|
Sağlığında ona "filosof tənqidçi" və "ədəbiyyatın vicdanı" deyirdilər. Ədəbi ictimaiyyətin və onu tanıyanların nəzərində o, ilk növbədə, böyük şəxsiyyət idi. Onun tənqidçi, ədəbiyyatşünas, pedaqoq, maarifçi kimi XX əsr Azərbaycan mədəniyyəti tarixində silinməz izlər buraxması danılmaz bir həqiqətdir. Mən o xoşbəxt insanlardanam ki, bu böyük şəxsiyyətin tələbəsi olmuşam. O, BDU-nun filologiya fakültəsində bizə XIX əsr rus ədəbiyyatı tarixindən mühazirələr oxuyurdu. Həqiqəti deməliyəm: onun mühazirələrinə hamı eyni maraq və həvəslə qulaq asmırdı. Amma onun fanatikləri olan tələbələr vardı (mən də o sırada idim), onlar birinci mühazirəsindən tutmuş sonuncusuna qədər heyranlıqla qulaq asır, bir cümləsini belə diqqətdən yayındırmırdılar. O, bəzi natiq pedaqoqlar kimi parlaq və emosional danışmırdı, səsi cazibəli deyildi, hətta çox zaman səsini aşağı tona endirirdi. Amma biz fanatiklər onun səsinin yox, məntiqinin və geniş dünyagörüşünün əsiri idik. Açığını deyim ki, bizim rus ədəbiyyatına böyük maraq və heyranlığımız onun mühazirələrindən və bu mövzuda yazdığı onlarla məqalədən başladı. İllər keçdi, mən aspiranturada ixtisas imtahanını M.Cəfərin qarşısında verməli oldum. Nəhayət, namizədlik dissertasiyamın müdafiəsində iclasa sədrlik edən M.Cəfər müəllim idi. Deyirlər ki, o, filologiya fakültəsinin dekanı olanda hər ay aldığı məvacibi yoxsul tələbələrə paylayırmış. Deyirlər ki, ziyalılar arasında sadəlikdən, səmimilikdən, təbiilikdən, dosta sədaqətdən, həqiqətpərəstlik duyğusundan söz düşəndə bir nümunə kimi onun adı çəkilirmiş. Deyirlər ki, bütün ömrü boyu içində paxıllıq olmayıb, elmi və ədəbi karyerası zamanı heç kimin bostanına daş atmayıb, həmişə həqiqət prinsipinə sadıq qalıb. Söhbət ustad tənqidçi, akademik Məmməd Cəfər Cəfərovdan gedir. ...Bu yubiley yazısını qələmə almamışdan öncə Məmməd Cəfər müəllimin Axundov adına Respublika kitabxanasında olan əsərlərinin kataloquna nəzər yetirdim. Mənə inanmırsınızsa, gedib baxa bilərsiniz- XX əsrdə yaşamış heç bir tənqidçi və ədəbiyyatşünas onun kimi məhsuldar fəaliyyət göstərməmişdir. Məmməd Cəfər müəllim səksən üç illik ömrünün altmış ilini fasiləsiz şəkildə, demək olar ki, dinclik və istirahət bilmədən Azərbaycan ədəbiyyatının xidmətində dayanmışdır. Həmişə bu postda ayıq-sayıq dayanan ustad, ədəbiyyatın təfəkkürü missiyasını yerinə yetirən tənqidin sıravi nümayəndəsindən onun aparıcı simasına qədər şərəfli bir yol keçmişdir. XX əsr Azərbaycan ədəbiyyatında- poeziya, nəsr və dramaturgiyada ayrı-ayrı ƏDƏBİ MƏKTƏBlərin mövcudluğundan söz açsaq, deyə bilərik ki, poeziyada Sabir, Səməd Vurğun, Rəsul Rza, nəsrdə Cəlil Məmmədquluzadə, dramaturgiyada