|
GÖRÜŞ
- Salam! - Siz kimsiniz? - Mən sənin vicdanınam. - Xudahafiz!
Oxuduğum bir lətifə
Ağabəy "Cip"ini dayanacağa çatmamış saxladı. Maqnitofonu söndürüb avtomobildən düşdü. Tənbəl addımlarla dayancağa tərəf yeridi. Təzə tanış olduğu qəşəng və həm də utancaq bir qızla orda görüşəcək, söhbətləşə-söhbətləşə gəlib maşina minəcəklər. Avtomobili işə salandan sonra onu hara sürəcəyi isə Ağabəyin işi idi, daha bəsdi, qız atılıb düşsəydi də, bu dəfə xeyri olmayacaqdı… Ağabəy qızı hara aparacağını bilirdi, indicə bahalı bir restorandan, gen-bol bir stolun arxasından qalxmışdı; birgə yeyib içdiyi əhlikef, dünyadan razı dostlarına lovğa-loğva elan etmişdi ki, yarımca saatdan sonra bir dünya gözəlini öz aralarında görəcəklər, həm də ağıllarına başqa şey gətirməsinlər, bu dünya gözəli onların fikirləşdiklərindən, tanıdıqlarından deyil, hələ əli indiyəcən kişi əlinə dəyməyib. Və belə bir ismətli qızın indi restorana gələcəyinə inanmayan dostları ilə acığa düşüb axırda böyük bir qonaqlıqdan mərc çəkmişdi. Ağabəy isə hələ ki, uda-uda gəlirdi. Vəzifəli atası, adlı-sanlı,iş başında olan qohumları, həmişə də dolu cibi, ağzında ilanı yuvasından çıxaran şirin dili, hər mövsümə uyğun geyindiyi son dəbdə əyin-başı - elə bunlar da çox vaxt onun qələbəsini təmin edən şərtlərdən olurdu. Birdən başının üstündən qanad çala-çala bir qarğa uçub keçdi. Dayanacaqdakı gövdəli bir ağaca qondu, orada yerini rahatlayan qarğa sonra da başladı qarıldamağa. Deyəsən, nənəsindən eşitmişdi: "Ayı balasına appağım deyər, kirpi yupyumşağım…" Onu gülmək tutdu. "Hə, yəqin indi bu qarğaya da öz səsi bülbülün avazından xoş gəlir…" Qarğa Ağabəyin nə fikirləşdiyini vecinə almayıb qonduğu ağacda hey aramsız qarıldayırdı. Onun bu yeknəsək səsi nədənsə birdən-birə Ağabəyi qorxutdu. Ancaq onu qorxudan nə idi-bunu ayırd edə bilmədi. Qəflətən beyni müxtəlif fikirlərlə dolub-boşalır və ona elə gəlirdi ki, bu vaxtacan elə bil nəyi isə başa düşə bilməyib. Ancaq nəyi? Məsələ də elə bunda idi, ancaq burası da var idi ki, hər nə idisə onun fikirlərini qarışdıran qarğanın bu yeknəsək, boz qarıltısı olmuşdu. Ağabəyin fikirləri isə heç vaxt qarışmazdı. Az sonra Ağabəy on-on beş gün qabaq ilanı yuvasından çıxaran şirin dilinin gücü ilə təsadüfən işinə yarayıb tanış olduğu abırlı-həyalı bir qızla görüşəcəkdi, onu özü ilə yarı xoş yarı zor hökmən restorana aparacaq, dostlarından da böyük bir qonaqlığın mərcini udacaqdı. Axı, Ağabəy həmişə uda-uda gəlmişdi. Addımlarını yeyinlətmək istədi. Lakin ayaqları sözünə baxmadı. Hansı bir quvvə isə onu arxaya, geriyə çəkirdi. … Hə! Axı, deyəsən, elə o da bu qara qarğa kimi həmişə qarıldayıb… İndiyəcən sayını-hesabını bilmədiyi tanış olduğu qızlara bolluca şirin sözlər, təriflər yağdırmış, hətta bəzisinə "sevirəm" də demişdi. Ancaq indi ona elə gəldi ki, həmin qızlar da dediklərinin hamısını, bax, beləcə qarğa qarıltısı hesab ediblər, bəlkə də bunun nəticəsidir ki, tay-tuşlarından hələ subay gəzən təkcə odur. Qarğanın bu yeknəsək, boz, aramsız qarıltısı Ağabəyin qəlbində bir boşluq yaratmışdı, kefdə-damaqda keçən bütün ötən günlərini Ağabəy bir-bir yadına salırdısa