|
Zaur QULİYEV
YALANIN RƏNGLƏRİ
Yalanın da rəngləri var, Ağ, qırmızı, qara, göy... Elə yalan var ki, Onu nə yer götürər, nə də göy... Ağ rəng - baharın ağ çiçəyi, Dağlara yağan təzə qar, Ağ mərmər məzar, Ağ paltar, Bəyaz gəlinlik donu. Bir də var ağ yalan - Rəngindən qorxur insan. Yalanların ən dəhşətlisidir, Böhtanın, şərin ağ zirvəsidir. Qara yalan - göz nurunun düşməni. Qaranlığa tapşırmaqdır Ən işıqlı guşəni. Kömür rəngidir. Zindanda keçən ömür rəngidir. Qırmızı yalan - Yaltağın üzünə çıxan rəngidir. Həyasızın gop rəngidir. İmperiyaların işğal etdiyi əraziyə Tuşlanmış topu-tüfəngidir. Yalan da var rəngsizdir, boyasızdır, Həyalı adamın sükuta imzasıdır. Acın: “toxam” - deməsidir. Mərdin kişi kimi ömür sürməsidir. İlk görüşə gələn qızın Anasına “dərsdən gəlirəm” - söyləməsidir. Hər cür yalan gəzdirənlərin arasında yaşayırıq. Ağ, qara, qırmızı yalanların Erasında yaşayırıq. Bəzən yalansız yaşamaq olmur Bu qəribə həyatı, Yalanlarsız başa vuraq ömrü, günü, saatı...
QAYIT
Ayrılığın yaşla doldu gözümə, Yad oldu dilimə yar kəlməsi də. Tumar da vermirəm daha özümə, Dağıldı saçımın səliqəsi də. Qərar tapammıram evdə, eşikdə, Dəyişik salmışam yaxşı-yamanı. Elə bil dost-tanış durub keşikdə, Hərdən soruşurlar, bəs yarın hanı? Doğrusu, nə deyim onlara indi, Axı məhəbbətin ürəyimdədir. Suallar bir deyil, beş deyil, mindir, Bəlkə günah səndə deyil, məndədir. Günahım olsaydı bağışlamazdın, Ülvi məhəbbətin məhv edib getdin. Gülərdim, bəlkə də, mən ağlamazdım, Bilsəydin ən böyük səhv edib, getdin. Dərindən düşün bir, nələr etmisən, Qoyma bağçamızda sola gülləri. Məni tənha qoyub hara getmisən, Qayıt yerinə qoy sənsizlikləri. Qayıtsan, yenidən təzələşərəm, Birlikdə vurarıq biz ömrü başa. Bəlkə də, bir qədər gözəlləşərəm, Bizi dost-tanışlar görsələr qoşa.
Mirsəyyaf ZAMANLI
İlan Gördüm gövhərini dünyanın
İşlərindən baş çıxara bilmədim, Tutammadım təhərini dünyanın. Öz içimdə boğulmuşam min dəfə, Çox udmuşam qəhərini dünyanın.
Aylar ötdü, il dayandı qəsdimə, Ha yandımsa, isinmədim istimə. Öz tüstümdən duman çökdü üstümə, Zülmət gördüm səhərini dünyanın.
Top atılsa, bəxt oyanmaz yatanda, Üzə çıxmaz dəryalarda batan da. Elə əlim yüyəninə çatanda, Qaçırmışam kəhərini dünyanın.
Acgözlüyü xəyalımdan silmişəm. Verdiyinə şükür deyib, yemişəm. Hər nədirsə öz payımdı, demişəm, Bal bilmişəm zəhərini dünyanın.
Quş dilini bilsəydim, quş dilində Oxuyardım,- vəfası yox gülün də. Nə qismətdi Mirsəyyafın əlində, İlan gördüm gövhərini dünyanın.
Qurd həqiqəti (Canavar balalı olanda insan ətinə meyil etmir)
Deyirlər, bətnində bala olanda, Canavar hərlənmir obaya, kəndə. Ac qalsa həftəynən, aynan da belə, Qaçib gözdən itir insan görəndə.
Xaraba bir yerdə qabaqlaşsa da, İştahdan kəsilir, dəymir insana. Yeməyə bir azca meyli olsa da, Hansı səbəbdənsə toxunmur ona?!
Niyə meyli yetmir insan ətinə, Yoxsa qorxur ona bəla gətirər? Qorxur xələl gələ qurd qeyrətinə, Qurdun hörmətini tamah itirər!
Bəlkə, düz eləyir elə canavar, Axı, hardan bilsin yediyi kimdi? İnsanin namərdi, həm də mərdi var, Bu yaziq canavar neyləsin indi?!
