|
Bir vaxtlar Bakının ən yüksək nöqtəsində ölkənin ən böyük abidəsi ucalardı. Onu hər yerdən görmək mümkün idi. Dünyanın yeddi möcüzəsindən sayılan əfsanəvi İsgəndəriyyə mayakı kimi, o da Xəzər sahilinə yan alan irili-xırdalı gəmilərin diqqətini cəlb edərdi. Əslinə baxsan, bu heykəl də məcazi mənada mayak idi - siyasi mayak. Uzun illər Azərbaycanın ictimai-siyasi həyatında hökm sürən ab-havanın gerçək barometri də demək olardı ona. Kirovun əli Domokl qılıncı kimi şəhərin başı üzərində yellənirdi. Bir növ siyasi nəzarət rəmzi olan uydurma sovet bütü elə bil gələcəyə aparan yolu göstərir, istiqamətimizi müəyyənləşdirirdi. Heykəlin təməlatma, eləcə də açılış mərasimləri kino lentinə çəkilib. Həmin tədbirlərdə iyirmi il Azərbaycana rəhbərlik edən Mircəfər Bağırovun çıxışından müəyyən görüntülər dövlət arxivində saxlanılır. Abidənin hazırlıq prosesinin xronikal kadrlarından məlum olur ki, şəhərin mərkəzində yerləşən möhtəşəm ibadət evi mühüm dövlət sifarişini yerinə yetirən heykəltəraş P.Sabsayın ixtiyarına verilmişdi. Beləliklə, ateist Kirov ikinci dəfə Kirxada “doğulub” Bakıya qalacaqdı. Çənbərəkənd qəbiristanlığının yerində salınan mədəniyyət və istirahət parkına da “unudulmaz” insanın adını verdilər. Abidəni dənizə baxan geniş seyrəngahda quraşdırdılar. Azərbaycan xalqı Sergey Mironoviçə öz dərin “məhəbbətini”, sonsuz “minnətdarlığını” ifadə etmək üçün bununla kifayətlənmədi. Yelizavetpollu olmaqdan yenicə qurtulan Gəncə əhlini indi də kirovabadlı elədilər. Bakı Dövlət Universitetinin qurucuları barədə xatirələr hafizələrdən silinən vaxtlarda ilk ali tədris ocağımıza və daha bir ali məktəbə Kirovun adı verildi. Rayonlar, müalicə və istirahət ocaqları, prospektlər, küçələr, kolxozlar, sovxozlar, teatrlar, mədəniyyət evləri, neft mədənləri, muzeylər, parklar, zavodlar, fabriklər, elmi-tədqiqat institutları, siyasi maarif evləri, kitabxanalar, idman sarayları, stadionlar onun adını daşıdı. Hətta, Parazitologiya elmi-tədqiqat institutu da Kirovun adıyla “şərəfləndi”. Parazitologiya və Kirov... Məcazi mənası necə də uyğun gəlir bu təyinatın (indi həmin binada Rusiyanın Azərbaycandakı səfirliyi yerləşir - E.B.). SSRİ üzrə Sergey Mironoviçin xatirəsini əbədiləşdirən obyektlərin hamısı saya alınsa, qalın cildə ancaq sığardı. Bu cür dərin hörmət sahibi, bir qədər dərinə getsək, axı kim idi? Ailəsinə vəfasız çıxan Miron adlı əyyaşın sovet dövründə fironlaşan oğlu hansı xidmətlərinə görə milyonların əziz-xələfinə çevrilmişdi? Onun təsviri ilə poçt markaları buraxılır, ekranda, səhnədə müxtəlif dillərdə danışan bədii obrazı canlanırdı. Bir qəlibdən çıxan özbək, qazax, azərbaycanlı, ukraynalı, tacik, gürcü bənzərli heykəl kirovların hamısı eyni məfkurəyə xidmət edir, sovetlərin güclü təbliğat maşınında eyni vəzifəni daşıyırdı. Görən, qəflət yuxusundan ayılmaq nədən bu qədər çətin olur? Zaman ölçüsünə görə bu yuxu neçə meşə ayısının qış mürgüsünə tən gələr? Qəflət yuxusuna dalmaqmı xoş, erkən oyanmaqmı şirin? Ayılmaq üçün münasib zəngli saatı hardan tapasan?.. Sovetləşmədən sonra millətin yatan oğullarına dəyməyib, ayıqları, aydınları gecələr evlərindən apardılar. Sürgünə göndərdilər, zindanlara saldılar. Bəhanə tapıb tez-tələsik qurşunladılar ki, başqalarına dərs olsun. Lay-laysız yatanlarımız oyanmasın, əksinə, daha möhkəm uyusun. Qış yuxusundan yayda da qalxmasın. Dörd fəslin hamısı onun təsəvvüründə uzun qış olsun. Amma mürgüləyən insanlardan, süst düşən cəmiyyətlərdən, toplumlardan fərqli olaraq, Zaman hər zaman oyaqdır. Ətalət, əsarət, mütilik zəncirini qırmağa tarixi imkan yaranan günlərin birində, ana torpağımız Kirov heykəlinin mənəvi tapdağından qurtuldu. Hamı gördü ki, başı bədənindən ayrılan, qolları kəsilən Mironıçın şəhərdə izi-tozu da qalmadı. Kirovabadlıların poçt ünvanı yenə dəyişdi. Şəhərin tarixi adı özünə qaytarıldı. Çox şükür ki, Nizaminin məqbərəsi Yelizavetpolda, Kirovabadda deyil, Gəncədədir! Bakının mərkəzindəki Kirovun ev-muzeyi də ləğv edilib. İndi heç Balaxanı çöplüyünə də zatıqırıq Miron oğlunun adını verməzlər. Bundan sonra Kirov kimin yadına düşəcək? Mən bəzən dəbdə, gündəmdə olan mövzulardan, qəhrəmanlardan vaz keçib, yaxın keçmişimizdə baş verən hadisələri, bir zamanlar vətəndaşı olduğumuz ölkənin fövqəlgüc sahiblərinin aqibətini qələmə alıram ki, tarixdən ibrət dərsi almağı öyrənənlər çoxalsın.
O, NECƏ KİROV OLDU
Sergey Kostrikov 1886-cı il mart ayının 27-də doğulub. Ailədə yeddi uşaqdan dördü erkən vəfat edib. Sergey övladlar sırasında altıncı və sağ qalan yeganə oğul idi. 1894-cü ildə içki düşkünü Miron Kostrikov üç körpə övladını xəstə arvadı Yekaterinanın ümidinə buraxaraq həmişəlik evdən getdi. Az sonra yalqız və köməksiz ana dünyasını dəyişdi. Başsız qalan balaca qızlara nənələri sahib çıxdı. Sergeyi də uşaq evinə əmanət etdilər. Yetimçilik adamı müstəqil həyata tez alışdırır. Az-çox təhsil görən yeniyetmə işə düzəlmək arzusuyla Tomsk şəhərinə gəlir. Özünə münasib iş tapmayan bir çox işsizlər kimi o da siyasətə meyil göstərir. Rusiya sosial-demokrat fəhlə partiyasının üzvü Sergey, 1905-ci ildə nümayişlərdə iştirakına görə qısa müddətə həbs olunur. Eyni səbəbdən ikinci dəfə göz altına alınanda məhkumluğu il yarım sürdü. Azadlığa buraxılandan sonra bir müddət İrkutskda, Vladiqafqazda başını girlədi. Nəhayət, xeyirxah adamların köməkliyi ilə “Terek” qəzetinə işə düzəldi. İlk yazılarını “Sergey Mironov” imzasıyla oxuculara təqdim edirdi. Gələcək həyat yoldaşı Mariya Markusla da həmin dövrdə şəfalı Qafqazın səfalı ətəyində tanış oldu. “Kirov” imzası isə 1912-ci ildən sonra qəzetlərdə görünməyə başladı. Elə o vaxtdan gənc jurnalist soyadı ilə biryolluq vidalaşdı. Bəs, yeni ad onun hardan ağlına gəlmişdi, məna yükü nə idi? Deyilənə görə, günlərin birində redaksiyada stolüstü təqvimin vərəqində onun gözü “kir” sözünə sataşıb. Latın dilində kir - sahib, hökmdar deməkdir. Amma, təqvimdəki qeyd İran hökmdarı Keykavus haqqında yığcam məlumat da ola bilərdi. Axı, ruslar onu Kir deyə tanıyırlar. Tarixi şəxsiyyət barədə məlumat xarakterli yazının jurnalistin diqqətini çəkməsi təbiidir. Burada bir məqam da var: məhrumiyyət içində böyüyən bəzi adamların ürəyində nə vaxtsa hökmdar olmaq arzusu qaynayır. “Niyyətin hara, mənzilin ora”, deyiblər. O da bir gün Kir kimi qüdrətli olmağı niyyət etməkdə azad idi. Kir adına “ov” şəkilçisi calamaqla xəyallarının gerçəkləşəcəyinə inamı bir az da gücləndi. Elçiyə zaval olmadığı kimi, arzular da bağlı qapı tanımaz. Dünyanı lərzəyə salmağa hazırlaşan inqilabçılara qoşulan Sergeyin könlünə şahlıq sevdası elə o vaxtdan düşmüşdü. Amma bütün bunlar mənim şəxsi qənaətimdir, həqiqət olmaya da bilər. Həqiqətsə odur ki, əyalət qəzetində dərc olunan bir sıra uğurlu məqalənin müəllifi Oktyabr inqilabına kimi partiyada xüsusi xidmətləri ilə heç vaxt fərqlənməyən sıradan biri olub. Hətta, müəyyən dövrlərdə menşeviklərə meyil göstərib, müvəqqəti hökuməti dəstəkləyib. Sergey iş-işdən keçəndən, yəni Oktyabr çevrilişindən sonra bolşevikləşib. “Avrora” kreyserindən açılan top atəşinin qulaq batıran səsindən ayılan kimi menşeviklərdən biryolluq ayrıldı. Bolşeviklərlə eyni platformanı paylaşan Kirov “millətlər atası” ilə ilk dəfə 1917-ci ildə, Sovetlərin İkinci Ümumrusiya qurultayında qarşılaşdı. Stalin o zaman Siyasi Büro üzvi kimi, ən yüksək partiya rəhbərliyində təmsil olunurdu. Qafqazdan gələn nümayəndələrlə görüşəndə, Sergeyin danışığı, davranışı Kobaya xoş təsir bağışladı. O, yeni komandanı, məhz bu cür adamlardan ibarət təsəvvür edirdi. Beləliklə, orta boylu, mavi gözlü, boğaz yırtan komissarlardan natiqlik qabiliyyəti ilə yaxşı mənada fərqlənən gülərüz inqilabçının əsl hamisi Stalin oldu. Hətta, 1918-ci ildə özəl zəmanət vəsiqəsi imzalayıb ona verdi ki, bərkə-boşa düşəndə daşdan keçən bu sənəd işinə yarasın. 1919-cu ildə Kirov Həştərxan Müvəqqəti İnqilab Komitəsinin rəhbəri təyin edilir. Onun təşkilatçılıq qabiliyyəti, bacarığı, bolşevik qəddarlığı burada özünü daha geniş büruzə verdi. Əksinqilabçı qiyamın qarşısının alınması üçün gördüyü sərt tədbirlər Leninin diqqətindən yayınmadı. Həştərxan əməliyyatından sonra onu XI Qızıl ordunun Hərbi İnqilab Şurasına üzv seçdilər. 1920-ci ilin aprelində Bakıya hücum çəkib Azərbaycan Xalq Cümhuriyyətini devirən ordunun rəhbərlərindən biri də Kirov olub. 1921-ci ildə Vladimir İliç Azərbaycan kommunistlərinə (faktiki olaraq Azərbaycana - E.B.) rəhbərliyi ona etibar edir. Sovetləşmənin ilk illərində bizim el-obada nə pislik varsa, bilavasitə onun və Serqo Orconikidzenin adı ilə bağlıdır. Nəriman Nərimanovun fəaliyyətinə əngəl törədənlərin siyahısına başçılıq edənlər onlardır. Azərbaycanın müstəqilliyini qoruyub saxlamaq istəyən vətənpərvərləri millətçi adlandırıb qurşunlayan, qılıncdan keçirən XI Qızıl ordunun əməlləri Kreml sahibinin ürəyincə idi. Vladimir İliç həmin dövrdə Kirovun qətiyyətli mövqeyini dəstəkləyir, xidmətlərini yüksək qiymətləndirirdi. Lenin Kirovun yeni təyinatından öncə regiona yaxşı bələd olan və partiyada milli məsələlər üzrə mütəxəssis kimi tanınan Stalinin rəyini, Sergeyə rəğbətini nəzərə almışdı. Azərbaycan Kommunist Partiyasının birinci katibi olsa da, əslində respublikanı Kirov idarə edirdi. Bütün strateji məsələləri öz nəzarətində saxlayırdı. Onun Leninə, Stalinə və Orconikidzeyə göndərdiyi xidməti məlumatlar, məxfi sənədlər buna dəlalət edir. Hökumət başçısı Nəriman Nərimanovun təqdimatlarından daha çox ortabab siyasətçinin cızma-qaraları Bakıdakı vəziyyət barədə Mərkəzdə fikir formalaşdırardı. Kirov çox vaxt reallığı, milli mentaliteti, yerli şəraiti nəzərə almayıb, bəlkə də heç bu işlərin mahiyyətini yetərincə anlamayıb, inqilabçı fəhminə güc verərdi. Siyasi karyerasında bir baş ucalmaq, gündəmdə qalmaq üçün hər cür çirkin manevrlərə əl atardı. Həmin illərdə “təmizləmə” əməliyyatı yeni vüsət alırdı. “Kontra” adını ( yəni, əksinqilabçı - E.B.) kimin üzərinə qoysaydın, beli biryolluq sınardı. Kütləvi həbslərin, sürgünlərin, güllələnmələrin ardı-arası kəsilmirdi. Rusiya ilə ilk İttifaq müqaviləsini bağlayan Azərbaycanda “xalq düşmənləri”nin sayı qonşu respublikalara nisbətən çox idi. Odlar diyarı qırmızıların alovunda dərddən, qəm-qüssədən getdikcə daha bərk közərirdi... Stalin Baş katib olandan sonra uğur cığırları ilə addım-addım irəliləyən Kirovun bəxt ulduzu bir az da parladı. Azərbaycan kommunistlərinə Moskvadan göndərilən rəhbər 1923-cü ildə partiyanın XII qurultayında bolşeviklərin Mərkəzi Komitəsinə üzv seçildi. Leninin vəfatından sonra hakimiyyət uğrunda daha geniş vüsət alan mübarizə şiddətlənəndə inqilabın beşiyi adlanan Peterburq yenə çalxalanmağa başladı. Zinovyev və Kamenev siyasi iddiaları fövqəladə yüksək olan Trotski ilə birləşib, Stalinə ciddi problemlər yaratmağa başlamışdı. 1925-ci ildə XIV qurultaydan sonra partiyada mövqeyi möhkəmlənən Baş katib daxildə qayda-qanun yaratmaq, müəyyən etdiyi partiya xəttinə zidd çıxan ünsürləri ifşa etmək məqsədilə Molotov, Voroşilov, Kalinin, Orconikidze ilə bərabər, Kivoru da Neva sahillərinə göndərdi. Görünən sərt tədbirlər nəticəsində şəhərdəki vəziyyət nisbətən sabitləşsə də təhlükə tam sovuşmadı. İrili-xırdalı proseslərə nəzarət etmək, Leninqradı Stalin sayağı bolşevikləşdirmək məsələsi artıq birmənalı şəkildə gündəmə gəldi. Koba Smolnıda baş kürsüyə şəxsən inandığı və güvəndiyi Kirovu oturtmağı qərara aldı. 1926-cı ildə qüdrətli hamisi Sergey Mironoviçi Siyasi Büro üzvlüyünə namizəd edərək, düşmən yuvasına çevrilən Leninqradı Trotskinin, Zinovyevin, Kamenevin tör-töküntülərindən təmizlənməyi bilavasitə ona tapşırdı.