da, o boşluğu doldura bilmirdi. İndi o boşluq dolmasaydı, Ağabəy mərci uduzacaqdı… Maşından düşərkən onu bürüyən coşqunluqdan, xoş əhval-ruhiyyədən əsər-əlamət qalmamışdı, süst düşmüşdü. Ağabəy qarğanın qonduğu ağaca yaxınlaşdı. Neçə ilin ağacı idi. gövdəsi enli olsa da, qupquru idi. Ömrünün axır çağlarını yaşayan xəstə qocaya bənzəyirdi. Beynindəki fikirləri qovmaq üçün Ağabəy bu ağacın fidan vaxtlarını gözü önünə gətirmək istədi. Hə, yəqin bu ağac da bir vaxtlar yaşıl-yaşıl yarpaqlayıb yazın, günəşin həsrətini çəkib ki, qışda üşüyən gövdəsini qızdırsın, gecələr isə işıqlı yarpaqlarının arasından süzülən ayı gözləyib. Göz qabağında, gediş-gəlişin gur yerində bitsə də, bəlkə də ködgəsi altında qızlar, oğlanlar da olub. Ancaq indi nə günəş, nə də ay bu ağacın vecinə deyildi. Ağabəy ağacın həndəvərini gəzib dörd dolanır, çat-çat olmuş qalın qabığına, qoca qolları kimi nazilmiş budaqlarına baxır, elə bil nə isə axtarır, ancaq axtardığını tapa bilmirdi. Birdən öz-özünə acığı tuturdu. Axmaq, gicbəsər! Hər dəfə evdə qapıdan çıxanda dəhlizdəki bədənnuma güzgüdə özünə baxmaqdan yorulmursan? Maşında da bir gözün güzgüdə qalır. Hər dəfə güzgüyə baxıb axır ki, bir şey tapırsan… Bəs indi gözlərini nə döyüb durmusan?.. Bir dəfə sıra ilə düzülmüş mağazaların qabağından keçirdi. İzdihamın içində bir oğlan uşağı gördü. Uşaq həyəcanla, narahat-nigaran ora-bura boylanırdı. Uşaq elə bil qəfəsə salınıb çırpınan quş idi, indicə ürəyi sinəsindən qopub çıxacaqdı, handan-hana uşağın bu halının səbəbini başa düşdü; uşaq anasını itirmişdi və indi də onu bir daha tapa bilməyəcəyindən qorxurdu. Və birdən… elə bil uşağa dünyanı verdilər. Uşağın gözü adamların arasında anasını almışdı. Və uşaq anasının üstünə elə yüyürürdü ki, elə bil quş idi, qanad açmışdı. Anası isə ehmalca onu yana itələyib əlindəki donu aşağı-yuxarı tutur, ora-burasına baxırdı. Ancaq indi o, kimi axtarırdı, bunu başa düşmürdü. Saata baxdı, qız indicə gəlməli idi. qız heç vaxt onunla görüşə bircə dəqiqə də olsa gecikməmişdi. Qızın bu üzüyolalığına da nədənsə indi Ağabəyin acığı tutdu. Dayanacaqda durub maşın gözləyən adamların sayı çoxalırdı. Birdən əyilib yerdən bir daş götürdü. Daşın yerə, kiminsə başına düşəcəyindən ehtiyat etməyib qəzəblə qarğaya atdı. Bir oğlan uşağı anasının ətəyindən dartdı, heyrətlə içini çəkə-çəkə: - Əmiyə bax, əmiyə bax, - dedi, -quşa daş atır… Qarğa qonduğu budaqdan qanadlanıb qalxdı. Ağabəy də yalnız bundan sonra iti addımlarla öz maşınına tərəf getdi. "Cip" sürətlə yerindən tərpəndi Yeyib-içib bir az da hallanan həmxanələri restoranda oturub onu gözləyirdilər. Ağabəyin tək-tənha, yalqız gəldiyini dostları mərci udduqlarına əmin olub səs-küy saldılar. Ancaq təhər-tövründən Ağabəyin qırımını ayrı görüb dərhal da susaraq özlərini yığışdırdılar. Axır ki, dostlarından biri hövsələsini boğa bilmədi: - Nə oldu, görüşə bildin? - deyə xəbər aldı. Ağabəy isə: - Görüşdüm, - dedi, ani sükutdan sonra: - görüşdük və ayrıldıq! Sonra isə nə fikirləşdisə qətiyyətlə: - Özü də həmişəlik, birdəfəlik! - deyib yumruğunu stola çırparaq ayağa qalxdı, iti addımlarla qapıya tərəf getdi.
