|
ARASINDA
Oğul bala, bu oyuna girişmə, Yanarsan Xeyirlə Şər arasında. Əzəl başdan bölünənlər bölünüb, Haqq qalıb qurdunan şir arasında.
Barış yoxdu, qurulubdu savaşlar, Ya əyilir, ya vurulur dik başlar, Böləmməyib dünya malın qardaşlar, Qəhr olub bər-bəzək, zər arasında.
Günümüzün ən şirini - ən acı, Əlacsızdır əlaclıya əl açır. Daha bizim dərdimizin əlacı, Asılıb göy ilə yer arasında.
GEDİR
Ana Vətən, sinəm çarpaz yaradır, Dərd püskürür, qəm axıdır, qan gedir. Nə müddətdir torpaqların paradır, Həsrətində zaman keçir, gün gedir.
Başa dəyir ya kəsəyi, ya daşı, Ayrı düşən el-obalar yadlaşır. Quş səkməyən sərhədləri yad aşır, Tora düşmür, hədəf olmur, gen gedir.
Dar günümdə görəmmədim dostları, Atdı çölə mərd qeyrəti, dost arı. Zalım fələk, fırladırsan dəstarı, Yarma çıxmır, un görünmür, dən gedir.
Dedim nola işıqlı bir gün gələ, Yorğun könlüm aman tapa, dincələ. Heç bilmədin işlər dönüb əngələ, Saç ağarır, diş tökülür, can gedir.
QALMAYIB
Zalım fələk, daha sənə üz tutub, Yalvarmaqdan özgə güman qalmayıb. Qarı düşmən evimizdə oturub, Yurd dağılıb, bir xaniman qalmayıb.
Bilən yoxdu dərdli başın nə çəkir? Tarlaları kim becərir, kim əkir? Qərbli, şərqli - hamısı da möhtəkir, Süfrəmizdə yağlı-yavan qalmayıb.
İnciməsin əcnəbilər sözümdən, Düşüb artıq o birliklər gözümdən. Ey ulu türk, sən küs özün özündən, Yoxsa daha Böyük Turan qalmayıb?!
Fələk, bizə bəxş et döyüş həvəsi, Cuşə gəlsin Cavidanın nəvəsi. Ötsə zaman, keçsə min il, min əsr, Deyilməsin Azərbaycan qalmayıb.
Kaş deyilsin Böyük Turan yaşayır, Milyon-milyon qoca, cavan yaşayır. Ana Vətən - Azərbaycan yaşayır, Bu torpaqda ahu-fəqan qalmayıb.
BƏSİMDİ
Köhnə tanışların üzü dönsə də, Mənə salam verən çiçək bəsimdi. Heç kimin qapısın döyə bilmirəm, Döyür pəncərəmi külək, bəsimdi.
Qoynuna girməyə dənizim hazır, Qumlu sahilində izimi yazır. Başında didərgin fikirlər gəzir, Onu yazan gərək, gərək bəsimdi.
Beləcə dərd çəkdi Məmməd Araz da, Bir az da oxşarlıq var sözümüzdə. Sağ olsun qohum da, oğul da, qız da, Onları şad görüm, görmək bəsimdi.
Gecə daşıyıram dağı arana, Sabah da aranı qovub virana, Yaralı köksündə ey Torpaq - Ana, Doğuldum, ölərəm, ölmək bəsimdi.
QIYMA
İlahi, bir az da möhlət ver mənə, Ala gözlərimin yaşına qıyma. Ucala bilmədim əngin göylərə, Barı torpağıma, daşıma qıyma.
Qəm ilə munisdir mənim həsrətim, Vətənli, Vətənsiz bir ömür çətin. İkiyə bölünmüş bu məmləkətin, Üçünə, dördünə, beşinə qıyma.
Nə vaxtdır qılıncı ovxardan düşüb, Yanır Azərbaycan, od hardan düşüb?! Bu vağan çiçəklər bahardan düşüb, Son bahar gəlməmiş qışıma qıyma.
Nə Araz boyunca gəzim dərdli mən, Nə görüm Şuşanı qəm sərhəddi mən. İtirdim ölçünü, işi, həddi mən, Dərd çəkmək işimdi, işimə qıyma.
İlahi, bir az da ümid ver mənə, Əllərim yetməyir ünüm yetənə. Başımı mən qurban dedim Vətənə, Bu baş Vətənindir, başıma qıyma.
GEDİRSƏN
İgidim, gəl gözlərindən öpüm mən, Üzü dönməz sərt yollara gedirsən. Anan, bacın yollarına gül səpir, Yol ayrılır, dörd yollara gedirsən.
Hər yoluna səpilənlər gül deyil, Güllü yerlər gülüxarlıq, bil, deyil. Yollar vardır burda döyüş, öl deyir, Səpilibdi dərd yollara, gedirsən.
Ölüm mərddir, şəhidlik bir zirvədir, Həyatımız qan-qadağa, hərbədir. Nicatımız döyüşlədir, hərblədir, Hərbi öyrən, hərb yollara gedirsən.
Silah aldın, meydanlara gir, döyüş, Meydanında ol bir aslan, şir - döyüş. Döyüş varsa, ta gözləmə, dur döyüş, Uğur olsun, mərd yollara gedirsən.
|
|