|
Azərbaycanda elə yaradıcı şəxslər var ki, onları obyektiv qiy-mət-ləndir-mək üçün yaşadıqları dövrün inkişaf mərhələləri ilə birlikdə öyrənmək lazımdır. Azərbaycan ədəbiyyatı tarixində görkəmli yer tutan Əbdürrəhimbəy Haqverdiyev (1870-1933) dramaturq, nasir, ictimai-siyasi xadim, pedaqoq, ədəbiyyatşünas-alim, rejissor-publisist və Azərbaycan musiqisini dərindən bilən bir mütəxəssis kimi tanınmışdır. Onun "Dağılan tifaq", "Bəxtsiz cavan", "Ağa Məhəmməd şah Qacar", "Köhnə dudman" və s. kimi pyesləri Azərbaycan dramaturgiyası tarixində ən dəyərli əsərlərdəndir. Xalqın həyatından, məişətindən bəhs edən maraqlı, orijinal hekayələri Haqverdiyevi bir nasir kimi məşhurlaşdırmışdır. Bu hekayələr mövzu müxtəlifliyi və şirin təhkiyəsi ilə Azərbaycan nəsrinin inkişafına müsbət təsir göstərib. "Şeyx Şəban", "Bomba", "Seyidlər ocağı", "Ac həriflər", "Mirzə Səfər" və s. hekayələri real həyat həqiqətlərini özündə əks etdirərək, dərin məzmunlu nəsr əsərləri kimi xalq tərəfindən sevilmiş, müəllifinə şöhrət qazandırmışdır. Azərbaycanda ilk elmi-tədqiqat müəssisəsi "Azərbaycanı tədqiq-tətəbbö cəmiyyəti"nin təşkilindən (1924) sonra bu cəmiyyətin rəhbərlərindən biri də Ə.Haqverdiyev olmuşdur. Ə.Haqverdiyev dram və nəsr əsərlərində toxunduğu mövzulara publisist məqalələrində daha dərindən müdaxilə etmiş, konkret şəkildə, dövrün aktual, həlli vacib məsələlərini açmış və onlardan bəhs etməyə cəhd etmişdir. "İki il", "Beş il", "Mirzə Fətəlinin faciəsi", "M.Fətəli və ərəb əlifbası", "M.Fətəlinin həyat və fəaliyyəti", "Pəri cadu" haqqında, "M.Qorkinin həyat və yaradıcılığı", "Molla Nəsrəddin" haqqında xatirələrim", "Azərbaycanda xalq tamaşaları və dini tamaşalar", "Azərbaycanda teatr", "Əski və yeni ədəbiyyat nümunələri", "Heca vəzni", "Ədəbi dilimiz haqqında" və s. məqalələrində Əbdürrəhimbəy onu əhatə edən mühitdə rastlaşdığı müxtəlif problemlərdən söhbət açaraq onun həllinə çalışmışdır. 1905-1907-ci illər hadisələri Ə.Haqverdiyevin yaradıcılığında yeni dövr açır. O, 1905-ci ildən etibarən son dərəcə istedadlı nasir və publisist kimi tanınmış və "Molla Nəsrəddin" (1906-1931) satirik jurnalının görkəmli nümayəndəsi kimi özünü göstərmişdir. Ədəbiyyatşünas alim Əziz Mirəhmədov yazır: "Bu böyük tarixi vəzifələrə hərə öz bacardığı şəkildə əməl etmişdi. M.Ə.Sabir şeir yazdı, C.Məmmədquluzadə "Molla Nəsrəddin"i təsis etdi, M.Hadi romantika yolunu tutdu. Ə.Haqverdiyev isə öz xırda və böyük hekayələrində, klassik dramlarında, məqalələrində bütün milli varlığımızı təfər-rüatı ilə əks etdirməyə başladı" ("Ədəbiyyat qəzeti" 20 may, 1949, ¹14 (412). "Molla Nəsrəddin" jurnalının nəşrindən sonra zəngin yaradıcılıq yolu keçən Ə.Haqverdiyev artıq xalq tərəfindən tanınan və sevilən bir yazıçı idi. O, "Molla Nəsrəddin"in üslubuna tabe olaraq, satirik hekayələr ustası kimi daha çox şöhrət qazanmışdı. Həqiqi xalq məcmuəsi kimi meydana çıxan "Molla Nəsrəddin"in və Ə.Haqverdiyevin arzu istəkləri, fikir və niyyətləri arasında daxili bir yaxınlıq, bağlılıq vardı. Bu jurnal Azərbaycanın qabaqcıl düşüncəli, maarifpərvər ziyalılarını öz ətrafına toplamışdı. Oxucuların səviyyəsinə uyğun, sadə xalqın asanlıqla anlayacağı dildə yazıb-yaradan yazıçılar, bu jurnalda ən əhəmiyyətli, ən mürəkkəb ictimai-siyasi məsələləri, xalq həyatının ən vacib problemlərini asan şəkildə oxuculara çatdırırdılar. "Molla Nəsrəddin" jurnalının simasını təyin edən mühərrirlərdən biri kimi jurnalın ədəbi-siyasi cəbhəsini C.Məmmədquluzadənin felyetonları, M.