|
BU MEH VƏTƏNDƏN ƏSIR
Bir meh əsdi, basdı məni bağrına Elə bildim, ayrılığı əsir alıb, anam qucdu ruhumu. Elə bildim , zindan çəkib, qandal qırıb atam sardı boynumu. Elə bildim, qonaq gəldi əsgər gedən qardaşım. Elə bildim, Tanrı payım balam öpdü əlimi. Elə bildim, qərib düşən əzizlərim, doğmalarım, yığışdılar başıma. Aman Allah, bu meh Vətəndən əsir, dilim-dodağım əsir, əlim ayağım əsir, Bu meh vətəndən əsir, Əsir vətəndən, əsir. Çiçəkdən-güldən əsir, Obadan-eldən əsir, Dağılan məzarlıqdan Qəbirdən-gordan əsir Əsir vətəndən, əsir Bu meh Vətəndən, əsir.
***
Yenə dolub gözlərim, qəlbim kimi. Dolanır başımda dünya kir-kirə kimi. Əzir, doğrayır düşünçələrimi bir buğda dəni kimi. Dondurur sevinçi baxışlarımda, gülüşü dodaqlarımda. Qıymır bir ovuç torpağı mənə, qarışıb ona çüçərəm, bir bahar gün işığında.
***
Köcəri quş kimi gəldin ömrümə, Dimdiyində gətirdin xoşbəxtliyi, Bu günümə dadızdırıb, tamarzı qoydun sabahımı. Quşlar bəlli zamanlarda köc edər Sənsə qəfil etdin bunu, Solmamışkən cicəklər. Elə bil ki, yuxudaydım sən gələndə. Kaş ki, yatıb qalaydım, o gördüyüm yuxuda.
QAR YAĞIR
Qar yağır başıma,çiyinlərimə, ayaqlarıma Düşüncəmi, yükümü, ağırlığımı Alıb aparır, Bir gün əzrail alacaq canımın Uyuyacağı qara torpağa. Qar yağır evimin damına, bəxtimin taxtına, Bir gün məzarım qazılacaq qəbiristanlığa. Qar yağır qarda qalan izimə, üzümə, gözümə Ağzımdan çıxan”Qar yağır “ sözümə Qar yağır beləcə ömrümün qar yağan gününə.
***
İçim od tutub yanır,aman Allah İçimə bir leysan tök. Bir sevgi ölüb içimdə Onu sən oxşa,onu sən ağla. Oy qəlbimi,elə ordaca göm,bu kimsəsiz ölünü. Çünki, səndən başqa bir kəsin xəbəri yox ondan. Qoy uyusun qırmızı məzarımda Qırmızı yuxularımın qırmızı sonu.
|
|