|
Dilimizin tarixi inkişaf yolunu bir tam halında özündə maddiləşdirən Azərbaycan poeziyasının inkişaf yolu uzun və keşməkeşli olmuşdur. Əgər söz sənətkarları poeziyanın birbaşa yaradıcılarıdırsa, ədəbi tənqid, şairlərin yaradıcılıq axtarışlarını araşdıran, ideya istiqamətlərini müəyyənləşdirən ədəbi tənqidçilər poeziyanın hərəkətverici qüvvəsi hesab edilməlidir. Tanınmış tənqidçi-ədəbiyyatşünas Vaqif Yusiflinin bu yaxınlarda işıq üzü görən "Poeziyanın yolları və illəri (1960-2000-ci illər)" adlı monoqrafiyası Azərbaycan poeziyasının qırx illik bir dövrünü əhatə edir. On fəsil və bir neçə bölmədən ibarət olan bu monoqrafiyada müasir Azərbaycan poeziyasının təxminən yarım əsrlik bir dövrü tədqiqata cəlb olunmuşdur. Bir-birindən maraqlı və elmi faktlara söykənən monoqrafiyanın birinci fəslini müəllif 1960-2000-ci illər Azərbaycan poeziyasında ənənə və novatorluq probleminin araşdırılmasına həsr etmişdir. Məlumdur ki, ənənə və novatorluq qütbləşməsinin özü bu iki anlayışın bütövlükdə mövcudluğunun təminatçısıdır. Yəni, ənənə novatorluğun məhək daşı, özülü, dayaq nöqtəsi olduğu kimi, novatorluq da özünün yenilik təzahürlərini ənənə ilə tutuşdurmaqda aşkarlayır. Ənənəyə laqeydlik özünü varislik hüququndan məhrumetmədir. Ənənə novatorluğun eneji mənbəyi, məkan durumunda zaman istiqmətidir. Eyni zamanda novatorluqdan məhrum ənənə də mövcud deyil. Ən ipə-sapa yatmayan novatorluq özünün müəyyən zaman kəsiyində ənənəyə çevrilə bilər. Əgər o, özündən əvvəlki ənənəvi kökündən pöhrələnibsə. Elə bu məqamda qeyd etməliyik ki, müəllifin bu iki məsələyə münasibəti anlayışların bir-birini işıqlandırması mövqeyindən şərh olunub diqqət mərkəzinə çəkilir. V.Yusifli Azərbaycan poeziyasının başlıca ənənələrini izah edərək yazır: "Azərbaycan poeziyası ta əzəldən humanist bir poeziya olmuşdur, bu poeziyanın əksər nümunələrində insana məhəbbət hissi hakimdir, xalqsevərlik, vətənpərvərlik bu poeziyanın canında, qanındadır. Dünyəvi və bəşəri hissləri təbliğ edə-edə o öz milli stixiyasını qətiyyən itirməmişdir". Həqiqətən də Azərbaycan poeziyasını ta orta əsrlərdən üzü bu yana araşdırdıqca qeyd olunan amilin aparıcı olduğu ortaya çıxır. Tədqiqatçı öz fikirlərini əsaslandırmaq üçün təkcə 60-cı illər poeziya nümayəndələrindən deyil, klassiklərdən-Nizamidən, Nəsimidən, Füzulidən dəlillər gətirir. Əsərin bu fəslində müəllif Azərbaycan poeziyasının öz məna və məzmununa, forma zənginliyinə, dərin humanizminə görə dünyanın poeziya arenasında önəmli yer tutduğunu qeyd edir və bunun altı səbəbini göstərir. Müəllif bu fikirdədir ki,Azərbaycan ədəbiyyatının dünya miqyasına çıxmasını, mütərəqqi, humanist bir ədəbiyyat olduğunu şərtləndlirən səbəblərdən biri də Azərbaycan poeziyasının təkcə öz içinə qapılıb qalan, yalnız "Azərbaycan poeziyası" hadisəsi kimi dərk olunan poeziya deyil, ümumən Şərq poeziyası kontekstində bu poetik regionu bir tam şəkildə əks etdirməsi ilə bağlıdır. Vaqif Yusifli əsərin birinci fəslində ədəbiyyatşünasların hər zaman diqqət mərkəzində olan poetik ənənələrin üslubi çalarlarına da aydınlıq gətirmişdir. Lakin o, sələflərindən fərqli olaraq, poetik ənənələrin roluna, inkişaf tarixinə, ayrı-ayrı şairlərin yaradıcılığında necə təzahür etdiyinə aydınlıq gətirməklə yanaşı, həmin ənənələri sistemli şəkildə təsnif etmiş, qruplaşdırmışdır. Və bununla da qeyd olunan məsələ ilə bağlı elmi ədəbiyyatda nəzərə çarpan