|
ƏSGƏR ATASI
Əsgər həyatında, cəbhədə qısa müddət bəsdir ki, tanıyasan - yoldaşın kimdir, necə adamdır. Müzəffər kişi ay yarım bizimlə birgə xidmət etdi, çətin günün yoldaşı oldu. Vur-tut ay yarım! Təxminən qırx-qırx beş gün ərzində hamımızın ürəyinə yol tapa bilmişdi. Yaşca özündən xeyli kiçik, övladları yerində əsgərlər onu nədənsə russayağı "Batya" çağırardılar. Müzəffər kişi isə inciməz, "ağsaqqal", "atam" kimi o sözü qəbul edərdi. Bəstəboylu M.Əsədovun saç-saqqalında ağ tüklər üstələməyə başlamışdı. Aylar, illər alnına, sifətinə, boynuna dərin qırışlar salmışdı və hiss olunurdu ki, ömrünü-gününü çölçülükdə, işdə-gücdə keçirmiş, həyatın hər özünü görmüş adamdır. İri əsgər papağını qaşlarınacan, qulaqlarının üstünəcən endirərdi. Təzə kamuflyaj alıb geyinmişdi. Arıq bədəninə altdan-üstdən o qədər paltar keçirmişdi ki, elə bil dizlərinə çatan buşlatın altında nəyisə gizlətmişdi. Söhbət düşəndə "soyuqla zarafat eləmək olmaz, oğul, qoy bizə dəyən soyuq paltara dəysin", - deyirdi. Əsgərlərdən fərqli olaraq uzunboğaz botinka əvəzinə çəkmə geyirdi ki, "ağır olsa da, soyunub geyinməyə rahatdır". "1993-cü ilin soyuq oktyabr ayı idi, - Lənkəran rayonunun Boladi kəndinin sakini Vüqar Mirzəyev xatırlayır, - cəbhəyə tezliklə yola düşməliydik. Batyaya həmin günlərdə hərbi komissarlığın həyətində rast gəlirdim. Bir dəfə gördüm ki, cavanlar başına toplaşıb. Uşaqlar ondan soruşdu ki, kimi yola salır? Batya özü ərizə verib, könüllü cəbhəyə getdiyini dedi". Lənkərandan gəlmiş əsgərlərin əksəriyyətini təlim mərkəzində bizim tabora verdilər. İlk gündən Müzəffər kişi təmkinilə diqqətimi cəlb etdi və məndə özünə rəğbət oyatdı. Bir dəfə Lənkərandan döyüşçülərə yardım gətirmişdilər. Bölüb paylamaq üçün Müzəffər kişini də çağırdıq. Mən onda əmin oldum ki, Batya nə qədər təmiz, tapşırılan işə necə vicdanla yanaşan adamdır. Xurmanı, mandarini, limonu sanki dənə-dənə, qram-qram böldü və bunu hamının gözü qarşısında etdi. "Belə yaxşıdır, oğul, qoy heç kimin nəfsi qalmasın, yersiz söz-söhbət olmasın",- dedi. Mən onunla tez-tez söhbət etməyi xoşlayardım və əsgəri qaydada yox, sadəcə "oğul" deyə mənə müraciət edərdi. "Torpaqlarımızın işğal olunması məni çox ağrıdırdı, oğul, - deyirdi. - Biz aciz xalq deyilik ki, ermənilərin qabağından qaçaq. Arada şeytan var, şeytanın əli olmasaydı, bu qələti onlar eləyə bilməzdilər. Prezident Heydər Əliyevin müraciətindən sonra özümə yer tapmırdım. Nə eləyəsən, başına haranın daşını tökəsən. Çox götür-qoydan sonra hərbi komissarlığa gəlib ərizə verdim ki, cəbhəyə gedirəm. Yaşlı olanda nə olar, bu ağır gündə cavanlara gərək yol göstərək, nümunə olaq". Və Müzəffər kişi bunu elə sakit, elə səmimi danışırdı, sanki demək istəyirdi: qonşuya borcum var, aparıram onu verim. Beləcə sadə, təkəbbürsüz, borc kimi, hərəkətində igidlik-filan axtarmadan. Halbuki onun əməli hər cür hörmətə, təqdirə layiqdi. 57 yaşında bir çətən külfəti atıb cəbhəyə getməsəydi, kim idi onu qınayan? Oturardı evində, balaları üçün gündəlik bir tikə çörəyin qayğısına qalardı. Təqaüd vaxtına nə qalmışdı ki? Müzəffər kişi xalqımıza qarşı yol verilmiş ədalətsizliyə göz yuma bilmədi. Yaşının ötməsini üzünə qalxan etmədi. "Torpaq qeyrətini çəkmək mənə qalmayıb k ?!", - demədi. Əyninə əsgər paltarı geyinib dar gündə silah əldə Vətənin müdafiəsinə qalxdı. Bu şərəfli və çətin addımı batya şüurlu atdı - on səkkiz yaşında dəliqanlı, yeniyetmə deyildi ki, düşünülməmiş hərəkətə yol verəydi. Yaşının ahıl vaxtında güllə qabağına gedəndə o bilirdi nə edir. "Uşaqlar böyüyüblər, özlərini saxlayacaqlar. Bir narahatlığım əsgərlikdəki oğlumdandı", - deyə