Cəfər Cabbarlı, İlyas Əfəndiyev ədəbi məktəbləri olmuşdur. Bu, bəlkə də bir fərqli düşüncədir, mənimlə razılaşmaya da bilərlər. XX əsr Azərbaycan ədəbi tənqidində isə mənim fikrimcə, bir məktəbdən söz açmaq olar ki, bu məktəbin baniləri kimi Məmməd Arifin və Məmməd Cəfərin adlarını çəkmək olar. Məsələ burasındadır ki, bu iki görkəmli şəxsiyyət otuzuncu illərin sonlarından başlayaraq ədəbi tənqidin təkcə bədii ədəbiyyatın deyil, həm də mədəniyyətin fəal bir sahəsinə çevrilməsində böyük rol oynadılar. Tənqidin "xalis ədəbiyyat sərhədləri daxilində yox, bütünlükdə ideoloji işin, ictimai fikrin ümumi mənzərəsində mövqeyi və rolu" (Q.Yaşar) ilk dəfə məhz bu iki tənqidçinin yaradıcılığında daha bariz şəkildə hiss olundu, onların ədəbi-tənqidi fəaliyyəti təkcə ədəbiyyata yox, həm də əsrə, zamana kökləndi. Məmməd Cəfər Zeynalabdin oğlu Cəfərov yüz il bundan əvvəl, may ayının 9-da Naxçıvan şəhərində dünyaya göz açıb. Atası dərziydi, çoxuşaqlı ailədə çörək qazanan ancaq o idi. Odur ki, əli işə yatan kimi balaca Məmməd Cəfər də həyatın qaynar burulğanına atıldı, çörək dükanında işləməyə başladı. On yaşı olanda -1919-cu ildə əvvəlcə anasını, az sonra atasını itirir, böyüyü yeddi, kiçiyi iki yaşında olan iki bacısı, özündən bir yaş kiçik qardaşı, əlli yaşında nənələri, demək olar ki, ümidlərini ona dikdilər. Ona görə də onun savad almağı bir az gec başa gəlir, ailə qayğıları ona imkan vermir ki, tam ibtidai təhsil alsın, amma buna baxmayaraq yazıb-oxumağı öyrənir, Şura inqilabı gələndə isə altı aylıq ali savad kursunu başa vurur, iki ay müddətində isə Hüseyn Cavidin böyük qardaşı Məhəmməd Rəsizadənin "şagirdi" olur. Ancaq ibtidai təhsil haqqında vəsiqəsi olmadığından onu orta məktəbə qəbul eləmirlər. Ürəyi isə oxumaq, təhsil almaq eşqilə çırpınırdı və tanış bir ziyalının məsləhətilə o vaxt maarif komissarı olan Ruhulla Axundova şeir ilə uzun bir ərizə yazır. Bu ərizənin böyük təsiri olur, 1928-ci ilin sentyabrın 15-də iki milis nəfəri çörək dükanlarının birində onu tapır, rayon partiya komitəsinə aparırlar. Ruhulla Axundov mənzum ərizənin birinci səhifəsində yazmışdı: "Bu oğlanı təcili tapıb məktəbə qəbul olunmasına kömək edin!". Beləliklə, elə həmin gün Məmməd Cəfər Naxçıvan pedoqoji texnikumuna qəbul olunur. (M.Cəfərin uşaqlıq və gənclik illəriylə bağlı bu faktları Yaşar Qarayevin görkəmli alimə həsr etdiyi "Bir ömrün işıqları" monoqrafiyasından əxz elədik). 