PƏRDƏ
- Pəncərələrə pərdə almağı unutmazsan! - Qapıdan çıxa-çıxda arvadı bir daha Müslümün yadına saldı. Həmişəki sakit, çəkingən səs idi. Qəsəbəyə bazarlığa gedən Müslümün cibindəki siyahıda alınası çox şeyin adı var idi, axşam ər-arvad oturub ikilikdə bu siyahını tərtib etmişdilər, daha doğrusu, həmişəki kimi nəzərdə tutduqlarının adlarını Müslüm bir-bir sadalamış, arvadı isə sakit-dinməz başını tərpətmişdi. Təkçə pərdə almaq onun sifarişi idi. "Pəncərələrə pərdə almağı unutmazsan!" - Arvadının əvvəlki sakit, çəkingən səsi idi. Arvadı bu evə gəlin gələn gündən bəri aradan neçə il keçsə də, hələ də bu günəcən onunla beləcə sıxıla-sıxıla danışırdı… Kənddən qəsəbəyə gedən şosse yoluna qədər arada xeyli məsafə var idi və indi Müslüm bu qəmgin payız günündə yol gedə-gedə fikirləşirdi ki, şübhəsiz, evin xanımı sifarişini-tapşırığını hökmlə, amiranəliklə vermiş olsaydı, Müslüm də çox güman acığa düşüb pərdə almaq haqda heç fikirləşmək belə istəməzdi. Bəlkə də gen-geniş çölün-düzün adamın qəlbini sıxan səssizliyindən, sükutundan idi ki, indi birdən-birə Müslüm hirslənmişdi: Ay zalım qızı, daha bəsdir də, sənin də səsin bir bərkdən çıxsın da!.. Müslüm köks ötürdü, yox, günahkar elə özü idi. Elə bil dünən idi. Toylarından üçcə gün qabaq dünya görmüş, gördüyü hər işi, dediyi sözü də yüz ölçüb bir biçən anası onu bir qırağa çəkmişdi, birbaşa mətləb üstünə gəlib sözünü kəsə söyləmişdi: - Bax, oğlum, - demişdi, -rəhmətlik atanın üzünü mən elə toy gecəsi gördüm. Qırx il bir yerdə olduq. De ki, aramızda bu neçə ildə bircə qırıq söz-söhbət, giley-güzar, umu-küsü oldumu, a tövbə! Nə o məndən incidi, nə mən ondan. Nə o bir yol səsini qaldırdı, nə də bir kərə mənim səsim ucadan çıxdı. -Anası dərindən bir ah çəkib sözünə ara verdi. Sonra da mənalı-mənalı: - Nədən ki, hər ikimiz arada pərdə saxladıq. Pərdəli gəzdik, pərdəli dolandıq… Müslüm də anasının sözlərini o gündən sırğa edib qulaqlarından asdı. Gəlin də fağır idi, dediyini də dilinin ucunda çəkinə-çəkinə deyirdi… Müslüm burasını lap yəqin bilirdi ki, işdir-şayət, onun ayağına daş atan olsa, arvadı o daşın qabağına sinəsini verər. Ancaq di gəl, bir gün nəsə qəfil bir ağrı-acıdan səsi, ah-naləsi ərşə bülənd olsa da, zalım qızının səsi çıxmaz, susub durmağı ilə guya arada pərdə saxlayardı… Müslüm yolu almışdı əlinə və lənət şeytana, nə