müəyyən fikir ayrılıqlarına, qarışıqlıqlara , bizcə, son qoymuşdur. Vaqif Yusifli Azərbaycan poeziyasında üslublardan söz açarkən həyatı, gerçəkliyi, inikas üsulunu (romantik və ya realist) əsas götürərək poeziyamızda romantik və realist şeirin üslublarının mövcudluğu üzərində dayanır və hər iki üslubu geniş şəkildə şərh edir. Klassik-romantik üslubun əsasən Nəsimi və Füzuli kimi sənətkarların dünyagörüşündə formalaşdığını göstərən müəllif bu üslubun poeziyanın canr-struktur xüsusiyyətlərinin müəyyənləşməsinə də təsir göstərdiyini yazır. Və beləliklə, bu üslubun Hüseyn Cavid, son dövrlərdə isə Səməd Vurğunun yaradıcılığında öz yüksək zirvəsinə çatdığını göstərir. O, qeyd edir ki, poeziyanın sonrakı inkişaf mərhələlərində xüsusilə Vaqif mərhələsindən sonra realist şeir üslubu yaranıb inkişaf etməyə başladı. Realist şeir üslubunu şərh edən müəllif əslində realist şeir üslubunun tərkib hissəsində satirik şeir üslubunun da öyrənilməsinin vacibliyini vurğulayır. Eyni zamanda qeyd edir ki, poeziyamızın sonrakı dövrlərində aparıcı üslub realist üslub olmuşdur. Azərbaycan poeziyasının keçdiyi inkişaf yolunu ədəbi-bədii metodlarını, janr xüsusiyyətlərini dərindən bilən tənqidçi V.Yusifli monoqrafiyanın I fəslində "Novatorluğun mahiyyəti, ənənə ilə novatorluğun qarşılıqlı əlaqəsi" məsələsinə də xüsusi diqqət yetirir, poetik ənənələrin niyə uzunömürlü, novatorluğun isə uzunömürlü olmamasının səbəblərindən, novatorluğun mahiyyətindən, onun ənənə ilə qarşılıqlı dialektik əlaqəsindən söz açır. Monoqrafiyanın II fəsli də novatorluq məsələsinə həsr olunub. "Ənənə və novatorluq problemi ədəbi tənqiddə" başlıqlı bu fəsildə müəllif Azərbaycan ədəbiyyatında novatorluğun tarixinin qədim olduğunu əvvəlcə Nizami, sonra Füzuli kimi sənətkarların yaradıcılığı konteksində işıqlandırır. Müəllif bu sahədəki fikrini davam etdirərək yazır ki, Füzuli ənənəsi uzun zaman Azərbaycan poeziyasında hakim rol oynamışdır. Lakin M.F.Axundov öz kəskin çıxışlarıyla, eyni zamanda öz komediyaları ilə poeziyamızda Füzulinin təsirini azaldaraq yeni realist mərhələnin başlanğıcını qoydu. Sonralar bu mərhələ həm nəsrdə, həm də poeziyada aparıcı xüsusiyyət daşıdı. V.Yusifli Azərbaycan poeziyasında realist mərhələnin davamçıları kimi M.Rəfilini, S.Rüstəmi, S.Vurğunu, M.Arifi, R.Rzanı, Ə.Cəmili, O.Sarıvəllini, N.Xəzrini, B.Vahabzadəni, C.Novruzu, F. Qocanı və bir çox görkəmli poeziya korifeylərini göstərir. Müəllif Azərbaycan poeziyasında novatorluq məsələsindən danışarkən özünəqədərki bir çox tənqidçi ədəbiyyatşünasların-Ş.Salmanov, H.Zeynallı, Ə.Ağayev, M.Cəfər, A.Abdullazadə, Y.Qarayev, A.Məmmədov kimi sənətkarların fikirlərinə istinad edir, onların məhz bu məsələ ilə əlaqədar tədqiqatlarını elmi ardıcıllıqla fikir süzgəcindən keçirir. Monoqrafiyanın bu fəslində ən diqqət çəkən məqamlardan biri də 60-70-ci illər poeziyasında baş verən ədəbi mübahisələrlə bağlıdır. Poeziyamızın bu mərhələsinin təhlilində məhz novator yaradıcılığı ilə seçilən şairlərmizin bəzi ifrat,əslində ədəbi tənqiddən uzaq tənqidçilərin yanlış baxış bucağından tənqid atəşinə tutulması işıqlandırılır.Müəllif yazır: ''Etiraf etmək lazımdır ki, yetmişinci illər Azərbaycan ədəbi-tənqidini Asif Əfəndiyevin tənqidi məqalələri olmadan təsəvvür etmək mümkün deyil. Bununla yanaşı, A.