Ə.Sabirin satiraları və Ə.Haqverdiyevin hekayə və məqalələri müəyyən etmişdi. Ə.Haqverdiyevin yaradıcılığının 2-ci dövrü 1905-ci il hadisələrindən sonra başlanır. Bu dövr onun yaradıcılığına yeni ideya, məzmun, mövzu verdi. O, mollanəsrəddinçilər cərgəsinə qoşularaq jurnalda yazıçı, publisist kimi məşhurlaşdı. "Molla Nəsrəddin"in redaktoru, yazıçı C.Məmmədquluzadə 1927-ci ildə Ə.Haqverdiyevin ədəbi fəaliyyətinin 35 illiyi ərəfəsində yazırdı: "Ə.Haqverdiyev hər şeydən qabaq "Molla Nəsrəddin" məcmuəsinin ibtidasından ta bu vaxtadək məcmuənin ən yaxşı əməkdaşlarından və məsləhətçi dərəcəsində yoldaşlardan hesab olunur. Qoca əməkdaşlarımızın bu günlərdə təhiyyə olunan yubileyini "Molla Nəsrəddin" məcmuəsi idarəsi öz bayramı kimi alqışlamışdır" ("Molla Nəsrəddin" jurn., 1927, ¹1). Ə.Haqverdiyev jurnalın ən yaxşı əməkdaşlarından biri kimi hekayə və publisist əsərlərində xalqı ətalətdə saxlayan seyidlərə, dərvişlərə, yüzbaşılara qarşı amansız olmuşdur. "Molla Nəsrəddin"in üslubuna uyğun satirik əsərlər yazan ədibin orada çap olunan ilk əsəri "Xortdanın cəhənnəm məktubları" idi. Xortdanın cəhənnəmdən göndərdiyi məktublar jurnalda silsilə şəkildə, 1907-ci ildən nəşr olunmağa başlamışdı. Cəhalət və istismar cəmiyyətinə qarşı kəskin satira olan "Xortdanın cəhənnəm məktubları"nda yazıçı cəhənnəmi mənfi tiplər məskəni mənasında təsvir edir, tənqid etdiyi tipləri daha qabarıq və canlı vermək, onun ifşasını gücləndirmək üçün sadə xalq danışığından istifadə edirdi. Xalqın yeni həyata olan arzu və istəklərini bədii yaradıcılığında əks etdirən humanist sənətkar, dövrünün müxtəlif ideyalarından ilham almış, müxtəlif imzalarla "Molla Nəsrəddin" jurnalında çıxış edərək insanları elmə, maarifə, tərəqqiyə səsləmişdir. Onun "Xortdan", "Lağlağı", "Həkimi-nuni-səgir", "Ceyranəli", "Mozalanbəy" və s. gizli imzalarla çap etdirdiyi yazıları jurnalın ən dəyərli əsərlərindən hesab olunurdu. Təsvirlərin genişliyi, hadisələrin inandırıcılığı və maraqlı verilməsi, mənalı gülüş bu əsərlərin əsas ruhunu təşkil edir. Ə.Haqverdiyev "Molla Nəsrəddin" jurnalında (1913, II iyul) nəşr etdirdiyi "İki il" adlı məqaləsini Azərbaycan ədəbiyyatı tarixində kəskin satiraları ilə yeni səhifə açan, yeni üslubu ilə başqalarından fərqlənən, mübariz, satirik şair M.Ə.Sabirin ölümünün 2-ci ili münasibətilə yazmışdır. Bu məqalədə ədib Sabirin mərd, heç kəsdən çəkinməyən mübariz bir sənətkar kimi tanıdığını, özünün də onun davamçısı olduğunu sübut etməyə çalışmışdır. O, Sabirin işfa hədəfi olan, hər addımda öz şəxsi mənafeyini güdən hacıları, məşədiləri, tacirləri, cəhalət xülyası ilə xalqı aldadan riyakar ruhaniləri tənqid edib, onları satira atəşinə tutmuşdur. Bu məqalədə ədib Sabirin simasında üsyankar bir şair qələminin sındığını, mübarizə meydanında xalqın acı taleyinə