|
Əsrdən əsrə minillikdən - minilliyə keçid dövrünün müşahidələri belə qənaətə gəlməyə imkan verir ki, ədəbi proses heç də həmişə tarixi tərəqqinin iddialarına cavab vermir. "Tarix inkişaf etdikcə ədəbiyyat da inkişaf edir" kimi absurd fikirbu dəfə də özünü doğrultmadı. İki əsrin və iki minilliyin qovuşuq və ayrılıq məqamı, təbii ki, dövlət müstəqilliyimiz tarixi taleyində özünü doğrultdu. Qüdrətli liderin dəmir iradəsi sayəsində əsrlərin və minilliklərin bağları Azərbaycanda qırılmadı. XX əsrin ənənələri ilə XXI əsrin yeni eksperimentlər və təcrübələri arasında münasibətlər sahmana salındı. Fəqət ədəbiyyat, xüsusilə də poeziya ilə bağlı belə inamlı mülahizələr söyləmək çətindir. Hər halda, çağdaş poeziya ilə bağlı gileyi söyləməzdən əvvəl obyektiv həqiqəti aşkara çıxaran tarixiliyə istinad edərək bir neçə mülahizəni söyləməyə bilmərik. I. Çağdaş Azərbaycan poeziyası əsrin önlərində öz klassiklərinin simasında fəlsəfi-intellektual poeziya təmayülünü inamla davam etdirir. Biz bu mülahizəni irəli sürərkən B. Vahabzadənin, F.Sadığın, Ç.Əlioğlunun, Ə.Salahzadənin, R.Rövşənin, R.Behrudinin, V.B.Ödərin, V.Səmədoğlunun, V.Bəhmənlinin axtarışlarını nəzərdə tuturuq.
II. Heca vəzni və xalq şeiri üslubunda yazan şairlər; III. Əksinə, posmodernist istimaqətdə yeni formalar tapmağa, həyat həqiqətini yeni rakurslardan təqdim etməyə cəhd etmiş şairlər: Ç.Əlioğlu, Q.Ağsəs, M.Mehdi, Aqşin, S.Babullaoğlu, Ə.Əsgəroğlu, B.Sadıq, Səhər və s. Bədii əsərin təmayül prosesi yüzilliklərdir sübut edir ki, nəsr və dramaturgiya yox, məhz poeziya tarixi inkişafın heç bir qanunauyğunluqlarına tabe olmur. Bununla biz heç də böyük Aristotelin "poeziya tarixdən daha ciddidir" kimi məşhur tezisinə etiraz etmək fikrində deyilik. Lakin hansı vəzndə yazılmasından asılı olmayaraq, öz ahəngində insan qəlbinin ritmini qoruyan poeziya min il bundan sonra da insan qəlbinin ilahi döyüntülərini tarixin uca zirvələrindən keçərək əbədiyyətə aparacaq.
Ötən il dramaturgiyada : 1. Elçin Hüseynbəyli "Sezar" - iki hissəli dram (Azərbaycan, ¹ 4, 2008) 2. Əli Əmirli "Hasarın o üzü" - iki hissəli dram (Azərbaycan, ?8, 2008)
3. Əjdər Ol "Dubay vaxtı" - iki hissəli satirik komediya (Azərbaycan, ?9.2008); Nəsrdə - Fikrət Qocanın "Dayanacaqda görüş", Məmməd İsmayılın "Bayat", Azər Abdullanın "Sarı Tağ", Paşa Qəlbinurun "Qara su", Aydın Talıbzadənin "Kəpənək modeli 102" Cəmilə Mansurovanın "Ruhən güclü", İlqar Fəhminin "Kölgəboğanlar", Kamil Əfsəroğlunun "Xəzri" roman və povestləri ilə yadda qalmışdır. Dramaturgiyadan və nəsrdən fərqli olaraq ötən il poeziyada, təxminən eyni imzalara rast gəlinir. Lakin bir sıra şairlərimiz var ki, onlar son illər poeziyanın ağır çəkisini qoruyub saxlayır, əzmlə müasirliyini və tarixiliyini illərdən-illərə ötürürlər. Hər il olduğu kimi bu il də "Azərbaycan" jurnalının poeziya guşəsi Azərbaycan xalqının böyük elm xadimi, mərhum şairimiz Bəxtiyar Vahabzadənin şeirləri ilə başlayır: "Gülüstan-Qarabağ", "Əl açdıq göylərə", "Bir rica", "Vicdan şahidliyi", "Üçüncü göz- könül gözü", "Gecikmə" və "Dünyaya gəlməmiş". Xalqının yüz illər boyu təşəkkül tapmış milli - mənəvi dəyərlərinin qorunması, adət - ənənələrinin yaşadılmasından, azərbaycançılıq məfkurəsindən çoxsaylı əsərlər, şeirlər yazan şair, sonda boyük müqəddəs bir yolun dar dalanında "Dünyaya gəlməmiş" şeirini təqdim edir:
Yolum dar dalana dirənib artıq, Sağ - solum dağ - dərə, qarşım qaranlıq. Çaşmışam, ağlım da çatmır dadıma, Özüm hay verirəm öz fəryadıma. Düşdüyüm dalanın yoxmudur sonu? Dünyaya gəlməmiş hardan bileydim, Dünyanın bu qədər puç olduğunu.