kiçik oğlu Ziya barədə qayğılanırdı. Əyninə əsgər paltarı geyindiyi gündən silahdaşlarına yük olmaq istəmirdi və atdığı addımın çətinliyinə mərdliklə sinə gərirdi. - Düzlən! - komandası verildimi, əsgərlərdən tez sıraya gələrdi. Təlimdə də cavanlarla ayaqlaşmaq onunçün nə qədər çətin olsa da, tapşırılan hər işi can-başla yerinə yetirirdi. Batya da intizamlılığı ilə sanki gənc əsgərlərə demək istəyirdi ki, orduda kimliyindən, yaşından asılı olmayaraq hamı komandirin əmrinə tabe olmalıdır. Təlim mərkəzində bir gün bərk külək qopdu və az qala çadırları aşıracaqdı. Özü əsgərlərin qabağına düşüb kəndir-filan tapdı, çadırları onlarla birlikdə bərkitdi. Və yadımdan çıxmaz, əsgərlərə məsləhət gördü ki, kəndirdən kəsib götürsünlər. "Turist gəlməmişik ki, döyüşə gəlmişik. Birdən elə vaxt lazım olar ki, qalarsan məəttəl. Heç kəs köməyinə yetməz". Əsgər çantasını həmişə çiynində gəzdirərdi və onun içində bıçaqdan, patrondan tutmuş suxariyədək hər şey saxlardı. "Vaxt gələr, lazım olar", - deyə işini möhkəm tutardı. Müzəffər kişinin bir "qəribəliyini" də unutmayacam. Özü ilə evdən gətirdiyi baltanı həmişə yanında, kəmərinin başında gəzdirirdi. - Batya, balta nəyinə gərəkdir?- soruşanda şəhadət barmağını qaldırıb özünəməxsus təmkinlə izah edirdi: - Oğul, balta çox lazımlı alətdi, çöllükdə hər an köməyinə çatar. O da ola cəbhədə, döyüşdə. Külək qopanda gördün necə dadımıza yetdi! Bir dəfə eşitdim ki, Züvlə kəndindən ağsaqqala məktub gəlib. Orduya qədər briqadiri olduğu çayçılar manqasının qızları yazmışdılar. Deyəsən, təzə briqadir təyin etmək istəyirmişlər, manqa üzvləri isə razı deyildilər, çayçı qızlar sevimli briqadirin - Müzəffər Əsədovun yerində başqasını təsəvvür etmirdilər və yazırdılar ki, "səbirsizliklə yolunu gözləyirik". Qədirbilən çayçı qızların məktubu onu kövrəltsə də, "Allah qoysa, müharibədən sonra", - deyə xəbər göndərmişdi. Müzəffər kişi əvvəllər uzun müddət sürücü də işləmişdi. Özünün söylədiyinə görə, Qarabağın hər kəndində-kəsəyində olmuşdu və o yerləri qarış-qarış gəzdiyindən yaxşı tanıyırdı. Kəşfiyyata getməyə də hazır idi. "Laçında, Zabuxun körpüsündə yolu bağlasan, elə bil ayağını qoyarsan düşmənin boğazına", - sadəlövhcəsinə deyərdi. Tez-tez xidmətdə olan oğlu Ziyanı yada salar, narahatlığını gizlətməzdi. "İmkanım olsa, Ziyanı da yanıma gətirtdirərdim", - deyə mənimlə dərdləşərdi. Yeni ili təlim mərkəzində keçirdik. Yanvarın 3-ü idi. Gecə saat 12-də həyəcan siqnalı verildi və bizi göndərdilər Ağdam bölgəsinə. Buludlu hava idi, ətrafa çökmüş duman, çisgin gah çəkilir, gah da hər yanı görünməz edirdi. Bilmək olmurdu ki, günəş haradan çıxıb harada batır. Ermənilər Güllücə kəndindən aralıda alçaq təpəliyin üstündə mövqe tutmuş, möhkəmlənmişdilər. Kənd təhlükə altında idi. Düşməni geri oturtmaq lazım idi. Əməliyyat şəraiti aydınlaşdırıldıqdan sonra birləşməmiz döyüşə girdi. Döyüşçülərimiz üzümlüklə irəliləməli və düşmənə arxaya, kanaldan geriyə atmalı idilər. Müzəffər kişi də komandirinin narazılığına baxmayaraq əsgərlərin sırasında idi. Düşmən hər vəchlə müdafiə olunmağa çalışırdı. "Qrad" maşınının, tankın, PDM-in, minomyotun mərmi yağdırmasına baxmayaraq, əsgərlərimiz duman çökməsindən istifadə edib erməniləri sıxışdırmağa başladılar. İtkimiz yox idi. İşlər əla gedirdi. Yavaş-yavaş duman seyrəlirdi, ətraf kinodakı kimi aydınlaşmağa başladı. Ermənilər bundan istifadə edib aprtilleriya atəşinə düzəliş verdilər. Təhlükə getdikcə yaxınlaşır, mərmilər üzümlükdə, əsgərlərimizin həndəvərində partlayırdı. - Batya yaralandı! - döyüşçülərimizdən kimsə qışqırdı. Mina Müzəffər kişinin lap