MARKSA SƏDAQƏT, MARKUSA XƏYANƏT
Vaxtilə bataqlıqlar içində böyük çətinliklər hesabına yaşayış məskəni salanda çar Pyotrun özündən başqa bəlkə heç kim bu şəhərin gələcəkdə necə olacağını təsəvvür etmirdi. Zaman ötdükcə Rusiyanın yeni paytaxtı dünyanın ən gözəl şəhərlərindən birinə çevrildi. Neva sahilində tarixi-memarlıq baxımından dəyər qazanan binaların sayı bir deyil, beş deyil. Belə tikililərdən biri də 1910-14-cü illərdə Kamennoostrov prospektində Rusiya Sığorta Cəmiyyətinin sifarişi ilə Benua qardaşlarının (onlar üç qardaş olublar - E.B.) ucaltdığı kompleksdir. Məhəllənin yaraşığı isə 26/28 nömrəli bina sayılırdı. İnqilabdan əvvəl bu evlərdə sayılan-seçilən zadəganlar, zəngin sahibkarlar, böyük tacirlər, çar üsul-idarəsinin yüksək səviyyəli məmurları, tanınmış ziyalılar, generallar yaşayırdı. Şahanə girişi olan bina müxtəlif özəllikləri və üstünlükləri ilə fərqlənirdi. Hətta, müstəqil elektrik təminatı da nəzərə alınmışdı. Birinci mərtəbədə ticarət obyektləri, camaşirxana, müxtəlif xidmət sahələri, ofislər yerləşirdi. Alt qatda fayton və avtomobillər üçün dayanacaqlar, tövlə, həyətdə mərkəzi isitmə sistemi, məişət tullantılarını yandırmaq üçün xüsusi sobalar quraşdırılmışdı. Amma, bəxtəvər sakinlərin rahatlığı uzun sürmədi. 1917-ci ildə Rusiyada dövran dəyişdi, hər şey alt-üst oldu və “yersiz gəldi, yerli qaç” deyilən qiyamət günündə cəmiyyətin bir təbəqəsi yuvasından didərgin düşdü. Prospektin köhnə adını dəyişib, səhv etmirəmsə, Qırmızı şəfəq qoydular. Qarışıq zamanda çox kişi öz ailəsini götürüb mühacir oldu. Vəd edilən işıqlı gələcəyə inanıb paytaxtda qərar tutanlar az sonra ev-eşiklərindən zorla çıxarıldı. Çünki, bütün fabrik-zavodlar kimi, binalar da milliləşdirilmişdi. Xüsusi mülkiyyət müsadirə edilib dövlət mülkiyyətinə keçmişdi. Dövlətsə fəhlə və kəndlilərin idi. Bundan sonra Benua qardaşlarının yüksək zövq və məharətlə ucaltdıqları evlərdə yeni hökumətin nümayəndələri yerləşməyə başladı. 1926-cı ildə Kirova həmin binada 20 nömrəli mənzili ayırdılar. 5 otaqlı geniş mənzildə Mironıç düz səkkiz il, başqa sözlə desək, ömrünün sonuna kimi, Mariya Markusla bərabər yaşadı. Stalin dəfələrlə onlara qonaq olmuşdu. Kuybışev, Orconikidze, Mikoyan bu ailəyə yaxın adamlar kimi, tez-tez Sergey gildə yığışardılar. Mariyanın səhhətində müəyyən problemlər olduğundan evin bütün səliqə-sahmanına xadimə Yevdokiya Aqapova baxırdı. Yevdokiya İliniçna ilə bərabər çalışan iki nəfər təcrübəli aşpaz evə təşrif buyuran adlı-sanlı qonaqların yanında ev sahiblərinin üzünü ağ eləyirdi. Bilmirəm nədən, hər halda düşünürəm ki, bu boyda da təsadüf olmaz, partiya-sovet rəhbərliyində, ordu komandanlığında təmsil olunan kişilərin əksəriyyətinin xanımı milli mənsubiyyətinə görə yəhudi idi. Bir neçə misal çəkim: Polina Semyonovna Karpovskaya (1897-1970) Molotovun, Yekaterina Davidovna Qorbman (1887-1959) Voroşilovun, Dora Moiseyevna Xazan (1894-1961) Andreyevin, Mariya Lvovna Markus (1885-1945) Kirovun, Yekaterina İvanovna Lorberq ( 1882-1960 ) Kalininin qəlbinə hakim kəsilmişdi. Bu siyahını bir qədər də uzatmaq olardı. Məsələn, Rıkov Nina Semyonovna Marşakla ailə qurmuşdu. Buxarinin birinci xanımı İsfir İsayevna Qurviç, ikincisi Anna Mixaylovna Lurye idi. Yejov - Sulamif İzrailevna, Poskrebışev - Bronislava Solomonovna ilə əhd-peyman kəsmişdi. Amma, Stalinin qəzəbinə düçar olanda mötəbər ərlər tələyə düşən xanımlarına sahib çıxa bilmirdi. Stalinin oğlu Yakov Cuqaşvilinin arvadı Yuliya Meltserin də milli mənsubiyyəti hamıya bəlli idi. Yakov müharibədə əsir düşüb həlak olandan sonra Stalinin gəlini Yuliyanı da həbs etdilər. Sən işə bax ki, onun da dadına yetən tapılmadı. Bakıda Şors küçəsinin harada olduğunu kimdən soruşsan, dəqiq yerini deyər. Adı çoxdan dəyişilsə də, şəhərin dağlıq hissəsindən mərkəzə qədər uzanan bu küçəni hələ də keçmiş adıyla xatırlayırlar. Amma, sual versəniz ki, Şors kim olub, inanmıram doğru-dürüst cavab eşidəsiz. 1938-ci ildə Stalinin tapşırığı ilə Nikolay Dovjenkonun çəkdiyi bədii film ekrana çıxandan sonra Vətəndaş müharibəsinin qəhrəmanı, Sovet dövrünün diviziya komandiri Nikolay Şors bütün ölkədə məşhurlaşdı. Amma, sonrakı illərin araşdırmaları, yeni aşkarlanan tarixi faktlar göstərdi ki, bu dəfə də ekrandan deyilənlərlə reallıq arasında olduqca böyük fərq və ziddiyyət vardı. Dovjenkonun filmində Meyerxold məktəbinin istedadlı aktyoru Yevgeni Samoylovun yaratdığı baş qəhrəman portret oxşarlığı baxımından Nikolay Şorsa bənzəsə də, zamanın ideoloji tələblərinə, partiyanın qarşıya qoyduğu vəzifələrə cavab vermək məqsədilə tarixi hadisələr fonunda tamaşaçıya təqdim olunan sosial sifarişli bədii obraz idi. Başqa sözlə desək, ekranda canlanan yeni qəhrəman Ukraynanın Çapayevi idi və film sovet xalqını düşmənə qarşı mübarizəyə səfərbər etmək məqsədi daşıyırdı. Yetmiş il öncə çəkilən kino əsərinin yaranma tarixi, ekran həyatı, yaradıcılıq prosesində meydana çıxan müəmma və sarsıntılar nəticəsində görkəmli kino xadimi Dovjenkonun səhhətində yaranan problemlər ayrıca yazının mövzusudur. Şorsu ona görə xatırladım ki, yeni ekran qəhrəmanı da vaxtilə Frume Xaykina adlı yəhudi qadınla ailə qurmuşdu. Oktyabr inqilabının əksər simaları rus soy adı ilə ictimaiyyətə tanıdılsa da, başqa millətlərin nümayəndələri idi. Kamenev kimi bildiyimiz Lev Borisoviç əslində Rozenfeld, Zinovyev - Radomılski, Trotski - Bronşteyn, Yaqoda - İyeqoda, Radek - Sobelson, Litvinov - Vallah familiyası ilə dünyaya gəlmişdilər. Bir maraqlı faktı da diqqətinizə çatdırım: 1934-cü ildə Siyasi Büronun tərkibinə daxil olan on nəfərdən dördü (Stalin, Orconikidze, Kaqanoviç, Kosior - E.B.) başqa xalqların nümayəndələri idi. Amma, bu tərkibə daxil olan ruslar da, o cümlədən Sergey Mironoviç Kirov taleyini yəhudi xanımlara əmanət etmişdi. Burda qəbahət olmadığı kimi, bəraət də yoxdur. Sergey ailə həyatında Mariya Markusla o qədər də xoşbəxt deyildi. İyirmi ildən artıq bərabər yaşamalarına rəğmən övladları olmurdu. Təhsilsiz, emosional təsirsiz, amma təkəbbürü yerə-göyə sığmayan bu qadın həmişə nəsə etməyə cəhd göstərər, amma uğur qazanmazdı. Bakıdan sonra Leninqradın birinci xanımı kimi cəmiyyətdə fərqlənmək, önə çıxmaq istəyi bir qədər də gücləndi. Sosial ziddiyyətlərin kəskinləşdiyi, güzəranın ağırlaşdığı, inflyasiyanın son həddə çatdığı yerlərdə, əxlaqsızlıq, qadın alveri həmişə geniş yayılır. 1928-ci ildə Mariya Markusun təşəbbüsü və rəhbərliyi ilə Leninqradda müalicə-profilaktika mərkəzi yaradıldı. Küçələrdə dolaşan yüngül əxlaqlı qadınları burada sağlıq kontrolundan keçirib, zöhrəvi xəstəliklərdən müalicə edir, savadsızlığın ləğvi kurslarında oxudurdular. Mərkəzin rəhbərliyi qızları qrup halında muzeylərə, teatrlara, konsertlərə aparmaq, qiraət saatları təşkil etmək, siyasi mövzularda mütəmadi mühazirələr oxumaqla mənəvi aləmlərini, həyat tərzlərini dəyişmək, onlarda inqilabı romantika hissi oyatmaq fikrində idi. Meyli çəkənlərə tikiş kursları təklif edilirdi, ayrıca evdarlıq dərsləri keçilirdi. Darvin nəzəriyyəsi barədə müəyyən təsəvvürü olan Markus ümid edirdi ki, meymunu adam eləyən əmək fahişələri də fəal kommunizm qurucularına çevirəcək. Fahişələrin mütəşəkkil şəkildə küçə yürüşləri hər kəsdə gülüş və istehza doğuraraq birmənalı qarşılanmırdı. Mariya bu sahədə mütəxəssis deyildi. Amma partiya liderinin xanımının iddiaları özündən böyük olduğundan yenilik adıyla hər işə israrla, inadla can atırdı. Fəqət, növbəti düşünülməmiş hərəkəti ilə özünü lap nüfuzdan saldı. Hadisə 1929-cu ildə zəhmətkeşlərin 1 May nümayişi zamanı baş verdi. Əmək-İslah profilaktika mərkəzində nəzarət altında müalicə olunan qadınlar dəstəsinin önündə xanım Markusun şəhərin küçələrindən keçərək, hökumət tribunası qarşısından qabaqcıl əmək kollektivlərinin, elm-təhsil ocaqlarının nümayəndələri ilə bərabər addımlaması heyrət doğururdu. Markusun bu cur təsirsiz, əhəmiyyətsiz tərbiyə və nəsihətlərindən mənən ağırlaşan yüngül qadınlar günlərin birində onun özünə dərs vermək qərarına gəldilər. Qaş qaralanda gözətçi oğlanları otağa salıb mümkün olan və olmayan oyunlardan çıxaraq məzələndilər. Bu rüsvayçılığın sədası Moskvaya çatanda Kremldəkilərin səbir kasası artıq çat verdi. Markusu dinməz-söyləməz vəzifəsindən kənarlaşdırdılar. Ona daha ağır partiya cəzası vermək məsələsi gündəmdə dayanmışdı. Ailə dostu Orconikidze qanının arasına girməsə, yəqin ki, yarıtmaz müdirin aqibəti faciəli olacaqdı. Az sonra müəssisə biryolluq bağlandı. Markus əsəb gərginliyindən xəstəxanaya düşdü. Onun azarındann çox ədalarında bezən Sergey “yastığın yüngül olsun” diləyini başının bəlasına bildirıb, həmişə olduğu kimi rahatlığı və təskinliyini başını başqaları ilə bir yastığa qoymaqda tapdı. Kirovun müəmmalı ölümü onun gizli eşq macəralarının üzərinə pərdə çəkdi. Alovlu tribunun şəxsi həyatının qaranlıq məqamları hələ də tarixin aydınlıq işığından kənarda qalmaqdadır. Qəribədir ki, vəfatından dörd il sonra Kirovun muzeyi Leninqrada gəldiyi gündən yaşadığı mənzildə deyil, Kşesinskayanın malikanəsində açıldı. İndi bu ad əminəm ki, çoxlarına heç nə ifadə etmir. Bir vaxtlarsa rus teatr səhnəsinin bu parlaq ulduzu dünya baletinin primadonnalarından sayılırdı. Yeri gəldiyi üçün əsas mövzudan bir az kənara çıxıb gözəl Matilda barədə danışsam, məncə Kirovun ruhu bizdən inciməz. Füsunkar gözəlliyi, ecazkar rəqsi, səhnə mədəniyyəti, işvə-nazı qarşısında qarşılıqsız dayanmaq imkansız sayılan Matilda öz dövrünün ən mahir könüllər fatehi idi. Bir ara şahzadə Nikolayın qəlbini ovsunlayan xanım az qala Rusiyanın sonuncu imperatorunun birinci xanımı olacaqdı. Hər tamaşadan qucaq-qucaq çiçəklərlə evə qayıdan primadonna tezliklə yaşadığı ünvanı dəyişdi. Gələcək hakimi-mütləq onun üçün “Niki” olandan sonra şəhərin İngilis prospektindəki yeni malikanəyə göndərilən hədiyyələrin sayı bir az da artdı. Zati-aliləri tərəfindən Matildaya bağışlanan ilk qiymətli hədiyyə sapfir və brilyant qaşlarla bəzədilmiş qızıl bilərzik oldu. Get-gedə xanımın mücrüləri bahalı zinət əşyaları ilə dolmağa başladı. Onun mina gərdəni mahir zərgərlərin nadir əl işlərinin səyyar sərgisinə dönmüşdü. Bu daş-qaşlar ehtiraslı baxışları ilə daş qəlbləri də asanlıqla əridən gözəllik ilahəsinə necə də yaraşırdı. Fəqət taxt-tacı balerina ilə paylaşmaq üç yüz illik sülaləyə yaraşmazdı. Ailənin qəti etirazı, mövcud ənənələrə bağlılıq gənc Nikolayın qəlbində çox da dərin kök salmayan məhəbbətinə güc gəldi. Amma imperator teatrı səhnəsinin kraliçası ilə gələcək monarxın sevgi macərası xeyli müddət davam etdi. Bəzən sevgililər arasında gizli tellər aşkar bağlantılardan daha möhkəm olur. Səbəbsiz ayrılıq, ayrılıqsız sevgi, sevgisiz tale olmur. Talesiz sevgi isə hər zaman acıdır. Bir müddət sonra Kşesinskaya taleyi ilə barışıb, Çar ailəsinin nüfuzlu nümayəndəsi Böyük knyaz Sergey Mixayloviç Romanovun sayəsində təkliyinə son qoydu. Sağlam düşüncəsi və doğru seçimi ona zəngin həyat, mürəkkəb də olsa maraqlı ömür payı qazandırdı. Sonralar Fransada məskunlaşan Matilda Feleksovna ömür karvanını axıradək sürüb 1971-ci ildə Parisdə vəfat etdi.