(Azərbaycan ?1, 2008)
Bu ənənələri davam etdirən, xüsusilə vətənpərvərlik mövzusuna müraciət edən şairlərimizdən Ələmdar Quluzadənin, Firuzə Məmmədlinin, Zeynal Vəfanın, Kəmalə Nəsrinin, Taleh Həmidin, Əzizə Ağahüseynqızının, Şövkət Zərin Horovlunun, Sultan Mərzilinin, Mahirə Abdullanın bir sıra şeirlərini misal gətirmək olar. Bu sırada Ələmdar Quluzadənin poeziyası özünə diqqəti daha çox cəlb edir. Son on beş-iyirmi ildə Azərbaycan xalqının başına gələn bütün faciələr Ələmdar Quluzadə poeziyasında öz əksini tapmışdır. Onun poeziyasını "Qarabağnamə", "Vətənnamə" də adlandırmaq olar. Müharibənin ilk günlərindən bu günümüzə qədər onun tükürpədici şeirləri "Gözlə, Xocalı, gözlə", mükəmməl poemaları "Qarabağ oyunu", "Şəhid şəhər", "Alay komandiri" və sair kimi digər şeirləri, poemaları və kitabları oxucular tərəfindən ürək yanğısı ilə oxunmuşdur. Ələmdar Quluzadənin poeziyasının böyüklüyü onun milliliyində və müasirliyindədir.
Tarixin təkrarı vecimə deyil, Səhvlərin təkrarı üşüdür məni
Ötən il şairin "Vətən eşqi", "Bir şəkillə söhbət", "Ehtiyac", "Keçib", "Hara tələsirik ki", "Dərzi, sənə qurban olum" şeirləri nəşr olunmuşdur. Aşağıdakı şeirdə şair vətənə məhəbbətini sadə, amma çox poetik dildə ifadə edib:
Qartal kimi millənərəm göylərə Lələyimdə vətən eşqi görərsən. Çəmən olub ayağını öpərəm, Çisəyimdə vətən eşqi görərsən. Tütəyimlə dağı - daşı dindirdim, Mən yandıqca alovlanar təndirim.
Poemaya marağın azalmaması ədəbi prosesdə müsbət haldır. Lakin poemanın özünəməxsusluğunun - epik vüsətinin azalması, artıq bu, mənfi hadisədir. Bu baxımdan müəyyən qədər özünü doğruldan dörd poemanı diqqətinizə çatdıra bilərik.
1. Məmməd İlqarın "Qaratel"; 2. Fuad Vəliyevin "Rekviyem"; 3. Məmməd Kazımın "Fateh"; 4. Ramiz Məmmədzadənin "Zirvə".
Ulu öndərimiz, ümummilli lider Heydər Əliyevin həyatına, keçdiyi müqəddəs yollara işıq salaraq qələmə alan Ramiz Məmmədzadənin "Zirvə" poemasından bir neçə hissəni nəzərinizə çatdıraq:
İnsan zirvəsi var, bu zirvə haqdır Dumanlı zirvəyə gün düşə bilmir, Namərd kor quyudu, zirvəsi yoxdu, Mərd var, zirvəsinə yetişə bilmir. Sönməz şölələri ulduzlarla tən Qaranlıq yollara işıqlar səpən Ayı salamlayan, günəşi öpən Heydər zirvəsidir, Heydər zirvəsi.