biganə qalmayan bir sənətkarın yox olduğunu, tüfeylilərin inkişafına zəmin yarandığını ürək ağrısı ilə təsvir edir: "Qəm çəkənlərimiz az, istirahət edib, plov yeyənlərimiz çox, oda yanıb vərəm gətirənlərimiz az, bihəya, boynuyoğun, "millət necə tarac olur-olsun" deyənlərimiz çox. Camaatın hər tərəfindən işıq gələn yollarını kəsib, qaranlığa salıb, cibini kəsənlərin hesabı bihəddü-payan, amma Sabirimiz bir, o da qara torpaq altında" (Ə.Haqverdiyev. Əsərləri 2 c., Lider nəşriyyatı, Bakı, 2005, s.322). Məqalədə əsas məqsəd Sabir sənətinə xas olan mübarizə ənənələrini yeni dövrdə davam etdirməyi təbliğ etmək idi.O, Sabirsevənləri, onun yolunu davam etdirənləri bu işdə daha çox çalışmağa, qələmlərini xalqın xeyrinə yönəltməyə, onu daha da kəskinləşdirməyə ruhlandırırdı. Sabir şeirinin əsas məzmununu bütün varlığı ilə dərindən duyan və hiss edən ədib, qabaqcıl ziyalıları zamanın tüfeylilərinə qarşı mübarizədə fəal iştirak etməyə çağırırdı. M.F.Axundzadənin şəxsiyyətinə və yaradıcılığına dərin hörmət edən Haqverdiyev onun xalqın tərəqqisi və maariflənməsi yolunda gördüyü işləri yüksək qiymətləndirirdi. O, M.Fətəlinin xalqa bağlı, hərtərəfli, geniş fəaliyyətini, onun ictimai və bədii fikir tarixindəki mövqeyini dürüst təyin edir, onu Azərbaycan nəsri və dramaturgiyasının banisi, mütəffəkir bir şəxsiyyət kimi təqdim edirdi. Azərbaycan dramaturgiyası tarixində faciə janrının banilərindən biri kimi məşhur olan Haqverdiyev həyat faciəsini doğuran ictimai səbəbləri dərindən duyurdu. O, M.F.Axundzadənin ölümünün 50 illiyi münasibətilə yazdığı "Mirzə Fətəlinin faciəsi" ("İnqilab və mədəniyyət" jur., 1928, ¹3) adlı həcmcə kiçik, lakin mənaca dərin olan məqaləsində dramaturqun faciəsinin ictimai-siyasi şəraitlə, real zəminlə sıx əlaqədə olduğunu açmışdır. Müəllif M.Fətəlinin faciəsini bütün xalqın faciəsi hesab edir, ölümündən sonra cənazəsinin 3 gün evdə qalması, mollaların onu dəfn etməkdən imtina etməsini hüzn və dərin kədərlə təsvir edirdi. 1911-ci ildə Ə.Haqverdiyev M.F.Axundzadənin anadan olmasının 100 illik yubileyi günlərində onun yaradıcılığına həsr etdiyi "Xəyalət" pyesini yazmışdır, Burada sənətkarın arzusu, işi, mübarizəsi əyani şəkildə əks olunub. O, Axundzadənin komediyalarında iştirak edən tipik surətləri geniş tamaşaçı kütləsinin zehnində canlandırmaq üçün onları yenidən səhnəyə çıxarıb M.Fətəli ilə görüşdürür. Rəiyyəti adam yerinə qoymayan hatəmxanağalar, öz cibinin mənfəətini güdüb, dinini, imanını, vicdanını pula satan hacı qaralar, cadugərliklə xalqı aldanan, dərviş məstəli şahlar, Molla İbrahimxəlil kimyagərlər və s. M.Fətəlinin tənqid hədəfləridir. Haqverdiyev M.Fətəlinin nə qədər çətin bir şəraitdə yazıb-yaratdığını müasirlərinə xatırladaraq, onun nəcib simasını məharətlə çanlandırır. "Azərbaycan teatrı" məqaləsi ilk dəfə 1934-cü ildə "Teatr və dramaturgiya" jurnalının (rus dilində) 12-ci sayında çap edilmişdir. Haqverdiyev məqaləsində Yunanıstanda və Avropada teatrın əmələ gəlməsi və inkişafından danışdıqdan sonra Şərq teatrının da xalq oyunları və mərasimləri ilə bağlı olduğunu göstərmişdir. Xalq oyunlarının dramaturji xüsusiyyətlərindən ayrıca