MARKUSUN BUZ DOLABI
1904-cü ildə Peterburqun mərkəzində xanım Kşesinskayanın sifarişi və Nikolayın səxavəti ilə inşa edilən malikanədə Oktyabr inqilabından sonra bir müddət Leninlə Krupskaya yaşadılar. Ayrı-ayrı vaxtlarda Siyasi-maarif evi, Köhnə bolşeviklərin Cəmiyyəti, Böyük Oktyabr Sosialist İnqilabı muzeyi, poliklinika, hətta İctimai-iaşə institutu da Matilda Feleksovnanın imarətinı eybəcər kökə saldı. Bu bina Leninqradda yeni sahibi-ixtiyar olan Sergey Mironoviçin bir çox məxfi və məhrəm görüşlərinin ünvanı idi. Görünür, bu da taleyin bir oyunudur ki, ölümündən 4 il sonra, 1938-ci ilin noyabr ayının 8-də Kirovun gizli sevdalarının aşkar ünvanında muzey açıldı. 1955-ci ildə muzey Benua qardaşların binasında Kirovun yaşadığı 20 nömrəli mənzilə köçürüldü. Doxsanıncı illərdə Sovet İttifaqı və sovet məfkurəsi dağıdılsa da, qətlə yetirilmiş bolşevikin xanimanı Leninqrad Dövlət Tarix muzeyinin filialı kimi fəaliyyətini davam etdirdi. Aparılan təmir-bərpa işləri nəticəsində ev əşyaları, mebel dəstləri, otaqların interyeri ilkin görkəmini almaqla, otuzuncu illərin ab-havasını canlandıra bildi. Kirovun iş otağı, kitabxanası, qonaq salonu, yataq otağı, ev xadiməsinin gecələdiyi oda və geniş mətbəx muzeyə gələnləri Sovet rəhbərlərindən birinin yaşam tərzi ilə yaxından tanış edir. İş otağında yerə gözəl Şərq xalısı sərilib. Kim bilir, bəlkə də bu qədim əl toxuması Azərbaycandan köçərkən “xatirə” adıyla aparılan çoxsaylı qənimətlərdən biridir. Ayaq altına salınan ağ ayı dərisi diqqəti cəlb edir. Bu da şimal qütbündən ona gətirilən hədiyyədir. Yazı masasının altında buna bənzər başqa bir dəri də soyuq qış günlərində Kirovun ayaqlarını isidərmiş. Odun sobasının üzərinə tülkü müqəvvası qoyulub. O tülkü ovçunun gülləsinə tuş gələnə qədər Leninqrad meşələrində asudə dolaşarmış. Divarlarda çoxsaylı fotoşəkillər asılıb. Kirova verilən hədiyyələrin bir qismi də digər otaqlarda, dəhlizdə sərgilənir. Ən çox diqqəti cəlb edən zəngin kitabxanadır. Rəflərdə yüzlərlə kitab saxlanılır. Onların içərisində nadir nəşrlər var. Ola bilsin ki, kitabların əksəriyyəti mənzilin keçmiş sahibindən qalmadır. Bəlkə elə ona görə çoxunun qatı da açılmayıb. Nəşrlər arasında kommunistlərin yasaqladığı ədəbiyyat nümunələrinə rast gəlinir. Hitlerin “Many kamf” kitabı, Nikolay padşahın yazışmaları da gözə çarpır. Burda deyibər ki, “Biz deyilik rəiyyət, bizlərə nə şəriət?” O illərdə başqasının evindən Hitlerin, Nikolayın kitabları çıxsaydı, canı zindanda çürüyərdi. İş otağında Kirovun iri qlobusu, radioqəbuledicisi necə varsa eləcə də saxlanılıb. Qonaq otağına ovda vurulan quşların müqəvvası xüsusi yaraşıq verir. Ev sahibi akvariumda qızıl balıq saxlamağı xoşlarmış. Çoxdan bəri süfrəsi açılmayan yemək masasının arxasında bir vaxtlar adı sovet tarixinə düşən ünlü kişilər yeyərdi, içərdi. İndi muzey eksponatına dönmüş Leninqrad qrammafon zavodunun patefonu, alman radioqəbuledicisi, “Radist” markalı radiola o dövrün ən müasir məişət cihazı sayılardı. Kirov qonaq otağında samovar çayı içib yazı-pozuyla məşğul olmağı xoşlardı. 1934-cü il dekabr ayının ilk günündə Uritski sarayında nəzərdə tutulan çıxışının mətnini də bu masanın üzərində yazmışdı. Qətl günü Nikolayevin atəş açdığı odlu silah əvvəllər muzeyin eksponatları sırasında nümayiş etdirilirdi. 1951-ci ildə Milli Təhlükəsizlik Nazirliyi səbəb bildirmədən silahı muzeydən götürüb. Yataq otağında çarpayıların önündə iki xalı sərilib. Stalinin tapşırığı ilə Kirov 1934-cü ilin payızında Qazaxıstana ezam olunanda evdə yalqız qalmaqdan canı sıxılan Mariya Lvovna nadir ağac növlərindən hazırlanan bu yataq dəstini ərindən xəbərsiz alıbmış. Bunun üstündə aralarında xoşagəlməz söz-söhbət də olmuşdu. Kirov evdə özü üçün kiçik emalatxana yaratmışdı. İşlətdiyi alətlər olduğu kimi orada saxlanılır. Ov paltarları, digər ləvazimatlar göstərir ki, Leninqrad meşələrində dincəlməyi xoşlayan Kirov evə heç vaxt əliboş qayıtmazmış. Şikarının ətini yeyib, dərisindən müqəvva düzəldərmiş. Mətbəxdə istifadə edilən buz dolabının isə eksponatlar arasında özəl yeri və maraqlı tarixçəsi var. Günlərin birində Mariya Lvovna ailə dostları Mikoyangilə qonaq gedib. Anastasın həyat yoldaşı Axşen Lazerevna mətbəxinin bəzəyi olan buz dolabının inanılmaz üstünlüklərindən, rahatlığından danışır. Markus Axşenin bu sözlərindən necə həvəslənirsə, evə qayıdan kimi, Sergeyə nə deyirsə, necə təsir edirsə, bu barədə məlumatım yoxdur. Amma, onu bilirəm ki, çox qısa müddətdə coğrafi baxımdan uzaq olan Amerikadan Ceneral Elektrik firmasının son model buz dolabı xanım Markusun mətbəxinə gətirilir. İçi də ən bahalı ərzaqla doldurulur. Onların istifadə etdikləri qida məhsullarının əksəriyyəti Fransadan gətirilərdi. Onu da deyim ki, həmin vaxt Amerikada yeni satışa çıxarılan elektrikli buz dolabı Ford avtomobilindən baha qiymətə satılırdı. Həqiqətən, varlığa nə darlıq? 1934-cü ildə ölkədə aclıq hökm sürürdü, əsas qida məhsulları kartla paylanardı. İnsanlar yarıac, yarıtox dolanırdı. Amma, bu gərginlik rəhbər işçilərin ailələrində hiss olunmurdu. Ən yüksək kateqoriyalı ərzaq kartı ilə leninqradlılara bir ayda 1 kilo ağ un, 5 ədəd yumurta, 200 qram kərə yağı verilirdi. Əldə etdiyim məlumatlara inansaq, 1932-ci ildə namenklatur işçilərə xidmət göstərən xüsusi mağazadan bazarlıq edən ərköyün xanımlar ay ərzində az tapılan məhsullardan görün nələr və nə qədər ala bilərdi:
1. Balıq 8 kilo 2. Kolbasa 4 kilo 3. Balıq kürüsü 1 kilo 4. Kərə yağı 1,5 kilo
Odur ki, bolşeviklərin “bərabərlik”, “qardaşlıq”, “həmrəylik” kimi reallıqdan uzaq olan şüarlarının Rusiyada təntənəsindən danışanda bişmiş toyuğun da gülməyi gəlir. Daha öncə demişdim ki, Markusun mətbəx işləri ilə arası olmazdı. Evlərində bir xadimə, iki peşəkar aşpaz çalışırdı. Onlardan biri vaxtilə çar Nikolayın ailə üzvlərinə yemək hazırlayırmış. Fransadan gəlmiş aşpaz üçün çar olmasın, katib olsun, nə fərq edərdi? Yetər ki, vaxtında yüksək maaşını ödəsinlər, vəssalam. Digər aşpaz Kuzmin dadlı yeməklər bişirməyi bacardığı kimi, duzlu qələmə də sahib idi. Sonralar yazdığı xatirələrdə səfər zamanı Kirovu necə müşayiət etdiyindən, onun sifarişi ilə bişirdiyi xörəklərdən, xüsusi qonaqlara özəl xidmət göstərməyindən geniş danışır. Bəzi qırmızı komissarların kitelinə, uzunboğaz çəkmələrinə, dəri gödəkcələrinə aldanmayın. Onların həyat tərzi sıravi kommunistlərdən kəskin surətdə fərqlənirdi. 1930-cu ildə Sergey Mironoviç artıq Siyasi Büro üzvü seçilmişdi. Bir vaxtlar trotskizmi necə vəsf etdirdisə, indi də eyni od-atəşlə keçmiş həmfikirlərini lənətləyirdi. Zinovyevi, Kamenevi vətən xainləri adlandırırdı. Trotski siyasi xadim kimi heç vaxt ona dəyər verməzdi, “yarımçıq adam”, “ortabab kəmsavad” adlandırardı. Amma, siyasi riyakarlar , gözü kölgəlili komissarlar Stalinin işinə daha çox yarıyırdı. Koba hər şeyi əvvəlcədən yüz dəfə ölçüb-biçərdi. Kostrikovun milli mənşəyi, insanlarla ümumi dil tapma, tez ünsiyyət qurma bacarığı, “partiyanın sevimlisi” rolunu məharətlə ifa etməsi, Baş katibə və onun siyasi kursuna nümayişkaranə sədaqəti, komandadan ayrı qol-budaq atmaq fikrindən qətiyyən uzaq olması, ailə-məişət zəminində müəyyən problemlərinin mövcudluğu, qadın düşkünlüyü kimi xüsusiyyətlər hamını daim itaətdə, əmrə müntəzir vəziyyətdə saxlamağı bacaran Stalini tam qane edirdi. Yoxsa, Qırmızı imperiya sarayının qapılarını ucqar əyalətdən gələn kimsəsizin üzünə kim açardı? XX əsrin iyirminci illərinin ortalarında Qırmızı imperatora hakimiyyətdə güclənmək üçün hər sahədə kirovlar lazım idi. O, partiya üzvləri arasından belələrini axtarıb tapır, orta eşalonda yerləşdirib, istiqamətləndirib, nəzarət altında yetişdirəndən bir müddət sonra daha yüksək vəzifələrə təyin edirdi. Lazım gələndə bir az da ucaldır, vaxtı bitəndə acımadan məhv edirdi. Bir çoxları kimi, Molotov, Jdanov, Malenkov, Yaqoda, Yejov, Kirov, Xruşşov, Beriya da Stalinin kadrları sayılırdı. Həmin dövrdə Kirov Stalinin ən yaxın münasibətdə olduğu adamlardan biri, bəlkə də birincisi idi. Bu yaxınlıq az sonra qısqanclıq doğuracaq dərəcəyə yüksələcəkdi. Sergey Moskvaya gələndə Stalinin evində gecələyirdi. Koba öz çarpayısında ona yer salardı. Gecə yarıyadək şirin söhbətləşərdilər. Keçmiş günləri yad edər, gələcək işlərindən danışardılar. Şərab masası arxasında Bakı gecələri də yada düşərdi. Axı, Bakıyla bağlı hər ikisinin qəlbində unudulmaz xatirələr vardı. Maraqlıdır ki, Koba və Kirov adlarının eyni mənşəli olduğu da güman edilir. Yəni, hər ikisinin Keykavus ismindən yaranma ehtimalı var.
