|
ƏSRLƏRDƏN GƏLƏN SƏS
Peyğəmbərimiz deyib: “Ev doğulub, ölmək üçündür, həyat yollardadır” Yol yaşamaq, təzədən başlanmaq üçündür, Sevmirəm yolların hamarını düzünü, Yollarım daş-kəsək olsun, Çən-çisək olsun Gədiklərdən “birəm-birəm” qar gəlsin, yollarıma ələnsin. Təki itirməyim babaların izini Yolum qayalara dirənsin, yoxuşlara diklənsin. Ayaq səslərimdən daşlaşan, ululaşan babalarım dillənsin. Amiranə səs eşidim Əsrlərin dibindən, yollarımda bələdçitək tutsun mənim əlimdən. Eheyy! Türkün səsi batmaz, Bozqurdlaşar, yatmaz. Türk oğlu türk! Gündoğandan - Günbatana uzanan bu yol sənin, Torpağına bayraq kimi Sancılan tək qol sənin. Yönünü sal əzəl yurdun Turana Savalana, Səhəndə. Qılıncını al əlindən Arazı sal kəməndə, Tək qoluna çarpış-vuruş durmadan, Yollarının düyünün aç ta gözləmir vaxt, zaman!
Sentyabr, 2007
BİR GÖZDƏ ÇƏKİLİR HAQQ DA, NAHAQ DA
Özü qan çanağı olan dünyanın, Baş aça bilmirəm heç gərdişindən. Bu qanlı-qabalı yalan dünyanın, Haqqa dar ağacı qurmaq işindən.
Oxu çıxıb yaydan təhəri yoxdur, Hədəfi cənubdur, şərqdir - bilinmir. Tökülən göz yaşı, çəkilən ahdır, Eynəsi açılıb, bircə yol gülmür.
Od ilə oynayır çırpısı hazır, Məlumdu ocağın körükləyənlər. Qərb Şərqin hökmünü əlüstü yazır, Analar qan udur, yanır körpələr.
Dünyanın vərdişi ağlatmaq dərdi, Mənim də ağlayan Qarabağım var. İlahi, sən yetir Məlikməmmədi, Qırılsın tilsimlər, açılsın yollar.
Uşaqlar doğulur vaqon evlərdə, Birinin qisməti cah-calal olur Qan ocağı olub İraq yenə də Nəsimi babam da “Sərpa” soyulub.
Qan qoxuyur orda daş da, torpaq da, Ağlına güc gəlib Qərbin tamahı. Bir gözdə çəkilir haqq da, nahaq da, Bilmirəm dünyanın nədir günahı?
DƏRDİ QUCAĞINA IXMIŞDI ANA
Bir ana oturmuşdu gördüm yol qırağında Başı enib sinəyə dizləri qucağında. Ağacların çiçəyi köçüb başında açıb Dodaqları bombozdu yanağın qanı qaçıb. Xəyalı göylərdədir fikri tarımar olub Baharın gülüş çağı gözü buludtək dolub. Yazdı, daş da, torpaq da könül verib sevgiyə, Hanı onun gülüşü Bəlkə çəkilib göyə? Hansı həsrət talayıb hansı dərd əyib onu? Bəlkə haqsız davada itirib tək oğlunu? Fələkmi qarğışlayıb ananın bu çağına, Dərd quşudu deyəsən, sığınıb qucağına. Onu torpaq ağrısı yurd qəmi döyüb, Allah, Od qızı libasını oddan da geyib, Allah! Haçansa səsli-küylü ağır bir eli vardı. Bir körpə ovutmağa indi bəs nəyi vardı? Dərd quşu aman vermir burda da dincəlməyə, İçində yuva tikib qoymur danışa-gülə. Baxışları çəkilib bahar da görmür onu Yol qırağında dərdi qucaqlayan ananı.
Nabran, iyul, 2007.