yaxınlığına düşmüş, qəlpə onun kürəyindən və qolundan dəymişdi. "Batyanın yaralandığını görüb iki nəfərlə tez onun yanına qaçdıq, - əsgər Teymur Məmmədov danışırdı. - Özünün bıçağı ilə dərhal paltarını kəsib yaralarını sarıdıq. Bu vaxt tibb bacısı Tərgül Kərimova özünü yetirdi. Batyanı təcili yardım maşını ilə qospitala götürdülər". Həmin döyüşdə düşməni geri atsaq da, Müzəffər kişini sağaldıb həyata qaytarmaq mümkün olmadı. Yaralandıqdan sonra özünü sındırmasa, gümrah aparmağa çalışsa da, aldığı ağır xəsarətdən gözünü hospitalda birdəfəlik yumdu. Canını tapşırarkən dilində donmuş və adamı kövrəldən bir kəlməni bizə çatdırdılar: "Ziya!"Çox çalışsa, narahatlıq keçirsə də, əsgər oğlunu bölməmizə gətirdə bilmədi və bu niskili özüylə son mənzilə apardı. Bu hadisədən bir müddət sonra qısa məzuniyyətə gedən əsgərlərimizi hərbi hissənin qərargahına aparmışdıq. Onların xarici görünüşünü bir daha yoxladılar və məzuniyyət vərəqələrini payladılar əsgərlərə. Maşın gəlməli idi ki, onları avtobus dayanacağına aparsın. Ona görə bir qədər gözləməli olduq. Qərargahda iş başdan aşırdı. Bir partiya əsgər gətirmişdilər və zabitlər onları bölüb yerləşdirməklə məşğul idilər. - Komandir, zəhmət olmasa, buraya gəlin, - deyə gizir Loğman Sadıqov məni bir qədər aralıda toplaşmış əsgərləri yanına çağırdı.- Burada bir əsgər var, bizim tabora keçmək istəyir. - Niyə məhz bizim tabora?- deyə maraqlandım. - Atam orada xidmət eləyib, - arıq əsgər cavab verdi. Daha sual verməyəcəyimdən ehtiyat edirmiş kimi tez də əlavə elədi: - Çoxdan istəyirdim ki, buraya dəyişdiriləm. Yaxşı ki, indi şərait yarandı. Komandir, xahiş edirəm, kömək edin. - Atan kimdir? - Düşünürəm ki, yəqin, zabitlərdən kiminsə oğludur. - Müzəffər Əsədov. Heç ağlıma gəlməyib! Atasından bir qədər hündür olar. Gözləri, nazik çənəsi elə bil atasınkıdır. Müzəffər kişi ilə söhbətlərimiz yadıma düşür. - Yoxsa, Ziyasan? - maraq hər şeyi üstələdi. - Bəli, komandir, - əsgər cavab verdi. - Atanın arzusu gec də olsa, doğruldu,- deyə köksümü ötürürəm.
CƏBHƏ YOLLARINDA
Tankların, topların mərmiləri uğultu ilə düşüb çalalar açmasa da, bu yerlərdə on-on iki il əvvəl olduğu kimi döyüşlər getməsə də, torpaq yolla irəliləyərkən dərhal hiss edirsən ki, cəbhə yolundasan. Bu yolun yolçuları əsasən hərbçilərdir və torpaq üzərində hərbi yük maşınlarının "möhürlədiyi" ləpirlərdən başqa avtomobillərin izinə bu istiqamətdə rast gəlmək çətindir. Xidməti işimizlə əlaqədar hərdən mənim yolum da bu yerlərə düşüb və hər dəfə cəbhə bölgəsinə gəlmək və bu kələ-kötür, palçıqlı yolları "ölçərkən" həyəcanlanmamaq olmur. Amma heç ağlıma gətirməzdim ki, səhhətində ciddi problemlərin olmasına baxmayaraq, xalqımızın sevimlı şairi Məmməd Araz da bu çətin yolları keçib 2002-ci ildə cəbhə bölgəsinə - Vətənin keşikçilərinə baş çəkməyə gəlibmiş! Ən maraqlısı isə o idi ki, xalq şairinin gəlişini burada "əbədiləşdirmişdilər"... İndi tozlu-torpaqlı cəbhə yolları şairin izilə bizi ön xəttə aparırdı. Görəsən, onda Məmməd Araz bu yerlərdə hansı hissləri keçirmişdi? Düşmənlə üzbəüz səngərlərdə keşikdə dayanmış döyüşçülərimizlə bizi görüşə aparan maşın qırıcı təyyarə kimi arxasınca qatı toz-duman buraxaraq irəliyə doğru şütüyür. İçəriyə dolan toz çəkisizlik şəraitindəki tək salonda "uçur". İstər-istəməz fikirləşirsən ki, Vətənə sədaqətlə xidmət edən və axşam-səhər bu yollarda addımlayan zabit və əsgərlər fədakar insanlardır. Yolun hər iki tərəfində zəhmətkeş əllərinin təmasına uzun illərdir həsrət qalmış tarlalardan keçirik və ön xəttə, səngərlərə yaxınlaşdığımız aydın hiss olunur. - Mövqelərimiz bu təpəliyin