Poeziyada digər maraqlı fakt, şairlərimizin, klassik şeir janrlarına - qəzələ, qoşmaya, bayatıya olan meylidir. Orta əsrlər Azərbaycan və yaxın Şərq ədəbiyyatının bənzərsiz lirik janrı olan qəzələ marağın artması müasir ədəbi prosesin diqqətə layiq hadisəsidir. Bu, hər şeydən əvvəl onunla bağlıdır ki, poeziyada novatorluq ənənəyə münasibətin konkretliyindən irəli gəlir. Yeni əsrin əvvəlindən bu günümüzə qədər, bu nəcib sənəti yazıb - yaradan Mahcamalın və Sona Xəyalın qəzəlləri diqqətəlayiqdir. Mahcamalın "Bağışlamaz", "Qaytar", "Gəlmir", "Bənövşə", "Çəpər keçir", Nigar Rəfibəyliyə yazdığı təxmis və bir də ötən ilin ən təqdirəlayiq - "Olasan" qəzəli:
Dəli şeytan mənə eylər belə tən, "canva qadam" Qəzet aç, ya da ki jurnal, olasan sən də adam. Gəzəsən şəstilə dünyadan alıb hər cürə kam, Belə bir işlə bütün aləmə səyyar olasan, Gərək ol cürət üçün şeytana həmkar olasan. Öz-özündən də gərək çox yazasan şöhrət üçün, Alasan gündə mükafat sözünə hörmət üçün. Düzəsən şəklini hər yerdə nida, heyrət üçün, Eyləyib diqqəti cəlb, çox kəsə dildar olasan, Gərək ol cürət üçün şeytana həmkar olasan.
Ötən illərdə Vətənpərvərlik mövzusunda yazdığı "Çəpər keçir" qəzəli isə daha maraqlıdır:
Bağlarımız çəpər-çəpər, bölüm-bölüm, dilim-dilim, Kəsik-kəsik, Vətən gəlir göz önünə, yanır dilim. Necə söküm çəpərləri bütöv olsun Azərbaycan, Nə vaxtacan nalə çəksin, saçın yolsun Azərbaycan?
Mahcamalın poeziyada mövqeyi heç kəsə bənzəmir. Mübaliğəsiz və təmənnasız:
Yazaram, mən nə o Sabir, nə də Pünhan olaram, Azı rişxənd hədəfi tazə qəzəlxan olaram Ölənimdən, gedənimdən, əzəlimdən yazaram, Qəmi eşq içrə üzəndən, xəzəlimdən yazaram.
Qəzəl fəlsəfi fikri ifadə etməyin ən gözəl poetik şəklidir, gözəlliyi dərk edən ən mükəmməl lirik şeir formasıdır. Lakin gözəl keyfiyyətlərlə yanaşı, bu gün poeziyada tənəzzülü əks etdirən bir neçə əlamət də özünü göstərməkdədir: 1) Şeirə pafoslu adın qoyulması. Şeirə pafoslu, diqqəti cəlb edən uzun-uzadı ad qoyulur, mətni oxuyub başa çıxırsan, həmin addan şeirdə heç bir əlamət tapmırsan. Burada sual meydana çıxır: görəsən şair nə demək istəyir? Ad? Yoxsa poeziya?! Gəlin bəzi şeir adlarına diqqət yetirək: Mina Rəşidin "Bəlkə çoxunun keçə bilmədiyi sədləri keçmişəm", "Aşkım gəlib görsəydin ölmüşəm neylərdin?", "Dəmir vaqonlar və didərgin körpələr" əvəzinə - "keçmişəm", "neylərdin", "didərgin körpələr" adları daha nəcib və daha maraqlı səslənmirmi? Yaxud, Hikmət Məlikzadənin - "İblisdən dərs aldıq adam şəklində", "Dünən səni gözlərimə mismarladım yuxu kimi", "Gecənin ahəngini pozur enməyə tələsən təyyarələrin uğultusu", "Göy yerdən yekəydi, yer olmayanda" və s. Kimi şeir adları daha çox hekayə cümlələrinə bənzəyir. Yaxud, "Vətən, mənim yerim hanı?" deyərək vətənə yersiz suallar verənlər də var. Güloğlan Dünya:
Yada sinə gərə-gərə Ögeyliyi görə-görə Parçalandıq neçə yerə Vətən, mənim yerim hanı?
