|
İSTƏK
Gözümü yuxu qanadıb, Gecəni gözümə sarı. Hamıdan üz döndərmişəm, Gedirəm özümə sarı.
Səni yaxşı aramağı, Üzü payıza saxladım. Uzun mətləbləri atdım, Qısadan-qısa saxladım.
Bu axırıncı vədimdi, And içdim daha, and içdim. Bütün adlara “quş” qoydum, Bircə Allaha and içdim.
Yox, üzü dönük deyiləm, Sevincin üzü yanadı. Sənə heç nə alammadım, Cibimin bağrı qanadı.
Sevdim, sevgimi həsrətə, Yuva qurmaqdan başladım. Mən sənə yaxın gəlməyə Uzaq durmaqdan başladım.
Bir də busəni xəlvəti Gecə saçına dola ver. Mən bəlkə bir də bitmədim, Bu yazı mənsiz yola ver.
Hər kəsin gücü çatmayan Bu sevgi daha yaxşıdı. Qovuşmaq həsrət gətirir, Ayrılıq daha yaxşıdı.
KÜÇƏMİZ
Küçəmiz yaman boşalıb, Çəkilib gedibdi hamı, Belə də sükutmu olar, Vahimə basır adamı.
Kəsilib səsin-sorağın, Qarışıb başın görünür. Nə uşaqlar at oynadır, Nə bir yad maşın görünür.
Xəlvət-xəlvət iş görübsən, Meylini bizə bilirdik. Bu küçənin şansını lap Doxsana, yüzə bilirdik.
Hərə birtəhər ovunur, O daldada, bu daldada. Heç bu olan işdimi ki, Bir qız hamını aldada.
Təki bizim küçəli ol, Payızın, qışın bəs idi. Ölüb-ölüb dirilməyə Bircə baxışın bəs idi.
Bildirsəydin pis olmazdı, Gələrdik, yola salardıq. Tək-tək gücümüz çatmadı, Yığışıb üzük olardıq.
* * *
Sən, ya mənim yuxumdasan, Ya xəyallar şəhərində. İndi hər şey cavabsızdı, Bu suallar şəhərində.
Nə qəfəsik, nə də quşuq, Amma biz də doğulmuşuq. Elə bil ki doğulmuşuq Qeylü-qallar şəhərində.
Tanış dəniz, tanış mayak, Azaq gedək, barışmayaq. Gəl bir müddət danışmayaq, Gəzək lallar şəhərində.
Şaxta, soyuq, ayaz-adım, Gəldim sənə addım-addım. Acı yedim, acı daddım, Həm bu ballar şəhərində.
Bir yerim var, bir göyüm var, Acı-şirin taleyim var. Nəyim yoxdu, hər şeyim var Ehtimallar şəhərində.
* * *
Bahar məndən ürəyimi istəyir, Bulaq kimi çağlamağa verimmi? Ya sənintək bir insafsız gözələ Yüz yerindən dağlamağa verimmi?
Şəfəqləri çox ürəyə saçılıb, Hansı eşqin əzabından qaçılıb. Yanınızda qul bazarı açılıb, Qollarımı bağlamağa verimmi?
Sənsiz həyat zəhər kimi, nə dad-tam, Əridikcə əriyəcək canım-şam. Çox dolubsan, çox dolubsan bu axşam, Gözlərimi ağlamağa verimmi?
Bir söz var ki, yarı demə, yarı de, İndən belə öz dilinə arı de. Götürmüsən ürəyimi, barı de, Əllərimi saxlamağa verimmi?
|
|