İNSANLIĞIN UCUZLAŞAN GÜNLƏRİ
Allahı inkar edən bolşeviklər Kremlin timsalında özlərinə yeni qibləgah yaratmışdılar. Belə olan halda səcdə və itaət ediləcək yeni fövqəlqüvvə sahibi də olmalıydı. Lenin dünyasını dəyişəndən sonra Stalin öz müəllimini bütləşdirməyə başladı. Fəqət, təkallahlığı qəbul edə bilmədiyindən, ona da qısqandı. “Proletar allahı”nın şöhrətini sələfiylə paylaşmaq fikrinə gəldi. Leninizm-Stalinizm ifadəsi, görünür məhz bu məntiqdən yarandı. Baş katib sonralar Lenini Mavzoleydə də yalqız qoymadı. Xeyli müddət müəllimi Ulyanova yoldaşlıq elədi. Mavzoleyin üzərindəki yazı da təzələndi: LENİN - STALİN. Öz yetirməsi olan Nikita Xruşşov şəxsiyyətə pərəstiş adıyla aləmi qatıb-qarışdırmasaydı, yəqin ki, Koba indiyə kimi İliçə qulaq yoldaşı olaraq Mavzoleydə qalacaqdı. Lakin, Süleymana qalmayan dünya, Stalinə də qalmadı... Stalinə qalmayan dünya Kirovu da qoynunda çox tutmadı. Onun da ömür kitabı yarımçıq qapandı... Təqvimdə artıq 1934-cü il idi. Varlı kəndlilərin kələyini çoxdan kəsmişdilər. Adlarını “qolçomaq” qoyub var-yoxlarını əllərindən alıb, bu qəniməti yalan-doğru, guya aclıq çəkənlərə paylamışdılar. Evində bir-iki kisə taxıl gizlədənin anası mələr qalırdı. Qolçomaqların mal-mülki bir yana, səsini də almışdılar. Daha aydın ifadə etsəm, onları səsvermə hüququndan məhrum etmişdilər. Otuzuncu illərin “ profilaktik ” tədbirlərindən sonra yazıçıların, sənət adamlarının xəyalları əvvəlki tək cilovsuz at kimi hara oldu, necə gəldi çapmırdı. Çünki, başı daşdan-daşa dəyən ziyalıların əksəriyyəti artıq “ağıllanmışdı”. “Ağıllanmayanlar”a heç başdaşı da qismət olmurdu. Partiya sıralarında aparılan kütləvi “ təmizlik ” prosesi dilsiz-ağızsızların sayını artırmışdı. Məsul vəzifələrə ipə-sapa yatanlar təyin edilirdi. Kadrların seçilib yerləşdirilməsində bu prinsip, əsas meyara çevrilmişdi. Ümumiyyətlə, fikir müxtəlifliyinə ən yüksək səviyyədə bir dəfəlik “yox” deyilmişdi. Rəhbərlə fikir ayrılığı partiyaya xəyanət kimi mənalandırılırdı. Hətta, Siyasi Büroda mübahisə, qalmaqal doğura biləcək şəxsin varlığı arzu olunmazdı. Dünənki xidmətlərini tez-tez yada salan bolşevikləri siyasi arenada yavaş-yavaş oyundankənar vəziyyətə salırdılar. Özəl keçmişi olmayan, gələcək ümidlərini yalnız ulu rəhbərə bağlayan gənclərin irəli çəkilməsi üstünlük təşkil edirdi. Kimsənin ictimai fikirdə əsaslı yer alması, cəmiyyətdə böyük nüfuz sahibinə çevrilməsi məqsədəuyğun sayılmırdı. Bu yanaşma tərzi təkcə yüksək vəzifə sahiblərinə deyil, ayrı-ayrı təşkilatlara münasibətdə də özünü büruzə verirdi. O illərdə tez-tez idarələrin, qurumların da adları dəyişir, biri başqasıyla əvəz olunurdu. Ölkədə Baş katibdən başqa dəyişməyən kimsə, nəsə qalmamışdı. Sabitliyin, stabilliyin, əldə edilən bütün uğurların ilhamvericisi yalnız o idi. 1923 -cü ildə yaradılan OQPU on bir illik fəaliyyətindən sonra 1934-cü ildə yeni yaranan NKVD-nin (Daxili İşlər Xalq Komissarlığı-E.B.) tərkibinə salındı. Çoxsaylı əmək-islah düşərgələrini də bu struktura qatdılar. QULAQ-lar, SLON-lar, ALJİR-lər (həbs düşərgələrinin qısaldılmış adları - E.B.) getdikcə artırdı. Axı, yüz minlərlə “xalq düşməni”ni xalqdan ayırıb təcridxanalarda saxlamaq lazım gəlirdi. Tutulanların hamısını güllələsəydilər, bataqlıqların qurudulmasında, Tayqa meşələrində taxta-şalban tədarükündə, yolların, kanalların çəkilişində canı boğazından çıxana, ruhu bədəndən ayrılana qədər kimlər çalışacaqdı? Dünyanın hansı yerində bu cür ucuz və hüquqsuz işçi qüvvəsi tapılardı? İlk beşillik planın yüksək göstəriciləri sevindirici idi. Amma, onun bütün ağırlığı, əsasən dustaqların üzərinə düşmüşdü. 1934-cü ildə artıq bir çox dövlətlə diplomatik əlaqələr yarandı, azsaylı xalqlara muxtariyyət verildi. Xarici ölkələr SSRİ ilə sağlam iqtisadi-ticari əlaqələr qurmağa başladı. Yeni iri sənaye müəssisələri işə salınırdı. Stalin bir ölkə daxilində sosializm cəmiyyətinin mövcudluğunu dünyaya nümayiş etdirdi. Həmin dövrdə ilk dəfə “Sovet İttifaqı Qəhrəmanı” fəxri adı təsis edildi. Memarlıq Akademiyası yaradıldı. Sovet yazıçılarının birinci qurultayı keçirildi. Bir sözlə, bütün sahələrdə canlanma hiss olunurdu. Fəqət, rəhbər hələ də daxilən narahatlıq keçirirdi. Ətrafda çox şey öz yerini tutmamışdı. Leninin yazılı vəsiyyətindən xəbərdar olan bolşeviklərin fiziki varlığı belə Baş katibin əsəblərini qıcıqlandırırdı. Partiyanın XVII qurultayında nümayəndələrin ayağa qalxaraq iki nəfəri gurultulu alqışlarla salamlaması bu qıcığı dözülməz həddə çatdırdı. Xüsusi hörmətlə qarşılananlardan biri, təbii ki, Stalin idi. İkincisi isə gərək heç olmayaydı... 1991-ci ildə Sovetlər dağılana kimi, bütün rəsmi tədbirlərdə, nümayişlərdə istifadə olunan digər əyani-təşviqat vasitələri ilə yanaşı, mütləq qaydada Siyasi Büro üzvlərinin şəkilləri asılardı. Portretlərin ardıcıllığı partiya rəhbərliyində nüfuz dairəsinə görə kimin hansı yer aldığını bəlli edərdi. 1934-cü ildə portretlərin düzümünü yada salaq: Stalin, Molotov, Voroşilov, Kaqanoviç, Kalinin, Orconikidze, Kuybışev, Kirov, Andreyev və Kosior. Amma, XVII ayaq üstə gurultulu alqışlarla salamlanan ikinci şəxs, şəkil düzümünə istinadən sırada səkkizinci idi. Onun adı əsas məruzəçilərin siyahısına da daxil deyildi. Arada söz gəzirdi ki, guya nümayəndələrin bir qismi Baş katib vəzifəsinə Kirovun namizədliyini irəli sürmək istəyib. Deyilənə görə, əhvalatı olduğu kimi, Kirov özü Stalinə danışıb və rəhbəri əmin edib ki, yanına gələn siyasi elçilərin təklifini qəti surətdə rədd edib. Stalin onun sözlərini soyuqqanlıqla dinləsə də damarlarındakı qafqazlı qanının qaynamadığına kimsə zəmanət verə bilməzdi. Beş il əvvəl Kirovun ucadan bəyan etdiyi ikibaşlı sözləri də Stalin heç cür unutmurdu. Alovlu tribun çıxışlarının birində demişdi ki, Leninin vəfatından sonra onun yolunun, əməllərinin yeganə varisi bolşeviklərin Kommunist Partiyasıdır! Başqa kimsə bu yüksək şərəfə göz dikə bilməz. Yəni, Kirovun 1929-cu ildə xitabət kürsüsündən söylədiyi sözlərdən belə çıxırdı ki, heç kim, o cümlədən dekabr ayında 50 yaşı tamam olacaq Koba Leninin siyasi varisi ola bilməzdi. İndi kimlərinsə ürəyindən keçənləri gəlib onun qulağına pıçıldamaqda Kirovun qəsdi nə idi? Bəlkə, Stalinə minnət qoymaq istəyirdi? Məgər Baş katibin diktatorluq meyillərinə açıq şəkildə etirazını bildirən Ryutinin partiyadan xaric edilməsi və güllələnməsi təklif olunanda, rəhbərin qərarına qarşı çıxıb müstəqil mövqe nümayiş etdirən Kirov deyildi? Həmin vaxt Buxarin, hətta Orconikidze Sergeyin cəsarətindən ürəklənib, onunla həmfikir olduqlarını söyləmişdilər. Stalin o an hirsini birtəhər cilovlayıb güzəştə getsə də, hər üçünün müqəddəratı barədə yenidən düşünməyə ehtiyac olduğunu anlamışdı. Təsadüfi deyil ki, ölkənin inkişaf etmiş stalinizm mərhələsini görmək onların heç birinə nəsib olmadı. Yaranmış vəziyyətdə Koba müəyyən suallara təcili cavab axtarmalıydı. Məsələn, Baş katibin əvəzlənməsi fikri kimin beyninin məhsulu idi? Bəlkə Nadejda Krupskayanın? Axı, Leninin vəsiyyətnaməsinin qurultayda oxunmasını təkidlə istəyən o idi. İkincisi, Baş katibin dəyişdirilməsi təklifini dilə gətirən, bu barədə gizli məsləhətləşmələr aparan, partiya daxilindəki qruplaşmanı dəstəkləyən daha kimlər kölgədə qalmışdı? Üçüncüsü, demokratik çevriliş planının arxasında Stalinin ən yaxın çevrəsindən kimlər vardı? Həmyerlisi və dostu sayılan Serqo bu murdar oyuna bulaşmışdı, ya yox? Yəni, belə şey mümkün ola bilərdi, yoxsa inqilabi romantika havası hələ də başında dolaşan jurnalist Artyom (Kirovun partiya ləqəbi - E.B.) liderin yanında yerini daha şirin salmaq üçün bunları uydurmuşdu? Məgər o, bilmirdi ki, iki qoçun başı bir qazanda qaynamaz? Əgər belə bir sevda kiminsə başından keçmişdisə, baş dediyin o gərəksiz yükü öz üstündə hansı sağlam çiyin saxlayacardı? Əgər belə bir rəy pərdə arxasında formalaşırdısa, demək partiyadaxili təşkilat məsələlərində, kadrların seçilib yerləşdirilməsində, dövlətin təhlükəsizliyini təmin etməli orqanların fəaliyyətində ciddi səhvə yol verilmişdi. Bəs, günahkar kim idi? Axı, 1922-ci ildən təşkilati məsələlər bilavasitə Baş katibin nəzarətində idi. Bütün səlahiyyətlər onun əlində cəmləşmişdi. Demək, diqqətdən yayınmalar vardı. Öz səhvini taleyin ümidinə buraxmadan özü düzəltməli idi. Amma necə? Mühüm hadisələrlə əlamətdar olan 1934-cü il başa çatmaq üzrə idi. Həmin il Kirovun tərcümeyi-halına yazılacaq hadisələr də az olmamışdı: Leninqrada və SSRİ-nin Şimal-Qərb bölgələrinə rəhbərliklə yanaşı, Mərkəzi Komitəyə katib seçildi. Neft sənayesinin bərpası və yenidən qurulması sahəsində xidmətlərinə görə Lenin ordeni ilə təltif edildi. Kirov hərdən şikar dalınca şəhər kənarındakı meşələrə gedərdi. Amma, daha çox həmvətənləri arasında xain ovuna çıxmağa meyil göstərərdi. O vaxt Rusiya Elmlər Akademiyası Leninqradda yerləşirdi. Otuzuncu illərin “təmizlik” əməliyyatlarının fəal iştirakçılarından olan Kirov elm xadimlərinə özəl sürpriz hazırlamışdı. Bilavasitə onun təşəbbüsü ilə görkəmli akademik Sergey Fyodoroviç Platonova qarşı uydurma ittihamlar irəli sürülərək, cinayət işi açıldı. Xüsusi yaradılan hökumət komissiyasının sədri Fiqatnerlə bərabər Stalinə və Orconikidzeyə təcili teleqram vurub çekistləri elm xadimlərinin ifşası üçün hazırlanan əməliyyata cəlb etmək barədə icazə istədi. Alimləri elm aləminə vurduqları ziyanla yanaşı, Sovet quruluşunu yıxıb əvəzində konstitusiyalı monarxiya qurmaq məqsədilə əksinqilabı təşkilat yaratmaqda suçladılar. Çox keçmədi ki, omların bir qismini tutdular, bəzilərini güllələdilər. Yetmiş yaşlı Platonovu isə Samaraya sürgün etdilər. O, hər həftə OQPU-nun yerli şöbəsində qeydiyyatdan keçməli idi. Ahıl çağında bu zülmə səbri nə qədər dözsə də, səhhəti tab gətirməyib ürək çatışmazlığından 1933-cü ildə vəfat etdi. Minlərlə günahsız insanın müqəddəratı ilə oynayan, ailələr viran qoyan Miron oğlunun özünə də tale qəribə sürpriz hazırlamışdı. 1934-cü il dekabrın 21-də İosif Stalinin 55 yaşını qeyd etmək ona nəsib olmayacaqdı.
SOÇİDƏ SON İSTİRAHƏT
Soçidəki yay iqamətgahını Stalin çox bəyənirdi. Ürəyi istəyən dostları yanına çağırıb, lazım gələndə elə oradaca müəyyən məsələləri müzakirə edərdi. Bu baxımdan Kirovu Soçiyə dəvət etməsi kimsəyə qeyri-adi görünmədi. Həmin günlərdə Jdanovu da ora çağırdı. Neçə vaxt idi ki, Koba Andrey Aleksandroviçi Kirova əvəz hazırlayırdı. Mənim diqqətimi çəkən başqa şey oldu. Avqust ayında rəhbərə mehman olan Kirov Smolnıya qayıdıb öz yerində qərar tutmamış onu Qazaxıstana taxıl tədarükünə göndəriblər. O böyüklükdə vəzifə sahibini bu işə cəlb etməklə, Leninqrad kimi mühüm və mürəkkəb vilayəti bir aydan çox başsız qoymaq çoxmu vacib idi? Sentyabrda Orta Asiyadan qayıdan kimi Kirov yenə Moskvaya çağırılır. Belə düşünmək olar ki, Stalinin adamları bu müddət ərzində keçmiş paytaxtda Kirovun xəbəri və iştirakı olmadan hansısa tədbirlər həyata keçirirdilər. Kimsəyə sirr deyil ki, özündən xəbərsiz heç mənzil-istismar kontorunun müdirinin kabinetinin yerini dəyişməzlər. Smolnıda olmadığı günlərdə Kirovun iş otağını başqa yerə köçürmüşdülər. Görən nə baş verirdi?
SMOLNIDA ONU GÖZLƏYƏN VARDI
Noyabrın 30-da Moskvada keçirilən növbəti plenumdan yenicə qayıdan Kirov günortadan sonra şəhərə başmaq seyrinə çıxmışdı. Bazar günü təkbaşına Leninqrad küçələrini gəzib dolaşırdı. Ətrafa sahib ədasıyla nəzər salsa da, şəxsən tanımadığı adamlarla doğmalartək hal-əhval tutur, mehriban davranır, səmimi söhbətləşirdi. Axı, bir gün sonra Uritski adına sarayda keçiriləcək yığıncaqda partiyanın Noyabr plenumunun nəticələri barədə danışacaq, Mərkəzi Komitənin, şəxsən Stalin yoldaşın qarşıya qoyduğu yeni vəzifələri fəallara çatdıracaqdı. Neçə vaxtdan bəri hamını narahat edən müxtəlif suallar getdikcə çoxalırdı. Yığıncaqda sorğu-sual atəşinə tutulacağını Kirov qabaqcadan bilirdi və ona görə də növbəti görüşə ciddi hazırlaşırdı. Həmin gün evdə zəhləsini tökəcək kimsə yox idi. Mariya Lvovna müalicəxanada tədavi görürdü. İstirahət günü olduğundan xidmətçi dincəlirdi. Dörd yaş özündən böyük olan həyat yoldaşı Markusla aralarındakı soyuqluq zaman ötdükcə buz bağladığından o, könül rahatlığını evdə deyil, başqa yuvalarda axtarırdı. Bu barədə söz düşəndə Matilda Kşesinskayanın keçmiş malikanəsi, eləcə də Opera və Balet teatrı yada düşərdi. Kirov təkcə tamaşa seyr etmək üçün deyil, həm də göz və könül oxşayan səhnə ulduzları ilə görüşmək üçün teatra gedərdi. Onun pərəstiş etdiyi və yaxın əlaqədə olduğu aktrisalar sırasında əsasən Aqrepina Vaqanova, Tatyana Veçeslova, Natalya Dudinskayanın adları çəkilərdi. Birinci katibin özgə qadınlarla əylənməyi xoşlaması Neva sahilində kimsəyə sirr deyildi. Milda Draule ilə olan əlaqələri isə neçə vaxtdan bəri dedi-qodu mövzusuna çevrilmişdi. Amma qadınlarla əylənmək təkcə onun şakəri deyildi. Sovet rəhbərləri keçmiş şahlardan fərqli olaraq, hərəmxana saxlamasalar da, eyş-işrətlə məşğul olmağa xüsusi diqqət ayırardılar. Hətta, ən qəddar və zalım adam kimi tanınan Lavrenti Pavloviç Beriyanın da ən zəif damarı çoxlarına məlum idi. Sovetlərin gizli xidmət idarəsinin rəhbəri özəl həyatının gizli məqamlarını tənzimləməyi, başqa sözlə desək, hacəliyi milliyyətcə erməni olan Sarkisov familiyalı NKVD əməkdaşına həvalə edərmiş. Şəhər gəzintisindən sonra evə qayıdan Kirov yazı masası arxasında oturub sabahkı məruzə mətni üzərində çalışdı. Əməlli-başlı yuxusunu almamış ömrünün sonuncu səhəri üzünə açıldı. Ruslar deyərlər ki, bazar ertəsi ağır gündür, lakin Sergey həmin gün canında heç bir ağırlıq və ya narahatlıq hiss etmədən rahat yorğan-döşəyindən qalxıb özünə çay süfrəsi hazırladı. Elə şeyləri yaxşı bacarırdı. Axı ovçu idi. Meşədə saatlarla pusquda durmağın, şikarını ala-çiy də olsa, tonqalda qızardıb yeməyin ləzzətini dadmışdı. Qəhvəaltıdan sonra işə zəng vurdu ki, görsün nə var, nə yox. “Hamı öz yerində, hər şey qaydasındadır, narahat olmayın, yoldaş Kirov”, - deyə vilayət partiya komitəsinin ikinci katibi M. Çudov məlumat verdi. Mironıçın sözlərindən ikinci katib belə nəticə çıxartdı ki, onlar bir də axşamkı iclasda görüşəcəklər. Kirov evdən birbaşa Saraya getsəydi, bəlkə də həmin gün o qanlı hadisə baş verməyəcəkdi. Fəqət, Mironıç nədənsə iş yerinə baş çəkmək istədi. Saat 16.00 - da qaraja zəng vurub maşın çağırdı. Evdən çıxıb küçəylə aramla addımlayırdı. Maşın arxasınca iməkləyirdi. Qorumaları nəzər cəlb etmədən onu təqib edirdi. Son bir ildə, qorumalarının sayı xeyli artmışdı. Mərkəzi Komitənin qərarıyla rəhbər işçilərin mühafizəsinə cavabdeh olan yeni qurum yaradılmışdı. Təsdiq edilmiş təlimatda hansı vəzifə sahibinə neçə nəfər qoruma ayrılması konkret göstərilirdi. Kirovun şəxsi mühafizə xidməti 15 nəfərdən ibarət idi. Troitski körpüsünə çatanda Sergey maşına minərək sürücüyə göstəriş verdi: “Birbaş Smolnıya”. Mühüm inzibati binalarda, adətən bir neçə giriş-çıxış qapısı olur. Smolnıda da yüksək rəhbərlər özəl qapıdan istifadə edərdilər. Amma, həmin gün birinci katibin maşını ümumi girişin önündə dayandı. Çünki o, belə istəmişdi. Mərtəbələri qalxdıqca, dəhlizlərdən keçdikcə Mironıça salam verən kim, kefini xəbər alıb söz soruşan kim... Sergey sanki kimsəni görmür, heç nə eşitmir, xəyalı göylərdə dolaşırdı. Elə bil harasa tələsirdi. Olmaya onu gözləyən vardı? Həmin vaxt aparat işçiləri Çudovun otağında iclasa toplaşmışdı. Bəlkə, onlara deyiləsi sözü, tapşırığı olacaqdı? Yox, o, kabinetinə tələsirdi. Kələfin ucu deyəsən elə orada gizlənmişdi...