2) Meyxanavari şeir. Bir zamanlar hamımız Sovet dönəmində mərsiyə və meyxana poeziyasının yasaq olduğundan şikayətlənirdik. Allaha çox şükür ki, nə klassik mərsiyə ustalarının - Racinin, Qumrunun, Dəxilin poetik irsini öyrənilməsinə heç kim mane olmur, nə də meyxana sənətinin təbliğində heç bir əngəl yoxdur. Meyxanaçılarımız sözün həqiqi mənasında həm mətbuatda, həm də efirdə istədikləri kimi meydan sulayırlar. Lakin bizi narahat edən özgə bir təmayüldür - meyxanavari şeir. O şeir ki, hələ XIX əsrin önlərində öz epiqon xarakteri ilə böyük Mirzə Fətəli Axundovu narahat etmişdi. İndi isə şairlərimizin bəzi şeirlərinə diqqət yetirək. Ətraf Alməmməd oğlunun şeirindən bir parça:
Qapım döyüldü: -- kimsən? -- sən. -- Açdım. - kim? -- Salaməleyküm. -- əleykümmə salam. Söhbətimiz bununlada bitdi. Vəssalam, bir yaşlı adam Ərklə keçdi içəri. Qamətini bir qədər əymişdi Yaşadıqca çiyinlərinə atdığı illəri, Həm mənə oxşayırdı. Həm də rəhmətlik atama. Çox şeylər düşdü yadıma Baxdıqca bu adama.
Mövzu baxımından bəlkə də maraqlı bir esse yazıla bilərdi, amma, poeziyadan çox, meyxanaya yaxındır. Yaxud, Əkbər Qoşalının şeirinə baxaq:
Atamızdan olmuşuq atamızdan olmuşuq. Atamız dan olmuşuq "axşam" ola bilmərik. Biz söz ilə böyüdük Bir söz ilə böyüdük, "axşam ola bilmərik.
3) Son illər onlarla elə şeirlər çap olunub ki, onların müəlliflərini yalnız toyxanaların tamadalarına bənzətmək olar. Çünki bu şeirlər qohum-əqrəbaya, qonşuya, dosta həsr olunmuş tostlardan uzağa getmir. Belə şeirləri oxuyanda Sovet dövrünün əmək qəhrəmanlarına yazılmış nümunələr (o dövr üçün bu hardasa maraq doğururdu) yada düşür:
Dağların başında günəş doğuldu, Dağların qoynunda bir qız doğuldu. N.Xəzri "Günəşin bacısı" Yaxud, Maral dedi bir qardaşın Sənə Tərlan, Maral kimi boylanırsan Cərgələrin arasından.