Əfəndiyevin bir çox tənqidi məqalələrində sırf subyektiv məqamlar, fəlsəfəyə uymaq, ibarəçiliyə meyl etmək halları da özünü göstərirdi. Dünya ədəbiyyatına, xüsusilə poeziyasına yaxşı bələd olan A.Əfəndiyev bəzən Azərbaycan poeziyasının XX əsrdəki nailiyyətlərini inkar edir, yeniliyi, novatorluğu düzgün qiymətləndirə bilmirdi. Tənqidçinin ən böyük qüsuru onda idi ki, o, təhlil etdiyi bədii əsərlərə fəlsəfənin qanunları ilə yanaşır və buna görə də xeyli mubahisəli məqamlara yol açırdı. Belə ki, K.Marksın, yaxud Leninin fəlsəfi fikirlərini R.Rza, F.Qoca, İ.İsmayılzadə poeziyasına tətbiq edəndə gülünc bir vəziyyət yaranırdı. İkinci bir qüsuru isə onda idi ki, A.Əfəndiyev istisnasız olaraq bütün bədii əsərlərə sosializm realizmi prisiplərindən yanaşırdı. 60-70-ci illərdə isə sosializm realizmi "aşağı enmə" mərhələsini yaşayırdı". Azərbaycan ədəbiyyatının bilicisi vətənpərvər bir tədqiqatçı V.Yusifli uzun zaman Azərbaycan poeziyasına sağalmaz yara vuran imperiya keşikçilərinə biganə qala bilməzdi. Bu üzdən müəllifin bu misraları görkəmli söz ustadlarına onların yaradıcılıq imkanlarına zərbə vuranlara gec də olsa verilən ən tutarlı qiymətdir. V.Yusiflinin ədəbiyyatşünaslıq, poeziya məsələlərinə həsr olunmuş fundamental monoqrafiyasını vərəqlədikcə onun poeziya tariximizi, poeziyamızda mövcud olan ədəbi yolları, daima ədəbiyyatşünaslar arasında mübahisə predmeti olan ədəbi cərəyanları nə qədər dərin bildiyinə, necə dəqiqliklə, sistemli şəkildə araşdırdığına heyran olmaya bilmirsən. Monoqrafiyanın III fəsli "Yeni poetik mərhələnin başlanğıcı" adlanır. Müəllif bu fəsildə yeni poetik mərhələnin başlanğıcını görkəmli yazıçı-tənqidçi M.Hüseynin sözləri ilə xarakterizə edir.O,yeni mərhələnin ötən əsrin 60-cı illərindən başlandığını söyləyərkən tarixi reallığın ədəbiyyata - poeziyaya müstəsna təsirini xüsusi vurğulayır. V.Yusifli III fəslin "Poeziyamızın müharibədən sonrakı mənzərəsi", "Müasirlik poetik axtarışların rəhni idi…" adlı bölmələrində bir çox aktual məsələlərə toxunur. Tənqidçi "Müasirlik poetik axtarışların rəhni idi…" bölməsində 60-cı illər poeziyasında populyar mövzuları qeyd etməklə yanaşı, çatışmazlıqları da göstərir. O, yazır: "…Ancaq əmək mövzusunda yazılan əsərlərin əksəriyyətində, xüsusilə lirik şeirlərdə əsas diqqət təqdim olunan insanın necə qabaqcıl olmasına, keçici qırmızı bayraq almasına yönəlirdi və çox zaman mənəvi nemətlər bolluğu yaradan əmək adamının mənəvi dünyası unudulurdu". Müəllifin toxunduğu bu məqam xüsusilə diqqəti cəlb edirdi. Bu əslində idealogiyanın sənəti üstələməsi idi. V.Yusifli də məhz bu barədə bir çox vətənpərvər şairlərimizin buna qarşı çıxmasını müsbət hal kimi qeyd edir. Sənətkarlıq axtarışları, tənqidin sənətkara, şairlərin şeirində ideya və məzmuna münasibətini əks etdirən bu fəsildə dövrün bir çox söz sərrafları Əhməd Cəmil, Rəsul Rza, Əli Kərim və başqalarının yaradıcılığı ətraflı şəkildə tədqiq olunur. V.Yusifli XX əsr Azərbaycan poeziyasının "Qızıl" dövrü kimi 60-80-ci illər poeziyasını göstərir. "XX əsr Azərbaycan poeziyasının "Qızıl" dövrü" adlanan dördüncü fəsildə müəllif 60-80-ci illər poeziyasının bir neçə başlıca səciyyəvi xüsusiyyətlərini qeyd edir. Bu illər ərzində poeziyamızın ümumi mənzərəsini canlandıran tənqidçi həmin dövrə məxsus poetik üslubların formalaşmasında əsas tendensiyanı nəzərdən keçirir. O, hər şeydən əvvəl, 60-80-ci illərdə təkcə poeziyada deyil, ümumən bütün ədəbiyyatda yeniləşmənin, tərəqqinin mövcudluğunu