VİDA ZƏNGİNİN NƏ VAXT ÇALINACAĞI KİMSƏYƏ BƏLLİ OLMAZ
Əgər deyilənlər doğrudursa, yəni qısqanclıq zəminində neçə vaxtdan bəri qəlbi qisas hissi ilə döyünən Leonid Nikolayev Kirovla məhz bu yerdə qarşılaşıb onu qətlə yetiribsə, demək, dünyanın ən böyük təsadüflərindən biri 1934-cü il dekabrın 1-də Smolnıda baş vermişdi. Lap Yuli Sezar söyləyən kimi: “gəldim, gördüm, qələbə çaldım”. Kirovun müəmmalı qətliylə əlaqədar yazılanları oxuyanda eyni hadisəni hərənin bir cür təsvir etməsi diqqətimi çəkdi. Kirovun hansı qapıdan binaya daxil olması haqda olan fikirlər belə haçalanır. Halbuki birinci şəxslərin gəliş-gedişi xüsusi dəftərxana kitabında mütləq qaydada qeyd olunub arxivdə saxlanılır. Nə isə... Görək, Leninqrad İcra Komitəsinin əməkdaşı M.Roslyakov dekabrın 1-də baş verənləri necə xatırlayır. O, ikinci katib M. Çudovun otağında keçirilən iclasda iştirak edirmiş. Sözlərindən belə məlum olur ki, güllə səsinə təşkilat şöbəsinin müdiri A. İvçenko ilk olaraq dəhlizə atılıb. Çıxmağı ilə geri dönməyi də bir olub. Üzündə qeyri-adi ifadə varmış, dili söz tutmur, yerində donub qalmışdı. Roslyakov özü dəhlizə çıxanda qəbul otağının qapısında Kirovu yerə yıxılan vəziyyətdə görüb. Üzüqoylu uzanan katibin səs-səmiri çıxmırdı. Sol qoltuğunun arasındakı qovluq necə varsa, eləcə də qalmışdı. Bir mülahizə də var ki, guya Kirov iş otağına məruzə mətninin dalınca gəlmişdi. Şahid isə qovluqdan yerə səpələnən kağızların məhz məruzə mətni olduğunu söyləyir. Roslyakov Kirovun başını qaldıraraq haylayıb ki, bəlkə səs verə. Cavab gəlməyib. Sonra Nikolayevin əlindən tapançanı alaraq başının üstünü kəsdirən Leninqrad şəhər partiya komitəsinin katibi A.İ.Uqarova təhvil verib. Kirovun sağ tərəfində arxası üstə uzanıb qalmış şübhəli şəxsin ciblərini arayanda partiya bileti və cib dəftəri tapıb. Onları da Uqarov götürüb. Bu məqama da diqqət yetirin: şübhəli bilinən adamın əlindən silahı mühafizəçilər deyil, Roslyakov alıb. Nikolayevin ciblərini o axtarıb. Belə çıxır ki, hadisə yerində hüquq-mühafizə orqanı əməkdaşlarından, qorumalardan kimsə yox imiş. Şəxsi mühafizəçi Borisov izahatında yazır ki, atəş səsini eşidib hadisə yerinə özünü yetirəndə Kirovu yerə sərilən görüb və dərhal şübhəli şəxsi tərksilah edib. Şahid ifadələrində bunu öz adına çıxaran başqa adamlara da rast gəldim. Kirovun qətli ilə bağlı aparılan yoxlamaların hamısında qətlin baş vermə epizodu təsvir edilib. Əsas şahid qismində adı çəkilən kapitan Borisov həmin gün həbs edilir. Bir gün sonra, yəni dekabrın 2-də onun NKVD-nin təcridxanasından Smolnıya yük maşınında gətirilməsi də təlimata uyğun deyildi. Ötən əsrin otuzuncu illərində küçələri avtomobilə həsrət qalan Leninqradda yük maşının istiqamətini itirərək qarşıdakı binaya çırpılması sağlam məntiqə sığmır. Borisov aldığı kəllə-beyin zədəsindən yerindəcə həlak olur. Maraqlıdır ki, istiqamətini itirən yük maşınının çırpıldığı 50 nömrəli binada NKVD-nin əməliyyat şöbəsi yerləşirmiş. Çox sonralar məlum olacaq ki, Borisovu müşayiət edən çekistlərin heç biri öz əcəliylə ölməyib. Sağ qalan sürücünün otuz ildən sonra qəzayla bağlı xatirələri də ilgincdir. Sürücü deyir ki, iki çekist kuzovda dustağa göz qoyurdu, biri də onun yanında oturmuşdu. Gözlənilmədən əməliyyatçı sükandan yapışıb maşının istiqamətini dəyişməyə cəhd edəndə maşın az qala aşacaqmış. Sürücü son anda güc işlədib sükana hakim olsa da qəzanın qarşısını ala bilməyib. Bu «təsadüfdən” ölən yalnız kapitan Borisov olub. Cavabsız qalan daha bir sual: nəyə görə qətl hadisəsindən sonra ilk dindirilən məhz Milda Draule idi və nə üçün dindirilmə protokollarından bəzi vərəqlər çıxarılıb? Bu səhifələrdə onun harada, saat neçədə, hansı şəraitdə saxlanıldığı, sorğu-sual edilməsinin səbəbi açıqlanırdı. Əllinci illərin ikinci yarısında (yəni, Xruşşovun rəhbərliyi dövründə - E.B.) həmin vərəqlər cinayət işinin materiallarından rəsmən çıxarılaraq akt üzrə məhv edilib. Niyə?
1 DEKABR, 1934-CÜ İL
Hadisə yerinə ilk yetişən yaxınlıqdakı tibb məntəqəsinin işçiləri olub. İyirmi dəqiqə sonra təcili yardım xidməti gəlib. Smolnıya şəhərin ən görkəmli təbibləri çağırılıb. Onların arasında məşhur cərrah İ. Canelidze də var idi. Fəqət, bir aləm ağ xalatlının bir araya yığışması “toydan sonra nağara”nı xatırladırdı. Çünki, yaxın məsafədən açılan atəş öz işini görmüşdü. Meyidi diriltməksə insan əməli deyildi. Sarsıntı içində olan həkimlər hər ehtimala qarşı, nəbzi susan, nəfəsi kəsilən Kirovun üzərində xeyli əlləşdilər. Amma, ölünün heç qıdığı da gəlmədi. Bütün bunlar Kirovun iş otağında cərəyan edirdi. NKVD-nin Leninqrad idarəsinin rəisi Filip Medved, İdarənin baş həkimi Mamuşini də özüylə gətirmişdi ki, bəlkə bu çıxılmaz vəziyyətdə işə yarasın. Ümumi çaşqınlıq hiss olunurdu. Filip Medved bura gəlməzdən öncə Moskvaya zəhg edib Smolnıda baş verən terror aktı barədə öz rəisinə məruzə etmişdi. Hadisə yerində tərtib olunan ilk xidməti məlumatı imzalayıb teleqrafla xalq komissarı Yaqodaya göndərdi. Məlumatda deyilirdi: “1 dekabr saat 16.30 radələrində Smolnı binasının 3-cü mərtəbəsində iş otağının 20 addımlığında naməlum şəxs tərəfindən Kirov yoldaşın baş nahiyəsinə atəş açılmışdır. Şəxsiyyəti tam məlum olunmayan saxlanılan şübhəli, cibindən çıxan sənədlərə görə, 1904-cü il təvəllüdlü, 1924-cü ildən partiya üzvü Leonid Vasilyeviç Nikolayevdir. Yoldaş Kirov kabinetindədir. Həbs olunan Nikolayev dindirilmə üçün NKVD-yə göndərilmişdir. Onun həyat yoldaşı Milda Draulenin həbsi barədə sərəncam verilmişdir. Smolnıda əməliyyat-axtarış işləri davam edir.” Medved məlumatı saat 18.30 da imzalamışdı. 16.30-da aldığı güllə yarasından iki-üç dəqiqə sonra dünyasını dəyişən Kirov iki saat öz kabinetində niyə qalmalı idi? Məgər, Medved bilmirdi ki, Kirov qış yuxusuna getməyib? Onun bioloji həyatı tükəndiyindən həkimə ehtiyacı qalmayıb? Belə vəziyyətdə yanında keşikçi deyil, keşişin olması daha münasib idi. Qanlı olaylar barədə Kaqanoviçə Vilayət Partiya Komitəsinin ikinci katibi Çudov məruzə etmişdi. Bəd xəbəri Stalinə ilk çatdıran deyəsən Kaqanoviç olmuşdu. Axşam saatlarında Baş katib köməkçisinə Çudovla telefon əlaqəsi yaratmağı tapşırdı. Stalinlə birbaşa xəttə olduğunu bilən Çudovun dili kəkələyir, ağzı söz tutmurdu. Onun cavablarından qane olmayan Stalin dəstəyi həkimə verin dedi. Ayaq üstə farağat duran Çudov Canelidzeyə telefona çağırıldığını deyəndə həyəcanından əsirdi. Axı, xəttin o başında yoldaş İosif Vissarionoviç şəxsən gözləyirdi. Bir anda ortalıq sükuta qərq oldu. Stalinin İustin İllivanoviçə xüsusi ehtiramı və etibarı vardı. Vəziyyəti onun məruzə edəcəyini biləndə artıq sual verməyib professoru dinlədi. Onların öz aralarında gürcücə danışması hər kəsin diqqətini çəkdi. Kirovun aldığı güllə yarasından dərhal keçindiyini bildirən həkim ölümün dəqiq səbəblərini aydınlaşdırmaq üçün meyiti tibbi müayinədən keçirməyə icazə istədi. Rəhbərin razılığını alandan sonra cəsədi xəstəxanaya apardılar. Müayinə zamanı yəqin ki, ilk növbədə ən mühüm məsələ güllənin hansı istiqamətdə beyni zədələdiyini təyin etmək idi. Baş nahiyəsində yeganə dəlik vardı. Demək, güllə ağız boşluğundan bayıra çıxmışdı. Boyu 1 metr 68 santimetr olan Kostrikovu (Kirovun gerçək soyadı - E.B.) güllələdiyi güman edilən Nİkolayevi Allah qəddi-qamətdən də məhrum etmişdi. Onun boyu Kirovdan gödək idi. Metr yarımlıq Nikolayev ayağının altına stul qoymalıydı ki, tapançadan atılan güllə belə istiqamət alsın. Bunu bizdən də yaxşı məşhur cərrah bilməliydi. Amma, dinib-danışan olmadı. Hazırlanan arayışa o da yazıldı ki, mədəsində cüzi qastrit əlaməti istisna olmaqla, 48 yaşlı Kirovun soyumuş əndamı tam sağlam imiş. Güllənin hansı tapançadan açılması, əldə edilən gilizlərin Nikolayevin silahına aid olub-olmaması kimsəni maraqlandırmadı. Axı, dəhlizdə Mironıça bir başqası, lap elə arxasınca gələn kapitan Borisov, yaxud yaxınlıqdakı mühafizəçilərdən Auzen, Dudeyko, Balkovski də atəş aça bilərdi... Qəribədir ki, cinayət işində hadisə yerinin planı da yoxdur. Həmin axşam Nikolayevi ruhi xəstələr üçün nəzərdə tutulan 2 saylı şəhər xəstəxanaya aparsalar da psixi ekspertizadan keçirməyiblər. Cinayətin törədilməsində istifadə olunan odlu silah, eləcə də Smolnıda açılan hər iki güllənin gilizi üzərində ballistik ekspertiza aparılmayıb. Hadisə yerində şübhəli şəxs qismində saxlanılan Nikolayevin dindirilməsi davam edirdi. Gecə yarıya kimi onunla bilavasitə NKVD - nin Leninqrad idarəsinin rəhbəri Medved, müavini Fomin, iqtisadi şöbənin müdiri Moloçnikov, məxfi-siyasi şöbənin rəis müavini Stromin işləyirdi. Nə qədər sorğu-sual etsələr də Leonid birmənalı şəkildə israrla təkrarlayırdı, deyirdi ki, qətli təkbaşına düşünüb həyata keçirmişəm. Heç bir köməkçim olmayıb. Kimsə məni bu işə təhrik etməyib. Səbəb 8 aydan bəri işsiz qalmağım, rəhbər partiya orqanlarına göndərdiyim yazılı müraciətlərimə vaxtında baxılmaması, bir də ailə-məişət zəminində yaranan problemlər olub. Səkkiz aydan bəri partiya işindən uzaqlaşdırılan Nikolayevin əl-qolu sallana-sallana, tapança belində şəhərdə sərbəst dolaşması, istədiyi vaxt Smolnıya rahat girib-çıxması məgər şübhə doğurmur? Diqqət çəkən daha bir məqam. Oktyabrın 15-də Smolnının ətraflnda Nikolayevi şübhəli şəxs kimi tutub saxlamışdılar. Onun üzərində silah aşkar edilmişdi. Cib dəftərində Kirovun ev istiqamətində hərəkət marşrutunu əks etdirən qrafik qeydlər vardı. Bu barədə operativ şəkildə NKVD rəhbərliyinə məlumat verilib. Az keçmədən Daxili işlər komissarlığı Leninqrad vilayət idarəsinin rəis müavini İvan Zaporojets Mərkəzdən göstəriş alır: “Saxlanılan şəxs sorğu-sual edilmədən dərhal azadlığa buraxılsın”.