1932-ci ildə M.Cəfər pedaqoji texnikumu bitirir və təhsilini davam etdirmək üçün Bakıya gəlir, o, Lenin adına APİ-nin dil və ədəbiyyat fakültəsinə daxil olur. Beləliklə, gənc M.Cəfər qaynar ədəbi mühitə qovuşur. O, Naxçıvanda yaşayarkən ara-sıra şeirlər də yazırdı, əlinə keçən bədii əsərləri mütaliə edirdi və onun şeirlərini dinləyən hər kəs bu cavanın istedadlı olduğuna şübhə eləmirdi. Bakı həyatı isə M.Cəfərin publisist və tədqiqatçı kimi fəaliyyəti üçün təkanverici rol oynadı, o, "Gənc işçi", "Maarif işçisi" qəzetlərinin redaksiyalarında çalışır, sonra aspirantura təhsili alır. Xarakterindəki zəhmətsevərlik, sənətinə fanatik məhəbbəti M.Cəfərin çox tezliklə elmi təşkilatçılıq karyerasını da müəyyənləşdirir: o, APİ-də rus ədəbiyyatı tarixi müəllimi, ədəbiyyat fakültəsinin dekanı, Axundov adına Müəllimlər İnstitutunda ədəbiyyat tarixi kafedrasının müdiri kimi fəaliyyət göstərir. M.Cəfər Böyük Vətən müharibəsi illərində Qubada müəllimlər institutunun təşkilatçılarından biri olur, hətta iki il orada elmi işlər üzrə direktor müavini vəzifəsində çalışır. Onun pedoqoji fəaliyyəti daha çox ADU-nun filologiya fakültəsi ilə bağlıdır. M.Cəfər düz on səkkiz il-1959-cu ilin sonuna kimi burada fakültə dekanı, rus ədəbiyyatı tarixi kafedrasının müdiri və əlbəttə, müəllim kimi ADU-nun filologiya fakültəsinin tələbələrinin sevimlisinə çevrilir. Maraqlıdır ki, o, sonrakı illərdə də rus ədəbiyyatı tarixindən mühazirələr oxumaq üçün BDU-ya dəvət edilirdi. Qızğın pedaqoji fəaliyyətlə yanaşı, M.Cəfər dörd il (1945-1948) "Ədəbiyyat qəzeti"ndə baş redaktor da işləmişdir. Mən istəmirəm ki, bu bioqrafik faktları uzadım. Qısaca deyim ki, M.Cəfər sonrakı illərdə də həmişə ədəbi və elmi fikrin fəal qurucularından olmuş, Ədəbiyyat institutunda şöbə müdiri və direktor, Azərbaycan EA ictimai elmlər bölməsinin akademik-katibi vəzifələrində çalışmışdır. Bu, alim-mütəfəkkir Məmməd Cəfər ömürlüyünün çox qısaca tarixçəsidir. Amma Məmməd Cəfərin tənqidçi-ədəbiyyatşünas portretini dolğun təsəvvür etmək üçün, ilk növbədə, gəlin onun elmi biblioqrafiyasına nəzər yetirək. "Rus ədəbiyyatı tarixi oçerkləri" (1939), "Klassiklərimiz haqqında" (1948), "M.F.Axundovun ədəbi-tənqidi görüşləri" (1950), "A.İ.Gertsen" (1954), "Ədəbi düşüncələr" (1958), "Füzuli düşünür" (1959), "H.Cavid" (1960), "Azərbaycan ədəbiyyatında romantizm" (1963), "Azərbaycan-rus ədəbi əlaqələri tarixindən" (1964), "Estetik zövq haqqında" (1964), "Mütəfəkkirin şəxsiyyəti" (1966), "Səməd Vurğun" (1966), "Cəlil Məmmədquluzadə" (1966), "Estetik tərbiyə, ailə və məktəb" (1967), "Həyatın romantikası" (1968), üç cildlik "XIX əsr rus ədəbiyyatı tarixi" (1970-1974), "Sənət yollarında" (1975), "Nizaminin fikir dünyası" (1982)... Bu sıraya M.Cəfər müəllimin uzun illər orta məktəbin "Ədəbiyyat" dərsliklərinin müəllifi olduğunu da əlavə edə bilərik. Klassik və müasir ədəbiyyatımızın