dünya ədəbi prosesində baş verən mühüm keyfiyyət dəyişiklikləri ilə bağlı olduğunu vurğulayır. Bundan başqa, müəllif XX əsrin atom, elmi-texniki tərəqqi dövrünün, eyni zamanda, azadlıq uğrunda mübarizələrin yaratdığı həyəcanın mənəvi atmosferin bədii ədəbiyyatda da zamana uyğun meyl və tendensiyalar tələb etdiyini və bu meyl və tendensiyaların, ilk növbədə müasir ədəbiyyat yaratmaq səyi ilə bağlı olmasını diqqətə çatdırır. Dördüncü fəslin ən çox maraq doğuran bölmələrindən biri ''Poeziyada Əli Kərim mərhələsi'' bölməsidir.. Müəllif Əli Kərim yaradıcılığını tədqiq edən bir çox tənqidçilərin: Tofiq Hacıyevin, Cavanşir Yusiflinin və başqalarının fikirlərini ümumiləşdirərək yazır: ''Onu (Əli Kərimi - red.) nə Səməd Vurğun, nə də Rəsul Rza poetik məktəblərinin heç birinə daxil etmək olmaz. Ancaq Əli Kərim poeziyası bütün şaxələri ilə minillik Azərbaycan poeziyasına bağlıdır və müəllif indiyə qədər Əli Kərim haqqında deyilmiş ən doğru, ən dəqiq - Əli Kərimi bütünlüklə ifadə edən fikirlər söyləyir. O, yazır: "Fikrimizcə, Əli Kərim şeiri Azərbaycan poeziyasında SÖZÜN DİRİLMƏSİ, EHYA OLUNMASI, SÖZÜN POEZİYAYA ÇEVRİLMƏSİ kimi böyük bir missiyanı həyata keçirirdi. Sovet poeziyası sözün gizlinlərdə qalan potensialının tam qüvvətlə üzə çıxmasına böyük maneə yaradırdı. Səməd Vurğunun poetik ustalığı sayəsində şeir lisanımız xəlqiləşdi, amma dilin bədii təsvir arsenalı, obrazlar, metaforalar, məcazlar qatı tam açılmadı. "Bu dildə varlığın hər sədası var", - bu, Əli Kərimin misrasıdır və həmin misra dərk edilmiş zərurət tam reallığı ilə ilk dəfə Əli Kərim poeziyasında öz bəhrəsini verdi". Bu bənzərsiz fikirlərin ardınca müəllif Əli Kərimin hər zaman təzə şeirlərini bir daha tədqiqata cəlb edir, bu şeirlərdəki təkrarsız bənzətmələri diqqətə çatdırır. "Fikir poeziyası", "İnsan amili", "Tənqid pafosu" kimi ədəbi məsələləri özündə əks etdirən dördüncü fəsil bütünlüklə V.Yusiflinin yaradıcılıq uğurlarından xəbər verir. Bəzən poeziya tənqidçiləri poeziyadan danışarkən şeiriyyətdə şairin öz dünyasını unudurlar. Tənqidçilərin bir çoxunun şairdən nədən, necə, yazmağı tələb etməsi, əslində sovet diktaturasının qalığı kimi də başa düşülə bilər. Lakin unutmaq olmaz ki, şair bir insandır və onun daxilində bir M Ə N var. Bu M Ə N onun dünyaya baxışlarını, daxili həyəcanlarını, hisslərini müəyyənləşdirir. Bu baxımdan söz sərraflarının yaradıcılığı haqqında danışılarkən mütləq onların daxili dünyası nəzərə alınmalıdır. Elə dəyərli tənqidçi-ədəbiyyatşünasımız V.Yusifli də monoqrafiyasının beşinci fəslini məhz bu məsələyə həsr etmişdir. "Hər şairin öz dünyası" adlanan bu fəsildə müəllif eyni mövzu ilə bağlı yazılan poetik nümunələrdə şairlərin fərdi poetik üslubunu ön plana çəkir. O, konkret olaraq 60-80-ci illər poeziyasında önəmli rol oynamış gözəl şairimiz Əliağa Kürçaylının yaradıcılığında apardığı araşdırma sayəsində belə bir nəticəyə gəlmişdir ki, Ə.Kürçaylının poeziyasını bir sözlə səciyyələndirmək olar: HƏYATSEVƏRLİK. V.Yusifli fikrini davam etdirərək eyni mövzuda ("Ana" mövzusunda) şeirlər yazmış Məstan Əliyev və Nəriman Həsənzadənin mövzuya baxış bucaqlarının fərqli olduğunu qeyd edir. Əsərin bu fəslində 60-80-ci illər poeziyasının ən parlaq simalarından olan Məmməd İsmayıl və Fikrət Sadıqla yanaşı, həmin dövrün bir çox şairləri - Sərdar Əsəd, Məmməd Aslan, Ağacavad Əlizadə, Eyvaz Borçalı, Səyavuş Sərxanlı, Famil Mehdi, Vaqif Hüseynov, Şahmar Ələkbərzadə, Vilayət Rüstəmzadə, Teyyub Qurban, Şəkər Aslan, Əşrəf Veysəlli, Ağa Laçınlı, Məmməd Aslan, Ayaz Vəfalı, Abbas Abdulla yaradıcılığından da söz açılır. V.Yusifli beşinci fəsli aşağıdakı notlarla bitirir: "Fərdi poetik üslub məsələsi ilə bağlı müharibələrimizi yekunlaşdırıb belə bir qənaətə gələ bilərik ki,bu məsələ poeziyada NOVATORLUQLA sıx ilgilidir. Çünki novatorluq hər bir sənətkarın poeziyada özünü necə təsdiq etməsinin real təcəssümüdür
