|
*** Ay göyün ortasında Ucalıqda dayanıb. Ağaclar, daşlar, sular Ay rənginə boyanıb.
Soyuq payız gecəsi, Ürəyim bir ovuc qan. Bir xəyal enib gəlir Mələklərin yanından.
Əriyib yox oluram, Bir deyiləm, çoxam, çox. Aman, Allahım, aman, Yoxam Mən, var imiş yox.
*** Gələcəklər gələcəklər. Keçmişlər isə keçmişlər. Gələcəksiz, keçmişsizdi Haqq şərabı içmişlər.
Bu dəryadan dirisi yox, Gir bu dəryada boğul. Ürəklə beyin arası Ən qısa, ən uzun yol.
Bu iki gözümlə gördüm Güllərin solduğunu. Bilirəm ki, kimsə bilmir Nəyin nə olduğunu.
*** Baxdıqca bu qəbirlərə Qorxuram ölməyəm, Tanrım. Dalıb o uca sirlərə Qorxuram ölməyəm, Tanrım.
Yolum bu qədər qısamı? Əy belimi, ver əsamı. Görsəm də ki, ölür hamı, Qorxuram ölməyəm, Tanrım.
Yerin məndən, Səndən bəri, Dinsizlikdən, dindən bəri. Mən Səni sevəndən bəri, Qorxuram ölməyəm, Tanrım.
*** Ətrinə uçduğun gülü Əllərin dərə bildimi? Ürəyin istəyənləri Gözlərin görə bildimi?
Arasında gözüm qalsa, Qapını bağlayarsanmı? O qapının arxasında Yalqızca ağlayarsanmı?
Gözlərinin dediyini Dilin söyləyə bildimi? Baxışların izləyəni Baxtın əyləyə bildimi?
*** Səni heç Kim görməyib, Bircə mən görmüşəm, mən. Sənin ətrin gəlirdi Bu axşam ürəyimdən.
Əllərin yaşayırmı?- O ağ çiçək əllərin. Mənə yalan söylədən Haqdan göyçək əllərin.
Bir bax, gör, seçilirmi Gözlərin gözlərimdən? Səni heç Kim sevməyib, Təkcə mən sevmişəm, mən.
*** Dünyada dünya olduğu Yadımdan çıxdı bir gün. Həmin günü səhərədək Dünyasız qaldım bütün.
İşıq nədi, Zülmət nədi, Əridi, axdı, getdi. Nə Mən qaldım, nə Sən qaldın, Hər şeyin sonu yetdi.
Hər şeyin sonu nə gözəl, Eləcə də əvvəli. Əvvəli gör, sonu axtar, Yaşa, yaşa, ay dəli...
*** Hər gün bir az ayılaq Bu dərin yuxumuzdan. Ayıl, istəklim, ayıl, Pərdədi zaman, məkan.
Bu ay-ulduzlu pərdə, Gecə-gündüzlü pərdə, Şəkilli, sözlü pərdə, Gözlərimizdə duman.
Qıyma bizi varlığa, Sənsiz ahu-zarlığa, Rəhmətinlə yarlığa1, Aman, ay Allah, aman.
*** Mənə yazığın gəlməsin Beləcə qal, necə varsan, Məni bağışlama, gözəl, Bağışlasan unudarsan.
Məni həsrətin yaşadır, Həsrətinə qurban olum. Nə gedənəm, nə gələnəm, Yolsuzluqdu mənim yolum.
Hər gecədə, hər küçədə Çaşıram, ancaq çaşıram. Sənə yaraşa bilmədim, Çaşqınlığa yaraşıram.
*** Hanı o baxışların, gözünü kim öldürüb? Tərpənir dodaqların, sözünü kim öldürüb?
Görənləri əyləyən, hamı “maşallah” deyən, göy üzünə bənzəyən üzünü kim öldürüb? Sənin dərdini göylər aya, ulduza söylər. Səni hamı yad eylər, özünü kim öldürüb?
*** Ürəyimlə ağlımın tən ortasında durdum. Otlardan, çiçəklərdən özümə yuva qurdum.
Dərin-dərin sirlərin, uca-uca yerlərin, ərənlərin, pirlərin tilsiminə baş vurdum.
Saraldı yaşıl düzlər, Qaraldı iti gözlər, Daraldı geniş sözlər, Lal-dinməzcə oturdum.
*** Qaranquşlar başlayanda axşam nəğmələrinə, gedirsənmi gözü yaşlı yenə kövşən yerinə.
Yenə dərin dərələrə qaranlıqlar dolurmu? Yenə qürubun dilindən anladığın olurmu?
Dirsəklərin dizlərini yenə tapa bilirmi? Əllərin yanaqlarından yenə öpə bilirmi?
*** Bu qədər yüksəklikdə, durmaq çətin olur, dost. Sözsüz ki, enəcəyik - köhnə qayda budur, dost.
Ömrün boyu soruşsan, nə olmuşdu ki, mənə. Tapılmaz bir cavabı, ha soruş dönə-dönə.
Səslən bütün dünyaya, “Ey hər şeyi bilənlər!” Nəsə olmuşdu mənə, nə olmuşdu, kim deyər?!
*** Bu işi görmək çətindi, görməmək daha çətin. Sən ən çətinə güc eylə, ucadırsa da himmətin!
Bütününlə göz ol, gəz, Eşq bulunar, bilinməz. Hansı dildədir dadı sirrin, hikmətin, heyrətin.
Yox olanları böylə bil, Onlar başdan var deyil. Bu sözü yoxluğum yazdı, Varlığım yazmazdı qəti!
*** Nə qədər adam doğuldu, Bir sən doğulmadın, sən. Hamı yaşayan dünyada olmadım, olmadım mən.
Dilin olsa, danışardın, üzün olsa, gülərdin. Ağlayardın gözün olsa, Özün olsa, ölərdin.
Həyat nədi, ölüm nədi? Görmədin, bilmədin sən. Dünyadan getmədin, nə də dünyaya gəlmədin sən.
*** Varmı xumarlandıqların gecələrli, gündüzlərli? Arasında nazlıqların tənhalarlı, yalqızlarlı.
İçərin göy, eşiyin yer. Er, bu yolun sonuna er! Bir nəfəs al, bir nəfəs ver, nanələrli, yarpızlarlı.
Çiyinsizlə daşınmağı, sifətsizlə oxşamağı, al ovcuna yaşamağı, günəşlərli, gündüzlərli.
|
|