elə bir böyük şəxsiyyəti yoxdur ki, M.Cəfərin tədqiq obyektinə çevrilməsin. Ədəbiyyatımızın elə bir problemi yoxdur ki, M.Cəfərin tənqidi yazılarında öz həllini tapmasın. Əgər belə demək mümkünsə, o, Nizamidən Anara və Elçinə qədər səkkiz əsrlik bir ədəbiyyatın yorulmaz tədqiqçisi və təbliğçisi olmuşdur. Ancaq bu sözlər onun elmi-tənqidi fəaliyyətini tam açıqlamır. M.Cəfər istər ədəbiyyat tarixçisi, istər nəzəriyyəçi alim, istərsə də tənqidçi kimi yanaşdığı hər hansı bir mövzuya öz möhürünü vururdu. Məsələn, Füzuli haqqında Həmid Araslı da, Mirzağa Quluzada də, Mir Cəlal da gözəl elmi əsərlər yazmışlar, lakin "Füzuli düşünür", "Füzuli sevir" əsərlərinin füzulişünaslıqda müstəsna yeri var. M.F.Axundov və Sabir haqqında çoxlu əsərlər yazılıb, amma M.Cəfərin bu sənətkarlar haqqında yazdığı əsərlər xüsusilə seçilir. M.Cəfər Azərbaycan ədəbiyyatşünaslığında Cavid haqqında ilk monoqrafiyanın müəllifidir, bu monoqrafiya cavidşünaslığın yeni mərhələsi üçün başlanğıc nöqtəsi oldu. Azərbaycan ədəbiyyatında romantizm probleminin ilk tədqiqçisi də M.Cəfər olmuşdur. M.Cəfər Azərbaycan şeirinin vəzni, poetik xüsusiyyətləri haqqında ən sanballı və indi də əhəmiyyətini itirməyən bir çox məqalələrin müəllifidir. Bu "ilk" təyinlərinin sayını yenə artırmaq olar. Amma onun üç cildlik "XIX əsr rus ədəbiyyatı tarixi" dərsliyinin isə alternativi yoxdur. Bu yazıda, təbii ki, Məmməd Cəfərin elmi-tənqidi fəaliyyətinin bütün aspektlərini açıqlamaq mümkün deyil. Ancaq Məmməd Cəfəri Məmməd Cəfər kimi tanıdan və sevdirən məqamlar üzərində dayanmaq istərdim. BİRİNCİ MƏQAM. Məmməd Cəfər təpədən-dırnağa milli tənqidçi-ədəbiyyatşünas olsa da, ədəbiyyata daha geniş üfüqlərdən - Şərq və Avropa kontekstindən yanaşırdı. Azərbaycan ədəbiyyatının hər hansı bir problemi dünya ədəbi fikrində cərəyan edən hadisələrdən təcrid olunmurdu. Yaşar Qarayev M.Cəfərin tənqid zövqü və görüşlərinin formalaşmasında klassik fransız maarifçiliyinin (Volter, Russo, Didro, Lamatri, Helvetsi) və rus inqilabçı-demokratlarının (Çernışevski, Dobrolyubov, Gertsen, Belinski) böyük təsiri olduğunu qeyd edir. Yazır ki: "...bu cəhəti M.Cəfər yaradıcılığında ilk dəfə olaraq Səməd Vurğun müşahidə etmiş və onu "filosof tənqidçi" kimi ilk dəfə o fərqləndirmişdi. Ümumiyyətlə, klassik fransız maarifçiliyinin və rus inqilabi-demokratizminin estetikası M.Cəfərin ən çox öyrəndiyi və ölməz ənənələrini bu gün də müdafiə etdiyi ədəbi tənqid məktəbi hesab oluna bilər". İKİNCİ MƏQAM. Məmməd Cəfərin elmi-tənqidi fəaliyyəti tarixlə müasirliyin ideya-mənəvi bağlılığını əks etdirən bir təlimdir - desək, yanılmarıq. O, təkcə klassik irsin qoruyucusu, hamisi, ənənə