STALİN YENƏ SMOLNIDA
Həmin axşam Stalin hökumətin rəhbəri Vyaçeslav Molotov, Müdafiə məsələləri üzrə komissar Kliment Voroşilov, Daxili işlər komissarı Yenox Yaqoda, MK yanında Partiya nəzarəti komissiyasının sədr müavini Nikolay Yejov, Baş prokuror Andrey Vışinski və digər yüksək vəzifəli məmurlarla birlikdə qatarla Leninqrada yollandı. Fəqət, bu barədə kütləvi informasiya vasitələrində rəsmi məlumat verilmədi. Hərdən düşünürəm ki, 1934-cü il dekabrın 1-də Stalinin gecəylə Leninqrada yollanmasının əsl səbəbi nə idi? Yalnız yaxın dostunun, silahdaşının faciəli ölümü? Axı, əziz-xələf anası Ketevan vəfat edəndə dəfndə iştirak etmək üçün Gürcüstana getmədi. Stalin kimi bərkdən-boşdan çıxan, inqilab alovlarının içində püxtələşən, duyğularını, istəklərini siyasi maraqlarının quluna çevirməyi bacaran bir liderin bu addımı atmağına daha ciddi səbəb olmalıydı. Əgər o, təcili qatara minib hadisə yerinə tələsirdisə, demək onun siyasi maraqlarına real təhlükə yaranmışdı. Nə imiş nigarançılığın gerçək səbəbi? Hadisələri izləməyə davam edək.
2 DEKABR
Qəzetlərdə dərc olunan rəsmi məlumatlarda partiya və hökumət rəhbərliyi adından dərin hüznlə bildirir ki, 1934-cü il dekabrın 1-də saat 16.37-də fəhlə sinfinin düşmənləri tərəfindən göndərilən qatilin əliylə Siyasi Büro üzvü, Mərkəzi Komitənin katibi, Leninqrad vilayət partiya komitəsinin birinci katibi Sergey Mİronoviç Kirov həlak olub. Səbəb hələ göstərilmir. Dəfnin təşkili ilə əlaqədar xüsusi dövlət komissiyası yaradıldığı, mərasimin ayın 6-da, saat 15.00-da Qızıl meydanda keçiriləcəyi bildirilir. Rəsmi məlumatda vurğulanır ki, sinfi düşmənlərin kökü biryolluq kəsilməlidir. Müttəfiq respublikaların mövcud cinayət-prosessual kodeksinə təcili surətdə edilən əlavələr qüvvəyə minir. Bu dəyişikliklərdən sonra terrorizm nəticəsində baş verən cinayətlərin istintaq müddəti maksimum 10 gün müəyyən edildi. Müttəhim ittihamnamə ilə yalnız məhkəmədən bir gün öncə tanış ola bilərdi. Prosesin tərəflərin iştirakı olmadan da keçirilməsi qanunla mümkün sayılır. Əhv barədə kasasiya şikayətinə baxmaq yasaqlanır. Məhkəmə qərarının dərhal yerinə yetirilməsinə tapşırıq verilir. Leninqrada çatan kimi, dəmiryolu vağzalından birbaşa Smolnıya yollanan Stalin hadisənin necə baş verdiyini araşdırmağa başladı. Onun Nİkolayevlə görüşü Kirovun iş otağında keçdi. Bu haqda yazılanlar müxtəlifdir. Rəsmi sənədlər olmadığından hərə eşitdiyini bir cür qələmə alıb. Bəziləri deyir ki, guya Nikolayev rəhbəri görcək ürəklənib. Ayaqlarına yıxılaraq etiraf edib ki, onu cinayətə təhrik edən çekistləri idi. Açıqlama verib ki, 4 ay ərzində NKVD-nin 4 əməkdaşı bu cinayətin dövlət maraqlarına xidmət etdiyinə onu inandırıb. Dindirmədə Kirovun müavini Çudov şəhər prokuroru Palçayev də iştirak edirdi. Palçayev təcrübəli hüquqşünas idi. Dərhal dərk etdi ki, Leonidin ağzından qan püskürən ifadələri eşitmək hər ikisinə baha başa gələcək. Odur ki, tezliklə intihar edərək üzüsulu bu dünyadan köçdü. Amma, son məqamda Çudovu xəbərdar etmişdi ki, kabinetdə Nikolayevin etirafına şahid olduğumuz üçün bizi sağ buraxmazlar. Kirovun müavini məsələnin nə dərəcədə ciddi olduğunun fərqinə varmadı, bəlkə heç prokuror dostunun təşvişini əsassız saydı. Günlərin birində gözləmədən onu həbs edəndə vaxtilə dostunun xəbərdarlığına etinasız yanaşdığını özünə bağışlamadı... Smolnıda dindirmələr aparan Stalin mühafizəçisi Borisovun yanına gətirilməsinə göstəriş verdi. Az sonra ehtiyatla ona məruzə etdilər ki, kapitan təcridxanadan Smolnıya gətirilərkən yol - qəza hadisəsində aldığı zədədən yerindəcə həlak olub. Bu xəbər onu bərk qəzəbləndirdi. Daha bir sürpriz: həmin gün Stalin NKVD Leninqrad idarəsinin rəhbəri Filip Demyanoviç Medvedin həbs olunması barədə göstəriş verdi. Bir müddət sonra onu da “xalq düşməni” kimi güllələyəcəkdilər.
3 DEKABR
Moskvaya yola düşməzdən əvvəl Leninqraddakı vəziyyətin qarışıq və gərgin olduğunu öz gözüylə görən Baş katib cinayət işinin yubanmadan hərtərəfli araşdırılmasının labüdlüyünü hər kəsin diqqətinə çatdırdı. Daha sonra Yejovu qatardan endirərək, istintaqın gedişinə şəxsən nəzarət etməyi və bu barədə mütəmadi olaraq ona məlumat verməyi tapşırdı. Mənim təxminimə görə, Stalini Smolnıda baş verən hadisədə bir insan, yaxın iş yoldaşı, silahdaş, məsləkdaş itkisindən daha çox, Mərkəzi Komitə katibi, Siyasi Büro üzvünün mənəviyyat düşkünü kimi dünyasını dəyişməsi narahat edirdi. Axı, inqilabın beşiyi sayılan tarixi binada eyş-işrətlə məşğul olan partiya liderinin qısqanclıq zəminində qətlə yetirilməsi dünya ictimaiyyətində bolşevik rəhbəri obrazı barədə mənfi fikir yaradar, onun kadr siyasətinə kölgə sala, xələl gətirə bilərdi. Əxlaqsızlıq çanağı Kirovun öz başında çatlasa da, hadisəni olduğu kimi ictimaiyyətə çatdırmaq iqtidar nümayəndələrinə müəyyən mənada mənəvi zərbə endirə, xaricdən sovetlərə qarşı əks-təbliğatı gücləndirə bilərdi. Bütün bunları birmənalı şəkildə yolverilməz sayan Stalin mövcud xətanın qarşısını almaqla, mahir ovçunu - Kirovu, Nikolayevin şikarı kimi deyil, əks-inqilabçıların, terrorçuların, zinovyevçilərin mütəşəkkil cinayətkar dəstəsinin qurbanı kimi tarixdə yaşatdı. Məsələyə bu cür yanaşma onun digər gizli və daha ciddi hədəfləri ilə üst-üstə düşürdü. Hər zaman niyyəti gizli, əməlinin nəticəsi aşkar olan Koba, görən bu qərara nə vaxt gəldi? Gecə qatarla Piterə gələndə, yoxsa Smolnıda keçirdiyi görüşlərdə, toplantılarda, dindirmələrdə həqiqət aydınlaşanda? Bəlkə bu hadisələr baş verməzdən daha öncə, Kremldəki iş otağında növbəti siyasi gedişlərini götür-qoy edəndə? Görən, çekistlərin gizli tapşırığını həyata keçirdiyini Kobaya etiraf edəndə Nikolayev nəyə ümid bəsləyirdi?
4 DEKABR
Stalinlə görüşündən sonra aparılan dindirmələrdə Nikolayev əvvəlki ifadələrini dəyişərək şəhərdə gizli fəaliyyət göstərən əks-inqilabi qruplaşmaya mənsub olduğunu boynuna aldı. Bəyan etdi ki, indiyədək verdiyi yanlış ifadələr istintaqı cinayətin əsil səbəbinin, qaynağının, iştirakçılarının aşkar edilməsindən yayındırmaq məqsədi daşıyıb. Qeyd edib ki, bu aksiyanın Sovet hakimiyyətinə, bolşeviklər partiyasına qarşı ölkədə artan narazılıq dalğasını hərəkətə gətirəcəyini gözlənilirdi. Leonidin cib dəftərində yazılan bir ünvan əməliyyatçıların diqqətindən yayınmadı: Gertsen küçəsi, 43. Yanında telefon nömrəsi də var idi: 196-82. Həmin ünvanda Almaniyanın Baş konsulluğu yerləşirdi. Sən demə, son aylar işsiz-gücsüz dolaşan Nikolayev dəfələrlə konsulluğu ziyarət edibmiş. Hər dəfə oradan çıxanda Torqsin mağazasına yollanarmış. Özü də alış-verişin pulunu alman markı ilə ödəyərmiş. Onun hansı xidmətlərinə görə cibinə alman pulu qoyulması məlum deyil. Maraqlıdır ki, dekabrın 2-si, yəni hadisə törədilən günün səhəri, Baş konsul Rixard Zommer kimsəyə xəbər vermədən qatara minib Finlandiyaya yollandı. Halbuki, diplomatik qaydalara görə, Baş konsul bu barədə Xarici İşlər Xalq komissarlığına mütləq qaydada məlumat verməliydi. Zommer ömrünün sonuna kimi bir də SSRİ-yə qayıtmadı. Bu qaranlıq məsələyə altı komissiyanın heç biri aydınlıq gətirmədi. “Pravda” qəzeti yazırdı ki, Kirovun qətlində günahkar olan ağ qvardiyaçı terroristlərin böyük bir qrupu həbs olunmuşdur. Bu o demək idi ki, qətli törədən bir nəfər deyil, mütəşəkkil cinayətkar dəstədir. Həbslər davam edirdi.
6 DEKABR
Moskvada keçirilən vida mərasimində Stalinin tabuta yaxınlaşıb meyitin alnından öpməsi diqqət çəkdi. “Pravda” qəzeti yazırdı ki, bu öpüş böyük sovet dövlətinin, qüdrətli sovet xalqının Kirova olan məhəbbətinin ifadəsi idi. Mərasimdə çıxış edən V. Molotov bir daha bəyan etdi ki, qətl hadisəsində fəhlə sinfinin düşmənləri, ağqvardiyaçı alçaqlar, xarici agentlər günahkardır. Tezliklə onların ifşa olunacaqlarına xalqı əmin etdi. Bir daha xatırladaq ki, ilk ifadələrində Leonid Nikolayev cinayəti qısqanclıq zəminində təkbaşına törətdiyini israrla bəyan edirdi.
7 DEKABR
Dindirmələrdə vəziyyət bir qədər də dəyişdi. Cinayəti təkbaşına törətmədiyini etiraf edən Leonid Nikolayev onu təhrik edənlərin və köməkçilərinin müxalifət düşərgəsinin təmsilçiləri, daha dəqiq desək, zinovyevçilər olduğunu etiraf etdi.
15 DEKABR
Leninqradın yeni rəhbəri Jdanov kommunistlərin plenumunda müxalifət nümayəndələrini kəskin surətdə tənqid etdi və Kirovun qətlində onların iştirakının müəyyənləşdiyini söylədi. Tezliklə cinayətkar dəstə üzvlərinin layiqli cəza alacaqlarına vətəndaşları əmin etdi.
16 DEKABR
1934-cü ilin yanvarında Zinovyev və Kamenev partiya sıralarına bərpa edilmişdi. Amma, Kirovun qətlinin əsas təşkilatçılarından olduqları güman edilən Lev Nikolayeviç Kamenev və Qriqori Yevseyeviç Zinovyev dekabrın 16- da yenidən həbs edildi.
18 DEKABR
“Leninqradskaya pravda”nın baş məqaləsində vaxtilə Oktyabr inqilabının beşiyi başında dayanan Kamenev və Zinovyevə birmənalı olaraq “faşist tör-töküntüsü” damğası vuruldu.
19 DEKABR
Nikolayevin dindirmələri davam edirdi. Onu gah qorxudaraq, gah könlünü almaqla dilə tuturdular. Dindirmələr uzun sürürdü. Ondan istədiklərini eşitməyəndə müstəntiqlər hər vasitəyə əl atırdılar. İşgəncələrə dözməyən Nikolayevin intihar cəhdi baş tutmadı. NKVD-nin ssenarisində belə sonluq nəzərdə tutulmurdu. O, hələ lazım idi. İstintaqa verdiyi ifadələri məhkəmədə təsdiq etməli olacaqdı.
21 DEKABR
İosif Vissarionoviç Cuqaşvili 55 yaşını Moskva yaxınlığındakı bağ evində yaxın dostları və qohumlarının iştirakı ilə qeyd etdi. Süfrədə xüsusi təmtəraq nəzərə çarpmasa da, şahidlərin dediyinə görə, məclisdə səmimi ortam şən əhval - ruhiyyə hökm sürürdü. Budyonnı bayan çalır, Jdanov royalın şirmayi dillərini səsləndirirdi. Qonaqlar xalq mahnıları oxuyur, rəqs edir, rəhbərin şərəfinə badə qaldırıb sağlıq deyirdilər. O gecə qırxı hələ çıxmayan Kirovu yada salan olmadı.
22 DEKABR
Stalin hüquq-mühafizə orqanlarını süründürməçilikdə təqsirləndirirdi. Göstəriş verdi ki, Kirovun qətli ilə bağlı məsələyə ayın sonuna kimi yubanmadan baxılsın. Cinayətdə əli olanların hamısı ifşa edilərək cəzalandırılsın. Məhkəmə ərəfəsində Kollegiyanın sədri Ulrix Stalınlə görüşüb onun məsələyə münasibəti ilə maraqlananda birmənalı şəkildə cavab aldı. Baş katibin fikri qəti idi. O, cinayətkar dəstənin bütün üzvlərinin güllələnməsini istəyirdi. İndi qoy ədalət məhkəməsinin üzvləri nə qədər istəyirlər fikirləşib baş sındırsınlar. Necə olsa, 28-nə kimi vaxtları vardı. Onun mövqeyi Baş prokurorun müavini Andrey Vışinskiyə də məlum idi. Əslən odessalı Vışinski də vaxtilə bakılı olmuşdu. 1908-ci ildə inqilabi fəaliyyətinə görə məsuliyyətə cəlb olunanda uzun müddət Bayıl həbsxanasında Stalinlə bir kamerada qalmışdı. Ağır illərdə yaranan dostluq münasibəti ömür boyu davam edirdi. Belə olmasa, siyasi əqidəsini menşeviklərlə paylaşan, hətta 1917-ci ilin iyununda Petroqradda Leninin və Zinovyevin həbsinə göstəriş imzalayan hüquqşünas Vışinski Sovet dövründə nəinki yüksək vəzifə tuta, heç sağ-salamat qala da bilməzdi. Xatırladaq ki, ona partiya sıralarına qəbul olmaq üçün zəmanəti şəxsən Koba verimişdi. Stalinin zəmanət verdiyi ikinci adam, deyəsən heç olmayıb. Kirovun qətli ilə bağlı keçiriləcək məhkəmə prosesində dövlət ittihamçısı Andrey Vışinskinin özü iştirak edəcəkdi.