arxasında, yüksəklikdədir, - zabit Müşfiq Orucov arxaya çevrilmədən əli ilə maşının pəncərəsindən qabağı göstərir. - Əsgərlərimiz gecə-gündüz səngərlərdə keşik çəkirlər. Şəmkirdə doğulub boya-başa çatmış zabit Bakı Ali Birləşmiş Komandirlər Məktəbini (indiki Heydər Əliyev adına Azərbaycan Ali Hərbi Məktəbini) 1995-ci ildə bitirib. Sifətinin gündə qaralması göstərir ki, günün çox hissəsini açıq havada keçirir. Əslində, hərbçi belə - möhkəm iradəli, çətinliklərdən qorxmayan və peşəsinə sədaqəti həmişə uca tutan olmalıdır. Maşın yoxuşu qalxıb bu çöllükdə vahəyə bənzəyən əsgər məskəninə yaxınlaşır və bölmənin qarşısında dayanır. Bölmə komandiri mətin addımlarla rəisinə yaxınlaşıb məruzə edir. Məlum olur ki, gün ərzində heç bir fövqəladə hadisə baş verməyib. Bir neçə əsgər təyin olunmuş yerdə silahını təmizləyirdi. Posta qalxmağa hazırlaşan əsgərlər isə yaraqlanıb-yasaqlanıb dəyişdirici ilə birlikdə səngərə sarı addımlayırdılar. Bir qədər aralıda əsgərlər özləri üçün turnik düzəldiblər. Bölmədə boks həvəskarının xidmət etdiyini də gördük. Bunu qumla doldurulmuş və yataqxananın qabağında asılmış torba göstərirdi. Məlum oldu ki, "armudu" gizir Qurban Qurbanov asıb. III dərəcəli idmançı olan Qurban asudə vaxtlarında məşq edir. Döyüşçülərimizin idmana marağı təbiidir. Hərbi xidmət elə bir sahədir ki, idman, fiziki hazırlıq zabitə də, gizirə də, əsgərə də hər an lazım olur. Xüsusilə də cəbhə bölgəsində. Son illərdə burada xeyli quruculuq işləri görüldüyünün şahidiyəm. Yuxarı komandanlığın xüsusi diqqəti və zabitlərin səyilə şəxsi heyətin məişət şəraiti xeyli yaxşılaşdırılıb. Döyüşçülərin yataqxanasına daxil olanda göz oxşayan əsgərsayağı səliqə-sahman gördük. Qonaq gəldiyini eşidən əsgərlərin "qırışığı" açılmışdı, maraq və diqqət dolu baxışlarından hiss edilirdi ki, əhval-ruhiyyələri yaxşıdır. Amma o da aydındı ki, bura abad hərbi şəhərcik yox, məhz cəbhə bölgəsidir. Və silahdan ayrı düşməyən, az qala silahla yuxuya gedən və silahla oyanan oğullar, doğrudan da, düşmən çəpəridirlər. Onlar sinələrini burada Vətən üçün, ana və bacılarımız, hər birimiz üçün sipərə çeviriblər. Yayın qızmar çağında, qışın sərt soyuğunda beləcə düşmənlə üz-üzə döyüş postlarında dayanır, xidmətin bütün çətinliklərinə sinə gərirlər. Günün nizamına əməl etməyə çalışsalar da, istənilən an, hətta gecənin yarısı düşmən "şıltaqlıq" edərsə, həyəcan siqnalı ilə yağının cavabını vermək üçün bütün şəxsi heyət ayağa qaldırıla bilər. - Hələlik nisbi sakitlikdir, - baş leytenant Emil Kamalov bildirir. - Amma dığalar hərdənbir atıcı silahlardan atır, sükutu pozurlar. Bu, bizi qorxutmur. Döyüşçülərimiz gecə-gündüz müşahidə aparırlar. Məkrli düşmənin istənilən təxribatının qarşısını almağa qadirik. Əlbəttə, buraya gəlib postlara baş çəkməmək düzgün olmaz. Ona görə səngərlərdəki əsgərlərimizin yanına getmək istədiyimi bildirirəm. Zabitlərlə birgə tranşeyə keçir, yüksəklikdəki atəş mövqeyinə qalxırıq. Hiss olunur ki, tranşeyə təzə əl gəzdirilib. - Tez-tez səngərləri təmizlədirik, - zabit Müşfiq Orucov deyir. - Yoxsa, küləyin, yağışın təsirindən uçulub dağılar. Hərəkət eləmək olmaz. Atəş mövqeyi təpənin üstündə, münasib yerdədir. Ətrafı buradan yaxşı müşahidə etmək, həndəvəri nəzarətdə saxlamaq mümkündür. Başında dəbilqə döyüş postunda dayanmış əsgər Vüsal Əbdülrəhmanov Oğuz rayonundandır. Artıq bir ilə yaxındır ki, ordu sıralarında xidmət edir. Ondan vəziyyəti xəbər alıram. - Səhər tezdən orada səngərin içini təmizləyirdilər, - döyüşçü düşmən mövqelərini göstərib deyir. - Bir qədər əvvəl isə təpənin arxasına ZİL-131 markalı yük maşını gəldi. - Amma arabir