danışan ədib M.Fətəli ilə yaranan dramaturgiyanın inkişafı və Azərbaycanda təşkil olunmuş teatrdan bəhs edir. O, Azərbaycanda teatrın bünövrəsini qoyan (1873) Nəcəfbəy Vəzirovun, Azərbaycanda ilk dəfə tarixi dram yazan N.Nərimanovun ("Nadir şah", 1890) xidmətlərini də lazımınca qiymətləndirir. Azərbaycan teatrının inkişaf yolunu göstərən və bu haqda ilk ciddi məqalə yazan Ə.Haqverdiyev burada teatr tarixindən qısa da olsa bəhs edir. Ədib məqalədə İranda geniş yayılmış küçə sehrbazlarını, kəndirbazları təfərrüatı ilə təsvir edir. Sonra isə doğru olaraq, Azərbaycanda mədəni inkişafın, maarifin mühüm sahəsini təşkil edən teatrın yüksək inkişaf mərhələsinə çatdığını qeyd edir və belə nəticəyə gəlir ki, hər bir xalq öz milli mənliyini, qürurunu qorumaqdan ötrü həyat səhnəsinə atılmalı, onun mədəni inkişafına maeçilik törədənləri yaramaz qüvvələrdən çəkinmədən, qorxmadan aradan götürməyi bacarmalıdır. Bunun üçün də xalqın birliyi, mətanəti və polad iradəsi olmalıdır. Bütün imkanlardan istifadə edən Haqverdiyev elmi məqalələrində də yeri gəldikcə xalqın məişətindən və ictimai-siyasi vəziyyətindən bəhs etmişdir. Onun ""Pəri cadu" haqqında qeydlərim" məqaləsi 1943-cü il, 12 dekabrda "Ədəbiyyat qəzeti"ndə nəşr edilmişdir. Bu məqalədə ədib xalqı mübariz olmağa çağırır və yazır ki, hər bir şəxs qarşısına qoyduğu məqsədə çatmaq üçün bütün çətinliklərə dözməli və öz səadətini başqalarının bədbəxtliyi üzərində qurmamalıdır. Hər bir insan xoşbəxtliyini və bədxətliyini kənarda deyil, öz-özündə axtarmalıdır, nəfsinin əsiri olan və başqalarına quyu qazanlar, mütləq bəlalarına düşəcək, gec-tez bədbəxt olub, məqsədlərinə çatmayacaqlar. Öz gücünə və əməyinə inananlar isə gec də olsa onun barını yeyəcəklər. Bundan başqa ədib "Pəri cadu" pyesi haqqında yayılan müxtəlif fikirlərə də cavab vermiş və əsərin nə məqsədlə yazıldığını izah etmişdir: "Doxsanıncı illərin (XIX əsr - D.M.) ortasında simvolizm deyilən bir ədəbiyyat üsulu teatr səhnəsinə atıldı. Alman ədibi Nauptmanın "Qərq olmuş can" sərlövhəli faciəsi cəmi mədəniyyət aləminə bir səs saldı. Bu üsulun Şərq ruhuna xeyli uyğun olması məni artıq həvəsə gətirdi. Və mən Şərq həyatından götürülmüş simvolik bir əsəri teatrımız üçün yazmaq fikrinə düşdüm. Nəhayət, 1901-ci ildə "Pəri cadu" əsərini yazdım!" (Ə.Haqverdiyev. Əsərləri 2 c., Lider nəşriyyatı. Bakı, 2005, s.332). Məqalənin müsbət cəhətlərindən biri də ədəbiyyat tədqiqatçıları üçün əsər haqqında dəyərli məlumat verilməsidir. Lakin burada simvolizm haqqında məlumat verilmir. Ə.Haqverdiyevin "Ədəbi dilimiz" məqaləsi 1934-cü il 15 apreldə "Ədəbiyyat qəzeti"nin 7-ci sayında çap olunmuşdur. Bu məqalədə ədib "Molla Nəsrəddin" jurnalının fəaliyyətindən bəhs edərək göstərir ki, bu jurnal ədəbi dilmizi hər cəhətdən korlamağa çalışıb, yad sözləri yerli-yersiz ora qarışdıranlara qarşı oxucuları ayıq-sayıq olmağa çağırır. Onun dediyi kimi Azərbaycan dili hər zaman öz təravət və gözəlliyi ilə xarici təsirlərə uğurla müqavimət göstərmişdir. Ə.Haqverdiyevin elmi və publisist əsərlərində qarşya qoyduğu, həlli vacib olan bir sıra məsələlər dövrümüzdə də öz müasirliyini saxlayır.
|
|