(N.Həsənzadə)
Diqqətinizə çatdırdığım şeir parçalarındakı qəhrəman yaşayır, poeziya isə ölüb. Bu Azərbaycan şeirinin acı bir təcrübəsidir. O dövr üçün belə şeirlər insanlarda əməyə, torpağa həvəs, yaşamaq üçün müəyyən stimul verirdi. Bu gün isə belə şeirlər yalnız məhdud dairəni (həsr olunmuş qəhrəmanın yaxınları) özünə cəlb edir. Nəzərinizə çatdırdığım bu cəhət heç də həyatında hər hansı bir itkinin acısını yaşamış, onun psixoloji sarsıntılarından doğan səmimi fikirlərə aid deyildir. Əksinə poeziyanın və oxucunun səmimiyyətə həmişə ehtiyacı var. Belə şeirlərdə şair öz hisslərini oxucusu, oxucu isə misralarla bölüşür. Adil Cəmilin torpaq, qələm və oxucu ilə bölüşdüyü kimi:
Ağlaya bilmirəm qəbrin önündə Göz yaşı gizlicə axır icimə Səndən ayrı düşən ağlar günümdə Ağlaya bilmirəm, məndən incimə. Məni ovundurar göz yaşı çətin, Xəyalın yolundan yığışmır ata, O qədər böyükdür sənin həsrətin Gözümün yaşına sığışmır ata. "Ağlaya bilmirəm"
Yaxud, Fərqanə Mehdiyevanin:
Gəzirəm qərib-qərib Nə ümid var, nə inam Adam qalmır soruşam Hayana gedib anam? Dindirəndə "can" deyən Adımı qoyub gedib. Möcüzəyə bax, Allah, Dəli kimi sevdiyi, Atamı qoyub gedib. "Hayana gedib anam?"
Sona Xəyalın:
Sinəmdə qövr edən ana dağıdır, Elə bilirəm ki, dörd yanım gedib. Ay ellər, ömrümün xəzan çağıdır, Bir-bir illərimi sayanım gedib. Daha itirmişəm hesablarımı, Gizləyə bilmirəm hesablarımı Təzə nəşr olunan kitablarımı Öpüb göz üstünə qoyanım gedib.
Və bir də Əjdər Olun --- "anamı xatırladım":
Qızcığazım anlamır, anam olub mənim də, bilmir ki, anam kimi, dayanıbdır önümdə. Bilmir nə gündə idim Onun dəfn günündə
Anamı xatırladım… --- bu kimi şeirlər təbii, səmimi hissləri ifadə edir və oxucuya səbrli olmağı öyrədir, hər şeyə rəğmən həyatını davam etməsinə, yaşamağa güc verir. Şeirlə səmimi rəftar edən şairlərimizdən biri də Qəşəm Nəcəfzadədir. Şeirləri ayrı - ayrı mövzularda olsa da, sanki biri-birinin davamıdır. Onun poeziyasını ümumiləşdirib belə adlandırmaq olar---"Həyat etüdləri", bir şeirinin adı kimi. "Yenə elə-belə", "Pəncərə şüşəsi", "Təqvim" və s. Həmişə gənc şair hələ də ya bir fənn müəlliminə vurulur, ya da skamyada ad yazan gənci xatırladır:
Sahil bağında Skamyalara yazılmış adlar İslanmış sərçələr kimi civildəşirlər Vaxtilə biz də sevmişik. İndi biz bu adlara təsəlli olmayaqmı?
Lakin şairin şeirlərində yaratdığı təkrar ifadələr o qədər də uğurlu alınmamışdı, əksinə oxucunu yorur, şairin incə ruhlu şeirlərinə kobud ahəng qatır:
Yaxşı ki, mən sənə zəng elədim Yaxşı ki, sən də telefonu söndürdün Yaxşı ki, mən də səbəbini soruşdum Yaxşı ki, sən də məni sevmədiyini Söylədin. "Atətsayağı".
Ümumiyyətlə, ötən ilin poeziyasında novatorluğa meyl çox az nəzərə çarpır. Səhv etmirəmsə, 2006-cı ilin Azərbaycan jurnalının II nömrəsində 2005-ci ilin poeziyası ilə bağlı sorğuda Qulu Ağsəs belə bir lakonik fikirlə cıxış edirdi: "ötən ili poeziyasına baxanda xeyli gözəl nümunələr görürəm. Arasında az da olsa özümü də görürəm". Az da olsa, əsl poeziya nümunəsidir:
Bunu ancaq sənə danışıram Bircə balama: Kasıb evində bağlanmış Turşu bankasıdır atan Ağzı hərdən açılır - Bayramdan - bayrama. Sənin dünyaya gəlişin də Bayramdı deyə.