atırlar, - bunu əsgər İlham Rəşidov söylədi. - Atanda komandirlərimizə bildiririk, sonra ehtiyatla ermənilərin hərəkətini müşahidə edirik. Komanda alınsa, düşmən atəşlə susdurulur. Düşmən atəşkəsi pozan kimi dərhal döyüş həyəcanı siqnalı verilir, yuxarı komandanlıq hadisə barədə məlumatlandırılır. Şəxsi heyət əvvəlcədən təlimatlandırıldığı kimi səngərlərdə mövqe tutur. Rəhbərlik necə göstəriş versə, döyüşçülər elə də hərəkət edirlər. Başqa cür ola da bilməz. Son günlər burada hansı hadisələrin baş verdiyi ilə maraqlanıram. Zabit Müşfiq Orucov deyir: - Postlarımızda hər manqanın öz müşahidə jurnalı var. Növbə ərzində hansı hadisə baş versə, əsgərlər jurnalda qeyd edirlər. Əsgərlərin qeydləri ilə tanış olub maraq doğuran hadisələr barədə dəftərçəmə yazıram: 11 avqust. Düşmən tərəfdə "Ural" markalı maşın müşahidə olunub. 13 avqust. Düşmən tərəfdən snayper tüfəngindən üç ədəd güllə atılmışdır. 14 avqust. Səhər tezdən düşmən əsgərləri səngər təmizləyiblər. 17 avqust. Saat 11 radələrində düşmən tərəfdən avtomatdan 20 ədəd güllə atılıb. 22 avqust. Üç düşmən əsgəri səngərin üstündə müşahidə olunub. Məlumatlar beləcə lakonik və konkretdir. Şübhəsiz, bütün qeydlər barədə qəzetdə yazmaq olmaz. Ancaq hiss olunur ki, düşmənin təbliğatının əksinə olaraq, dığalar o qədər də intizamlı və hazırlıqlı deyillər. Döyüşçülərimizin intizamı, hazırlığı isə bizi sevindirməyə bilməz. Əslində, burada gördüklərim ordumuzda ötən illər ərzində baş vermiş dəyişikliklərin bariz nümunəsidir. Gizlətməyə nə ehtiyac var, bir vaxtlar mövqelərimizdə heç səngər belə qazılmırdı. İntizamsızlıq baş alıb gedirdi. Nəticədə, torpaqlar əldən getdi, ağır itkilər verdik. İndi vəziyyət, əlbəttə, xeyli dəyişib. Buna hərbi hissələrimizə, cəbhə bölgələrinə baş çəkərkən bir daha əmin olursan. - Odur, ermənilərdən biri görünür, - əsgər üstüörtülü atəş mövqeyinin "pəncərəsindən" qabağı göstərir. Doğrudan da, qarşıdakı səngərdə bir qaraltının hərəkəti müşahidə edilir. Ancaq əsgərlərimiz atəş açmırlar. Çünki bu barədə komanda verilməyib. Əgər "qarabalaya" əmr edilsəydi, əminəm ki, dığanın qaraltısı hərəkətini birdəfəlik dayandıracaqdı. Bunun özü də intizamdır. İntizamlı döyüşçü isə qələbəyə daha şanslıdır. Zabit Müşfiq Orucovla razılaşdığımız kimi, nəhayət, xalq şairi Məmməd Arazın əsgərlərimizə baş çəkdiyi posta gedirik. Döyüşçülərimizin təpəliyin başında olan müdafiə mövqeyinə dolanbac tranşeylə qalxdıqca istər-istəməz tövşüyürük. Postla erməni mövqeləri arasında hava məsafəsi 100-150 metr olar. Ancaq əsgərlərimiz burada düşməndən çəkinmirlər. Qarayanız azərbaycanlı balası: " buralar da, qarşıdakı erməni mövqeləri də bizim dədə-baba torpaqlarımızdır, niyə çəkinməliyik ki?! Qoy ermənilər bizdən çəkinsinlər", - deyir. "Bəs görəsən, xəstə şair bu yüksəkliyə necə qalxa bilib?" - deyə düşünürəm. Sonra da sanki sualımın cavabını özüm tapıram: "Vətən mənə oğul desə, nə dərdim, mamır olub qayasında bitərdim", - deyən vətəndaş şairin bir səngərə qalxması nədir ki?! -Bu post döyüşçülərimiz arasında ən məşhur yerdir,- zabit Müşfiq Orucov deyir.- Şair ön xəttə gələndə bu posta da qalxmışdı. Döyüşçülər yüksəkliyi o vaxtdan Məmməd Araz postu adlandırırlar. Sevimli xalq şairinin adını daşıyan səngərdə əsgərlərimiz fəxrlə döyüş növbəsində dayanırlar. ...Mən hərbi hissəni tərk edəndə artıq gün axşama əyilmişdi. Ancaq ovqatım yüksək və xoş idi. Hələ də xəyalən səmimi və gülərüz, Vətənə borcunu kişi kimi verən və onun yolunda hər cür fədakarlığa hazır olan döyüşçülərimizin yanında idim. Və həmin torpaq yolla geri qayıtdıqca düşünürdüm: bu cəsur oğullar çox şeyə qadirdirlər.