keşikçisi kimi deyil, həm də bu ənənələrin gələcək nəsillərə çatdırılması missiyasını həyata keçirən ilk tənqidçilərdən olmuşdur. Məmməd Cəfər Azərbaycan ədəbiyyatının ayrı-ayrı mərhələ və dövrlərini qətiyyən bir-birindən təcrid etmirdi, o, müasirlərimizi düşündürən bir çox suallara cavab axtararkən, ilk növbədə, Nizamiyə, Füzuliyə, Axundova, Sabirə, Mirzə Cəlilə, onların ölməz əsərlərində ifadə olunan fikirlərə istinad edirdi. Onun fikrincə, bu sənətkarlar həmişə müasirdirlər. Nizami hümanizmi barədə yazırdı: "Nizamiyə görə, humanizm insanın ən yüksək duyğularını, qəlbin ən ali, incə və nəcib hisslərini canlandıran, insan ruhunu çiçəkləndirən bahar nəsimidir. Onsuz insan mənəviyyatı qaranlıq qış gecələri kimi soyuq və miskindir". M.Cəfərin Füzuli sənətiylə bağlı məqalələrinə gəlincə, qətiyyətlə demək olar ki, bu yazılarda böyük fəxr duyğusundan doğan elə sətirlər var onları həyəcansız oxumamaq olmur. Ustad tənqidçi əvvəlcə Füzuli sevgisinin mahiyyətini şərh edir, bu sevginin fəlsəfəsini açır. "Füzulinin nəzərində insan hər şeydən əvvəl həyat aşiqi, elm və idrak aşiqi, gözəllik aşiqi deməkdir. Füzuli sənətinin iki əsas canlı məsdəri vardı: eşq və idrak. Füzuli varlığa bu yolla mərifət yetirirdi... Füzuli sevir, Füzuli düşünür deməkdir. Aşiq Füzuli ilə mütəfəkkir Füzuli, ancaq vəhdət halında alındığı zaman onu duymaq olur. Füzuli başqa cür dərk edilə bilməz....Füzuli sevirdi. Füzulini başa düşmək üçün hər şeydən əvvəl sevən qəlbə malik olmaq lazımdır. Elə bir qəlb ki, sadəcə sevib yüngülləşmək deyil, sevib kədərlənə bilmək üçün də döyünsün. Sevib yüngülləşmək, nəşələnmək çox asandır. Bu cür sevməyi hər kəs bacarar. Sevib kədərlənmək, bütün xalqın, elin, bəşəriyyətin dərdinə şərik olmaq isə çətindir. Füzuli belə sevirdi... Yüngülləşmək üçün sevməyi və təmiz niyyətlə də olsa özünü sevdirməyi bacaranlar Füzulini anlaya bilməzlər. Özünü Qeysə, sevdiyini isə Leyliyə oxşadanlar, özünü Məcnun kimi nalan və giryan, sevdiyini isə Leyli kimi məhzun və pərişan görmək istəyənlər də Füzulini anlaya bilməzlər". Odur ki, Füzuliyə sevgilərlə yanaşı, Füzulini anlamayan, "onu dərdə salan nadanlar"a da münasibətsiz keçinmir ustad tənqidçi. Ancaq M.Cəfərin füzulişünaslıqda, deyərdik ki, ən böyük hünəri dahi şairin dünyagörüşünün tədqiqidir. "Füzuli düşünür" monoqrafiyası şair Füzuli ilə alim-mütəfəkkir Füzulinin vəhdətini, əslində, bu "birliyin" şairin yaradıcılığının elə ilk illərindən yarandığını sübut edir. Füzulini tədqiq edən M.Cəfər bu dahi şairi təkcə ədəbiyyat üçün, elm üçün deyil, həm və ən başlıcası, gələcək nəsillər üçün kəşf edirdi. Ustad tənqidçi digər klassiklərə də məhz bu meyarla