|
BU QALANIN
Qala şəhəri - İçərişəhər, bu gün sənin içində nələr baş verir?! İgidləri papaq altda çox qalmadı, Xainləri itib-batdı, çoxalmadı. Daş da olsa, sinəsində ox qalmadı Bu qalanın.
Bürclərində nəyi vardı, yelə verdi, Dözümlüydü, it də olsa, yola verdi. Satılmadı, zaman özü ələ verdi Bu qalanı.
Hər döyüşdən sonra bir boy ucalırdı, Tarix onda qədimləşir, qocalırdı. İgidləri duruşundan güc alırdı Bu qalanın.
Nə azmanlar görmüşdü o, bürc ovcunda, - Uyumazdı, vaxt - gözündə, güc - ovcunda. Qoç igidlər yetişərdi qoç ovcunda Bu qalanın. Bir vaxt qəfil top səsindən dara düşdü, Eh, nə oldu - tor quranı tora düşdü, - Ayağının altındaca gora düşdü Bu qalanın. Gedənə də, gələnə də şahiddi o. Sahiblənmək istəyənə sahibdi o. Ömür olub, ömürlərə sahildir o, - Cırnatmayın bu qalanı.
2008
SÖZ
Çapdım sözün sahilinə, Baxıb gördüm, dəryadı söz. Fikrin, hissin, həyəcanın Laylası söz, fəryadı söz.
Çətininə çiyin verdim, Asanında sındım sözün. Yandım, bişdim ocağında Əhdim sözün, andım sözün.
Uzaqda yox, alnımdaydı, Açar oldum söz qəlbinə. Xoş üzümlə, sərt üzümlə Məni saldı öz qəlbinə.
Nə sirri var, açdı-tökdü, Mənə saldı mehrini də. Əziz tutdu, mənə qızdı İmzasını, möhrünü də.
Saydım, seçdim, incələdim, Öpdüm əlin halal sözün. Durdum elə qulluğunda Anam sözün, balam sözün.
Söz - hasardı, söz - divardı, Dünyanın iç qapısıdı. Açmadınsa, düz divardı, Açdınsa, keç, qapısıdı.
2008
TƏZƏ İL NOVRUZDUR
Gah yağış yağacaq, gah qar səpəcək, Göyün sinəsində nə var, səpəcək. Dünyanın başına bahar səpəcək, Təzə il Novruzdur, Novruza alqış. Nə verib alammır qış bu fəsildən, Aşır başımızdan iş bu fəsildə. Bir budağa quş ol, uç bu fəsildən, Bahara aparan yolumuza alqış. Tonqallar çırtlayır yollar boyunca, Şamlar, yelləncəklər - oyun-oyuncaq. Mahnılar, oyunlar, rəqslər - doyunca, - Yallıya çatılan qolumuza alqış. Kosa saqqal umur təkədən bu gün, Doyammır loxmadan, tikədən bu gün. Qışın bağrı çatlar hikkədən bü gün, Bu gündən başlayan ilimizə alqış. Döyür qapıları Axır çərşənbə, Əfsanə çərşənbə, nağıl çərşənbə. Dolur papaqlara noğul çərşənbə, Yeni halımıza, günümüzə alqış. Dilin də, dinin də qədimi - bizdə, Pirin, peyğəmbərin qədəmi - bizdə. Axtarsan, taparsan Adəmi bizdə, Halal yurdumuza, yerimizə alqış. Gah yağış yağacaq, gah qar səpəcək, Dünyanın başına bahar səpəcək, Təzə il Novruzdur, Novruza alqış.
2009
GÜLƏ - GÜLƏ
Bu da bir ömürdü, sərt üzü - səndə, Bu da bir gecədi, gündüzü- səndə, Keçdiyin küçədi, ən düzü - səndə, Niyə çəkinirsən? Keç gülə-gülə.
Çəkildi əlçatmaz göyün bu bəxtə, Düşmədi eşiyin, evin bu bəxtə. Sınma, gileylənmə, sevin bu bəxtə, Gəldisə ömrünə gec gülə-gülə.
Alış; doğmasına, yadına baxma, Yaşa; ünvanına, adına baxma. Sevda şərbətdisə, dadına baxma, Verilir, çək başa, iç gülə-gülə.
Nədir taleyində bu ağ, bu qara?! Paran bütövləşməz, bütövün - para. Səni əzablara, iztirablara Əkəni ömründən biç gülə-gülə.
Canından artıqmı can qoyduğun kəs?! Heç kəs arşınını sən qədər ölçməz. Ya qopar qəlbindən, ya qoparma, döz, Axır ki, birini seç gülə-gülə.
Bu da bir ömürdü, sərt üzü - səndə, Bu da bir gecədi, gündüzü - səndə, Keçdiyin küçədi, ən düzü - səndə, Niyə çəkinirsən? Keç gülə-gülə.
2009
* * *
Bir yarımçıq şeirim ola, Qayıdam, gələm üstünə. Söz mənim üstümə qaça, Mən qaçam qələm üstünə.
Susmaqdan yorulub qaçam, İş-gücdən dərilib qaçam, Ölüyəm, dirilib qaçam, Diriyəm, öləm üstünə.
Geninə-boluna düşə, Oxucu toruna düşə, - İş-gücüm yoluna düşə; Tökülə aləm üstünə.
Bilirəm ki, yenə qalan, Bəlkə, aya, günə qalan, Pay-pürüşdən mənə qalan Ömrümü böləm üstünə.
2008
QURUYAN AĞACLARIN
Payızın sarı simidir, Qəribdir, ömrüm kimidir. Doğranır, ağrı dəmidir Bu quruyan ağacların.