Yay, 2005
BİR TƏŞƏKKÜRÜN TARİXÇƏSİ
Şəxsi arxivimdə 1993-cü ildə yazılmış və cəbhə həyatımın ən həssas və yaddaqalan anlarını özündə yaşadan sənədlər arasında bir məktub saxlayıram. Əslində, vaxtın artıq xeyli saraltdığı və adi makina kağızında əllə yazılmış məktub məndə qalmamalı, Qax rayonuna göndərilməli idi. Bu, bir təşəkkür məktubu idi və cəsur döyüşçülərimizdən Əziz Abdullayevin atası Seyfulla kişiyə ünvanlanmışdı... 1992-ci ilin dekabrında mən artıq işğal altında olan Laçın rayonunun cənubundakı sonuncu kəndlərdə müdafiə mövqeyində dayanmış tabora sosial-siyasi işlər üzrə komandir müavini göndərildim. O vaxt burada nəinki peşəkar, hətta mülkidən çağırılmış zabitlər tək-tük idi və bir çox zabit vəzifələrini rütbəsiz, lakin qoçaq, döyüşçüləri arxasınca apara bilən əsgərlərə həvalə etmişdilər. Mülki şəxs olan tabor komandiri isə döyüşlərdə yaralandığı üçün hospitala göndərilmişdi. Vəziyyətlə tanış olmaq üçün tabor komandirini əvəz edən Muxtar Haşımovla Səfiyan, Aşağı Fərəcan, Yuxarı Fərəcan kəndlərinə qalxdıq. Dinc sakinlər artıq buranı tərk etmişdilər, adda-budda evlərdə isə əsgərlər qalırdılar. Hamısının üz-başını tük basmışdı, kimsəsiz adada qalmış Robinzon Kruzoya bənzəyirdilər. Əlbəttə, indiki anlamda hərbi intizamdan əsər-əlamət yox idi. Döyüşçülərin çoxu Sovet ordusunda xidmət etmiş gənclər idi. Bizi görən kimi bəzi əsgərlər hamamla, geyimlə, təminatla, hətta silah-sursatla bağlı şikayətləri üzərimizə yağdırmağa başladılar. - Nə vaxtdı çimə bilmirik, sabun yoxdur. - Haçan çəkmə verəcəklər, dağda-daşda ayağımızdakılar cırılıb. - Niyə adam sayına çörək gətirmirlər? - Erməni postlarında DŞK pulemyotları qoyulub, bizdə adi pulemyot belə çatışmır. Əlimizdə, açığı, elə bir imkan olmasa da, problemlərin həllinə çalışacağımızı deyirik. Şübhəsiz, gördüklərimizdən ürəyimiz ağrıyır, ancaq döyüşçülərə ürək-dirək verməyə, çətinliklərin müvəqqəti olduğuna, torpaqlarımızı düşməndən azad edəndən sonra ev-eşiyimizə qayıdacağımıza inandırmağa çalışırıq. Bölüklərdə, doğrudan da, Vətənin müdafiəsinə könüllü qalxan, ürəklə döyüşlərə gedən layiqli oğullar az deyildi. Belə bir döyüşçü ilə daha bir postu yoxlayarkən tanış oldum. Çavuş Əziz Abdullayevin qoruduğu post Həkəri çayı ilə yanaşı, üzüyuxarı Laçına tərəf uzanan asfalt yolun üstündə, işğal edilmis Malxələf kəndinin qarşısında "Uçan gav" deyilən yerdə idi. Yəqin ki, gəldiyimizi buradakı döyüşçülərə digər postlardan ratsiya ilə xəbər vermişdilər və posta yaxınlaşanda taqımın iki cərgə düzüldüyünü gördük. Ortaboylu, gülümsər başçı tabor komandirinə vəziyyət barədə hərbi qaydada məlumat verdi. - Əziz Abdullayevin komandir olduğu taqım ən yaxşı bölmələrimizdəndir, - Muxtar Haşımov üzünü mənə tutub dedi. Taqımdakı o dövr üçün normal sayıla bilən intizam, döyüşçülərin xoş ovqatı bizim də əhval-ruhiyyəmizə sirayət etdi. Əvvəlcə elə düşündüm ki, taqım komandiri zabitdir. Rütbəni bildirən paqon, ulduzlar həmin vaxt çoxlarında yox idi. "Bəs zabitdirsə, niyə heç olmasa, bölüyə yox, taqıma rəhbərlik edir?" - Əziz zabitdir? - Muxtar Haşımovdan astaca soruşuram. - Yox əşi, - o, gülümsünür. - Əsgərlərin arasından seçib qoymuşuq. Çox bacarıqlı oğlandır. Əziz Abdullayevin rəhbərlik etdiyi taqım məndə olduqca nikbin təəssürat oyatdı. Qıvrım saçlı, qaxlılara məxsus şirin ləhcə ilə danışan çavuşa sonralar hörmətim daha da artdı. Onda lider xarakteri vardı və taqımın əsgərlərini öz ətrafında birləşdirməyi bacarmışdı. Düşmən postları qarşıdakı yüksəkliklərdə yerləşdiyindən, əslində, çökəkdə qalmış döyüşçülərimizin vəziyyəti ürəkaçan