|
Adamlardan biri
Adamlardan biridir, Ali deyil, adidir. Boz köynək geyinir çox vaxt - Uzunqol. Eyni rəngdə cib dəsmalı var. Boz - gizlənmək istəyənlərin rəngidir. Dedim axı, adidir. Saçlarını arxaya darayar, Əllərini cibinə qoymaz dünyasında. Boyu - adi adamlardakı kimi, normal. İşi var, Yəni, məşğul adam. Konkret iş saatları var. İstirahət üçün də konkret vaxt verilir ona. Şənbə, bazar. Adamın Allahı var. İstirahətini görməmişəm amma. Adi adamdır. Saçlarını arxaya darayır, əllərini cibinə qoymur. Başını dik tutub gəzir. Dedim axı, adidir. Nə gizlədim, mənim üçün alidir.
* * *
Əlimdən atıb qabları sındırmadım sən qəlbimi qıranda, Barmaqlarımı oynatmadım, - əllərim əsər qocalanda. Qocalsam əgər... Mən qocalmaram. Saçlarım ağarmaz, əllərim əsməz. Uşaq nağıllarıyla uşaq başı aldatmaram da. Qızlarımı çox sevərəm. Aysumu, Suqramı...
* * *
Vərəq-vərəq açsam ömrümü, səhifələsəm tək-tək günlərimi, səni sevsəm... Sən dünənki xatirəmsən, sabahkı ümidim. Mən səninəm, sən mənim. Gəl sevməyi sınayaq: Sən Məni, Mən Səni.
* * *
Yazıların ən gözəlini sənə yazacam. Adına bağlayacam hər şeyi, - Təzə aldığım geyimimi, Saç düzümümü, Dırnaqlarımın uzunluğunu, Saç boyamı, dırnaq boyamı. Yerə dəyənə qədər uzadacam saçlarımı Mütləq sevməlisən uzun saçları, - təbiətinə xasdır məncə, uzunluq. Necə olsa, əllərin böyük Saçlarım upuzun olacaq, görərsən. Sevərsən?
* * *
Mən əsgər gedəcəm. Səni gözləməmiş əsgər gedəcəm. Erməni böyüyür, Yeyir-içir içimizi elimizdə, Evimizdə. Bəsdir daha! Qoyduğumuz torpaqları Mən almağa gedəcəm. Səni gözləməmiş Mən əsgər gedəcəm.
* * *
Səhər dünənimlə rastlaşdım. Unutmağa çalışdığımçün həyat üzümə çırpdı uşaqlığımı. Mən də beləydim... Bəlkə indi də dəyişməmişəm. Uşaqlıqda eynək taxırdım. Uzağı görmürdüm. Gedib uzaqda unudacam hər şeyi.
* * *
Köhnə xatirələrlə başımı qatıram. Dururam, yatıram. əlimi, üzümü yuyuram, fikirlərimi yuya bilmirəm. Səsin qulağımdadır. Yox. Sən onu sevirsən.
|
|