|
ETİBAR İTƏRSƏ
Dindirmə, əriyər könlümün buzu, Axar yanağımdan sellənib gedər. Yazağzı sel-sudan çaxnaşıb artan Çeşmətək gözündən lillənib gedər.
Gün kimi gəlmişdin boran könlümə, Ağlımın bəlası olan könlümə, Demədim talan sal, talan könlümdə Pünhanlar boy verər, bəllənib gedər.
Qəlbim qan gölüdür, ləngəri əldə, Titrədər toxunsa ötəri yel də. Etibar itərsə qayıtmaz bir də, Güllə yeri kimi güllənib gedər.
AĞ ÇİÇƏK
Ay ağ çiçək, ağ çiçək, allar düşüb gözümdən. İçimdə bir qallıq var, gəl, al məni özümdən.
Ürəyim ağ kəlağay, yer tapammıram sərim. Belə ürəklə bəlkə ciçək olub əzəlim.
Götür, hara istəsən apar məni, at məni. O Bəy bəyazlığına bələ məni, qat məni.
Gedim bir ağ yuxuya, gedim ağ mələk kimi. Qayıdıb bu dünyaya gəlim ağ çiçək kimi.
BU DƏRD Kİ VAR
Bu dərd ki var, keçən deyil, Çalış yola ver də, ağla. Bir ağladın kar olmadı, Çək sinənə bir də ağla.
Bax ha, nadansa qarşında, Gülünc olar göz yaşın da. Yer ver bağrının başında, Çəkil dalda yerdə ağla.
Boş ver dünya dəstgahına, Bat bir ömrün günahına, Yol get dərdin dərgahına, Dərdini DƏRD bil də, ağla.
***
Əsim-əsim əsən qəlbim, Nə titrəyib, nə əsirsən? Düşüb dünyanın küyünə, Hansı gümana əsirsən?
Çəkdin ruhumu çarmıxa, Nədəni nə, bilmədim ha?! Kimin var ki, dönə baxa, Kimə haylanıb gəzirsən?
Hayladın dinən oldumu? Sinənə sinən oldumu? Özlədin, bilən oldumu? Bağlı qəsr, bəlli sirsən.
***
Ürəyim bal səbəti, duyğularım şan. Bal arısı kimi gündüz harda gəzib dolansam da, ürəyimə çəkilirəm günün axırı axşam.
***
düşüb ağ yollara gedirik ağ diləklərə ağ çıraq yandırmağa ağ daşlar ayağımızı döyə-döyə ovcumuzda ürəyimiz ürəyimizi yeyə-yeyə saya-saya gedirik qara, ağ məni alır cərgədən gələndə AĞ QONAQ ağ nəğmə yağır göylərdən hər yer olur ağappaq yaxınlaşır yer göyə atlanıb ürəyim gedir yer ilə göyün birləşdiyi yerə yüngülləşir ağ göyərçin kimi, öləziyir bütün "rənglər" bütün ağrılar itirir rəngini.
BAHAR GƏLİR
Torpaq qonaq gözləyən ev sahibi kimi tədarükdə, var - gəldədir ağacların qarasını çırpıb tökən külək də, qar yükünü atmış göy üzü bəyaz tül, buludlar ağlayıb ürəyini boşaldan adam kimi yüpyüngül, oturub elçi daşı üstündə Günəş açılıb eyni, gözləri yanır bulaqların eşqə düşən gənc kimi, dərələr yuyulmuş dişlərini göstərən qayaların seyrək təbəssümünə əzilib-büzülməkdə, ağaclar düyün - düyün, qoca ağacların quruyan budaqları yaşlanan gözəlin üzündəki qırış kimi sezilməkdə, qış uzunu lüt budaqları dayanacaq yeri seçən sərçələr sevincək. ... demək, bahar gəlir, bahar gəlir, demək.
YERİN BAĞRIMIN BAŞIDI
Ömür yolda qatar ikən, Sinəm cadar-cadar ikən, Arzularım çapar ikən Minib tərkinə gəlmisən.
Keçən illərin köçündən, Ağrılarımın içindən, Sıyrılıb Qədər suçundan Ürəklə, ərklə gəlmisən.
İllər həsrət, qəm yaşıdı, Qəlb eşqinə baş daşıdı, Yerin bağrımın başıdı, Gəl, öz mülkünə gəlmisən.
|
|