deyildi və orada duruş gətirmək çox çətin idi. Düşmən tez-tez müxtəlif istiqamətlərdən həmin mövqeni güclü atəşə tutur, postdakı əsgərlərimizə goz acmağa imkan vermirdilər. Ancaq mahir qumbaraatan olan Əzizin qorxmazlığı döyüşçülərə böyük inam verirdi və əmin idilər ki, ermənilər bu istiqamətdən mövqelərimizi yara bilməzlər. Hərdən yarızarafat, yarıciddi soruşurdum: - Əziz, birdən postu əldən verərsiniz ha! - Yox, komandir, - gülümsünər və tez-tez təkrarladığı sözləri deyərdi. - Biz ki varıq, cin kimi uşaqlarıq! Erməni bizə bata bilərmi? Qanlı döyüşlər getdiyi həmin ərəfədə ordumuz hələ vuruşa-vuruşa formalaşmaqdaydı. Ön cəbhədə döyüşən oğulların hansısa qaydada mükafatlandırılması, həvəsləndirilməsi üçün, doğrusu, elə bir imkan yox idi və bir çox hallarda buna heç cəhd də göstərilmirdi. Onda tabor komandirinin sosial-siyasi iş üzrə müavini kimi mən, seçilən döyüşçülərin valideynlərinə təşəkkür məktubları yazmaq fikrinə düşdüm. Məqsədim qanlı-qadalı günlərdə Vətənə sədaqətlə xidmət edən, torpaqlarımızın müdafiəsi uğrunda fədakarlığa hazır olan döyüşçülərimizin cəsurluğuna cüzi də olsa qiymət vermək, onları daha da ruhlandırmaq idi. Ancaq mənim bu təşəbbüsümü ciddi qarşılamayanlar da vardı. - Burada qırğın gedir, təşəkkür məktubunun vaxtıdır? - deyənlər də tapılırdı. Mənsə fikrimdən dönmədim və 1993-cü ilin mayında 20-yə qədər nümunəvi əsgərin valideynlərinə özümün sərbəst tərtib etdiyim məktubu yazdım. Bədbinləri başa salmağa çalışırdım ki, müharibə vaxtı yazılmış təşəkkür məktubları, zaman gələcək, döyüşçülər və onların valideynləri üçün Vətənin orden və medalları qədər dəyərli olacaq. Layiqli saydığımız döyüşçülər sırasında, təbii ki, çavuş Əziz Abdullayev də vardı. "Hörmətli Abdullayevlər ailəsi! Sizin oğlunuz Abdullayev Əziz taborumuzda əsgəri xidmətini yerinə yetirir", - mətn belə başlanırdı. Əzizin və təşəkkürə layiq görülən digər oğulların intizamlı olmaları, döyüşlərdə dəfələrlə fərqlənmələri, işğal edilmiş torpaqlarımızın azad olunması üçün ürəklə vuruşduqları məktubda vurğulanırdı. Onu da qeyd edim ki, həmin 20 nəfərdən bir neçəsi sonralar döyüşlərdə mərdliklə həlak oldu. Ancaq təşəkkür alanlardan heç biri döyüşçü adını ləkələyən hərəkətə yol vermədi. Məktubları hərbi hissə komandiri tərəfindən möhürlətdikdən sonra valideynlərə göndərmək niyyətində idim. Əziz isə demişdi ki, qısamüddətli məzuniyyətə buraxılanda özü məktubu evlərinə aparacaq. Ancaq döyüşlər getdiyindən və komandanlığın başı qarışıq olduğuna görə məktublara möhür vurdurmaq ləngiyirdi. Artıq 1993-cü ilin avqustu idi. Düşmən Laçın rayonunun zəbt olunmamış sonuncu kəndləri üzərinə güclü hücuma keçdi. Çavuş Əziz Abdullayevin başçılıq etdiyi taqım da ermənilərin ağır zərbələrinə sinə gərməli oldu. Malxələf kəndi tərəfdən çıxmış düşmən tankı hər tərəfdən atəş yağmuruna tutulmuş "Uçan gav" postuna doğru asfalt yolla irəliləyirdi. Amma inanırdıq ki, həmin istiqamətdə müdafiə xəttimizi yarmaq dığalar üçün asan olmayacaq. - Əziz yaralandı! - rabitəçinin çatdırdığı məlumat həmin anda qanımızı möhkəm qaraltdı. Düşmən tankının atdığı mərminin qəlpəsi cəsur çavuşun qarnından tutmuş və ağır yaralamışdı. Əzizi heç hospitala çatdırmaq mümkün olmadı. Yolda sanitar-təlimatçıya son nəfəsində dediyi sözlər ürəyimizi ağrıtdı: - Mən ölürəm, uşaqlara çatdırın ki, postu əldən verməsinlər. Taqımın əsgərləri Əzizin vəsiyyətinə sadiq qaldılar. Ermənilər həmin gün "Uçan gav"ı ələ keçirə bilmədilər. Düşmən tankını isə döyüşçülərimiz qumbaraatanla məhv etdilər. Əziz Abdullayev həlak olandan sonra təşəkkür