QARA DAŞA
Haçandan düşübsən,
Bu dərin dərənin dibinə?
Üstünü ot basıb,
mamır basıb
gör nə günə düşübsən,
nə günə?!
Bir zamanlar
qartallar ətrafında
qıy vurar, dolaşardı,
Günəş şəfəqlərini
səndən alıb,
yanıb alışardı.
İndi bu dərin dərənin dibində
qalıbsan tənha,
qarala-qarala,
dərdini bilənin yox
nələr çəkdiyini bilənin yox,
acı taleyinə
acı-acı gülənin çox.
Mənim kimi
için-için yanıb
qaralıb qara daş olubsan,
sanma özünü tək,
mənə sirdaş olubsan.
Heyranam səndəki dözümə,
Bu dözüm qaytardı məni özümə.
29.07.2007
TAPANMADIM
Yol getdim, yol boyunca
bir yoldaş tapanmadım.
Dərdimi söyləməyə
Bir qardaş tapanmadım.
Yellərə verdim yaşı,
qarşılayıram qışı.
Qoymağa bir başdaşı
qara daş tapanmadım.
Göydə süzər qızılquş,
əzələn belə olmuş,
Göylərdə yuva qurmuş,
qızılquş tapanmadım.
A qara bəxtim, oyan,
unma kimsədən aman.
Məni anlayan, duyan,
bir sirdaş tapanmadım.
23.07.2007
GÖZLƏRİNDƏN DÜŞƏN İŞIQ
Gözlərindən düşən işıq,
üzümə, gözümə
qəlbimə nur çilədi.
Bütün varlığımı
nura qərq etdi,
nura bələdi.
Gözlərindən düşən işıq,
qəlbimdə
ümid ocağı çatdı.
Başımdan
dumanlı fikirləri
çıxartdı, atdı.
Gözlərindən düşən işıq,
qanad taxıb
qaldırdı məni
göylərin yeddinci qatına,
apardı məni,
apardı özü ilə
ömrün yeni həyatına.
Gözlərindən düşən işıq,
qollarımda güc oldu,
dizlərimdə təpər oldu,
onun ziyasından
qaranlıq gecələr dönüb aydın səhər oldu.
Gözlərindən düşən işıq,
Aydan da, Günəşdən də gur idi,
o, adi işıq deyildi,
qəlbindən qəlbimə süzülən
ilahi nur idi.
Gözlərindən düşən işıq,
üzümə, gözümə,
qəlbimə nur çilədi.
Bütün varlığımı
nura qərq etdi,
nura bələdi,
gözlərindən düşən işıq.
BU GECƏ YAĞIŞ YAĞDI...
Bu gecə yağış yağdı,
Buludlar güllələndi,
Yer-göy silkələndi
Çaylar daşdı, selləndi.
Bu gecə yağış yağdı,
Göylər fişəng atdı,
Buludlar tonqal çatdı,
Buludlar ürəyini boşaltdı.
Bu gecə yağış yağdı,
ancaq bilən olmadı
səhərədək o ki var
tökülən damcılar
sevinc yaşıdır,
kədər yaşıdır,
Bu gecə buludlar
necə yaşadı.
02.01.2007
YOLUN HAYANADIR, AY ALLAH BƏNDƏSİ?
Yol var
çəməndə, bağçada itir.
Yol var
tində, dolanbacda bitir.
Yol var
dərə keçib, dağ aşır,
dünyanı dolaşır.
Yol var
qalxır, ucalır göyə.
Yol var
gedənlər qayıtmayır geriyə.
Çıxıbsan yola,
gedəsisən, gedəsi,
Yolun hayanadır,
ay Allah bəndəsi?
Hər yolun
yüz-yüz yolu var.
yüz-yüz qolu var.
Tanrı yolu:
haqqın yolu,
işıq yolu,
nur yolu,
namus yolu,
qeyrət yolu,
qürur yolu,
igidlik yolu,
ölməzlik -
şəhidlik yolu!
Mərhəmət yolu,
rəhmət yolu...
... şeytan yolu: -
kor yolu,
nankor yolu,
rəzalət yolu,
cəhalət yolu,
kin-küdurət yolu,
insanlığa nifrət yolu,
lənət yolu!
İstəsən də
istəməsən də
bu yollardan biri
tapacaq səni,
özü ilə aparacaq səni.
Çıxıbsan yola
gedəsisən, gedəsi,
Yolun hayandadır,
ay Allah bəndəsi?
Zirvə-qartalındır,
Meşə - maralındır.
Çöl-çəmən -ceyranındır.
Bu yollar da sənin -
İnsanındır.
Hansını istəsən seç
Hansını istəsən keç.
Ancaq
addımını atanda düşün,
fikirləş bir az,
sonra olacaqdır gec!
Çıxıbsan yola,
Gedəsisən, gedəsi.
Yolun hayanadır,
ay Allah bəndəsi?
Yolun hayanadır,
ay Allah bəndəsi?
13.01.2008
|