Ağarası günü yoxdu, Qılınc imiş, qını yoxdu. Vur boynunu, qanı yoxdu Bu quruyan ağacların.
Nə meyvəsi, nə dadı var, Nə anılası adı var. Dondun, isidən odu var Bu quruyan ağacların.
2008
SƏN BELƏ İSTƏDİN, QOY OLSUN, NƏ QƏM
Dəli sevdaların ipini çəkdim, Keçirdim ağlımı vaxt ələyindən. İstək yollarından izimi çəkdim, Sildim bu borcu da öhdəliyimdən.
Nə məni axtarar, nə səni tapar, Qalan duyğuların gözü tox daha. Arayar öləni, itəni tapar, Yaddan - yadı tapar, səni yox daha.
Sən mənə - yox kimi, mən - sənə indi, Yaxınlıq bilməyən həddə durmuşuq. Maraq hədəfiyik yetənə indi, Bir yetik ünvanda, adda durmuşuq.
Təsbehəm əlində xatirələrin, Fikrimin sapında hər gün - bir dənə. Çəkib isti, soyuq gün dənələri, Atıram dünənə, srağagünə.
Başqa gün olacaq sabah, bilirəm, Sabahdan sonra da sabahlar - sənsiz. Yenə olacağam, vallah, bilirəm, Necə var idimsə qabaqlar sənsiz.
Sən belə istədin, qoy olsun, nə qəm! Mən də bu istəyin ortağı idim. Sən deyən elə də aciz deyiləm, Mən səni itirmək qorxağı idim.
2009 ÇOXUMUZDAN CAVAN BACISAN
Ağır xəstə yatan bacım Həziran üçün
Ömründü ətirli yaz çiçəkliyi, Niyə əzizlədin bu qış təkliyi?! Götürdün çiyninə ağbirçəkliyi, Baxma, çoxumuzdan cavan bacısan.
Di dur, qalx ayağa, yatdığın bəsdi. Səni yumşaq yataq doğradı, kəsdi. Sən axı hamıdan, axı hər kəsdən Əvvəl bir qurtuluş bulan bacısan.
Yastıqlar dəstəkdi hər qoltuğunda, Yatırsan bir qansız şər qoltuğunda. Üstünə qaçırdıq dərd qoltuğunda, Bizə arxa, dayaq olan bacısan.
Nə idi qəddini əyən, bilmirik, Sorursan, necəyik, deyə bilmirik. Ay yastığı yüngül, bəyəm, bilmirik, Hamımızın dərdinə qalan bacısan.
Ömür - qayğı yüklü ağır qatardı, Alıb hərəmizi, bir yola vardı. Əlimiz uzandı, sənə çatardı, Neynək, ağrımızı alan bacısan.
Əhvalayrıcda da, halayrıcda da, Sən biz soraqlısan ilayrıcda da. Elə bu durduğun yolayrıcda da Soraqdan-sorağa dolan bacısan, Lap pöhrə çağından solan bacısan.
2008
* * *
Elə axınla gedirlər, Lap həzər etməyin gəlir. Qapısını o dünyanın Yüyürüb örtməyin gəlir. Bir qəfil səslə gedirlər, Tələs-tələslə gedirlər, Elə həvəslə gedirlər, Qoşulub getməyin gəlir. Belə diri qalmaq olmur, Tutub yeri qalmaq olmur, Köçdən geri qalmaq olmur, Gedəni ötməyin gəlir.
2009
* * *
Göndərmişdi, başa vurdum, Yaxşı - yaman, - döşə vurdum. Bu dünyasın dişə vurdum, O dünyası, gəlirəm a... Çəkdi yükün, boş getmədi, Mənə çatdı, köç getmədi. Bir də gördün, heç getmədim, Mən bir azca dəliyəm a... Savab mələk, günah mələk - Hər çiynimdə - bir şax mələk. Mən bir az xeyirxah mələk, Bir az qisas mələyəm a...
2009
* * *
Niyə ağlayırsan, bacı? Ağlamaqdan keçib daha. Bu dərd sənə ürək açıb, Köynəyindən keçir daha.
Tanıyıb yaxanı, seçib, Bu ox gör kimə sancılıb?! Qəlbimə yaxını seçib, - Dərdin qəlbimə sancılıb.
Axıtma, gözünün yaşı Dost qalır, düşmən isidir. Yüklə ürəyinə, daşı, - Dərd ürəyin çəkisidir.
2009
* * *
Yazmıram, yaratmıram, Ağlıma heç nə gəlmir. Gələnlər başla gəlir, Dırnaqla, dişlə gəlmir.
Duyğular xəsisləşib, Niyyətlər xəbisləşib. Yaxşı nə var, pisləşib, Gələndə xoşla gəlmir.
Yazdığın cırıb gəlir, Tilsimi qırıb gəlir. Gəlsə, cin vurub gəlir, Ağılla, huşla gəlmir.
2008
* * *
Çətini uzaqda qalıb. Sənə doğru atdığım addımlardan bir şey çıxmadı. Çünki mən aşağı enən eskalatorla yuxarı çıxmaq istəyirdim.
* * * Müsəlman qılıncının qılınc müsəlmanı var.
* * *
Ağac kökündən, insan budağından kök atar. Kökü olmasa ağacın, budağı olmasa, insanın kökü kəsilər.
2008
* * *
Məhəbbət üzümə çəkilən Ay işığı, Bəxtimə yazılan rəngin ağıdır.
Məhəbbət duyğuların Allahı- ancaq Allahdan aşağıdır.
Məhəbbət gəncliyimin, ahıllığımın, qocalığımın böyümək istəməyən şıltaq uşağıdır.
Ruh əbədidirsə, Cəhənnəmi Cənnətindən dadlı Dünya ruhun məhəbbət çağıdır.
|
|