Gör nə qədər xoşbəxtliyə növbə var Qatarlanıb sıralarda durmuşuq Bədbəxtliyin hər insanda gözü var Hədəfdəyik, haralarda durmuşuq?
Dərd yüklənmiş karvanlara qoşulub Qolu zorlu insanlara qoşulub Xoşbəxtliyi umanlara qoşulub Yazıq-yazıq aralarda durmuşuq
Ruzi verən ələyimiz qurudu Su istədik, dərya, dəniz qurudu Bar gətirən bağlar təmiz qurudu Ümid yeyən səhralarda durmuşuq
Ərşi-fərşi qarışdırıb görən var Tanrının da qılığına girən var Guya bizə xoşbəxtliyi verən var... Ayaq üstə buralarda durmuşuq.
DANIŞMA
İki namərd yol gedir Bir-birilə yanaşı O da naşı, bu da naşı Biri çevik, biri ləng Tapışıblar çox qəşəng Əkdikləri yalandır Tökdükləri yalandır Becərirlər, biçirlər O yana da keçirlər Nə günahdan qorxu yox Nə Allahdan qorxu yox Saf duyğusu, ruhu yox Hər ikisi qovurlar Qovduqları mərdə bax Çəkdiyimiz dərdə bax Anlamırıq fələyi Şeytan qovur mələyi Qovan şərdir, qaçan kim Bu yollarda yorulub Dayanacaq haçan kim? Ağıllanmaz şər, qardaş, Daha şərdən danışma Qaçıb gedək göylərə Sən kafirdən danışma Kəm-kəsirdən danışma, Daha yerdən danışma.
SƏN BIR CÜRƏ, MƏN BIR CÜRƏ
Biz kimik ki, qismət pozaq Ya da ondan düşək uzaq Gəl oturaq şeir yazaq Sən bir cürə, mən bir cürə
Yeri tanı, göyü tanı Sevək bizi Yaradanı Dərk eləyək bu dünyanı Sən bir cürə, mən bir cürə
Qəhqəhəyik, göz yaşıyıq Bəlkə həsrət yağışıyıq Bu dünyanın naxışıyıq Sən bir cürə, mən bir cürə
Beşikdən yol başlayırıq İnsan adı daşıyırıq Niyə belə yaşayırıq? Sən bir cürə, mən bir cürə
Haramına, halalına Heyran olma cəlalına Baxırıq dünya malına Sən bir cürə, mən bir cürə
Atəş, şeytana uyuruq Gec anlayıb, gec duyuruq Bir gün ölüb ad qoyuruq Sən bir cürə, mən bir cürə