yanaşırdı. ÜÇÜNCÜ MƏQAM. Görkəmli tənqidçi Yaşar Qarayev yazırdı: "Sənətdəki gözəlliyin sirlərini kəşf etmək, böyük fikirləri duymaq və aşılaya bilmək, dərin inandırıcılıq-onun tənqid sənəti təlimində əsas cəhətdir və məhz həmin xüsusiyyətlərin Məmməd Cəfərin öz yaradıcılıq praktikasında kəsb etdiyi konkret ideya-məfkurə və emosional məzmun onun rəğbət bəslədiyi estetik sistemi, ədəbi tənqid konsepsiyasını xarakterizə edir". Bu müddəadan çıxış edib Məmməd Cəfərin bir çox əsərlərində onun tənqid sənəti təliminin başlıca istiqamətləri ilə tanış ola bilərik. Deyə bilərik ki, M.Cəfər tənqidi məhz sənətdəki gözəlliklərin sirlərini, möcüzələrini kəşf etməyə yönəlmişdi. Biz M.Cəfərin təkcə klassiklər haqqında deyil, həm də öz müasirlərinin yaradıcılığı barədə düşüncələrini əks etdirən yazılarına diqqət yetirsək, görəcəyik ki, məsələn, Rəsul Rzanın yeni şeir üslubu fərdi xüsusiyyətləri ilə seçilir, fərqləndirilir. Onun şeir texnikasında, şairanə cümlə tərzində, şeir dili və intonasiyasında, bədii təsvir vasitələrində, obrazlarında, ifadə üsullarında, dildə arxaizmə və neologizmə münasibətində yeniliyə, orijinallığa meyil etməsini, həmçinin poetik formalar, şeir texnikası baxımından milli ədəbi ənənələrə arxalanmasını, bir tərəfdən qoşma, gəraylı, bayatı, nəğmə, məsnəvi şəkillərinə müraciət etməsini, əruz və hecanın müxtəlif şəkillərində əsərlər yazmasını, digər tərəfdən, sərbəst şeirə xüsusi maraq göstərdiyini M.Cəfər çox ustalıqla, əsl tənqidçi professionallığı ilə şərh edir. Yəni bu məqalədə M.Cəfər bəzi yubiley və portret yazılarından fərqli olaraq, şairin kimliyini müəyyən edən bir əsas məsələyə diqqəti yönəldir ki, o da POETİK USTALIQDIR. Eyni prosesi biz S.Vurğun haqqında yazıda da izləyə bilirik. Təkcə şairlər haqqında deyil, C.Cabbarlı, M.Müşfiq, M.S.Ordubadi, M.İbrahimov, İ.Əfəndiyev, Mir Cəlal, Osman Sarıvəlli, Əbülhəsən, Elçin yaradıcılığından söz açan yazılarında da M.Cəfər diqqəti daha çox sənətkarlıq məsələlərinə yönəldirdi. DÖRDÜNCÜ MƏQAM. Məmməd Cəfər ədəbiyyatda yeniliyi, novatorluğu müdafiə edən tənqidçilərdən idi. O, istər klassik ədəbiyyata, istərsə də müasir ədəbiyyata o meyarla yanaşırdı ki, yazılan əsərlərdə yeni ideyalar irəli sürülsün, bu ideyalar deklorativ şəkildə yox, heç vaxt öz təravətini itirməyən bədii obrazlarla əks olunsun. Ustad tənqidçi altmış il ərzində bir neçə ədəbi nəslin yaradıcılığını izləmiş və demək olar ki, onların ilk yazıları və kitabları barədə obyektiv söz deməyə çalışmışdır. Onun fikrincə, istedadı vaxtında görmək və qiymətləndirmək lazımdır, lakin onu tərifləyib göylərə qaldırmaq lazım deyil, əsərlərində nəzərə sarpan uğurlu cəhətlərlə