|
ANA, XOŞBƏXT DEYİLƏM...
Ürəyinin yağıyla bəsləmisən məni sən, Əlində qoru tutub, gözləmisən məni sən, Gecəni səhərəcən, nazlamısan məni sən, Nigaran bir baxışla indi halım sorursan, Dilim də gəlmir, Anam, Dilim də gəlmir, deyəm: - Ana, xoşbəxt deyiləm...
Bala deyib sən mənə, balandan dada gəldin, Eşidib xoş sədamı bir az murada gəldin. Mənsə bala dadmamış balalı oda gəldim, Məndə sevinc gəzirsən, eh... özünü yorursan, Havalansam, inləyən sınıq-salxaq bir neyəm, Dilim də gəlmir, Anam, Dilim də gəlmir, deyəm: - Ana, xoşbəxt deyiləm...
Tənha gecələrimin səhəri yaman uzaq, Eşikdə istisə də mənim boş evim sazaq, Bircə gecəmin ahın desəm, köksün yanacaq, Bəlkə də xəbərsizsən, mənçün xəyal qurursan, İstəmirəm xülyanın bircə kərpicin əyəm, Dilim də gəlmir, Anam, Dilim də gəlmir, deyəm: - Ana, xoşbəxt deyiləm...
Hərdən də Ana deyib, gəzir səni mən balan, Hərdən də bala dərdi ömrümü edir talan, İstəyirəm ahımla yeri-göyü tərs salam, Qaranlığın içindən bircə balamı alam! Yox, Ana! mən acizəm, Yox, Ana! mən gücsüzəm... Qoy baş qoyum köksünə, ağlayım için-için, Qoy dərdimi bircə-bir sənə söyləyim, Ana! Qoy səndən xəbər alım, xəbər alım ki, neyçün, - Neyçün məni bəslədin? Neyçün məni nazladın? Neyçün gəldim cahana?!..
...Nigaran bir baxışla yenə halım sorursan, Dilim də gəlmir, Anam, Dilim də gəlmir, deyəm, - Ana, xoşbəxt deyiləm...
MƏNİM ŞEİR BALALARIM
Sənə şeir yazmayacam... Son şeirimin sətirlərini boğazıma dolamışam, boğuluram. Ürəyimi yandırıb, İstəyimdən yan qurub, Qəhərlənən, Dilimin ucunda kilidlənən kəlmələri, içimdən sökülən, Kağızlara tikilən İlmələri Çözmüşəm, dağılıram.
Sənə şeir yazmayacam... Ay şeirimin atası! Hər yetim şeirim doğulduqca, Qınaqlarda boğulduqca Nənni ürəyimin, Qəbir ürəyimin solur butası. Ağılarım, Yağılarım, Mənim şeir balalarım, Bəlkə elə... Elə mən də sizlə doğuluram...
ƏFV ET
...Bağışlayan, Adil Sənsən, Əfv et, Tanrım, əfv et məni! Hesab sorsan bir gün məndən, Əfv et, Tanrım, əfv et məni!
Zəm-zəm içib durulmuşam, Öz Məkkəmə burulmuşam, Mən bəndənə yar olmuşam, Əfv et, Tanrım, əfv et məni!
Bu bir günah, bir qadağa, Canım Sənə hey sadağa, İnan, dərdim qiymam dağa, Əfv et, Tanrım, əfv et məni!
Nə saxtayam, nə riyayam, Sevgi adlı bir duayam, Müqəddəsəm, övliyayam, Əfv et, Tanrım, əfv et məni!
Özün yazdın böylə yolu, Sevdam Ali, sevdam Ulu, Mən sevdamın dönməz qulu, Əfv et, Tanrım, əfv et məni!
SƏNİ GÖZLƏYİR
Gözlərini Bənövşən Açmır, səni gözləyir. Yaz olsa da ətrini, Saçmır, səni gözləyir.
“Oyan” - deyir sübh mehi, Bükür boynunu “eh”i, Yarpağındakı şehi, İçmir, səni gözləyir.
Qorxur yad əllər dəyər, Qurur kol altda dəyə, “Sözlüm gələcək” - deyə, Köçmür, səni gözləyir.
|
|