|
Dr. Alim YILDIZ Sivas Cumhuriyyət Universitetinin dosentidir. 2003-cü ildə Sivasda düzənlənən TÜRKSOY 4. Şairlər Buluşmasında iştirakım zamanı Alim bəyi tanıdım. Alim bəyin içdən gələn şeirləri və ciddi görünüşü onu digərlərindən fərqləndirirdi. Bu insanın dilində "yox" kəlməsi yoxdur.
QAR YAĞIR
Qar yağır, Qar yağır və mən bir parkda, altun sarısı bir küçə lampasının altında oturmuşam oturacaqda. Qar yağır və yalnızlığım yağır ürəyimə.
Ürəyimdən incə bir sızıltı, Səkilərdən qara bələnmiş insanlar keçir, əlləri ciblərində, təlaş içində.
Qar yağır, Qəribliyim düşür yadıma, Fərd olduğum, çarəsizliyim. Çıxıb gedirlər bir-bir bəyaz tumurcuqlu çinarlar, bəyaz iynəli şamlar. Sıx-sıx qapanmış pərdəli qara evlər və qara küçə pişikləri. Bircə mən qalıram bu parkda, Bu altun sarısı küçə lampasının altında, bu oturacaqda.
Bir yolçuluq uzanır qürbətdən həsrətlimə, Bolu Dağından bir avtobus, Gözüm görmür gözünü, Gözün gözümü görmür. Göz görmür gözü, Göz-gözü görmür. Qürbətdə qar belə yağar, Vəfasız yar.
Qar yağır Ağ-qara dünyaya, Bəyaz göylərdən. Bəyaz bir türkü gəlib tapır məni, və bir də kəfənsiz ölüləri Fəllucənin, Basranın bu parkda. Altun sarısı bir küçə lampasının altında bu oturacaqda. Alıb aparır məni Basralı Ömər, ağ-qara iqlimlərə.
Qar yağır şəhərlərə hələ, və dünyanın bir guşəsindəki bir parkda, qar altında qalır Kimliyim.
SEVDAYA DAİR
Gizlətmişdi könlüm, kimsə bilməzdi, Sevdanın taleyi beləmi gülüm, Nə qədər baxsam da üzün gülməzdi, Qaçıb gedəcəkdin, eləmi gülüm.
Söndürməkmi, yoxsa yandırmaq işin? Saxta imiş, saxta imiş gülüşün, Anlamı nə, xəbərsizcə gedişin, Səndəki qəlb deyil, yaylamı gülüm?
Yapışdı yaxama, yıxar kədərlər, Karvan-karvan gəlib, tək-tək gedərlər, Sevənlər axirətdə qovuşar derlər, Keçsin bu illərim, vaylamı gülüm?
Gedərkən ardına dönüb baxdınmı, Üzüldünmü, söylə peşman oldunmu, Evləndin, və yaxud nişanlandınmı? Nə olur söyləmə, söyləmə gülüm!
HEÇ NƏ SORMAYIN, LÜTFƏN!
Boğulmuşam, donmuşam, səssizliyin səsində, Tutmayın əllərimdən, işıqları söndürün, Məni məndə buraxın, mən razıyam halımdan, Heç nə sormayın, lütfən!
Vəznli cümlələrim çilələr dərgahında, İtiləndim bıçaq tək, söylənməmiş sözlərlə, Fəqət, mən çox qorxuram, dilimdəki ilandan, Heç nə sormayın, lütfən!
Qovalayır illəri zaman, məkan üstündə, Zehnimdə uğuldayır, keçmişimin səsləri, Xəbərsizəm gedəndən, ümidim yox gələndən, Heç nə sormayın, lütfən!
Qapalı könül gözüm, gerçəklərin yasında, Qatılmayın yasıma, sözdən çələng hörməyin, Görmədim ağlayanı, bəhs etməyin güləndən, Heç nə sormayın, lütfən!
Kainat qoca valın fırladır dizi üstə, Durdurmağa qalxmayın, dönər əzəli bəstə, Hazırlanın soloya, qurtaran yox ölümdən, Heç nə sormayın, lütfən!
Bir xədər gözləyirəm, könlüm dost ölkəsində, Dağıtmayın fikrimi, xəyalları qırmayın, Vida etdim həsrətə, döndərməyin yolumdan, Heç nə sormayın, lütfən!
MƏHƏBBƏT QƏZƏLİ
Yağmalanmış bir ölkədir ürəyim, Qan rəngli gözlərim döyüşdən qalıb.
Sevgim girov düşüb, bir neçə ildir, Sevdanın ünvanı dodaqlarında.
Məhəbbət fərari rəsmlərimdə, Solğun rəngə girmiş fondadır əğyar.
Baldırqan zəhərli hüceyrələrim, Hüceyrələrim baldırqan zəhərli.
Yenə qəm yükünün mehmandarıyam, Bildir, bu il kədər məndə qonaqlar.
Bülbül və Pərvanə Kərəm kimilər, Gözlərim dolarsa, ürəyim qanar.
Əllərim açmazsa qapılarını, Necə qovuşaram sənə, gözəl yar!
|
|