|
BİR ŞAİR YIĞNAĞI İSTƏYİRƏM MƏN
Yağışa həsrət bir quraq torpağam, Sinə cadar-cadar, qəlb şırım-şırım. Mənə bir ixtiyar verilsin, Allah, Bütün kainatı şeirə tapşırım. Qalmasın nə qəhər, nə qəm canımda Kaş, şair dostlarım ola yanımda,- Bir şair yığnağı istəyirəm mən.
Boşala ürəyim, boşala dərdim, Küsdürüb nadanlar özündən məni. Şeirlə ovunsun darıxan ruhum Duysunlar qəlbimi gözümdən mənim. Süzüm gözəlliklər asimanında Kaş, şair dostlarım ola yanımda,- Bir şair yığnağı istəyirəm mən.
Gözümün gördüyü gözümə sığmır - Yük yenə bu yazıq ürəyə düşür… Mən dərdi yeyirəm, dərdsə qəlbimi, Özümlə davada ömür ötüşür. Durub düşünəndə donur qanım da Kaş, şair dostlarım ola yanımda,- Bir şair yığnağı istəyirəm mən.
Necə gen düşmüşük bir-birimizdən, Yağır çiynimizi qayğı əyibdir. Vallah, arzularam hər saat, hər an Ürəyim yamanca qəribsəyibdir.
Bir şair yığnağı istəyirəm mən, Keçir ürəiymdən hər bir anımda. Kaş, şair dostlarım ola yanımda,- Bir şair yığnağı istəyirəm mən.
BİLMİRƏM SƏN MƏNİM NƏYİMSƏN İNDİ
Bilmirəm sən mənim nəiymsən indi, Bir karvan həsrətim, bir köç qəmimsən. Doğmadan doğmasan, ögeydən ögey, Sən candan əzizim, sən heç kimimsən.
Yol alıb talehim üzü tərsinə, Yeriyir üstümə dərd axın-axın. Bilmirəm sən mənim nəiymsən indi, Uzaqdan uzaqsan, yaxından yaxın.
Nə yadıq yad kimi, nə də doğmayıq, Bu eşqin astarı üzə düşübdür. Doğma ola-ola yad olmaq zülüm - Elə bu zülüm də bizə düşübdür.
Daha indən belə yadlaşaq gərək, Kəsib yolumuzu ayrılıq əymiş. Yollayıb sevgimə ayrılıqları, Bu taleh neçə yol qəlbimə dəymiş.
… Sən mənim ümiddən sonrakı ağrım, Bir dünya kədərim, qəmimsən indi. Nə yadsan yad kimi, nə də doğmasan, Bilmirəm sən mənim nəyimsən indi…
QAYIDIŞ
Şair Ramiz Qusarçaylıya
Sən bir solan çəmənə Bahar gətirdin, nədir?! Özüm duyurdum bu yol Sonda zülmətə gedir.
Bu zülmətdə, bu yolda Qəfil doğan aya bax?! Təsadüfmü?- Hər nəsə, Tanrı verən paya bax?!
Gözünü açdın bu gün Bir quruyan çeşmənin. Haqqını kim qaytarar Bu seçimin, seçmənin?
Alnımda "Ay işığı" - Tanrı yazısı kimi. Qəlbimə şeir ələnir Qəlbin ruzisi kimi.
Öləziyən ocağa Çırpıdır bu çağırış. Yaradanın əfvidir Bu özümə qayıdış…
|
|