|
Məndən qəhrəman olmaz
Bəlkə də insanlar ağlamırlar, insanlar ağlayanda axtarırlar Özlərini, itirdiklərini Göz yaşının küçələrində. Dostlar tost deyəndə Allahı çağırırdılar. “Allah canımızı sağ eləsin”, Arağın haramı ilə Allahın halallarının təzadını gördüm süfrəmdə. Arzuların saxtalığını anladım. Sən içəndə daha çox yadıma düşürsən, Sevəndə və sərxoş olanda ağlımız başımızda olmur. İçib, sonra qusan dostuma xəstəliyinin adını deyə bilməyəndə Anladım ki, yumruğum qəzəbimin ifadəsi deyil. Məndən qəhrəman olmaz. Avtomobil yollarından, Qatar relslərindən, Havadakı təyyarələrdən Umacağı yox, Heç biri məni məndən apara bilməz, Nə də səndən. İlk sevdiyim, İlk şeirim, Ümumən həyatımdakı ilklər daim maraqlı, Sonları düşünmək də istəmirəm, Məndən qəhrəman olmaz. Ayağım ağrısını unutmur, Ürəyim səni, Hərdən evlənmək haqqında düşünürəm, Evlənmək ev olmaqdı, Evlənmək həyatı birləşdirir deyirlər, əslində evlənmək ömrü parçalayır, qadına uşağa, evə və s... sevgininin vahidliyi belə yoxmuş... Eh... Tüpürcəyini udanlar cəsarətsiz adamlardı, Tüpürmək iyrənməkdən qurtulmaqdı, Həyatda iyrəndiklərimə tüpürə bilmədim bəzən, Məndən qəhrəman olmaz.
Kitablar aldatdı bizi
“Sonu yaxşılıqla bitən kitablar göndərin mana” Nazim Hikmət
Yox, Nazim baba, olmadı, gəncəm, fəqət inanmıram, Nazim baba, Sonu yaxşılıqla bitən kitablara, Sonu nikbinliklə bitən nağıllara, Ömrün çoxu zülümsə, İnsanın sonu ölümsə, Yaxşılıqla bitə bilməz heç nə, Kitablar aldatdı bizi, Nazim baba. Qızların ağ atlı oğlanları gəlmədi, Ömrümüzü yandırdıq, simurq quşu gəlmədi. Insanlar haqqında iki yüzdən çox elm oldu, Amma insanları tanıya bilmədik, Çox ağların altından qara çıxdı, çox... Səndən sonra da yoxdu Sonu yaxşılıqla bitən kitablar. “güllələnən partizan xilas olmadı, Həkim gülərək çıxmadı əməliyyatdan, Qanadları qırılan təyyarə sağ-salamat enmədi yerə”, Hər birinin öz ölümü oldu, Nazim baba, Sonu yaxşılıqla bitən kitablar nağıllardı. Nağıllarsa uydurmadı. Sənə çatmadı sonu yaxşılıqla bitən kitablar, Bizə də. İnşallah, bizdən sonrakılara çatar!
Ölümə Çağırmadılar
Çox gülmədim deyəsiz, gülüb özündən getdi. Mən öləndə deyərsiz, ölüb özündən getdi. Bu dərd yolun fikirli, mən öz-özümə getdim. Ölümə çağırmadılar, salıb üzümə getdim.
Əla söhbət
Darıxıram, Dostum da yanımdadır, Saatın səsi eşidilir, Ürəyimin nəbzini duya bilirəm, Qıymırıq sakitliyə Əla söhbət gedir, O, öz ürəyilə, Mən öz ürəyimlə.
Bütöv sevirəm
Ayaqların nə gözəldi? Elə əllərin də, Kirpiklərin nə gözəldi? Gözəldi gözlərin də. Sən gedəndə əvvəl kirpiklərin qapanır, Gözlərin çəkilir gözlərimdən, Sonra əllərin uçur əllərimdən. Sonda ayaqların uzaqlaşır yanımdan. Mən səni bütöv sevirəm axı. Niyə hissə-hissə qopursan məndən?!
Gözümə işığın düşür
Gözümə işığın düşür. Yarın-yaraşığın düşür. Gəl qaçıb gedək dünyadan, Pasportun var, yaşın düşür.
Qapıya elçi gələndə, Təriflərlə öyüləndə, Yaxşı oğlan deyiləndə, Yada ev və maşın düşür.
Davam edir dava-dalaş. Bu nə tale, bu nə savaş. Tələsmə sən, yavaş-yavaş Hər gün ölüm aşın bişir.
Yağış
Yağış yağır, yaman yağır, kəndçı deyir taxıla xeyirdi, evini su basan sanır ki, Allah onu cəzalandırır. Molla deyir ki, mələklər qan ağlayır, düzünüsə mən bilirəm, hardasa buludlar yamanca tərləyib.
Bulud
Qara bulud, ağ bulud, mavi bulud ağ bulud - mələk, qara bulud - şeytan, mavi bulud - onların arasını vuran.
Sadə
Uşaqkən beşiyini bəzəmişdilər, daha sonra yüyrüyünü, sonrasa oyuncaq evini, evlənərkən gəlin maşınını, ölərkən tabutunu, sonra məzar daşını, İndisə danışırlar ki, Rəhmətlik sadə gəldi, sadə getdi.
Dostum hər gün eyni şəkillərə baxır Dostum Etibara
Dostum hər gün eyni şəkillərə baxır. çox sevir yaşanmış günlərin donmuş anlarına baxmağı, dostum şəkilləri güllələyir, köhnə yaddaşının təzə duyğuları ilə
QATİL DOSTUM,
köhnə şəkillərdə uşaqlığını xatırlayır şəkillərə baxa-baxa uşaqlaşan
UŞAQ DOSTUM,
Sonrasa ötən günlərə baxıb bir az da böyüdüyünü hiss edən
QOCA DOSTUM,
axı, zaman geri dönmür naz eləyən qızlar kimi. hər şəkildə donub qalan anlarını gözlərinlə isidirsən, gözləriylə şəkilləri
DÖYƏN DOSTUM,
bəsdir baxdın yaddaşına yad olmayan xatirənə, kağızlardan hazırlanmış abidənə. axı, səni təzə şəkillər çəkdirməli həyat gözləyir zaman səsləyir qucağında qucaq-qucaq ağrıları, acıları, öpüşləri, sığalları.
|
|