M.Ə. Möcüz 60 illik həyatının son bir ilini anadan olduğu Şəbüstər qəsəbəsindən xeyli uzaqda - İranın şimalında yerləşən Şahrud şəhərində yaşamışdır. Özünün yazdığına görə, Şəbüstərdə ona qarşı "müharibə elan edən" mürtəce qüvvələrlə "26 il vuruşduqdan" sonra bacanağı Xəlil Möhdəvi Nadirin dəvəti ilə Şahruda köçmüş, nisbətən sakit bir həyat sürmüş və orada da vəfat etmişdir. İndiyədək Şimali Azərbaycan möcüzşünasları şairin vəfatı şəraiti və məzarı haqqında bir kəlmə də olsa, söz açmamışlar. Lakin cənublu tədqiqatçılardan prof. M.T.Zehtabi, Y.Şeyda və M.Niqabinin bu barədə müəyyən araşdırmaları vardır. Həmin araşdırmaların nəticələri və əldə etdiyimiz bəzi yeni sənəd və məlumatlar bu mövzu ilə bağlı daha dəqiq və obyektiv elmi qənaətlərə gəlməyə əsas verir. Əvvəla, şairin vəfat tarixi haqqında. Bu barədə ilk məlumat məşhur kitabşünas alim H.M.Naxçıvaninin oğlu Ə.Naxçıvaniyə məxsusdur. Onun 1942-ci ildə Təbrizdə çıxan "Azərbaycan" qəzetinə göndərdiyi məlumata görə "... şair (Möcüz nəzərdə tutulur - F.X.) qəməri 1353-cü ilin cəmadiyil-axır ayında ki, şəmsi 1313-cü ilin mehr ayına tətbiq olunur, vəfat etmişdir". Miladi tarix ilə bu, 1934-cü ilin sentyabr-oktyabr aylarına uyğun gəlir. Ə.Naxçıvaninin məlumatından üç gün sonra tədqiqatçı Q.Məmmədli də "Vətən yolunda" qəzetində dərc etdirdiyi "Həqiqəti sevən şair" adlı ilk məqaləsində şairin vəfat tarixini eyni ilə "1353 hicri və yaxud 1313 şəmsi ilinin mehr ayı" kimi göstərir. Q.Məmmədli şairin 1945-ci ildə Təbrizdə və 1948, 1949-cu illərdə isə Bakıda çap etdirdiyi kitablarına yazdığı müqəddimələrdə də ay göstərmədən 1934-cü ilin onun vəfat ili olduğunu bir daha təsdiq edir. 1954-cü ildə Möcüzün əsərlərinin işıq üzü görən növbəti nəşrinə müqəddiməsində isə Q.Məmmədli heç bir təsdiqedici mənbə göstərmədən yazır: "M.Ə.Möcüz 1934-cü il sentyabr ayının 25-də Şahrudda vəfat etmişdir". 1955 və 1982-ci illərdə yenə onun tərtibi ilə çap olunan Möcüzün kitablarında 25 sentyabr 1934-cü il şairin vəfat tarixi hesab olunur. Q.Məmmədlinin "müqəddimə"lərinə istinadən "Kratkaya Literaturnaya Ensiklopediya", "Bolşaya Sovetskaya Ensiklopediya" və "Azərbaycan Sovet Ensiklopediyası"nda da Möcüzün vəfat tarixi 25 sentyabr 1934-cü il kimi təqdim olunur. Cənubi Azərbaycan müəlliflərinə gəldikdə isə M.Müctəhidi və X.Müşardan başqa (bu tədqiqatçılar 1933-cü ili şairin vəfat ili kimi göstərirlər) onların hamısı ay göstərmədən 1934-cü ili Möcüzün vəfat ili kimi qəbul etmişlər. Təkcə prof. M.T.Zehtabi 1934-cü ilin mart ayının ortalarını şairin vəfat tarixi hesab edib. Göründüyü kimi, Möcüzün vəfat tarixi ətrafında müəlliflər bir-biri ilə ciddi mübahisələr aparmasa da, hərəsi bir versiyanın üzərində dayanmışdır. Bəs həqiqət necədir? Bu qarışıqlığa son qoymaq üçün ortada hər hansı bir dəlil-sübut varmı? Axtarışlar nəticəsində əldə edilmiş iki təkzibedilməz fakt bu barədə mövcud olan bütün fikir müxtəlifliyinə son qoymaq və həqiqəti üzə çıxarmaq üçün kifayətdir: 1. Şairin qəbrinin başdaşı üzərindəki yazı: "Haza məqbəre-mərhume-ağaye-Əli Möcüz vələde-Hacıağa Şəbüstəri, 1313" ("Budur, mərhum Əli ağa Möcüz Hacıağa Şəbüstəri oğlunun qəbri, 1313"). 2. Şahrud şəhəri Əhalinin Vəziyyətinin Qeydiyyatı İdarəsi (İdareye-Səbte-Əhval) tərəfindən 20 şəhrivər 1313-cü ildə (20 sentyabr 1934) imzalanan Möcüzün "Ölüm şəhadətnaməsi". Farsca yazılan həmin sənədin tam mətninin tərcüməsi belədir: "¹102, dairə 1. Şahrud Şəhəri Əhalinin Vəziyyətinin Qeydiyyatı İdarəsi. Qanunun 4-cü maddəsi. Gün: 12, Ay: 6, İl: 1313, Adı: Ağayi-Əli, Soyadı: Möcüz, Pasport ¹2749, Mərənd dairəsi, Şəbüstər Şəhəri Əhalinin Vəziyyətinin Qeydiyyatı İdarəsi tərəfindən verilib. Vəfat etmişdir.Vəfatı haqqında məlumat verən: Məhəmmədhəsən Məllah, Ölümün qeydə alınma tarixi: 20.6.1313. Qanunun 13 və 15-ci maddələrinə əsasən imza edirəm (imza)". Beləliklə, qəbir daşı üzərində 1313 ş. (1934), "Ölüm şəhadətnamə"sində isə 12.6.1313 (3 sentyabr 1934) rəqəmlərinin yazılması tam sübut edir ki, M.