məktubunu Qaxa göndərməyi, şübhəsiz, məsləhət bilmədim və cəsur çavuşdan əziz xatirə kimi özümdə saxladım. O qanlı-qadalı illərdən xeyli keçsə də, şəhidlərdən söhbət düşəndə, arxivimə nəzər yetirəndə Əziz Abdullayevi və onun kimi sifətləri, səsləri, fədakarlıqları xatirimdən silinməmiş İlyas Cabbarovu, Sərvər Zeynalovu, Yavər Qadaşovu, Faiq Sadıqovu, Rəşid Bağırovu, Vətən uğrunda canlarından keçmiş digər döyüşçüləri yad etməyi mənəvi borcum hesab edirəm. Belə oğullar təkcə silahdaşlarının deyil, bütövlüklə xalqın yaddaşında əbədi yer qazanıblar. Bu yaxınlarda bir daha Əziz Abdullayevi və digər şəhidlərimizi yadıma salan bir hadisə baş verdi. Hələ Laçından tanıdığım, o yerlərdə döyüş yolu keçmiş və yaralanmış zabit yoldaşım Gəray Məmmədovla təsadüfən küçədə üz-üzə gəldik. Onu çoxdan idi ki görmürdüm və görüşə hər ikimiz olduqca şad olduq. Gəray artıq bir neçə ildir ki, ordu sıralarından tərxis olunub. Hal-əhval tutduq, olub-keçənlərdən danışdıq, Laçında, Qubadlıda, Cəbrayılda gedən döyüşləri xatırladıq. - Kimləri görə bilirsən? - Gəray soruşdu. Əlbəttə, birgə xidmət etdiyimiz və hər ikimizin yaxşı tanıdığı adamları nəzərdə tuturdu. Əlaqə saxladığım cəbhə yoldaşlarım haqqında ona məlumat verdim. - Sənin kimlərdən xəbərin var? - üzümü ona tuturam. Gəray ünsiyyətdə olduğu silahdaşlarımız barədə bildiklərini söylədi və birdən: - Silahlı Qüvvələr günündə sən, deyəsən, bizim döyüşçülərin arasında yox idin? - Necə bəyəm? - suala sualla cavab verirəm. - Belə qərara gəlmişik ki, hər il iyunun 26-da bir yerə yığışaq. Bizim hərbi hissədə döyüş yolu keçmiş silahdaşları nəzərdə tuturam. Bu il Şəhidlər Xiyabanında toplaşdıq, Vətən uğrunda canından keçənləri birgə yada saldıq. İşimizdən-gücümüzdən danışdıq. Bilirsən, hamımıza nə qədər xoş oldu ?! Sənin, deyəsən, xəbərin yoxdur? Təəssüflə çiyinlərimi çəkirəm. Amma təşəbbüs mənim də ürəyimdən xəbər verir. Deməli, bir-birimizə dinc dövrdə də ehtiyacımız var. Bunu başa düşmək üçün yalnız döyüş yolu keçmək lazımdır. Müharibənin öz ibrət dərsləri var. Döyüş meydanı elə bir yerdir ki, hər kəs nəyə qadir olduğunu tez büruzə verir. Əgər kimsə mülki həyatda, necə deyərlər, gen dünyada rastlaşdığımız kimi "maskalanıbsa", qısa bir sınaq anında, adi bir döyüş əməliyyatında cildini çıxarmağa, əsl simasını göstərməyə məcbur olur. Belə məqamlarda Vətənini ürəkdən sevən, dostluğun, yoldaşlığın qədrini bilən, silahdaşlarının həlak olmasını ən yaxın itki kimi qəbul edən və bununla belə ağır məqamlarda nikbinliyini itirməyən insanlar bu çətin günlərin imtahanında üzə çıxır, doğmalaşırlar. Beləcə, ağır günlərdə birlikdə olmaq, çiyin-çiyinə məhrumiyyətlərdən, oddan-alovdan adlamağın özü sərt həyat dərsidir. Əgər kim bu dərsi keçibsə və doğru ibrət götürübsə, ömrünün axırına qədər onu unutmayacaq, keçmişinə və yaddaşına heç vaxt xəyanət etməyəcək. Əsl insanlığı, dostluğu, yurdsevərliyi, etibarlılığı da bu dərsin meyarları ilə ölçəcək. Müharibənin sınağından çıxmış silahdaşlıq əlaqələrini itirmək istəməyən, şəhid olmuş yoldaşlarının əziz xatirəsini ürəklərinin çağırışı ilə yad etmək üçün ilin bir günündə yığışan döyüşçü dostlar ən ülvi duyğulara sahibdirlər, elə deyilmi? Bu görüşün təəssüratı ilə yenə şəxsi arxivimə üz tutur, cəbhə həyatımla bağlı kağız-kuğuzu nəzərdən keçirirəm. Vaxtilə öz əlimlə yazdığım təşəkkür məktubunu, eləcə də cəbhə xatirələri ilə dolu başqa sənədləri tapıram. Xəyalımdan getməyə başlamış bəzi cəbhə hadisələrini bu kağızların köməyilə bir daha yada salıram. "Silahlı Qüvvələr günü mütləq görüşərik", - deyə düşünürəm.
|
|