|
YUXU
Min ildi yatıb qalmışam, küy düşə, küyə durum. Mən də rast gəlim səsimə, səsimə yiyə durum.
Nə kilsə zəngi çalınır, nə bir azan verilir Ki, durum qaçım kilsəyə, üzü qibləyə durum.
Səndən də bir səs çıxmayır, bilim dost kim, düşmən kim. Bilim kim çalmış laylamı, kimi söyə-söyə durum...
DÜNYANIN ÜZÜNƏ TÜPÜRMƏK OLMUR
Sillətək dəysə də yanağa, üzə, qənim kəsilsə də hər birimizə, hər nədi, doğmadı, əzizdi bizə, dünyanın üzünə tüpürmək olmur.
Atsa da bizləri evdən küçəyə, bir gün çatmasa da bu əl heç nəyə, lap şeytan desə də tüpür hər şeyə, dünyanın üzünə tüpürmək olmur.
Doğmadı torpağı, daşı doğmadı, doğmadı baharı, qışı doğmadı, doğmadı ilanı, quşu doğmadı, dünyanın üzünə tüpürmək olmur.
Doğmadı dolusu, qarı, yağışı, doğmadı ilməsi, mili, naxışı, doğmadı duası, ahı, qarğışı, dünyanın üzünə tüpürmək olmur.
Baxsa da bizlərə zaman qıyqacı, bu dil ağzımızda dadsa da acı, bu üzdə qardaşdı, o üzdə bacı, dünyanın üzünə tüpürmək olmur.
Üzləri üzlərdən eyləsə yenə, bizləri bizlərdən eyləsə yenə, neyləsə, neyləsə, neyləsə yenə, dünyanın üzünə tüpürmək olmur...
BAHAR
Deyəsən, artıq bahardı, heç vaxt üzə bilmədiyim bir gülün qoxusu gəlir burnuma...
YEKNƏSƏQLİK
Nəyəsə inanmaq öz-özünü aldatmaqdı. Aldanmaq küfr olmadığından, aldana-aldana yaşayanların yeri - cənnətdi bəlkə də o dünyada. Bəlkə də əksinə, aldanmaq ən böyük küfrdü - kiməsə, nəyəsə inandığın üçün. Nəyin daha doğru olduğunu, nə sən bilirsən, nə mən.
Elə isə fikir eləməyə dəyməz, buyur, sən də öz ömrünü yaşa; hamı kimi İnana-inana aldan, Aldana-aldana inan Bu dünyada...
MƏN DƏ HAMITƏK ÖLƏRƏM
Mən də hamıtək ölərəm, məni də basdırarlar. Məni də əzizləyərlər, mənə də yas qurarlar.
Hamını salaram işə, Hamı gələr bu görüşə. Ayağıma düşə-düşə başım üstə durarlar.
Asta-asta nəfəs dərib, Üstümə al yaylıq sərib, Özümü yuxuya verib, saatımı qurarlar...
KƏŞF
Səni mən yaratdım, səni mən kəşf elədim, sən mənim ən böyük ixtiramsan. İnsanlara mən tanış verdim səni; sevənlər sevdi, sevməyənlər şəkk gətirdi sənə. Bu üzdən qəzəbimə tuş gəldi bütün insanlar və səni gizlətdim onlardan - böyüklüyünə sığına-sığına. İndi hamı bir nəfər kimi inanır gözəgörünməz olduğuna...
TƏƏSSÜF
Əvvəlcə özümçün yaşadım. Sonra sən çıxdın qarşıma, səninçün yaşadım bir az. Bağışla, mən heç vaxt bizimçün yaşaya bilmədim...
KÖLGƏ
Qardaşım Hacıbalanın xatirəsinə Birdən görürsən bir kölgə laxlayır qapı dalında. Bir kölgə lap adam kimi ağlayır qapı dalında.
Yığıb içinə səsini, unudub doğma kəsini, görən kimdi kölgəsini saxlayıb qapı dalında.
Durub baxırsan mat-məəttəl, bu kölgədi, yoxsa əcəl. Görürsən səni bir cüt əl haqlayıb qapı dalında...
OYUN
Hamımız oyunçuyuqsa məcburuq hərdən oynayaq. Uduzmağa bir şey də yox, bilmirik nədən oynayaq.
Nə durmusuz səssiz-səssiz? Açın kartı, bu mən, bu siz! Bizə yaraşmaz heç nəsiz hər gün tənədən oynayaq.
Vaxtdı, daha çıxın üzə, yer yox qoltuq altda izə. Kişinin sözü birdirsə, o bir kəlmədən oynayaq.
TUTHATUT
Yaman tuthatutdu; Bu gecə vaxtı Pəncərəmi külək tutur, Pəncərəmin o üzündə Adamları meydan, Meydanları adamlar tutur. Kömək Əlidən qalıb deyə-deyə Polis kiminsə qolundan tutur Və kiminsə gözlərini qan tutur. Kimisi yıxılmamaqdan ötrü əsadan, dəyənəkdən, kimisi allahın ətəyindən tutur. Mənimsə ürəyimi ağrı tutur - Sənin boş-bekar durduğundan. Bu tuthatutda Sənin də bir şeydən yapışmağının, Bir şeydən tutmağının Zamanı gəlmış artıq. Buyur, bu dəniz, Bu da saman çöpü...
OXUDUM
Dünyada bir kitabı son varağınacan oxudum. Bu dünyanın zülmətini çırağınacan oxudum.
Ötürmədim bir yazını, dərinini, dayazını, körpəsini, çağasını yanağınacan oxudum.
Oxudum gəlinin, qızın, oxudum ayın, ulduzun. Nə yol qalmışdı up-uzun, qırağınacan oxudum.
Gördüm bitdi, sondu, tanrı, tulladım göyə açarı... Qəddi bükük ağacları yarpağınacan oxudum.
Keçdi dünya ələyimdən, qan axmamış kürəyimdən, hər kişini ürəyindən papağınacan oxudum.
MƏNİM DÜNYADA KİMİM VAR
Mənim dünyada kimim var, ikicə körpəmdən başqa... Harayıma kimsə gəlməz, bu dərddən, o qəmdən başqa.
Bir mənəm, bir iki körpəm, üç olduq, oldu hər şey kəm. Yapışmağa möhkəm-möhkəm bir yer yox kölgəmdən başqa.
Könlümün qəm-qəhər yeri, gecə sürün, səhər yeri. Vətəndi Yerin hər yeri, bircə bu ölkəmdən başqa...
|
|