|
|
|
|
|
|
|
|
|
|
|
Qəşəm NƏCƏFZADƏ
|
|
|
|
|
|
KÜLƏYİN ÖLÜMÜ
Bəlkə dünən sındırdığın budaqdı, Oğlum, qapını aç, qapıda bir külək ölür. Bəlkə dünən əkmədiyin ağacdı Bəs niyə qapımızda ölsün bu gözəl külək? Bəlkə bir ağacın kəm gəlibdi yarpağı Qəfil ayağı sürüşüb küləyin. Küləyin sürətidi qadınların saçları Saçlar hanı? Uçub küləyin dirəyi. Külək gərək ata dəyə, at hanı? Külək gərək telə dəyə, tel hanı? Külək gərək sevənlərin arasından keçməyə Deyəsən keçib, oğlum, qapıda bir külək ölür. Külək adama dəyər, qalxar Külək bizə ağacdan baxar O dağdan gələr Bu dağdan çıxar Körpə bir tumurcuq kimi Şümal budaqdan çıxar Külək gərək əldən göyərə Otdan yüksələ Dünyaya bir yaşıl yarpaqdan əsə Gərək pəncərə şüşəsinə külək Zivədə asılmış bir uşaq corabından dəyə Hanı, hanı, külək ölür. Əsdi, əsdi, dəyməyə əl tapmadı, Bir az görünməyə bir tel tapmadı Ətrin daşımağa bir gül tapmadı Bir corab görmədi zivədə yelləməyə Hanı, hanı uşaqlar? Bir yol tapmadı tozunu qaldırmağa Yolu basıbdı otlar. Otların üstüncə sürüşdü külək Qalxa bilmədi ayağa. Oğlum, qapını aç, qapıda bir külək ölür O küləyi ağlayan ən çox sənin Külək kimi qalxan telin olacaq.
Çay simfoniyası
Balıqdan-balığa böyüyər sular Daşlardan-daşlara səs eylər, eylər. Dərələr çayları tutar ovcunda, Gəzdirər dünyanı su söylər, söylər. Elə bil meşələr çay qırağında Şəkil çəkdiribdi asıbdı dağdan. Bilmədik küləklər gəldilər hardan? Şəkli dağ döşündə ha yellər, yellər. Əllərimi çaya salıb gedirəm, Əlimin başına sular dolanır. Balıq balıq bilir barmaqlarımı Gəlib barmağımla qoşa dayanır, Ayə, əllərimi şeir yandırır Balıqla öpüşüb bu əllər, əllər. Çaylar yerə qonan buluddu dedim, Küləklər yorulmuş göy atdı dedim. Çaylar at görəndə qalxdı bir dodaq Dodaqlar çayları ha əylər, əylər.
Köhnə evimiz
Biz gözəl yaşadıq köhnə evimizdə... Oğlumun yüyrüyü üçün tavana vurduğum mismar ən gözəl yazıdı Artıq gərəksiz olduğunu bilir Bizimlə getmək istəyir yazı. Divara dərs cədvəlimi vurmuşam Dərs dediyim günlər Sinif uşaqları kimi Atılıb düşürlər. Divardan asdığım saat Həmişə düz işləyir. Divar qədər etibarlı kağız yoxdu Yaddan çıxmasın deyə Balaca oğlumun peyvəndinin Tarixini yazmışam divara... Bir də ağ divarlar Balaca oğlanlarımın İlk əlifbası: A B V Q D S hərfləri Sonra it Eşşək At şəkli Burun, göz, ayaq şəkli Oğlanlarımın danlaq yeri Qulaqlarının burulmaq vaxtı Arvadımın - “xaraba qalsın, bu nə evdi, biz yaşayırıq” - kəlməsi Yol işarəsi, Həyat nişanəsi. Köçdük köhnə evimizdən Qaldı tavanda mismar Divardakı yazılar Şəklim çıxmış köhnə qəzetlər Dərs çədvəlim Bir də kiçik qızımın arabasının bir təkəri...
