|
SEVGİ QURBANLARI
Nəfsinə hakim ol, hökmü özün ver,
Oynama bu körpə yalanlar ilə.
Sevgi qurbanları qəlbdə yaşayır,
Gözlərdə dönsələr heykələ belə.
Sevgi əziyyətdir, sevgi zülümdür,
Sevgiylə yaşamaq hünər istəyir.
Üzünə nə qədər qapı bağlansa,
İnsana haqq yolun sevgilər deyir.
İNTİZAR ZİRVƏSİ
Təbiət şeh ilə tutur camını,
Yenə yaz yağmuru öpür torpağı.
Günəşin alovlu, odlu baxışı
İsidir canını dərənin, dağın.
Fikrim dalğalanır ilğımlar kimi,
Dərədən axıram, dağa qalxıram.
Ən uca zirvəni fəth etsəm belə,
Həsrətlə gəldiyim yola baxıram.
Bu daşa-torpağa necə qəribəm,
Eləcə qəribəm qərib torpağa.
Təbiət oyadır qışı yuxudan,
Çiçəklər xalını sərir torpağa.
YENƏ DARIXDIRIR BU YAĞIŞ MƏNİ
Hələ də yandırır səndən uzaqda
Arxamca boylanan o baxış məni.
Bürünüb qalmışam nikbinliyimə,
Fələk nə biləydim qarğamış məni?
Qara saçlarının bihuş ətiri
Məst edərdi hər misranı, sətiri...
Başımın üstündə hicran çətiri,
Yenə darıxdırır bu yağış məni.
ŞEİRİM KİMİ
Gözlərim yollara dikilib qalıb,
Payız yarpağıtək tökülüb qalıb.
Dumanım dağlara çəkilib qalıb,
Oxşaya bilmirəm dəli fikrimi,
Ömrüm - günüm keçir şeirim kimi.
Bəzən misralarım selə bənzəyir,
Şirin nəğmə deyən dilə bənzəyir.
Hələ açılmamış gülə bənzəyir,
Dərd ilə soldurma qönçə şeirimi,
Ömrüm - günüm keçir şeirim kimi.
Bu həyat sehirdi, bu həyat sirdi,
Ürək gözəlliyə daim əsirdi.
Hayana baxıram, bədii əsərdi,
İnsanın taleyi şeir deyilmi?
Ömrüm - günüm keçir şeirim kimi.
DÖZƏ BİLSƏM
Bu dərd məni üzdüyütək
Mən bu dərdi üzə bilsəm...
Qartal kimi bir qıy vurub
Səmalarda süzə bilsəm...
Nə fikrim qalmazdı, inan,
Nə qəmim olmazdı, inan;
Çiçəyim solmazdı, inan,
Ayrılığa dözə bilsəm.
Baş-başa qalıb qəmimlə,
Oynamazdım qələmimlə;
Taleyimi öz əlimlə
Mən yenidən yaza bilsəm.
İNTİZAR
Səngərində lalə bitən
ana Vətən,
Bir layla de sən mənə,
Uyuyum qoynunda
çiçəklər kimi.
Qoxulasın təbiət
bihuş ətrimi.
Pıçıldasın küləklər dodağında
sakit göl qırağında,
tənha söyüdün altında
tənhalar haqqındakı şeirimi.
Burda, dağ başında
ümidlərə qısılıb yaşayır
arzulara tor atanlar;
Vətənin taleyini daşıyır
əsgər kimi
günü-günə satanlar...
|
|