V.Yusiflinin monoqrafiyasını nəzərdən keçirdikdə bir nüansın şahidi olursan: o, yarıməsrlik poeziya tariximizi elə tədqiq edib ki, tədqiqata cəlb olunmamış heç bir ədəbi metod, heç bir şair kənarda qalmayıb. Müəllifin altıncı fəsli "Poeziyada ənənəvi mövzulara yeni baxış" adlandırması da təsadüfi deyil. O, bu fəsildə 60-80-ci illərdə poeziyamızda mövcud olan siyasi lirikanı zərgər dəqiqliyi ilə tədqiqata cəlb edib. Tədqiqat aparan zaman müəllif dövrün aparıcı şairlərinə-S.Rüstəm, R.Rza, X.Rza Ulutürk, Cənubdan gələn şairlər B.Azəroğlu, S.Tahir, Ə.Tudə, M.Gülgün, H.Bülluri və onların yaradıcılığına olduqca obyektiv yanaşır. Onların siyasi lirikasını həm sənətkarlıq baxımından, həm də ideya-məzmun tərəfindən yüksək qiymətləndirir. Müəllif həmin şairlərin bu gün qəbul olunmayan, idealoji baxımdan yaşadıqları dövrün siyasi iqlimini təbliğ edən şeirlərini də tədqiqatdan kənarda qoymamağı tövsiyə edir. Bununla yanaşı, adı çəkilən şairlərin vətənpərvərlik ruhunda yazılmış şeirlərinin poeziyamız üçün önəmli səciyyə daşıdığını vurğulayır. Fəslin ən maraqlı məqamlarından biri də budur ki, V.Yusifli 60-80-ci illər poeziyasında apardığı dərin araşdırmalar nəticəsində siyasi lirikanın mövzu dairəsinin genişlənməsini müşahidə edə bilmişdir. O, yazır: "Yetmiş-səksəninci illərdə siyasi lirikanın mövzu dairəsi də genişlənmişdir. Azərbaycanın birliyi, bütövlüyü, müstəqilliyi və azadlığı ideyası ilə yanaşı, turançılıq və türkçülüyün təbliği də siyasi lirikada aparıcı motivlərdən birinə çevrilməkdə idi. Bu sahədə yenə Xəlil Rza öndə idi: "Nə yaxşı ki…" şeirində o, türk olduğuna görə böyük qürur hissi keçirdiyindən söz açır, "dayağımdır, bayrağımdır, varlığımdır türklüyümüz" deyirdi''. V.Yusifli dövrün siyasi ab-havasının Xəlil Rza yaradıcılığından da yan keçmədiyini göstərir.Şairin yazdığı "Yes takaya partiya" şeirində Sovet hakimiyyətinin qurucusu Lenini vəsf etməsini təbii sayır. Müəllif məsələyə bu prizmadan yanaşmaqda bir daha sübut edir ki, nə və necə yazmasından asılı olmayaraq bu əsərlər milli poeziyamızın, milli təfəkkürümüzün məhsuludur. Qeyd etmək lazımdır ki, müəllif bu fəsildə azərbaycançılıq, türkçülük, azadlıq ideyalarının poeziyamızda təcəssümünü məhz bu dövrlə bağlayır. Altıncı fəsil "Vətənpərvərlik lirikası", "Təbiət lirikası", "Təbiət-insan, təbiət-cəmiyyət problemlərinin poeziyada əksi", "Sevgi lirikası" kimi bir-birindən rəngarəng, ardıcıl, ədəbiyyatşünasların diqqətini cəlb edən mövzularla daha da dolğunlaşır. Xüsusilə "Sevgi lirikası" mövzusu orijinal şəkildə təqdim olunur. Həqiqətən də tənqidçilər, oxucular nə qədər qəribə olsa da "XXI əsrdə sevgi varmı?" sualını verirlər. V.Yusifli isə öz tədqiqatında təkcə sevgi mövzusunda yazılmış poeziya nümunələrinin mövzu və ifadə yozumunu tədqiq etməklə keçməmiş, eyni zamanda "sevgi"yə çox orijinal tərif vermişdir: "Ancaq bu gün Sevgi daha geniş anlamları ifadə