İki səhifə
Kəndin yanındakı köhnə dəyirman Qalıb yadımda yaman, aman, aman, ay aman. Atamla buğda gətirmişdik üyütməyə Yeni keçmişdim yeddinci sinfə Əlimdə ədəbiyyat kitabı Qatlamışdım ev tapşırığının yerini Diri bir saat çırpınırdı Qatladağım vərəqdən. Bir gəlin də vardı- kəndçimiz, ərsiz Qolları buğda taylarıyla bağlı Bir az qorxaq, Ağbəniz, donu da çitdən. Dəyirmançı, dənçi baba arıq, bığlı qara çəyirtkə kimi kişi çıxır yuxarı, tullanır aşağı bığında, qaşında un dənəcikləri gün işığında işıldayır, Gözləri mış gözü kimi mışıldayır Dəyirmançı Dənçi baba O yana qaçdı Bu yana qaçdı Birdən aşağı yatdı Ətrafı pusdu, Qəfil altdan yuxarı gəlinə göz basdı. Sanki bir gözü ağ vərəq kimi Qatlandı birdən-birə. Bəs nə idi o gözləri qatlayan? Gəlin az qaldı yerə girə. Ürəyim balıq kimi çırpınırdı. Elə bilirdim dəyirmançı buğdanı yox Çölləri üyüdür Çiçəklər Otlar, atlar qırılır gəlinə görə. Qadın nədi, Anlayırdım ilk dəfə, Evə qayıtdım Qulağımda dəyirmanın səsi Yadımda isə iki səhifə: Biri ədəbiyat kitabımda qatladığım vərəq Biri də dəyirmançının vərəq kimi qatlanan gözü- Erotikanın ilk səhifəsi.
Yüz altmış
Maşınım yolları çəkir başına Mənzilin sağlığına. Arxada adamlar qalır damlalar kimi qabaqda adamlar var buludlar kimi. Təkərlər asfalta səsin yazdırır Sonra da oxuyur qara val kimi.
Sürətə bax: yüz altmış Sürətlə arxaya qaçır Problemlər, xatirələr, nələr... “Ədəbiyyat qəzeti”ndə Çap etdirə bilmədiyim şeirlər. Millət vəkilindən edə bilmədiyim xahiş Oğluma tapa bilmədiyim iş. Arvadımın əlindən səpələnir keçmişə Baralgin Analgin Sedalgin Validol, Cəhənnəm ol. Balaca oğlumun əlindən sürüşür düşür Ev almaq üçün boynubüküklüyüm Yazıxlığım Vüqarımdan dönüklüyüm Vərdiş elədiyim səbr Öyrəşdiyim ədəb-ərkan. Qalır arxada tənələr... Tənqidçinin haqqımda yazdığı Qərəzli məqalələr. Arvadım soruşur məndən Hara tələsirsən Kim qovur səni? Sürətlə deyirəm Mən cəhənnəmə Qaçırıram adamların əlindən Bircə balamın hələ kölgə düşməmiş İki misra gözlərini.
Məşhur adamın gülümsəməyi
Məşhur adamlarla şəkil çəkdirməyə Düzələn sıraya gülməyim tutur. Məşhur adam da həmişə ortada gülümsər Bir dəqiqəlik. Şəkilçəkən adamları əvvəlcədən belə öyrədib: Bir az gülümsəyin. Adamlar yan-yörəsinə elə dartınırlar ki, Təki çiyinlərinə dəysinlər, amma dəymirlər. Elə bil içlərində mıx var əslində hamımız beləyik bizi içimizdəki iri taxtaya mismarlayıblar. Hər gün arvadı şəklin tozunu silər Ortada məşhur adam, yanında əri. Bir az da böyüyər balaca kişi Şəkillə ovudar evdəkiləri.
