|
UŞAQ EVLƏRİ
Uşaq evləri...
burda
hər kəs
ümidsizlik içində
talelər
uçuq divarlar kimi
yuxulara
soyuq qucaqlar gəlir
hər gecə.
Uşaq evləri...
arzular
otaqların qaranlıq küncünə qısılıb.
şırım-şırım təbəssüm quruyub
yanaqlarda.
çat-çat olmuş
barışlardan
ana həsrətinin
qoxusu gəlir.
Uşaq evləri...
dodaqlarda
“ana” kəlməsi yetimdi,
saçlardan
ata nəvazişi itkin düşüb...
hər gün
iki göz baxır üzünə
taleyin
sınıq pəncərəsindən.
yollardakı
ayaq izlərindən asılıb
oyuncaq kimi
qırılmış uşaq ümidləri.
uşaqlar böyüdükcə,
dərdlər də böyüyür
və dərdlərin içində
böyüyür
atasızlıq,
anasızlıq.
ən azı
hamı
dərk edir
atıldığını burda.
əslində
hamımız
zamanın soyuq qucağına
atılmışıq...
uşaq evləri...
hər gün
qəmli gözlər,
həsrətli baxışlar
susuz səhra kimi
uzanan yollara
tor atmaqda.
yollarsa,
“Qara daş” kimi
sükut dilində
ibadət
etməkdə...
* * *
nifrətimi
maşınlara hörürəm
daş-daş.
torpaq asılıb
ayaqlarımdan sanki.
səhəri
dirigözlü açıram
və günəşin
necə çıxdığını
seyr edirəm hər gün.
mənə
bir az
səhər göndər
içində gecə olmasın...
SEVGİ PIÇILTILARI
E... üçün
gecə özüm ötürdüm
səni qapıya qədər.
əlin qaldı əlimdə
tapa bilmədim səhər.
oyandım ki, sən yoxsan,
daha yata bilmədim.
qaçdım səhərə qədər
sənə çata bilmədim.
düşündüm, bəlkə, gələ,
bəlkə, yanımdan keçə.
bir də geri dönmədi
səni aparan gecə.
* * *
sən getdin...
və bir sənsizlik asıldı
sənə uzanan əllərimdən.
sən getdin...
xatirələr
yarpaq-yarpaq töküldü
ayaqlar altında.
dünya
ayrılıqlarla dolu qədəh.
başıma
çəkmək istəyirəm
sənsizliyin
sağlığına.
* * *
mən
tənhalığı,
sənsə
ayrılığı seçdin...
getdin,
dodaqlarım
üzündə,
gözlərim
gözündə qalıb.
sən getdiyin gündən
əllərim
dizimdə qalıb.
* * *
dil açan
kağızdı ürəyim.
oxu!..
sənin adınla başlanır
sevincim də,
kədərim də...
* * *
dünyanın
bütün dərdlərini
gözlərimə sıxıram bir az...
sonra da
əllərimdən çıxıram.
bağışla,
əzizim
sənə çata bilmirəm...
* * *
hələ də
o gecənin dadı qalıb
damağımda.
hələ də
əllərinin istisi
getmir əllərimdən.
hələ də
sən yadıma düşəndə
siqaret yandırmaq,
külünü
ovuclarıma yığıb,
başıma tökmək istəyirəm.
sonra da
səni axtarıram
külqabıda qalaqlanmış
siqaret kötüklərinin
arasında...
|
|