Ə.Möcüz 3 sentyabr 1934-cü ildə Şahrudda vəfat etmişdir. Şairin vəfat şəraiti ilə əlaqədar olaraq əlimizə gəlib çatan yeganə məlumat isə cənublu şair və ədəbiyyatşünas Y.Şeydanın Möcüzü tanıyanlardan eşitdikləridir. Ona deyilənə görə, Ayətullah Hacı Seyid Rza Vəhidi Məşhədə ziyarətə gedəndə həmyerlisi Möcüzdən xəbər tutmaq üçün yolunu Şahruddan salır və "şairin cənazəsi ilə bərabər olur... Ona namaz qılır və bu tərzlə ... şairin pərvəndəsi bağlanır". Bir neçə kəlmə də Möcüzün məzarı haqqında. Bu barədə ilk məlumat cənublu möcüzşünas M.Niqabiyə məxsusdur. O, Möcüzün məzarının yerini müəyyənləşdirmək üçün 5 sentyabr 1988-ci ildə Şahruda getmiş və şairin baldızı oğlu Yusif xan Möhdəvi Nadirlə görüşərək öyrənmişdir ki, Möcüz Şahrudun "Köhnə məzar" qəbiristanlığında dəfn olunub. Lakin 1960-cı illərdə şəbüstərli həmyerliləri onun cənazəsinin qalıqlarını çıxararaq Şəbüstərə aparmışlar. Əldə olan digər faktlar bu məlumatın nəinki doğru olduğunu təsdiq edir, həm də şairin məzarının Şəbüstərə köçürülməsinin tam təfsilatını əks etdirir. Keçək faktlara: 1. Möcüzün həmyerlisi prof. M.T.Zehtabi Almaniyada çıxan "Azərbaycan" dərgisinə verdiyi müsahibəsində deyir: "Mən Bakıda olanda 1963-1964 illərində Şəbüstərdən Bağır Məmmədzadə gəldi mənim yanıma. Dedim: "Get, Möcüzün qəbrini filan yerdən çıxart, gətir Şəbüstərdə bir yerdə saxlayın" . Bir il yarımdan sonra gəldi, dedi: "Bəli, getdik filan yerdə basdırdıq"". 2. Q.Məmmədli M.Niqabiyə göndərdiyi 10 iyul 1980-ci il tarixli məktubunda yazır: "Bağır Məmmədzadə də Şurəvidədir ... Möcüzün sümüklərini Şahruddan Şəbüstərə gətirən həmin bu adamdır. O, bu hadisəni qardaşı Qurbanəliyə (filologiya elmləri namizədi Q.Məmmədzadə nəzərdə tutulur - F.X.) danışıb" (məktubun surəti bu sətirlərin müəllifinin şəxsi arxivindədir). 3. M. Niqabi Təbrizdə farsca çıxan "Əhrar" qəzetinə verdiyi müsahibəsində yazır: "... Üç nəfər - Bağır Məmmədzadə, Əsgər Əkbəri və Mir Yusif Musəvi doktor Zehtabinin sifarişi ilə şairin sümüklərini və qəbir daşını Şahrudun "Köhnə məzar" qəbiristanlığından çıxarıb Şəbüstərə aparmışlar". 4. Q.Məmmədzadə, Ə.Əkbəri və M.Y.Musəvinin qarşısında Möcüzün cənazəsinin qalıqları yığılan qutu və qəbrinin başdaşını əks etdirən fotoşəkil. Cənubi Azərbaycan möcüzşünasları şairin məzarının Şəbüstərə köçürülmə səbəbi haqqında iki versiya üzərində dayanırlar. 1. M.T.Zehtabi: "... Möcüzün cəsədi şairin öz vəsiyyəti əsasında Şahruddan Şəbüstərə köçürülüb...". 2. M.Niqabi: "1364 şəmsidə (1967) Şahrud şəhrdarisi "Köhnə məzar" qəbiristanının bir qismətin uşaq parkına təbdil edəcəyi üçün Möcüzün sümükləri və qəbir daşı ... Şəbüstərə gətirilmiş"dir. Bizcə, bu işin əsas təşkilatçısı olan M.Zehtabinin dedikləri həqiqətə daha çox uyğundur. Ən başlıcası isə odur ki, bu versiyalardan hansının doğru, hansınınsa yanlış olması Möcüzün cənazəsinin qalıqlarının Şəbüstərə gətirilməsi faktını təkzib etmir. Hazırda Şəbüstərdə Möcüzün cənazəsinin qalıqları dəfn edilən yer gizli saxlanılır. Bunun səbəbi şairin vaxtilə ifşa etdiyi bəzi tiplərin indi müəyyən nüfuz sahibi olan övladlarının qəbir üzərində təhqiredici hərəkətlərə yol verəcəklərindən ehtiyat edilməsidir. Bu fikri bizə 1990-cı ilin avqustunda Şəbüstərdə evində qonaq olduğumuz prof. M.T.Zehtabi demişdir. Möcüzün vəfat tarixi və məzarı ilə bağlı çoxlarına bəlli olmayan həqiqətlər bundan ibarətdir.
|