yanaşı, nöqsan və qüsurlarını da çəkinmədən göstərmək lazımdır. M.Cəfər altmışıncı illərdə ədəbiyyata gələn gənclərin hər birinin yazılarına da məhz bu meyarla yanaşırdı. Yazırdı ki, "Əkrəm Əylislinin "Nənəmin tütün kisəsi", "Gilas ağacı" və "Ot basmış pilləkənlər" hekayələri gənc müəllifin gələcəkdə yaxşı bir nasir olacağını xəbər verir. Əkrəm Əylisli yazılarında həqiqətə sadiq, səmimidir, müşahidələri canlıdır". Ancaq ustad tənqidçi mövzu cəhətindən Ə.Əylislinin yaradıcılığında məhdudluq olduğunu da nəzərə çarpdırırdı. O, Əlibala Hacızadənin də ilk hekayələrində yığcamlığı, orijinal, işlənməmiş mövzulara meyil etdiyini, dilinin emosionallığını xüsusi qeyd edir, amma Əlibalanın "Ağ saçlı qızın hekayəsi"ndə sentimentalizmə qapıldığını, realizmdən uzaqlaşdığını, dərdi-qəmi ideallaşdırdığını tənqid edir. "Ədəbiyyatımızın yeni nəsli" adlı həmin məqaləsində M.Cəfər Yusif Səmədoğlunun, Anarın, Çingiz Hüseynovun, Çingiz Ələkbərzadənin ilk hekayələrinə də məhz bu prinsiplə yanaşır və demək olar ki, onun ilkin proqnozları sonralar özünü doğrultdu. M.Cəfərin o illərin gənc şairlərinin yaradıcılığında nəzərə çarpan qüsurlara münasibəti də maraqlı idi. O, cavan şairlərin şeirlərində fikir dayazlığını, mövzu yeknəsəqliyini, nəzmçiliyi, sözçülüyü xüsusilə nəzərə çarpdırırdı: "...göldən, çaydan, bağdan, bulaqdan da yazmaq olar və lazımdır. Ancaq necə yazmaq, hansı fikir, hansı hiss ilə, hansı niyyətlə yazmaq..." BEŞİNCİ MƏQAM. Məmməd Cəfər ədəbi əlaqələr sahəsində ən mötəbər və nüfuzlu tədqiqatçılardan biri idi. Onun rus, alman, fransız, ingilis, ispan ədəbiyyatını yetərincə bilməsi silsilə məqalələrin, monoqrafiyaların, dərsliklərin yaranmasına səbəb oldu. Bu yazılar müəyyən bir boşluğu doldurmaq xatirinə deyildi, Azərbaycan oxucularını dünya mədəniyyətinin ən gözəl inciləri ilə tanış etmək, Qərb və Şərq mədəniyyətləri arasında körpü salmaq idi. Məmməd Cəfər o tədqiqatçılardan idi ki, Azərbaycan ədəbiyyatı haqqında düşünəndə dünya ədəbiyyatında baş verən prosesləri nəzərdən qaçırmırdı, oxşarlar, paralellər axtarırdı. Bu mənada onun "Azərbaycan ədəbiyyatında romantizm" monoqrafiyasiyası Azərbaycan ədəbiyyatşünasları üçün elmi-nəzəri prinsiplərin yollarını müəyyənləşdirdi. Hadini, Cavidi, Səhhəti və digər Azərbaycan romantiklərini bir-biri ilə müqayisə etmək, onların yaradıcılığındakı oxşar və fərqli xüsusiyyətləri açıqlamaq bir ədəbiyyatşünas üçün bəlkə də heç bir çətinlik doğurmur, amma Azərbaycan romantiklərini Bayron, Şiller, Lermontov, Henrix Heyne kimi dünya romantikləri cərgəsində tədqiq etmək böyük hünər istəyirdi. İllər gəlib keçir, tənqid və ədəbiyyatşünaslıqda da yeni meyarlar yaranır, vaxtilə