|
Kəndİm haqqında inşa
Köhnə, Tavansız, Təmirsiz evimiz qədər doğma, Nənəmin qulpuqırıq qazanında bişən dovğa qədər dadlı, Gecənin səhərlə öpüşməsindən doğulan günəş işığının altında xumarlanan itimiz qədər əziz, Heç nə ola bilməz mənə, kəndim! Hər səhər tozlu yollarında mürgüləyən tək-tük ayaq izlərinin qarşısındakı bir topa qoyun sürüsü qədər ümidli, Sərhəd tanımayan boz atların qədər əsəbi, Səhər-səhər şehli otlarında cikkildəşən sərçələr qədər şəkər, Heç nə ola bilməz mənə, kəndim! Ürəyinin başındakı köhnə qəbiristanlıq qocalar evindi sanki, Hər dəfə maşınla yanından keçəndə düşüb izn alıram, Qoynunda uyumaq üçün, Yaşlı qəbirlərindən, kəndim!
Nə olsun ki, işığın tez sönür, qazın yoxdu. Nə olsun ki, məktəbin uçuqdu, Dərs oxuyan yoxdu, Yenə səndən əziz, Heç nə ola bilməz mənə, kəndim!
Ay ana kəndim, ana kəndim Ay nənə kəndim, nənə kəndim Ay oba kəndim, oba kəndim Ay baba kəndim, baba kəndim Kəndim, oy...
SƏRHƏD
Yaşamağın çətinliyini Anam məni bələyəndə bilmişəm. Onda ayaqlarım anladı ki, bu dünyada sərhəd var...
GƏNCLİK
Bar, Sərinləşdirici içkilər, Gözəlçələr və ya fahişələr Və sağ tərəfdə əyləşmiş günü 10 manata fəhlə işləyən gənclik.
PİŞİK
Ölümün üzünə gülür pişik Maşın təkərinin kölgəsində.
QAR DƏNƏSİ
Bu səhər Bir qar dənəsi öldü Burnumun ucunda.
ÇÖRƏK DÜKANI
Həmişə adamlar sürücüyə çörək dükanının önündə saxla deyirdilər. İndi çörək dükanı yoxdu, orda avtobus dayanır çörək dükanının xatirəsi önündə.
QADIN
Qırmızı işıqdı gözəl qadınlar. Sürücülər gördümü - basırlar əyləci, dururlar qarşısında
ƏS
Kədər gözlərimdən Yarpaq kimi asılıb. Sənsə küləyisən onun, Əs, Bəlkə dağıtdın Gözlərimdən asılmış kədəri.
|
|