28 – 29 DEKABR
14.20-də başlayan məhkəmə iclası 16 saatdan çox davam etdi. Dekabrın 29-u qarlı qış günündə səhərə yaxın oxunan hökm 14 nəfərin üzünə sabahı əbədi qapatmış oldu. SSRİ Ali Məhkəməsi Hərbi Kollegiyasının səyyar sessiyasının qərarı ilə Kirovun qətlində günahkar bilinən müttəhimlərə güllələnmə cəzası verildi. Nikolayev və digər 13 nəfərin Leninqradda fəaliyyət göstərən gizli zinovyevçi antisovet qrupun fəal üzvləri olduğu xüsusi qeyd edildi. Nikolayevə guya söz vermişdilər ki, 3-4 il həbs düşərgəsində baş girləyib azadlığa buraxılacaq. Haqqında ölüm hökmü çıxarıldığını eşidəndə “məni aldatdılar ”, deyə bağırdı. “Bu ədalətsizlikdir ”, - deyib ədalət məhkəməsini ədalətli olmağa çağırdı. Digərləri də ittihamı etirazla qarşılayıblar. Amma, bütün bunlara əhəmiyyət verən olmadı. Həmin gün səhər saat 7.40 - da hökm yerinə yetirildi.
30 DEKABR
İlin son günlərində statistik rəqəmlərdən məlum oldu ki, məmləkətdə 1 milyon 200 min adam mühakimə edilib. Bilavasitə NKVD xətti ilə baxılan cinayət işlərinin sayı 79 minə çatırdı. O illərdə böyük bir zindana, əmək-islah düşərgəsinə çevrilən Sovetlər birliyində dağılan ailələrin, bədbəxt talelərin nə dəqiq hesabını aparan vardı, nə də bu faciələrə görə kimdənsə hesab soruldu. Onlar da əmin idilər ki, “qaliblər mühakimə olunmur”. Bu yalnış müddəa çoxunu yoldan çıxarıb. Əslində dövran dəyişəndə, ilk mühakimə olunan keçmiş qaliblər olur.
31 DEKABR
Yeni ili məhbəsdə qarşılayan 32 yaşlı Milda Draulenin fikri-zikri sahibsiz qalan iki övladının yanında idi. Amma, onları bir daha görmək anaya nəsib olmayacaqdı. Kirovsuz ötən ömrünün ikicə ayı tamam olanda Smolnıdakı qətlin törədilməsində onu da müqəssir bilərək güllələyəcəkdilər. Özü də təkcə onu yox, yaşlı anasını, bu məsələlərə heç bir aidiyyatı olmayan bacısını, bacısının ərini də eyni aqibət gözləyirdi. Görən daha kimlər tutulacaq, daha kimlərin vətən xaini olduğu aşkarlanacaqdı? Hələ ki, bu işlərlə bilavasitə Xalq Komissarı Yaqoda məşğul olurdu. Onun səlahiyyətləri böyüdükcə, ömür payı özündən xəbərsiz kiçilirdi. Sinəsini bəzəyən Qırmızı Bayraq ordeni, ”SSRİ-nin Fəxri çekisti” nişanı və ən son layiq görüldüyü Lenin ordeni yaxın gələcəkdə onun özünə ünvanlanacaq ciddi ittihamların qarşısına sipər ola bilməyəcəkdi. Şərəfinə ucaldılan böyük heykəli də bir gecədə partladacaqdılar. Kirovun qətlindən dörd il sonra Smolnıda baş verənlərdə şəxsən Yaqodanı da günahlandıracaqdılar. Nahaq yerə demirlər ki, “dünən fərman verən bu gün can verir”. İnsan və insanlıq ucuzlaşıb dəyərdən düşəndə, mənəvi eybəcərlik dəbdə olanda, insan haqları, azad söz, azad fikir tapdaq altında qalanda, mizan - tərəzinin tarixən əldən-ələ keçməsi barədə həqiqət unudulanda bu cür hadisələrin baş verməsi təbiidir. Yeni il axşamı hər kəs evinə, ailəsinə, yaxınlarına, əzizlərinə ruzi-bərəkət, əmin-amanlıq diləyirdi. 1935-ci ildə daha nə baş verməliydi ki, sosializm quran sovet xalqı bir az da “xoşbəxt ” olsun, bir az da “yaxşı” yaşasın?
HƏQİQƏTƏN BAŞ VERƏNLƏR HƏQİQƏT OLMAYANDA
Həyat yoldaşı Leonid Nikolayevi 13 nəfər “cinayət ortağı ” ilə birlikdə güllələnməsindən məhbəsdə saxlanılan xanım xəbərsiz idi. Onun vida zəngi 1935-ci il martın 9-da çalınacaqdı. Hazırlanan terror aktı barədə bilib, vaxtında xəbər vermədiklərinə görə Mildaya, bacısı Olqa və onun həyat yoldaşı Roman Kulişerə ayrıca cinayət işi açılmışdı. Bu işıqlı dünyada hər üçünün vədəsi yaz gələndə bitəcəkdi. Nikolayev +13 nəfər. Bu nəhs siyahıda kimlər vardı? Kirovun qətlində onların iştirakı nədən ibarət idi? Qalın-qalın qovluqlarda “Leninqrad mərkəzi”nin işi, Mərkəzdən xüsusi tapşırıq almış terrorçu qrupun əməliyyat planı barədə hər hansı sübut, tutarlı dəlil indiyədək üzə çıxmadı. Cinayət hadisəsinin üstündən altmış il keçəndən sonra bəraət alan 13 nəfər keçmiş “terrorçu”nun adları mənə bəlli olanda mütəşəkkil qrup barədə fikrin siyasi sifariş yerinə yetirmək məqsədilə meydana gəldiyinə gümanım artdı. Ölümə məhkum edilən “cinayətkar”ların bir neçəsinin adını xatırlatmaq istəyirəm: 1. Leninqrad Sənaye institutunun tələbəsi, Vıborsk rayon komsomol komitəsinin katibi İ. Kotolınov. 2.Leninqrad quberniyasının keçmiş komsomol katibi V.Rumyantsev. 3. Mühəndis N.Şatskoy. 4. Leninqrad Sənaye institutunun tələbəsi V.Zvezdov. 5. Leninqrad Sənaye institutunun tələbəsi N.Antonov. Leninqraddakı məhkəmə prosesinə bir həftə qalmış, yoldaş Stalinə təqdim olunan siyahıda 23 adamın adı yazılmışdı. Koba əlinə qələm alıb öz xəttiylə sənəddə düzəlişlər aparıb. “S.M. Kirovun qətli “Leninqrad mərkəzi”nin gizli terrorçu dəstəsinin tapşırığı ilə Nikolayev tərəfindən həyata keçirilib“ cümləsini şəxsən mətnə əlavə edib. Daha sonra siyahıya bir də əl gəzdirərək, cəmi 14 nəfərin adını saxlayıb. Bir neçə müxalifətçinin, o cümlədən Kamenev və Zinovyevin adlarının üstündən xətt çəkib. Onların vədəsi bir qədər sonra gələcəkdi. Bir ay sonra gizli fəaliyyət göstərən “Moskva mərkəzi”nin üzvləri məhkəməyə çıxarılacaqdı. Beləliklə, Kamenev və Zinovyev o siyahının bəzəyi olacaqdı. Onsuz da, Trotskinin təbirincə desək, “siyasi əkizlər” zindanda saxlanıldıqlarından tam zərərsizləşdirilmişdi. Smolnıda açılan atəş səsinə 3-cü mərtəbənin dəhlizinə çıxıb nəsə görən, eşidən, duyan, qanlı olaydan az-çox xəbərdar olan 79 nəfər canlı şahidi bir-bir dindirib həqiqəti üzə çıxarmaqdansa, səbəb və əsas olmadan işdən qovdular. Kirov muzeyinin direktoru Tatyana Suxarnikovanın araşdırmalarına görə, onları müxtəlif bəhanələrlə azadlıqdan da məhrum etdilər. Görünür, ictimaiyyətdən gizli saxlanılan bəzi məlumatların azad qafalarda qalması məsləhət deyilmiş... Təqvim ili təzələnsə də Smolnıdakı qətl hadisəsi uzun müddət gündəmdə qaldı. Həbslər, soruşdurmalar eyni minvalla davam xeyli etdi.
9 YANVAR 1935-Cİ İL
Leninqradda fəaliyyət göstərən əksinqilabçı zivovyevçi qruplaşma üzvlərindən Səfərov və Zalutskinin rəhbərlik etdiyi dəstəsinin cinayət işi ilə əlaqədar daha 77 nəfər azadlıqdan məhrum edildi.
15 YANVAR
Başsız qalmış “Moskva mərkəzi”nin üzvlərindən 19 nəfərin cinayət məsuliyyətinə cəlb olunması barədə məlumat yayıldı.
16 YANVAR
SSRİ Ali Məhkəməsi Hərbi kollegiyasının qərarı ilə bir qrup vətəndaş beş ildən on ilə kimi azadlıqdan məhrum oldu. İttiham edilənlərin arasında kimlər vardı? 1.Zinovğev Qriqori Yevseyeviç 2.Kamenev Lev Borisoviç 3. SSRİ Qida Sənayesi Xalq Komissarlığının süd məhsulları idarəsinin rəisi Q.Yevdokimov. 4. “Başelektrikşəbəkə” trestinin rəisi İ.Bakayev 5. Rusiya Yerli Sənaye Məhsulları xalq komissarlığının idarə rəisi Y. Şarov 6. Rusiya Dövlət Plan Komitəsinin bölmə müdiri İ.Qorşenin Tam siyahı 19 nəfərdən ibarətdir. Məhkəmə onları görün nədə günahkar bildi: - Zinovyevin başçılıq etdiyi müxalifətçi dəstəsinin fəal üzvü olmaqda, - Sovetlərin əleyhinə gizli fəaliyyətlə məşğul olmaqda, - Əks-inqilabi “Moskva mərkəzi”nin tərkibində çalışmaqda, - Kirovun qətlinin təşkilatçısı olan “Leninqrad mərkəzi” ilə sıx əlaqə saxlamaqda və cinayət tərkibli iş birliyində. Nəticədə rəsmən elan edildi ki, mühakimə olunanlar Kirovun qətlində siyasi və mənəvi məsuliyyət daşımaqda suçlu bilinirlər.
17 YANVAR
“Moskva mərkəzi”nin məhkəmə prosesi başa çatan günün səhəri Stalin Mərkəzi Komitə adından yazılan məktubun layihəsini müzakirə üçün Siyasi Büro üzvlərinə yolladı. Məktub belə adlanırdı: “S.M.Kirovun qəddarlıqla öldürülməsi ilə bağlı hadisələrdən ibrət dərsi”.
18 YANVAR
Heç bir düzəliş edilmədən Siyasi Büroda təsdiqlənən məktub qapalı iclaslarda oxunmaq üçün partiya təşkilatlarına göndərildi. Mətndə deyilirdi ki, özlərini “Leninqrad mərkəzi” adlandıran zinovyevçilər qruplaşma tərəfindən xüsusi qəddarlıqla həyata keçirilən qətl hadisəsinin ideya-siyasi rəhbərliyini “Moskva mərkəzi” öz üzərinə götürmüşdür. Onlar konkret S.M.Kirovun qətlə yetiriləcəyindən bəlkə xəbərsiz olsalar da, orada hökm sürən terrorçuluq əhval-ruhiyyəsi barədə, görünür xəbərdar idilər və bu emosiyaları daha da qızışdırırdılar. Zinovyevçi müxalifətçilər siyasi riyakarlıqda günahlandırıldılar. Məktubda deyilirdi ki, onlar ağqvardiyaçı ziyanəvərlərlə, casuslarla, satqınlarla bir sıradadırlar. Təkrar-təkrar vurğulanırdı ki, zinovyevçilər ağqvardiyaçılar qədər təhlükəlidir. Onlara qarşı barışmaz mövqe tutmaq tövsiyə olunurdu.
26 YANVAR
Zinovyevçilər bir-bir aşkarlanır, ifşa edilirdi. İctimai qınaq, tərbiyəvi iş, partiya cəzası artıq Cinayət Məcəlləsinin müxtəlif maddələri ilə əvəz olunmuşdu. Leninqraddan Sibirin şimalına və Yakutiyaya 3-4 illiyə 663 nəfər “zinovyevçi” sürgün edildi. Statistik məlumatlar göstərir ki, 1935-ci ilin yanvar ayının sonuna kimi, NKVD tərəfindən bu məsələ ilə bağlı yalnız Leninqrad vilayətində minə yaxın adam həbs edildi. Tədqiqatçılar Stalinin şəxsi arxivində Leninqrad və Moskva şəhərlərində fəaliyyət göstərən zinovyevçi “Mərkəz”lə əlaqəsi olan adamların siyahısına rast gəliblər. Onlar yazırlar ki, bu siyahını öz xəttiylə Koba tərtib edibmiş. O vaxtlar ictimaiyyətə həqiqət kimi qəbul etdirilən bir çox şey, əslində həqiqətən baş verənlər deyildi. Sovet hökmdarının istədiyi, məsləhət gördüyü hər nə varsa, həqiqət elə o idi. O, nə yazmışdısa, nə demişdisə, nə etmişdisə düz idi. Çünki, ixtiyar sahibi idi. Çəkməçi Vissarion oğlunun dünyaya meydan oxuyacağı günlər bundan sonra da hələ uzun müddət davam edəcəkdi...