edir, sevgi insanın özünü dərk etməsi, durulması, daxilən yeniləşməsi, zənginləşməsi deməkdir, sevgi Həqiqətdir, Vicdandır, Xoşbəxtlikdir, sevgi ağılla ürəyin vəhdətidir, daha doğrusu, "Ağıllı ürək"dir. Yəni, onu təkcə intim, erotik bir hiss, duyğu kimi qavramaq olmaz . Göründüyü kimi, V.Yusifli məhz qeyd etdiyi sevgidən bəhs edən poetik nümunələri araşdırmış və bu nümunələr içərisində "Sevgi ilə poeziyanın vəhdəti", "Sevginin öz obrazı", "Yaşayan sevgi", "Həsrət obrazı" nüanslarını diqqətə çatdırmışdır. O, bu mövzu ilə əlaqədar araşdırma apardıqca müraciət etdiyi sənətkarların da sırası genişlənir. Bu şairlər arasında Azərbaycan poeziyasında eşqin, məhəbbətin ən böyük tərənnümçüsü M.Füzuli hamıdan əvvəl gəlir. Sonrakı yerlərdə həm toxunduqları mövzuya münasibətləri baxımından, həm də yaşıyıb-yaratdıqları zamana görə Vaqif, Nəbi Xəzri, Bəxtiyar Vahabzadə, Əli Kərim, Nəriman Həsənzadə, Fikrət Qoca, Ramiz Rövşən, Cabir Novruz, Musa Yaqub, Məmməd İsmayıl, Firuzə Məmmədli, Səyavuş Sərxanlı, Vahid Əziz, Musa Ələkbərli, Məmməd İbrahim, Zirəddin Qafarlının sevgi məzmunlu şeirləri tədqiqata cəlb edilir. Müəllif bacardıqca, obyektivlik baxımından Azərbaycan poeziyasında sevgi mövzusunda yazmış bütün şairlərin adını çəkməyə çalışır. Bu da öz növbəsində tədqiqatçının mövzunu daha əhatəli şəkildə tədqiq etməsindən xəbər verir. V.Yusiflinin müəllifi olduğu bu monoqrafiyada poeziyamızla bağlı elə bir mövzu tapmaq olmaz ki, tədqiqatdan kənarda qalmış olsun. Yeddinci fəslə diqqət yetirək. "Klassik bədii formaların yeni həyatı" adlı bu fəsildə Azərbaycan poeziyasında uzun müddət yaşayan bədii şeir formaları və onların bədii və forma cəhətdən hansı dəyişikliklərə uğramasından söhbət açılır. Burada poeziyamızın ən qədim formalarından olan qəzəl janrının sadələşməsi, xəlqiləşməsi, sənətkarlar, xüsusilə də S.Rüstəm tərəfindən bu janra ictimai məzmunun gətirilməsindən danışılır. Eyni zamanda bu janrın yeni formada bənzərsiz nümunələrini yaradan Əliağa Vahiddən, Baba Pünhandan bəhs olunur. Müəllif məhz bu əsərində ilk dəfə olaraq Baba Pünhana bir şair kimi ədəbi qiymət verir, şairin qəzəl janrında "Qarabağ" mövzusunu təqdim etməsini yüksək qiymətləndirir. "Ümumiyyətlə, Baba Pünhanın simasında Sabir ənənələrinin istedadlı bir davamçısı yetişdi. Qəzələ satira ruhu aşılamaqla Baba Pünhan bu klassik janrın bir daha nəyə qadir olduğunu sübut elədi .''V.Yusifli klassik qəzəl janrı ilə yanaşı, populyar janr olan qoşma janrının da bugünkü vəziyyətini aydınlaşdırır. Qurbani, Abbas Tufarqanlı, Sarı Aşıq, Aşıq Ələsgər, Aşıq Hüseyn Bozalqanlının yadigarı olan qoşma janrının davamçılarının: B.Vahabzadə, H.Arif, M.Araz, M.İsmayıl, M.Yaqub, Z. Yaqub kimi söz ustadlarının olduğunu qeyd edir. Bu fəsildə həmçinin gəraylı janrının müasir formalarına aydınlıq gətirilir, heca vəzninin müxtəlif formaları - Qabil, Məstan Günər, Məmməd Araz və başqaları tərəfindən yaradılan nümunələr fikir süzgəcindən keçirilir. Monoqrafiyanın öz həcminə və məzmununa görə fərqlənən fəsillərindən biri də "Azərbaycan sərbəst şeiri" adlanır. Bu fəsildə konkret olaraq poeziyamızda sərbəst şeirin yaranması, yaradıcıları, bədii formaları tədqiqata cəlb edilir. Fəslin ən diqqət çəkən məqamlarından biri də Sərbəst şeir adlandırılaraq şeiriyyət üçün qüsurlu sayılan söz və ifadələrin bədii janra yol tapmasına tənqidi münasibətdir. Təbii ki, hallarla ömrünü