GÖYLƏRDƏN GƏLMİŞƏM MƏN YER ÜZÜNƏ
Göylərin qucağından yer üzünə gəlmişəm, Göy qanadlı, nur üzlü mələklərlə yenmişəm. Göy nəğməsi oxuyan günahsız mələk idim. Mələklər arasında haqq dolu gerçək idim. Yerə gəlib düşmüşəm zalım fələk oynuna, Bu haqsız günahların mən girmişəm qoynuna. Nə biləydim ömür də dərd ilə bəslənərmiş, Sevincdə də bu qədər qəm-kədər gizlənərmiş? Yaxşılıq axtarmışam, ümid verə könlümə, Yamanlar arasında ömr etmişəm sən demə. Mənim göy mələklərim Qarabağda azdılar, Göy həvəsli ömrümə yer dərdini yazdılar. Yurd dərdindən əyildim dəvənin boynu kimi, Bu ağrını çəkəcəm, deyəsən qəbrə kimi. Şax gəzmədim bir kərə, büküldükcə-büküldüm, Günahdan xəcil olub, öz içimdə çəkildim, Artan torpaq ağrımı bəxt saydım, qədər bildim, Tökülən göz yaşımdan bu yer, bu göy doymadı, Nə yaxşı, ümid məni yıxılmağa qoymadı.
PAYIZ DÜŞÜNCƏLƏRİ
Bayaqdan gəzirəm dağ arasında, Ürəyimi kövrək duyğular alır. Nəzərim yox ilə var arasında, Budaqda çırpınan yarpaqda qalır.
Onun da oxuyub payız hökmünü, ağacdan asılıb son ümid kimi. Öz payız ömrümü andırıb mənə, Ayrılıq qılınctək kəsir üstümü.
Kiçicik pöhrələr əsirlər tir-tir, Küləklər aşırır o yan-bu yana, Soyuq nəfəsilə payız elə bil, Bir həsrət paylayır burda hər yana.
Dünyanın oyunun düşünmək nahaq, O nədən “boşalır”, o nədən “dolur”? Bu gün yaz ömrümü yaşayan yarpaq, Sabah ayaq altda bir xəzəl olur?
Cığırla qalxıram üzüyuxarı, Eynimdə yaşamaq, yazmaq həvəsi. Başımın üstündə durna qatarı, Ayağım altında xəzəl naləsi.
Payızdan ayrılıb köçən durnalar Bir də bu payıza qayıtmayacaq. Təbiətin necə təzadları var?! Payızın yerini bahar alacaq.
Yolum zirvəyədi, zirvə də uzaq. Ayağım elə bil yerdən üzülür. Bir payız ovqatı nədən yaşamaq? Zirvədən üstümə işıq süzülür.
QƏRƏNFİLLƏR OYAQDIR
Şəhidlər məzarlığı. Gözlərimdə yaş yanır, Soyuq sükut daş kimi boğazıma tıxanır. Neçə ana fəryadı heykəl olub nə vaxtdır, Gör neçə çiçək ömrü burda solub nə vaxtdır. Gün altda cıqqır-cıqqır torpaq yanır, qovrulur, Amma burda soyuqdan insan da, daş da donur. Bir quş da ötüb getmir, təbiət sanki laldır. Baxışlarda qəm, kədər, bir də sonsuz sualdır. Sinəsi dağlı Bakı məzarlığa baş əyir, Ətəyinə göy Xəzər göz yaşları çiləyir. Göy üzü çadır-çadır Dolubdur, yağacaqdır, Təkcə dərdi ovudan qərənfillər oyaqdır.
BİRDİ ÜRƏYİM
Nə qədər ovudub ağlamaq olar? Özü boyda dərddi-sərdi ürəyim. Nə qədər el üçün ağlamaq olar? Qəm dolu Arazdı, Kürdü ürəyim.
Qalıb yolayrıcı düşüncələrdə, Ağrısına dönüb sevinc də, qəm də. Həqiqət axtarıb gəzdiyi yerdə Nə qədər yalanlar gördü ürəyim.
Zamanın hökmünə dözüb ağladı, Dərdin dərinində üzüb ağladı. Xəyalda yurd yerin gəzib ağladı, Neyləyim, bir belə kürdü, ürəyim.
Qəfildən alışıb yandırır məni, Gah dərdin buzunda dondurur məni, Gah da “Kərəmi”ni çaldırır mənə, Dərdlər xiridarı pirdi ürəyim.
Yıxılsam, yenə də haylaram onu, Dərdi bir də dinə, qoymaram onu. Kül edib torpağa paylaram onu, Heyif ki, sinəmdə birdi ürəyim.
|
|