İkiüzlü, vicdansız, şərəfsiz yesə, Onlara oxşayar bətnində bala! İsmətsiz, əxlaqsız, qeyrətsiz yesə, Ləkəsiz qurd nəsli gələr zavala!
Bir vətən xaini yesə canavar, Balası xəyanət edəcək yurda! Yenə yaltaq yesə biri azalar, Oylağını satmaq yaraşmaz qurda!
Meyli çoxarvadlı kişiyə yetsə, Yalquzaq adını onda itirər! Ərinə xəyanət eləyən yesə, Qurdun qeyrətinə töhmət gətirər!
Amandı, canavar, yemə insanı, İnanılmaz olar qurd həqiqəti! Tamahın güc gəlsə, yeyəndə tanı, Yoxsa əldən gedər qurd ləyaqəti!
Səndən özgəsini bacı bilmişəm
Nurdan yaranmısan, nursan, işıqsan, Qüdrətdən çəkilən qələmə əhsən! Viranə könlümə bir yaraşıqsan, Dünyaya sən məndən ötrü gəlmisən! Qar gəldi, sinəni gördü bir ara, Utandı, çəkilib getdi dağlara. Gözəllik verirsən hər il bahara, Cənnət çiçəyisən, solmayan gülsən! Çönüb yana baxsan, ürək çəkərsən, Bircə yol bəzənsən, yüz qan əkərsən, Dadlısan, tamlısan, tamam şəkərsən, Balı da xəcalət eləyər busən! Mələklər yığılıb, səndən dərs alar, Leyli görsə, damcı-damcı tər salar. Üzə çıxmaz Əsli kimi tərsalar, Tək olan Allahın şah əsərisən. Sənsiz keçən günü acı bilmişəm, Səndən özgəsini bacı bilmişəm. Eşqini başımın tacı bilmişəm. Mirsəyyaf hazırdı, fərmanı ver sən! İsa SEVƏR
XOŞBƏXT OLMAQ ÇƏTİNDİ
P o e m a
Altı il gözləmişəm bu günü, altı gün keçib o gündən, Anlamırıq, anlamırıq bir-birimizi nədəndi? Bir otaqda, bir yataqda iki soyuq bədəndi. Surətimi, qamətimi bəyənmir? Qazancımı, nemətimi bəyənmir? yoxsa mənim xislətimdə güvə var. yeyir onu yavaş-yavaş, deyəmmir? güzəştə get, güzəştə get deyir anam, deyir bacım. Güzəştə gedib kişi olurlar... Bəlkə belə körpələr də güzəştlə doğulurlar? Mən güzəşti sevmirəm, ümidimə, istəyimə güzəştlə yetməyəcəyəm! Səhvim varsa keçilməsin, toy şərbətim içilməsin, günahım dura-dura yaxşı işim seçilməsin... Bircə qadın sevib atam, Bircə kişi görüb anam, gərək onlar mənə görə kiçilməsin! Biz namusu paltar kimi geyinmişik, biz nəslə Başqa paltar biçilmişik!
* * *
Düz altı il gözləmişəm bu günü, altıca ay keçib hələ o gündən. Qısqanmışam, qısqanmışam onu mən. bu sevgimi, məhəbbətimi görəsən? hörümçəktək özünə tor hörəsən, hərləyəsən öz içində özünü, hər baxışa, hər duruşa yanasan, öz yarını - meyli meyxoş sanasan?.. Bəhanəylə bozardasan üzünü, eyhamlarla deyəsən hər sözünü... çay - süzülə rəngindən qaçasan, plov bişə duzundan fal açasan. Bir də gördüm üz döndərir, - mələyim. yol bölünür, yol ayrılır, neyləyim? Soyuqluğun kərəmi yox, kanı yox, başlandımı, buza dönür ev-eşik. Bir körpə var, bu dünyaya gəlməyib, alınmayıb, satılmayıb bir beşik... Sevgi üçün ömür gərək gilə-gilə əriyə... yol axtardım, cığır gəzdim geriyə... Səhvlərimi bircə-bircə izlədim, yalanımı, gerçəyimi üzlədim. gördüm elə, çox çəkmişəm çəpinə, asan işi mən salmışam çətinə... gülüm məni gözləyibdi intizarla, qubarla. Mən də dostlar məclisində olmuşam, şərab mənim şərəfimə güc gəlib, qətrə-qətrə qədəhlərə dolmuşam. gülüm məni gözləyibdi, sanki mən də yoxmuşam!...