poeziyamızın tədqiqinə həsr etmiş dəyərli tənqidçimiz bu kimi arzuolunmaz barışa bilməzdi. Və barışmır da: "…Bu cür şeirə gətirilməsi qüsur sayılan sözləri, ifadələri, əsasən, ədəbiyyata yeni gələn cavan şairlərin şeirlərində daha çoz izləyirik. Əlbəttə, məqsədə müvafiq olaraq nadir hallarda olsa da, şeir dilində belə sözlər işlənə bilər, amma bunu kütləvi hala çevirmək və bəzən şeir dilini elə bu terminlər üzərində qurmaq, təbii ki, şeir sənətini emosionallıqdan məhrum edir. Məsələn, Nərmin Kamal adlı cavan şairə öz şeirlərində "konfabusiyalı xəstə", "Emosional kütlük", "Simptomp", "pitsaxana", "Aksiz markası", "sonapaks", "tizersin", "impulsiv hərəkət'', "maqnit sahəsi", verendaya otağı", "pataloji alkoqolizm", "gigiyenik xidmət", "şəxsiyyəti təsdiq edən kartdan çıxarış", "atraksion""jalüz", "popkom", "kontrol", Sevinc Pərvanə "SPİD", "Partnyor", "Stomotoloji kabinet", "ginekoloq", , "etiraz aksiyası", "qeyri-leqal xəyanət", "klimaks", "elektrik DİRƏYİ", Azəd Yaşar "irsiyyət və şərti refleks qanunları", "dərman reklamı", "bağırsaq pozğunluğu", "sadomiya", "elmi kommunizm", "narkotik qoxu", "orfoqrafik və qrammatik yanlışlıqlar", "gerçək elm", "siqaret blokundan kəsilmiş karton", "koker", "fransız riyaziyyatçısı Evarist Qalua", "cürbəcür polifonik zəng melodiyaları", "Elmlər Akademiyasına gedən qatarlar", "ekoloji natarazlıq", Rasim Qaraca "ana bədəninin koridoru" kimi sözləri, ifadələri şeirə gətirməkdən zövq alırlar. Amma təbii ki, bu "zövq" yazdıqları şeirin zövqsüzlüyünə dəlalət edir.'' Tədqiqatçının həyəcan təbili çalması əbəs deyil. Əgər bu gün poeziyamızda, ədəbiyyatımızda senzura yoxdursa və yaxud da bu şairciklərin yazdıqları cəfəngiyyat üçün mətbuat açıqdırsa, bu hələ o demək deyil ki, poeziyamız nəzarətsizdir və ya tənqid yoxdur. Əksinə, V.Yusifli və onun kimi dərin savad sahibləri poeziyamızın tarixini, dil, üslub xüsusiyyətlərini dərinliklərinə qədər bilən tədqiqatçılarımız bunu görür və vaxtında qarşısını almağa çalışırlar. Qeyd etmək istərdik ki, əlinə qələm alıb şeiriyyətə gəlmək istəyən gənclər üçün bu tənqid düzgün yol, bir yaradıcılıq istiqamətidir. "Müstəqillik dövrünün poeziyası" doqquzuncu fəsil adından da göründüyü kimi ötən əsrin 80-ci illərinin sonundan başlayaraq 2000-ci ilə qədər Azərbaycan poeziyasının keçdiyi yolu əhatə edir. 71 il 5 ay Azadlıq həsrəti ilə çırpınan Azərbaycan xalqı 1991-ci il 18 oktyabr Konstitusiya aktı ilə Azadlığa qovuşdu. Müəllif bu fikirlərini belə ifadə edir: "Yazıçı Ənvər Məmmədxanlının çox sevdiyi bir ifadə vardı - "azadlıq yanğısı". O azadlıq yanğısı idi milyonlarla insanı Azadlıq meydanına çəkib aparan. Bu Azadlıq yanğısından Müstəqil Azərbaycan doğuldu". Müəllifin ruhundan qopan bu kəlmələr insanı riqqətə gətirir. Bir vətəndaş olaraq Müstəqilliyimizlə qürur duymaya bilmirsən. Və müəllif yenə də bənzərsiz deyim tərzi ilə yazır: "Demokratik Azərbaycan Respublikasınının süqutundan sonra 71 il 5 ay ərzində xalqın ruhunda, genində yaşayan o Azadlıq yanğısını söndürmək üçün Azərbaycan torpağında süni Qarabağ müharibəsi əkildi, 20 Yanvar, Xocalı qırğınları törədildi. Bakıya rus tankları yeridildi, şəhərlərimiz, kəndlərimiz işğal olundu, Azərbaycan böyük bir qaçqın məmləkətinə çevrildi. Bu azmış kimi Azərbaycanda Vətəndaş müharibəsi təhlükəsi yarandı" . Müəllif yana-yana söylədiyi bu sətirlərlə sanki, bu illərdə poeziyamızın, ədəbiyyatımızın