tanrım məni quş yaratdı, taleyim isə məni balıq kimi yaşamağa məhkum etdi. Hər dəfə nəğməmi oxumaq istəyəndə ağzıma su dolur.
***
Qaranı ağdan, ağı qaradan ayırmağa nə var ki… Ağı bozdan, bozu ağdan ayırmaqdır ən ağır iş!
***
İlahi, görəsən buludlar niyə ağlayır?!
***
Ağarmış hər saçım sənsiz haray çəkib qocalmış arzumdur. Dərddən ağlayan sevincimdir.
***
Mən elə səndəyəm. Ruhunun içində. Özünü axtarsan məni taparsan.
***
Ömrümün qışı gəlir. Mən isə hələ də yazı gözləyirəm.
***
Mən sevgi adlı bir zirvədəyəm. O zirvəyə məni həsrətim qaldırıb. Ən böyük həsrətə dözə bilənlər sevgi zirvəsinə qalxa bilərlər.
***
Mənim sevgim o qədər böyükdür ki, Sənin bütöv ömrünə bəs edər.
***
Üzüyü daş-qaşla bəzəmək o üzüyü ört-basdır etməkdir. Qadının da bəzəyi onu gizlədir.
***
Bəzənmiş bütün qadınlar bir-birinə bənzəyir. Bəzənməmiş qadınların isə hərəsinin öz gözəlliyi var.
***
Ey mənim cismimi yıxan varlıq! Sən məni yıxmadın. Mən ayağa durmaqla sənə qalib gəldim. Sən məni yıxmaqla özünü məğlub etdin. İnsan təkcə cismani varlıq deyil. Həm də ruhani olandır. Sən cismən məndən qüvvəli olsan da ruhən məndən güclü deyilsən. Güclü olsaydın, məni cismən yıxmazdın.
***
Yıxılmamaq üçün mən hər şeydən tutmaram. Yıxılaram, amma alçaq ətəyindən yapışmaram. Ondansa yıxılsam yaxşıdır.
|