“QATİL OVU” BİTMİRDİ
“Leninqrad mərkəzi” və “Moskva mərkəzi” işi üzrə cinayət məsuliyyətinə cəlb edilənlərə doxsanıncı illərdə ölümlərindən sonra bəraət verildi. Deyirlər ki, ikinci həyat yoxdur. Yoxdursa, onda gecikmiş bəraət kimə lazım? Xəritələrdən silinən bir dövlətin sinələrdən silinməyən dərdlərini milyonlarla adam özünə yük edib naməlum ölülər səltənətinə apardı. Stalinin siyasi rəqibləri Kirovun qətlində günahkar bilinərək siyasi arenanı növbə ilə tərk edirdi. Müttəhimlərin dilindən inanılmaz etiraflar səslənirdi. Kütləvi həbslər baş alıb gedən vaxtda dünən yüzlərlə adamı azadlıqdan məhrum edənlərin özlərinə bir müddət sonra məhbus paltarı geydirərək cəzaçəkmə yerlərinə göndərirdilər. Leninqradın daxili işlər komissarı Medved, onun müavini Zaparojets, hətta Sovet İttifaqı Daxili İşlər Xalq Komissarlığının rəhbəri Yaqoda da Smolnıdakı cinayətdə təqsirkar bilinərək həbs edilmişdi. 1938-ci ildə Yaqoda məhkəmə qarşısında ən ağır cəzaya məhkum olundu. Onun şəxsi katibi P.Bulanovun məhkəmədə səsləndirdiyi fikirlərə diqqət yetirin: “Yaqoda mənə dedi ki, NKVD-nin Leninqrad idarəsinin əməkdaşı Borisov Kirovun qətlinin iştirakçısı olub. Leninqrada gələn hökumət rəhbərləri hadisənin şahidi kimi, onunla görüşüb bəzi məsələləri aydınlaşdırmaq istəyi məlum olanda, Zaporozets bundan əndişələndi. Yaqodanın göstərişilə Zaporozets elə etdi ki, Borisovu təcridxanadan Smolnıya aparan vaxt baş verən yol qəza hadisəsində Mixail öldü. Bunu bədbəxt hadisə kimi rəsmiləşdirdilər. Heç cinayət işi də açılmadı.” Tarixçi alim Y.Jukovun araşdırmalarına görə Nikolayevin cinayət işi ilə bağlı 17 nəfər güllələnmə cəzası aldı. 106 nəfər iki ildən on ilə kimi müxtəlif müddətə azadlıqdan məhrum oldu. Məhkəmə qərarı olmadan 663 nəfər sürgünə göndərildi. 325 nəfər məcburi surətdə Leninqraddan başqa yaçayış yerlərinə köçürüldü. Kimin ağlına gələrdi ki, Kamenev, Zinovyev, Medved, Zaparojest, Yaqoda, Yejov, Yenukidze Kirovun qətlində günahkar bilinəcəkdilər? Kirovun 1938-ci ildə dərc olunan rəsmi tərcümeyi-halında cinayətlə bağlı deyilənlər diqqətimi çəkdi: “1934-cü il dekabrın 1-də Leninqrad bolşevikləri Uritski adına saraya toplaşaraq, Kirov yoldaşın Mərkəzi Komitənin son Plenumunun yekunları barədə çıxışını dinləməyə hazırlaşanda o, Smolnıda öz kabinetinin qapısında arxadan oğrun-oğrun yaxınlaşan mənfur muzdlu faşıst qatilin, trotskiçi banditin gülləsindən həlak oldu .” “Faşist qatil”, “trotskiçi bandıt” ifadələrinə diqqət yetirin. 1938-ci ildə Zinovyev daha yada düşmür, “Zinovyev-Kamenev qruplaşması” ifadəsi işlədilmir. Hədəfdə indi Trotski və Avropada baş qaldıran, bəzi ölkələrdə artıq hakimiyyətə gələn faşistlərdir. Qırxıncı, əllinci, altmışıncı, hətta doxsanıncı illərdə də əli Kirovun qanına bulaşanların axtarışı davam edirdi. NKVD general-leytenantı Pavel Sudoplatov qırxıncı illərdə Litvanın dövlət təhlükəsizlik nazirindən eşitdiyi bir hekayəti xatirələrində qələmə alıb. Müharibədən sonrakı dövrdə nazir tapşırıq almış ki, Litvanın əyalət şəhərlərindən birində gizlənən Kirovun qatilinin həbs edilməsi üçün tədbirlər görsün. Sual olunur: bir halda ki, Nikolayev əlbir olduğu 13 nəfər dəstə üzvü ilə 1934-cü il dekabrın 28-də məhkəmə qərarı ilə Kirovun qatili kimi güllələnmişdisə, qırxıncı illərdə Litva meşələrində axtarılan kim olacaqdı? Bəlkə həmin ölülər təkrar xortlamışdı? Mən hələ bu hadisəylə bağlı digər zərərçəkənlər barədə təkrar söz açmaq istəmirəm. Sudoplatov litvalı həmkarının sözlərinə əsasən yazır ki, əməliyyat axtarışları tezliklə nəticə verdi. Tutulan da oldu. Amma, həmin adam qatil yox, Moskvaya yalan məlumat göndərən bir alkoqol düşkünü çıxdı. Anonim olmasına baxmayaraq, Mərkəzi Komitədə həmin məktub xüsusi nəzarətə götürülmüşdü. Axı söhbət Kirovun “qatilindən” gedirdi...
BÖYÜKLƏRİN GÜNAHI DA BÖYÜK
S.M.Kirov sovet rəhbərliyində yeganə adamdır ki, ölümü ilə bağlı söz-söhbət Tanrının ona bəxş etdiyi ömür payı 1934-cü ildə yarımçıq tamamlanandan ta indiyədək davam edir. Bu günə kimi qətlin necə və nə səbəbdən baş verməsi tam dəqiq məlum deyil. Bu məsələ üzərində müxtəlif vaxtlarda nəinki hüquq-mühafizə orqanları, hətta ölkə başçılarından Stalin, Xruşşov, Qorbaçov da şəxsən baş sındırmışlar. Ayrı-ayrı vaxtlarda bir neçə səlahiyyətli komissiya yaradılıb, araşdırmalar aparılıb, ümumilikdə altı fərqli səbəb irəli sürülüb. Nəhayət, 1990-cı ildə Rusiya Federasiyasının Məhkəməsi cinayətin Nikolayev tərəfindən qısqanclıq zəminində törədildiyini təsdiq edərək, ayrıca qərar çıxarıb ki, bu məsələ bir daha məhkəmə araşdırması predmeti olmasın. Beləliklə, 75 bundan öncə çıxarılmış səs-küylü cinayət işinə 1990-cı ildə biryolluq xitam verən məhkəmə Marksın atası Leonid Nikolayevi Kirovun qatili kimi tanındı. Bəs, ata-anadan yetim qalan Marksla kiçik qardaşı Leonidin taleyi necə oldu? “Millətlər atası” Stalinin dillər əzbəri olan məşhur ifadəsi o illərdə tez-tez səslənərdi: “oğul atasına görə cavabdehlik daşımır”. Nə böyük riyakarlıq, İlahi. “Xalq düşməni” adıyla həbs olunan insanların ailə üzvlərinin, qohumlarının acı taleyi hamıya məlumdur. Övladlar “düşmən” valideynlərdən imtina etməyə təhrik olunurdu. Bu hərəkət yeni insanın inkişaf etmiş yüksək siyasi şüurunun göstəricisi kimi qiymətləndirilirdi. Ağlı kəsməyən körpələri başqa adla sənədləşdirib uşaq evlərinə göndərirdilər ki, keçmişlə əlaqə biryolluq kəsilsin. Leonid Nikolayev və həyat yoldaşı Milda Draule Kirovun qətlində günahkar bilinərək güllələnəndə böyük oğlu Marksın cəmi 5 yaşı vardı. Güman edilir ki, onu və kiçik qardaşını başqa adla əyalət şəhərlərindən birinin körpələr evinə yerləşdirmişdilər. Smolnıda baş verən qətl barədə yazılar mətbuat səhifələrində dərc olunmaqda hələ də davam edir. Hər dəfə yeni məqamlar üzə çıxmasa da, məlum faktlar yeni dövrün gözüylə incələnir, onlara münasibət bildirilir, tarixi həqiqəti olduğu kimi üzə çıxarmağa növbəti cəhd göstərilir. 2005-ci ildə bir rus vətəndaşı Kirovun qətliylə bağlı televizorda filmə baxandan sonra rəsmi orqanlara müraciət edərək repressiya illərində pozulan hüquqlarının bərpasına çalışıb. 70 yaşlı ixtiyar iddia edib ki, o, Leonid və Mildanın oğlu Marksdır. İndi heç Karl Marksa da sahib çıxmayan Rusiyada o qocanın hansı Marks olması xüsusi diqqət çəkməsə də, Baş prokurorluq araşdırma apardı və müraciət edənin həqiqətən repressiya qurbanı olduğunu təsdiqlədi. Yetimçiliklə keçən həyatının vida anı yaxınlaşanda qatil Leonid Nikolayevin oğlu kimi özünü cəmiyyətə təqdim edən qoca Marks bəlkə də bununla öz tərcümeyi-halına üsyan edib qara bəxtini gec də olsa oyatmaq və yalnız bundan sonra gözlərini əbədi qapatmaq istəyirdi. Bir sual ortaya çıxır: əsl xalq düşməni kimdir? Əli minlərlə günahsız adamın qanına bulaşan Kirov, yoxsa qatil olub-olmadığı hələ də şübhə doğuran zavallı Marksın aldadılan, alçaldılan və “Leinqrad mərkəzi” nin tapşırığını yerinə yetirən terrorçu kimi qəbir evinə göndərilən atası Leonid? Belə bir məsəl var: “Açaram sandığı, tökərəm pambığı”. Tarix göstərir ki, günü gələndə, saatı yetişəndə irili-xırdalı bütün qapalı sandıqlar açılır və içində nə varsa ortaya qoyulur. Kimin ağlına gələrdi ki, həmin gün Kirovun əynindən çıxarılıb ev muzeyin anbarında istifadəsiz qalan geyim əşyaları, 70 il sonra sahibi barədə gizli mətləblərin üzə çıxmasına səbəb olacaq. 2004-cü ilin dekabrında Rusiya Federasiyası Müdafiə nazirliyinin 111 saylı Məhkəmə -Tibbi ekspertizası Kirovun qəllinin hansı şəraitdə baş veridiyini yenidən araşdırdı. Tədqiqata ekspertiza sahəsində görkəmli mütəxəssis kimi tanınan professor S. Zosimov, Müdafiə Nazirliyinin Baş məhkəmə-tibbi eksperti V.Kolkutin, S.Kirovun ev-muzeyinin direktoru T.Suxarnikova da cəlb edilmişdi. Mütəxəssislərin səyi nəticəsində maraqlı faktlar üzə çıxdı. Aparılan trasoloji araşdırmalar göstərdi ki, kəllə sümüyündəki güllə dəliyi ilə onun papağındakı deşik düz gəlmir. Yəni, baş ayrı, papaq ayrı dəlinib. Bu isə qətllə bağlı yeni mülahizənin meydana gəlməsinə əsas verdi. Belə məlum oldu ki, Sergeyin kəllə-beyin nahiyəsinə üzüqoylu uzanan vəziyyətdə arxadan atəş açılıb. Papaq çox güman ki, sonradan dəlinib. Yetmiş il sonra bir maraqlı məqam da aşkarlandı. Kirovun muzeydə saxlanılan alt paltarındakı ləkələrin bioloji analizi nəticəsində müəyyən edildi ki, həmin gün Sergey Mironovıç məşuqəsi ilə cinsi əlaqədə olub. Bəlkə, kabinetdə baş verən bu iyrənc hadisənin şahidi olmaq və təbii ki, qisas almaq üçün Leonid “xeyirxah dostları” tərəfindən məqsədli şəkildə Smolnıya yönəldilmişdi? Ona görə silahı təhvil vermədən daxil olduğu hökumət binasında arxayın hərəkət edirdi. Gözüylə gördüklərindən dəhşətli sarsıntı keçirən aldadılmış və alçaldılmış kişinin qısqanclıq zəminində cinayət əməli kənardan hər kəsə təbii görünəcəkdi. Bəlkə də üzbəüz otaqdan güllə səsinə özünü yetirən qorumalar yarımcan Kirovu kabinetdən dəhlizə çıxarıblar ki, rüsvayçılıq olmasın? Təsadüfü deyil ki, hadisədən 15 dəqiqə sonra Smolnıdan birbaşa NKVD-yə gətirilən Mildanı məxfi-siyasi şöbəsinin 4-cü bölməsinin rəisi Koqan özü sorğu-sual edirmiş. Yoxsa, ilk dindirilən niyə Nikolayevin arvadı olmalıydı? Dəhliz əməliyyatı əvvəlcədən düşünülmüş plana oxşayır. Bütün bunları ekspromt şəkildə düzüb-qoşmaq ağlasığan iş deyil. Hər atılan addımı yüksək səviyyədə razılaşdırmadan bu cür incə və iri miqyaslı məxfi əməliyyatı nə Medved, nə onun müavini Zaparojets özbaşına həyata keçirə bilməzdi. Odur ki, cinayətin qabaqcadan hərtərəfli şəkildə hazırlanmış plan əsasında baş verməsi barədə müəyyən şübhələr, fərziyyələr yaranırdı. Amma, siyasi motivlər əsasında ağır ittihamlar, həbslər, edamlar baş alıb getdikcə, Kirovla Draulenin intim münasibətləri, cinayətin qısqanclıq zəminində törədilmə ehtimalı gündəmdən bir dəfəlik silinirdi. Sergeylə Milda arasında nə baş vermişdi? Deyilənlərin, danışılanların, gözlə görülənlərin müəyyən əsası vardı, yoxsa bütün bunlar Leninqrad bolşeviklərinin liderini ləkələmək istəyən siyasi rəqiblərinin növbəti uydurması idi? Kirovun ölümü bir qığılcım oldu və aləmi od bürüdü. Bu odun tüstüsünə boğulanlar da oldu, istisinə qızınan yox, köz kimi qızaran, alışıb yanan da vardı. Güllə səsi qulaqlardan getməmiş, yəni daha dəqiq desək, hadisədən 15 dəqiqə sonra keçmiş gimnazist Milda Draule artıq çekistlərə ifadə verirdi. Demək ki, üç əsas iştirakçı - Sergey, Leonid və Milda - ola bilsin məharətlə qurulan qanlı tamaşanın final səhnəsində iştirak etmək üçün eyni vaxtda Smolnıda qurulan tələdə idilər. Pərdə arxasında qalan müəllifin, quruluşçu rejissorun isimləri indiyədək naməlumdur. Bir şey birmənalı şəkildə aydındır ki, baş verən olaylardan sonra ölən Kirov, faydalanan Stalin oldu. Amma tamaşa bununla bitmədi. Stalin - Trotskini, Zinovyevi, Kamenevi və onların əlaltılarını, Xruşşov - Stalini və onun repressiya maşını olan NKVD-ni cinayətin təşkilatçısı kimi cəmiyyətə tanıtmağa çalışırdı. Qorbaçovsa bu məsələdə daha çox Xruşşovla həmfikir olduğunu nümayiş edirdi. Kirovun qətli ilə bağlı bir çox sənəd indi də məxfi şəraitdə saxlanılır, onlarla tanış olmaq qəti qadağandır. Bu isə o deməkdir ki, məsələ ilə bağlı qarşıda növbəti sürprizlərlə rastlaşmaq mümkündür. Tarix boyu, şair Hüseyn Arif demişkən, “hərə bir tor atıb, bit tələ qurur”. Tələyə düşənlərin hamısı suçlu olmadığı kimi, çox suçlu da ömür boyu tələsiz ötüşür. Kənardan seyrçi mövqeyindən hadisələri izləyənlər haqsızlığın dünyada ən ağrılı-acılı dərd olduğunu bilməzlər. Sovetlərdə milyonlarla ailə bu əzabla, bu dərdlə zəhərlənən günlərini, aylarını, illərini yaşamalı oldu. Tarixin çəkə bilmədiyi ağır yükü ailələr öz talelərində, kişilər çiyinlərində, qadınlar ürəklərində daşıyıb son mənzilə özləriylə apardılar. Rəhbərlərə ucaldılan çoxsaylı heykəllərin kölgəsi başsız qalan ailələri payızın soyuq səmum yellərindən, qışın ayazlı şaxtasından, yaz yağmurlarından, yayın qızmar günəşindən qorumadı. Bəlkə elə ona görə bir adama kölgə qədər xeyri dəyməyən yalançı bütlərə ucaldılan abidələr Zamanın ədalət mizan-tərəzisi ətalət yuxusundan ayılıb, işə düşən kimi, kəllə-mayallaq aşırlar? Milyonlarla insanın təsəllisi bundadır ki, tez-gec Ədalət zəfər çalır! Dəniz sinəsi təmizlənsin deyə, özündə güc tapıb suyun üzündəki çirkabı sahilə atdığı kimi, Zaman da qaranlıq mətləblərə işıq salır ki, gizlilər aşkarlansın, həqiqət üzə çıxsın, insanların mənəviyyatı saflaşsın, haqqın varlığına inam artsın. Bütün sirlərin ömrü üstü açılan gün tükənir. Yalançı bütlərin dövranı daha qısa olur: bir vaxtlar Bakının ən uca nöqtəsindən hamıya meydan oxuyan Kirov kimi!
|
|