işdisə yol boyu pərdə fikri də heç başından çıxmırdı. Müslüm başındakı qara-qura fikirləri vərə-vurd, o yan, bu yan edə-edə özlüyündə belə bir qənaətə gəlib çıxırdı ki, belə baxanda elə dünyanın özü də pərdəlidir. Gündüzlərin pərdəsi zil qaranlıq gecələrdir. Sərhədlər isə ölkələrin, məmləkətlərin pərdəsidir. Gəl o pərdəni qaldır, sərhədləri aç-gör nələr görürsən, nələr eşidirsən… Arada çay var idi və indi Müslüm o çayı adlasaydı, şösseyə çıxasıydı. Müslüm gəlib dayanmışdı çayın qırağında və sakit axan çaya tamaşa edirdi. Sular dumduru idi və o, da çayın dibindəki ağappaq balaca çınqıllara, quyruqlarını oynada-oynada belədən-belə şütüyən bapbalaca balıqlara heyran-heyran baxırdı. Ağlına nə gəldisə yerdən bir daş götürüb çaya atdı. Dumduru sular əlbəəl qarışdı, daş lap dərinə getdiyindən çayın dibi də bulandı, bayaqki ağappaq balaca çınqıllar quyruqlarını oynada-oynada belədən-belə şütüyən bapbalaca balıqlar görünməz oldu. Elə bil çayın dibinə pərdə çəkmişdin… Müslümün ürəyi sıxıldı. Yenə də anası gəlib durdu gözlərinin qabağında: - Odur bax, səsləri kəndi başına alıb. - Qonşu həyəti göstərən anası ağ edərdi. - Nədən ki, o evdə pərdə aradan götürülüb… Doğurdan da, az qala Allahın ver günü qonşuluqlarındakı ailədə hay-küy qalxardı. Ər-arvad bir-birilərinin üstünə cımxırar, höcətləşər, deyişərdilər. Kişi sakitləşəndə arvad başlardı. Ancaq çox çəkməzdi ki, deyib gülər, qəhqəhələri həyət-bacanı bürüyərdi. Elə bil bayaqdan bir-birilərini qıran heç bunlar deyilmiş… Müslüm birdən hiss etdi ki, qonşu ər-arvada nəsə paxıllığı tutur. Müslüm qəfildən yolunu dəyişdi, şosseyə çıxmayıb çayın qırağından yeyin-yeyin, yelli-yelli kəndə, evlərinə sarı döndü. Arvadı onun bu nagahan qayıdışından təəccüblənsə də, susub heç nə soruşmadı. Bəlkə heç deyiləsi söz deyil… Arvadının həmişəki bu sakit-kirimiş duruşundan bir az da hövsələsi daralan Müslüm bu dəfə səsini qaldırdı: - Qəsəbəyə bazarlığa gedəsi olmadım, - dedi, - sabah, birisi gün getsəm də, pərdə-filan alan deyiləm!.. Sonra da Müslüm evin pəncərələrindən sallanan ağır, qalın pərdələrə sarı əlini uzadıb hökmlə: - Onları da çıxart, rədd elə getsin. Qoy içəri bir işıq düşsün!... - Birdən səsi yumşaldı. - bəsdir sıxıldı ürəyimiz… Qadın da sanki bir himə bəndmiş, eləcə sevinə-sevinə, gülümsəyə-gülümsəyə, tələm-tələsik pərdələri dartdı…
|
|