|
YERİ
Qızım Nübara
Böyüyəndə tez çıxacaq yadından,
Sevəcəksən yıxıldığın bu yeri.
Gözümüzü yuxulara çox verib,
Yatdığımız balıncların qu yeri.
Bu odası, o sarayı bizimki,
Ötən qışı, gələn yayı bizimki.
Yaşamağa bircə payı bizimki,
Bu dünyanın dörddən üçü su yeri.
Böyüdüsə göz, baxmağı qorxulu,
Yaxınların bu uzağı qorxulu.
Böyüklərin yıxılmağı qorxulu,
Yıxılanı torpağın ağrı yeri.
Sən dünyanı tanıyınca, duyunca,
Neçə arzum böyüyəcək boyunca.
Yeriyəcək ürəyim də yanınca,
Gəl duruxma, ay dəcəlim, di yeri.
KİŞİLƏR
Durub əlləri qaşında,
Baxdı uzağa kişilər.
Çətin yollar yoxuşunda,
Düşdü qabağa kişilər.
Bir elə oğul oldular,
Döndülər nağıl oldular.
Təkcə haqqa qul oldular,
Sözünə ağa kişilər.
İnam , ümid qoymuşdular,
Hər şeyi mərd qoymuşdular,
Gedəndə yurd qoymuşdular,
Biz qorumağa kişilər.
Dünyaya baxıb, getdilər,
Bəlkə darıxıb getdilər.
Harasa çıxıb getdilər,
Atları yorğa kişilər.
GEDƏCƏYƏM ÜZÜ HAQQA
Taledəndi kövrək ömrü,
Belə qısa, gödək ömrü.
Kədərmiş, kəpənək ömrü,
Çiçəklərin çiynindəcə.
Bir ömürdü, sürüb gedir,
Bu payızı görüb gedir.
Sarı yarpaq ölüb gedir,
Küləklərin çiynindəcə.
Uçdular göyün üzünə,
Baxıb daşlı əlimizə.
Qəm töküldü üstümüzə,
Lələklərin çiynindəcə.
Kimin günahıdı gəzən,
Dünəni, sabahı gəzən.
Füzuli ahıdı gəzən,
Fələklərin çiynindəcə.
Hər şey bəlli özü Haqqa,
Ucatlmağa sözü Haqqa.
Gedəcəyəm üzü Haqqa,
Mələklərin çiynindəcə.
AÇILMIR
Vətən həsrətimiz hələ gileydi,
Hələ səbrimizin dili açılmır.
Kəsib nə müddətdir yağı gədiyi,
Bir elin cığırı, yolu açılmır.
Turacı, kəkliyi susdu dağların,
Hər daşı, qayası küsdü dağların.
Köksündə dumandı, sisdi dağların,
Yamacı açılmır, yalı açılmır.
Keçsə yad əlinə əsir torpağın,
Ruzi-bərəkəti küsür torpağın.
Yağı tapdağında qısır torpağın,
Çiçəyi açılmır, gülü açılmır.
DÜNYA, HƏLƏ DƏRMƏ MƏNİ
Bu uzanıb göyə çatan,
Baxanda gözün qaralan.
Budaq-budaq arzulardan,
Dünya, hələ dərmə məni.
Çiçəkli nar ağacıyam,
Qalan nübar ağacıyam.
Kiməsə bar ağacıyam,
Dünya, hələ dərmə məni.
Məndən nə başın çıxacaq,
Başına işin çıxacaq.
Dişləsən dişin çıxacaq,
Dünya, hələ dərmə məni.
Dəyən bir qəmə düşəcəm,
Bilmirəm kimə düşəcəm.
Dəyib dibimə düşəcəm,
Dünya, hələ dərmə məni.
|
|