Evdə ümid yavanlığı olar - Şəkil, Bir gün kişinin oğlunu tutdular... Kişi sandıqdan çıxarıb şəkli Ölə-ölə tapdı məşhur adamı Kişi təəccübləndi, bir az da qorxdu Üzü büsbütün çılpaqdı məşhur adamın. Şəkli qorxa-qorxa qoydu ortaya Bu mənəm, bu da sizsiz - dedi. Məşhur adam nə qədər elədi heç kəsi Tanıya bilmədi. Şəkil öldü... Stola toz kimi töküldü, Şəkildəki çürümüş təbəssümlər.
Anam bu şeiri mənim dörd yaşım olanda üstümdə oxuyub
Qəşəmin azarı çaylarla getsin Ay sular ey, ay sular ey... Dilində sözləri çiçəklə bitsin Ay çiçək ey...ay çiçək ey... Çölnən gedən, ay göy atlı Balam öskürür, dərmanı nədi? -qara qarğanın qanı -qarğanın da balası var Ölürəm eey, ay qara qarğa, ölürəm. Balam gedib quzuları qaytarıb, Örən yeri qoyub, xamı otarıb. Atların da hörüyünü qoparıb Quzular qoyunları əmib qurtarıb, Axşama bir qaşıq süd də qalmayıb, Ay balam ey, ay balam ey... Pəncərənin şüşəsini sındırır Doxturları görən kimi ağlayır. Ocaxda əl-ayağını yandırır Dəftər-qələmini maşın qayırır. Hələ ayaqqablı evlərə girir Pişikləri kürəyinə mindirir Küçükləri axşamacan hürdürür... Ay balam ey, ay balam ey... Ay Qəşəm ey, ay Qəşəm ey...
NƏsiminin heykəlinə
Göydən vurdular quş kimi Yerdən çəkdilər diş kimi Nəsiminin heykəlini götürdülər. Dar ağacının ipi qırıldı, nədi Göyə düşdü Nəsimi. Hələbdə Cəllad kəndirlə Gözünün yaşını sildi, Mən Nəsimini belə öldürməmişdim - dedi. Onu az öldürdüm Ona dar ağacını özüm qurdum Dərisini diri-diri özüm soydum Amma urvatsız eləmədim Ayağının altından kətili özüm çəkdim Amma torpağı çəkmədim - dedi.
Kəsib- kirimədi cəllad Mən onu sevə-sevə öldürdüm - dedi Mən onu sevməsəydim Heykəl qoymazdınız-dedi. Mən onu sevdiyim qədər Siz onu sevmədiniz - dedi.
Canım cəllad, Gözüm cəllad, O nə sözdü, Niyə heylə deyirsən?!
Yeni quruluş
Mənə deyirlər ki, etibarsızsan Düzdü, mən su kimi dəyişkənəm Adamam axı. Və heç kəslə əbədi dost olmağa məhkum da deyiləm Canım çıxır bir şeyə əbədi bağlanmaqdan. Birinə etibarımı sübut eləməkdən Birinin hörmətini qazanmaqdan Canım çıxır Sevgi çan çıxarmaqdı- Allah kəssin bu vərdişi.
Mən həyatımın rejissoruyam- Yoxsa ölərəm- Həyatımda adamların, əşyaların yerini tez-tez dəyişirəm Onları ürəyim istəyən kimi düzürəm Bəzən birini qabağa Birisini isə lap arxaya atıram Qoy həyatımdakı şeylər mənə xidmət etsin. Mənə lazımdı - qalsın Lazım deyil - getsin. Hər gün Həyatıma yeni quruluş verirəm Ağlatmaq Aldatmaq Unutmaq Hətta adam öldürmək belə Əsas işimdi. Tamaşadan-tamaşaya dəyişirəm Axı mən necə dəyişməyim Həyatam axı. Niyə məni başa düşmürsünüz, Ay adam uşağı?
|
|
|
|
|
|