mövzularının konturlarını cızır. Burada zamanla ədəbiyyatın qarşılıqlı əlaqəsi və bir-birinə təsiri fonunda yaradılan bu poeziya nümunələrində tarixi şərait əks olunur. Ümummilli liderimiz Heydər Əliyevin Azərbaycanı bu mürəkkəb tarixi şəraitdən çıxarması ön plana çəkilir. Təlatümlü fırtınalardan Azərbaycanı necə çıxartmağın yollarını arayan Heydər Əliyevin Azərbaycana qayıdışı o dövrün ustadlarına əlavə stimul vermişdi. Dahi rəhbərin siyasətinə, uzaqgörənliyinə arxalanan poeziya nəhəngləri dövrün ən aktual mövzularını ədəbiyyata gətirdilər. V.Yusifli ilk belə şeir müəlliflərindən biri kimi Eldar Baxışı nümunə göstərir. Onun "Ocaq" kitabğının müəllifi Zori Balayana məktub''u təqdir olunur. Bunun ardınca müəllif II dünya savaşı illərindəki poeziyamızla bu illərdəki poeziyamızı müqayisə edir və Azərbaycan poeziyasının "döyüşçü paltarı" geyindiyini yazır. Bu yolda səsini ilk ucaldan şairimiz Xəlil Rza Ulutürkün "Qalx ayağa, Azərbaycan!", Məmməd Arazın "Ayağa dur, Azərbaycan!" şeirlərindən ürək açıqlığı ilə söhbət açır. Müəllif bu şeirlərin bütün poeziya nümayəndələrini ayağa qaldırdığını göstərərək, həmin şeirlərdə Müstəqil Azərbaycan poeziyasının məramının ifadə edildiyini vurğulayır. Sonra Qarabağ savaşının başlanması, acı məğlubiyyət, atəşkəsin elan olunması, poeziya əskərlərinin buna münasibəti, Zəlimxan Yaqub, İsa İsmayılzadə, Qabil, Bəxtiyar Vahabzadə, Musa Yaqub və digər sairlərin Qarabağla, 20 Yanvar faciəsi ilə bağlı poetik nümunələri, mövzu, ideya baxımından tədqiqata cəlb olunur. O dövrdə poeziyanın qarşıya qoyduğu suallar, cavablar ayrı-ayrılıqda deyil, vəhdət halında araşdırılır. isa İsmayılzadənin "Haran ağrayır, vətən" poeması, Xalq şairi Qabilin "Ümid sənədir ancaq", "Nəsimi baharında", "Mərsiyə" şeirləri, Bəxtiyar Vahabzadənin "Şəhidlər" poeması, Fikrət Sadıqın, Mirvarid Dilbazinin, Fİkrət Qocanın, Məmməd Aslanın, Ələkbər Salahzadənin Qarabağla, 20 Yanvar faciəsi ilə bağlı yazdığı əsərlər tədqiq olunur. Monoqrafiyanın sonuncu fəsli, (onuncu fəsil) "Şeirdə ənənə və novatorluğun yeni meyl və tendensiyalarda təzahürü" adlanır. Əsərin bu fəslində V.Yusifli poeziyamızda modernizm və postmodernizm tendensiyalarına münasibət bildirir, son dövr Azərbaycan poeziyasında baş verən yenilikləri, mövzu və janr axtarışlarının hansı səviyyədə olmasını, eyni zamanda poeziya tənqidçilərinin bu kimi məsələlərə hansı münasibət bəslədiklərini fikir süzgəcindən keçirir. Müəllif poeziyamızın nisbətən cavan nəsli - Aqşinin, Zahir Əzəmətin, Ağayar Şərifin, Fikrət Əsədin yaradıcılıq imkanlarını saf-çürük edir. Gərgin zəhmət, eyni zamanda zəngin təcrübə əsasında yazılmış bu monoqrafiyada 50 illik Azərbaycan poeziyasının yetmiş illik bir dövrü tədqiqata cəlb olunur və demək olar ki,bütün poetik meyarlar üzrə araşdırılır.V.Yusifli monoqrafiyada poeziya tarixinin qeyd olunan dövrünü sadəcə təsvir etməklə məhdudlaşmamış, eyni zamanda tutarlı faktlara əsaslanaraq mübahisələrə aydınlıq gətirmiş, bəzi məsələlərə tənqidi mövqedən yanaşmışdır. Monoqrafiyanın üstün cəhətlərindən biri də budur ki, əsər çox aydın, hər kəsin anlaya biləcəyi bir üslubda yazılıb. V.Yusiflinin "Poeziyanın yolları və illəri (1960-2000)'' adlı monoqrafiyası Azərbaycan poeziyasının güzgüsü olmaqla geniş oxucu kütləsi üçün, ədəbiyyatşünaslar,o cümlədən gənc tədqiqatçı-filoloqlar və tələbələr üçün faydalı mənbələrdən biridir .
|
|