Mövzuya müasir yanaşaraq, onu müxtəlif rakurslardan işıqlandırıb, oxucunu yormadan, onun ruhunu incitmədən ən çətin problemləri həyatın tempinə, axarına cilalayan şeirlərdən danışmaq istərdim. Həmişə müasir modern yazıları ilə Çingiz Əlioğludan:
Həyat enerjisi hansı filizdə Gizlənib, kim bilir…bəs neçə faiz? Sənə bəxş olunub…məlum deyildir.
Balayar Sadıqın adsız şeirlərindən:
İlahi, bu daş kor olacaq Gözünə tökülən sükutdan…
yaxud,
həsrətinin ad günüdür… gözlərim kədər dolu qədəh sənin sağlığına…
Hicran Hüseynovanın - "Zikr et":
Sözlər çırpınır ki, Uçsun dodaqdan: Zikr et! Səhər. Bir qadın dayanıb uzaqda əlində söz dolu dəftər Sözlərin ən böyüyü səslənir qulağında Zikr et!
Maarif Soltandan:
Deyirlər vaxt gələcək… O vaxt nə vaxt gələcək? Bir may səhəri günəş doğanda? Bir qaranlıq gecəmi, Kədər məni boğanda? Yasəmən fəslindəmi, Ömrün sevgi çağımı? Bəlkə elə indidən qızdırım otağımı Qoy gəlib üşüməsin, Qoy gəlib düşünməsin.
Səyyarə Məmmədlidən:
Gəldiyi yolların sonunda Qoyulan Nidalı sual işarəsinə bənzəyir Əsalı qocalar.
Kəramətin, Nisəbəyimin, Zahid Sarıtorpağın şeirlərini də bu təmayülə aid etmək olar. Poeziya özünü bir çox istiqamətlərdə sınamış, eksperimentlərə çalışmış və bu eksperimentlərlə də bir sıra meyllərə axın yaratmışdır. Poeziyada digər bir sevindirici hal AYB - nin bölgələrdəki inkişafıdır. AYB-nin Sumqayıt şəhər bölməsində "Zərif qadınlar" məclisindən ---Xatirə Fərəcli, Nisə Qədirova, Rəfiqə Şəms; Bərdədən --- İsa Sevər, Xasay Mehdizadə, Kamil Vəfadar, Telman Hüseyn, Sevinc Nəcəfzadə, Həsən Baba,Tapdıq Türksoy, Əvəz Salahlı, Rizvan Nəsiboğlu; Qubadan ---Ramiz Qusarçaylı; Ramiz Qusarçaylının poeziyada özünəməxsus istiqaməti var. O, öz şeirlərini oxucusuna səlis dillə, kövrək hisslərlə çatdırır. Mövzuya fərqli poetik yöndən yanaşaraq, eyni həssaslıqla oxucunun qəlbinə yol tapması bu şeirlərin uğurudur. O, öz poeziyası ilə dövrünün bütün hadisələrinə həm vətəndaş, həm də bir şair kimi münasibət bildirir. Ərik ağacına olan arzusu kimi:
Qeyrət başı bağlı, Dərd başı açıq Səhər ürək götür, dərd başına çıx… Ağaclar Şuşada qurğuşun açır, Bu yaz çiçəklənmə, ərik ağacı.
Özünü müxtəlif janrlarda sınamış - qoşma, təmsil, qəzəl yazaraq çıxış edən - Bəxtiyar Ərşadın:
Ölüm, çevir gülə məni, Ağla gülə-gülə məni, Yaşadırsa hələ məni, Şükür, bu dünyaya, şükür.
Nəcimə Babayevanın, Tofiq Nurəlinin və s. kimi bəlkə də diqqətimdən yayıınan şairlərin adlarını cəkmək olar. "Yazıçı qadınlar" jurnalında nəşr olunan Sona Xəyalın, Nafilə Abuzərin, Şəhla Günayın, Qərənfil Xəlilovanın şeirləri maraqla qarşılanmışdır. Bir çox mülahizələrimizi burada saxlayıb, belə bir obrazlı müqayisə aparardıq: "Çağdaş Azərbaycan poeziyası hələ ki, özgə köynəyi geyinmiş oğlana bənzəyir, ümid edək ki, bu oğlan böyüyəcək".
|
|