dönə-dönə müraciət olunan mövzular yenidən işlənir və beləliklə, bir çox həqiqətlər ortaya çıxır. Ancaq Məmməd Cəfərin XIX əsr rus ədəbiyyatının (bu dövr rus ədəbiyyatında "qızıl dövr" adlandırılır) bütöv mənzərəsini əks etdirən tədqiqlərinin hələlik alternativi yoxdur. İndinin özündə də həmin dövrü M.Cəfər kimi son dərəcə obyektiv və yüksək elmi-nəzəri səviyyədə tədqiq edən ikinci bir ədəbiyyatşünasın adını çəkmək mümkün deyil. Hətta öz elmi səviyyəsinə görə M.Cəfərin "XIX əsr rus ədəbiyyatı" üçcildliyi rus ədəbiyyatşünaslarının bu dövrlə bağlı tədqiqatlarından qətiyyən geri qalmır. Gərək yüzlərlə, bəlkə minlərlə bədii, elmi, tarixi əsər oxuyasan ki, bir əsrin ədəbiyyatı və onun yetirdiyi sənətkarların yaradıcılığı barədə müfəssəl söz açasan. Sadəcə söz açmaq, əsərləri təhlil etmək deyil, həm də bu əsərlərə tarixiliklə müasirliyin vəhdəti prizmasından qiymət vermək... Buna sadəcə heyrət etmək olar ki, Məmməd Cəfərin təhlillərində Puşkin, Lermontov, Qoqol, Dostayevski, Tolstoy, Çexov Azərbaycan oxucusu üçün sanki yenidən doğulur... Burada M.Cəfərin A.P.Çexovla bağlı elmi oçerkindən bir misal gətirmək istəyirəm: "Orkestrdə müxtəlif səsli musiqi alətlərinin, müxtəlif lad və melodiyaların köməyi ilə əzəmətli bir simfoniya necə ifa edilirsə, Çexovun pyeslərində də ayrı-ayrı fərdlərin mənəvi iztirabları, kədərli, sıxıntılı həyatı, bir-birinə oxşar bədbəxt taleləri, ruhi sarsıntıları, həmçinin bunlara kontrast olaraq qəlblərdə, fikirlərdə oyanan yaxşı həyat arzuları bir-birini tamamlayaraq bir leytmotiv kimi ümumi həqiqəti, əsas məzmunu ifadə edir. Bu məzmun və leytmotiv isə bundan ibarətdir: belə kədərli yaşamaq olmaz, həyatı dəyişmək, cəmiyyəti dəyişmək zamanı artıq çoxdan gəlib çatmışdır..." Bu, Çexov haqqında yüksək elmi-nəzəri səviyyədə yazılan bir oçerkin emosional sonluğudur və deyim ki, M.Cəfər tənqidində emosionallıqla analitikliyin vəhdəti (Elçin Əfəndiyev) ən başlıca üslubi xüsusiyyətdir. ALTINCI MƏQAM. Bu yazıda son məqam kimi M.Cəfər tənqid məktəbinin təsir dairəsindən qısaca söz açmaq və yazıya nöqtə qoymaq istəyirəm. Məmməd Cəfər tənqidi həm öz sağlığında, həm də indi müasir ədəbi prosesin inkişafında istinad nöqtələrindən biri olaraq qalır. Onun ən istedadlı tələbələrindən olan Yaşar Qarayev yazır: "Sənət dünyasında gözəllik ölçüsü-əbədiyyət, inkişaf, sürət meyarı-nəsil sayılır. Yeni və köhnə estafet arasında adətən, "bir nəsil" inkişaf fərqi olur. Lakin yaradan şəxsiyyət, düşünən zəka üçün bir zaman vahidi kəsərsiz və təsirsizdir. Belə şəxsiyyətin ömür dünyası həmişə bir fəsildə yaşanır-əbədi gənclikdə!". Məmməd Cəfər müəllim də bizim üçün həmişə gəncdir...
|
|