|
Sükut
Sükutu kağız kimi bölmək hissi keçir ürəyimdən. Əvvəl dörd, sonra iki, sonra xırda -xırda hissəciklərə. Əli qanlı cəllad kimi ən xırda mərhəmət hissinə belə aldanmadan sükutu bölmək istərəm. Sükuta qənim kəsilmək hissi elə güclü ki, ən amansız insana çevrilləm sükutu devirmək üçün. İnsanların üzündən, gözündən, ürəyindən, yerişindən toplaya bilsəm sükutu. Sükut içində yox olduğumuzu anlada bilsəm insanlara. O zaman sükut sükut olmaz daha. Ölməz Koşşey kimi enər şahlıq taxtından. Baş alıb gedər bir ağac yarpağı olmağa. Sükut sükut olmaz daha.
***
Kimlərsə sənin taleyini kibrit çöpü kimi yandırb atdılar. Vətəni pula, mala görə sevənlərin həyatdan necə məmnun, razı olduqlarını görmüsən. Vətəndən özlərinə sahil kimi istifadə etdilər ki, öz böyük məqsədləri ora rahat yan ala bilsin. Sən demə vətən təkcə buz bulaqlar deyilmiş. Sənin kimi vətən mücahidləri tozmuş, çınqılmış. Bir dəfə külək əssə götürüb aparacaq qədər köməksizmiş. Vətənin puluna, malına daraşmaq cəhdi elə məktəb vaxtından onlarda cücərirdi. Müəllimənin söz açdığı, şagirdlərə sevdirmək istədiyi Vətən Fərrux, Ağaəli üçün yağ-pendir dürməyi qədər maraqlı deyilmiş. Sonradan Fərrux olacaqdı "Qızıldiş" Fərrux, Ağaəli olacaqdı "Dollar" Ağaəli. Qızıldiş Fərrux hansısa partiyanın sədridir indi. Onlar başdan-başa nidadılar. Qrammatikada belə bir termin var: baş və budaq cümlə. Elələri yerişləri, baxışları ilə baş cümlədilər. İlməsi itmiş gələcəyin yerindəsə "bəlkə"lərdir, "gözlə"lərdir, şübhələrdir.
***
Xeyirxahlığı sevirdi. Vətəni sevirdi. Umacaqsız, qarşılığında heç nə istəmədən. Taleyinə həbsxana da düşdü, həyatın ağ-qara dönəmlərini də yaşadı. Yaxşı bilirdi ki, seçdiyi həyatda onu nələr gözləyir. Günlərin bir günü Gülhanə parkında əbədi ceviz ağacına çevrildi. Bəzən fikirləşirəm ki, bizlərdə mübariz ruhlu insanlar, deyəsən bir daha olmayacaq. Nazim Hikmət əqidəsi, ruhu bir daha olmayacaq, deyəsən. Bu şüşə, beton binaların, dəmir barmaqlı eyvanların arasında gözəl duyğular, hisslər də kömürə dönür, hissiyyatsız daşa çevrilir. Yenə də həyatı əfsanəyə dönmüş insanlar barədə fikirləşirəm. Və o insanları qışda çiçəkləyən ağaclara, alaqlar içərisində bitmiş xoş rayihəli çiçəyə bənzədirəm. İstisiylə, oduyla insanları qızdıran Günəşə bənzədirəm.
Qara boşluqlar
İndi kimsəsizliyim, yalnızlığım daş divarlarla qol-boyun olub rəqs edir. Bu gün yalançı hisslərimin son qalıqlarını dəfn etdim. Mehriban, xeyirxah baxışlarına aldanmadan. Yerindəsə qara boşluqlardır qalan. Get-gedə böyüyür qara boşluqlar. Dalğa-dalğa ruhuma yayılır. O qara boşluqlarda nə həqiqət var, nə yalan. Nə şairlərin isti misraları, nə də aldanmaq qorxusu. Qaçmaq, qaçmaq lazımdır. İstəyirəm gecənin qaranlığında camaatın qapısını döyüm. Dayanmadan. Ruhumu qara boşluqlardan xilas etmək istəyirəm. Tək olmadığımı bilim. İnsanların harayıma səs verəcəklərinə inanım. Təəssüf. Onların sal qaya kimi tərpənməz baxışlarını isidə bilməyəcəm. Bir vaxt həqiqət cənnət meyvəsi kimi cəzbedici idi. Müqəddəslik tülünə bürünmüş halda yanaqları qızarırdı. Günlərin bir günü asıldığı budağından dərildi.