* * *
Gülüm, elə səndə də var yandıran söz, yaxan söz. Bəzən elə nahaq yerə küsmüsən, - xoş üz umdum, xoş söz umdum mən səndən, bir də baxdım yerli -yersiz küsübsən. Əvəz çıxdın gecikdiyim an üçün, zülüm verdin bu sevdiyin can üçün? sən sevirdin? Bəs əzablar nə üçün? Qılıncımız, qalxanımız qoşadır, Hər bir zərbə bədənə yox, başadır. cavan ürək, yazıq ürək, döz görək! Səni vaxtsız öldürməsin söz gərək.. yağ qurtarıb, şəkər də ki, azalıb. Bu qayğı da ürəyin bir yüküdü. Kişi gərək çiyinlərini sınasın, kişi yükü kəl yüküdü- xırda-xuruş dərdlər varsa, baş deyil, çiyin deyil, əl yüküdü... İş yerində müdir mırız sallayır, sınıxıram, bacılarım danlayır, deyir içki çıxacaqdı axrına, bəs həmdəmi necə tapım, hardan alım ağrıma? Həmdəm mənim ürəyimdə, beynimdə. Sevdiyimdən çoxmu düşdüm aralı? Etiraf et, etiraf et, ay ürəyim, bu halı. Gülüm, yaman közərtmisən yananı, bir yada sal, bir yada sal o anı... Qaşıqları qəfil çırpdın stola, cingiltisi hara getdi, gör hara? Qaşıqlarla salamladın ərini? Qaşıqlara dil anlatdın,
eləmi? Etiraf et günahını, Etiraf et bu sayaq, Etirafdır, etirafdır yaşamaq!
* * *
Həsrət üyüdürmüş adamı, üyüdürmüş, qardaş. Ona tab gətirməz nə qaya, nə daş. Üç gün ayrılığa tab etmir adam, üç il ayrılığa mən inanmıram!! Məni həsrətinlə sınağa çəkdin? Dözdüm şıltağına, dözdüm ədana, gülüm, Həsrətinlə məni sınama. Bölünmərəm, əyilmərəm, bükülmərəm. Sınaram, gülüm, sınaram çıxmasam sınağından. Gəl əl-ələ verək, işləyək, gülüm, işləyək. Ağac əkək, bar dərək. İşləyən əl yorulmaz, gülüm, yorulmaz. İşləyən adam Qeybətə uymaz, yalana uymaz, gülüm, uymaz. İşləməyən adam qadını duymaz, kişini duymaz, duymaz, gülüm, duymaz... İşləyək, gülüm, işləyək. Alın təri Məhəbbətin ünvanı, əl qabarı - xoşbəxtliyin ilk anı, Bütövlüyü orda axtar, orda tap! Məhəbbətə divar hörüb, qala yap! * * *
Tutuşdu qəm oduna şad gördüyün könlüm, Müqəyyəd oldu ol azad gördüyün könlüm.
M. Füzuli
Könül ki var, əzəl başdan şüşədi, şeir ki, var, bir yanğılı peşədi, bu peşəni seçən yardan incimə, bulanannan, durulannan incimə. Biri yersiz gülə bilir, ölürəm! Biri vaxtlı dinə bilmir, ölürəm! Torpaq üstə gəzən neçə harının əvəzindən, vallah, yerə girirəm! Buna görə hal qarışır halıma, buna görə qırış düşür alnıma. gülüm məndən görən nələr umacaq? öz odumuz üzümüzü yandıracaq, yaxacaq. od umsaq da, tüstüsündən bəlkə bizə çatacaq... Dəbdəbəli otaqların, yataqların, paltarların olmayacaq! Qohumların sədanı Parisdən, Londondan almayacaq! Körpəm “malış” dadmayacaq! körpəmin laylasını yad səslər çalmayacaq! Ana ol övladına, ana, babamın, nənəmin ruhu dirilsin, çörək bişirməyi, inək sağmağı hər qadın özünə Bir şərəf bilsin! İnəyi sağmayan bacarır nəyi? Saxta qaş qoymağı, göz düzəltməyi!? Belə saxtalar da unudur babanı, nənəni, duzu, çörəyi. Saçını daramağa ərinən gəlin bəs sevir nəyi? Kino köşkündə ölüvay-ölüvay əsnəməyimi? Bulvar çətrində duzsuz dodaqları çeynəməyimi? Düz altı il gözləmişəm Bu günü, altıca ay keçib hələ o gündən, Altı ayda
altı simə dönmüşəm. Bəmim olub, zilim olub, dözmüşəm...
* * *
İnamım var yaxşı günə, şən günə. Günlər bəlkə divar oldu ömrümə... ey taleyim, nə gözləyir, nə məni? Anlaşılmaz hisslər deşdi sinəmi! Mən bilirəm kişi nəsil Sevgidə də mətindi, xoşbəxt olmaq, asan deyil, çətindi!...
1983
|
|