|
YAZ ÇİÇƏYİ
Xumar-xumar boylanırsan, Yaz çiçəyi, yaz çiçəyi. Yuxudanmı doymamısan, Yaz çiçəyi, yaz çiçəyi?
Bu nə duruş, bu nə nazdır? Ləçəklərin bəmbəyazdır. Heyif, ancaq ömrün azdır, Yaz çiçəyi, yaz çiçəyi.
Yamacdasan, dağ üstəsən, Xırdaca yarpaq üstəsən. Nə gözəlsən tağ üstə sən, Yaz çiçəyi, yaz çiçəyi!
Təzə gəlib dağlara yaz, Üşütməzmi səni ayaz? Nəfəsimlə isin bir az, Yaz çiçəyi, yaz çiçəyi.
Əlim gəlməz səni üzüm, Əsirindir görən gözüm. Burax gedim, ay əzizim, Yaz çiçəyi, yaz çiçəyi.
KÖLGƏM
Kölgəmə yazığım gəlir, O bir az uşaq kimidir. Gecələr gözə görünməz, İşıqdan qaçaq kimidir.
İşıq arxadan düşəndə O keçər məndən qabağa. Tez-tez dəyişər yerini, Gah qul olar, gah da ağa.
Arxamca sürünüb gedər, Nə ilandır, nə yarasa. Sanki günəşdən utanar, Günorta itər hardasa.
Kiminin kölgəsi əyri, Kiminin düz kölgəsi var. Adi kölgələrdən başqa Bir də nüfuz kölgəsi var.
İnsanlar var bu dünyada, Kölgəsiz gəzər-dolaşar. Kölgələr var bu dünyada, Sahibindən uzun yaşar.
Kölgəmə yazığım gəlir, Belə zəifdir o nədən? Bəlkə, mən özüm zəifəm, Budur qəlbimi göynədən.
Kaş dönəm məğrur palıda, Al günəşə gərəm sinə. Məni sevənlər yığışa, Çətirimin kölgəsinə.
|
|