Iki şəhər
Qız atasının dizləri üstə çıxmışdı. Bapbalaca əllərini onun cod, tük basmış üzündə gəzdirirdi. Körpənin dəcəl gözlərinə bir cüt xeyirxah göz baxırdı. Daha bərk-bərk atasının qucağına sıxıldı. Neçə vaxtdır gözləri atasını axtarırdı. Atası çıxıb gedəndə qız hələ mışıl-mışıl yatırdı. Güllü-çiçəkli balıncına qara, yumşaq saçları səpələnmişdi. Oyatmaq istəməmişdi onu. Uzaqdan-uzağa seyr etmişdi körpə balasını. Hər dəfə çörəkpulu qazanmaq ümidi ilə şəhərə üz tuturdu. Ona-buna yük daşıyıb qazandığı pulları köhnə pencəyinin cibinə dürtəndə hər şeydən əvvəl gözləri önünə sakit baxışlı arvadı gəlirdi. Qızından ötrü həmişə uzaq şəhərdə qəribsəyirdi. Körpənin rənglərlə, işıqla sellənmiş dünyasına yeni-yeni oyuncaqlar, parlaq kağızlı konfetlər hədiyyə alırdı. Bir-iki rəngli kitab da almışdı. Bir az böyüyər, sonra oxuyar, - fikirləşmişdi. Şeytan qızı gözlərini ona inadla dikib öz nağıl payını gözləyirdi. Ata hər gəlişində mütləq nağıl danışmalıydı. Getdiyi şəhərin uşaqlarından, buludlardan, balaca pişiklərdən. Uşaq gözlərində təbəssüm parlayırdı. Bir şəhər beləcə onun xəyalında buluduyla, qarıyla, xoşbəxt uşaqlarıyla yaranırdı. Atanın şəhəri üz-gözünə, cod barmaqlarına, çirkli iş paltarlarına hopmuşdu. Bunu anlamaq üçünsə bir az böyüməliydi körpə balası. Hələ ki, çox uzaq şəhərlərə gedəcəkdi. Yenə eyni yollar, eyni ümid, eyni sevinc və kədər yaşayacaqdı. Və hər dəfə də qızının şəhəri bir o qədər böyüyəcək, yaşıllaşıb gözəlləşəcəkdi.
Yuxu
Uşaqlıq çağında xeyirxahlıq, şəfqət, mərhəmət hissi ilə bağlı nə varsa onu sarsıdırdı. Uşaqlığının qaynar, zəngin hisslərlə keçən vaxtlarına qayıdanda daha yaxşı başa düşürdü ki, uşaqlığının sirdaşına çevrilən o kitablardan, yarpaqlardan, hətta adi diyircəkli qələmindən aldığı duyğular təzələnməyəcək. Hər şey ona doğma, mehriban görünürdü və bu yaxınlıqdan, dünya ilə özü arasındakı tarazlıqdan xoşbəxtlik süzülürdü. Xoşbəxtlik işığında yuxularının da sahibi idi. Ürəyində tutduğu arzulara yuxularında qovuşurdu. Sonralar hisslər də vulkan kimi əvvəlki istiliyində qalmadı. Yavaş-yavaş öləzidi. Tanrı öz yanına apardı təmizliyini, paklığını. Əvəzində bu dünyada keçinmək üçün, adamların arasında batmamaq üçün başqa sima cücərməyə başladı. Özünü borclu adam kimi hiss edirdi. Bu yük altında əzilirdi. Və fikirləşirdi ki, ömrünün sonunacan bu yükün altından qurtara bilməyəcək. Borc dağ kimi ucalmışdı. Həyatının olan-qalan, yaxşı deyilə biləcək anlarına qapqara kölgəsini salmışdı. Bəzən vahimələnib öz-özünü məcbur edirdi yaxşı işlər görməyə, müsbət enerji ilə yüklənməyə. Hər səhər güzgüdə qorxaq, müti simasına baxdıqca öz-özünə nifrət eləsə də ömrü boyu bu simanı daşıyacaqdı. Bu sima da cürbəcür rənglərə boyana-boyana nimdaş paltara dönəcəkdi. Onu bu əzabdan yalnız bir qüvvə xilas edəcəkdi. Ölüm mələyi. Ölüm ağ qanadlı quş kimi onun başının üstünü alanda son dəfə xatırlayacağı uşaqlığının səsi olacaqdı.
|
|