|
Professor Cəfər Xəndan Hacıyev... Bu ad XX əsr Azərbaycan tənqidi və ədəbiyyatşünaslığı üçün, ədəbi fikrimiz üçün mötəbər adlardan biridir. Onun klassik və müasir ədəbiyyatımızın müxtəlif problemləri ilə bağlı onlarla məqaləsi, ədəbiyyat nəzəriyyəsi dərsliyi və ədəbiyyat tarixi kitablarında sanballı elmi oçerkləri bu gün də aktuallığını saxlayır. Lakin C.Xəndanı, ilk növbədə, görkəmli sabirşünas alim kimi tanıyırıq. Bəllidir ki, keçən əsrin 30-cu illərində Azərbaycan sovet ədəbiyyatşünaslığında klassik irsin tədqiqi sahəsində bir canlanma yaranmışdı. Xüsusilə, Sovet Yazıçılarının I Ümumittifaq Qurultayından sonra klassiklərə münasibətdə ədəbiyyatşünaslıq vulqar-sosioloji əyintilərdən xilas olmağa başlayır, ədəbi irsə tarixi yanaşmaq meyarı qərarlaşırdı. Tənqid və ədəbiyyatşünaslıq keçmişdə yaradılmış ədəbi-bədii abidələri müasirlik mövqeyindən daha dərindən dərk edir, bədii irsin tarixən mütərəqqi, sağlam xüsusiyyətlərini mənimsəyirdi. Bu dövrdə klassiklərin tədqiqində formalaşan istiqamətlərdən biri də xalqın bədii şüurunun inkişafında mühüm rol oynamış sənətkarlar haqqında əhatəli tədqiqatların meydana çıxmasından ibarət oldu. Bu zaman Azərbaycan ədəbiyyatşünaslığı M.Ə.Sabir yaradıcılığına daha böyük diqqət və qayğı ilə yanaşırdı. Buna başlıca səbəblərindən biri kimi, Sabir yaradıcılığının müasir ədəbiyyatın inkişafı üçün mühüm əhəmiyyət kəsb etməsini göstərmək olar. C.Xəndan və Mir Cəlal kimi alimlərin tədqiqatlarında Sabirin yaradıcılığı realist ədəbiyyatın problemləri baxımından araşdırılır, beynəlmiləlçilik, Yaxın Şərq ölkələrində milli-azadlıq hərəkatının inikası və başqa mövzular ətraflı təhlil edilirdi. Xüsusilə, bu dövrün tədqiqatlarında Sabirin folklorla bağlılığı, bədii dil xüsusiyyətləri ilk dəfə olaraq ətraflı şəkildə öyrənilmişdir. Bu mənada görkəmli ədəbiyyatşünas professor Cəfər Xəndanın «Sabir» monoqrafiyası (1940) xüsusi qeyd olunmağa layiq elmi əsərdir. Bu, M.Ə.Sabir haqqında nisbətən ilk iri monoqrafik tədqiqat idi. Böyük şairin həyatı, zəmanəsi, yaradıcılığının dövrləri, satirasının ideya-bədii xüsusiyyətləri, sənətkarlıq məsələləri və s. monoqrafiyanın əsas problemlərini və məzmununu təşkil edirdi. Monoqrafiyanın giriş hissəsində müəllif Sabir haqqında özünə qədərə yazılanları müxtəsər şəkildə nəzərdən keçirir, onların uğurlu və qüsurlu cəhətlərini göstərməyə çalışır. Müəllif haqlı yazırdı ki, hələ «Sabir yaradıcılığını dərindən elmi əsaslar üzrə təhlil edən böyük bir əsər yaradılmamışdır». Monoqrafiyada müəllif şairin yaşadığı mühitin dərin ictimai-siyasi ziddiyyətlərini şərh etməklə yanaşı, XX əsrin əvvəllərindəki ədəbi prosesin, mövcud təmayül və cərəyanların əsas cəhətlərinə nəzər salır, şairin həyat və fəaliyyəti üzərində ətraflı dayanır, Sabirin yetişməsində «Molla Nəsrəddin» ədəbi cərəyanının rolunu ayrıca göstərməyi lazım bilir. C.Xəndan şairin həyatını A.Səhhətin «Hophopnamə»yə əlavə etdiyi «Tərcümeyi-hal», qismən də S.M.Qənizadənin şair haqqındakı xatirəsi və S.Hüseynin şairin «Bütün əsərləri»nə (1934-cü il) müqəddiməsi əsasında qələmə almışdır. Bununla yanaşı, alim bir sıra yeni materialları - müasirlərinin şair haqqında mətbu xatirələrini, eləcə də şairə həsr olunmuş bədii əsərləri ilk dəfə olaraq tədqiqata cəlb etməklə nisbətən dolğun bir tərcümeyi-hal yaratmağa müvəffəq olmuşdur. Monoqrafiyanın, heç şübhəsiz, ən mühüm hissəsi Sabirin bilavasitə yaradıcılığına həsr olunmuş bölmədir. Burada Sabir yaradıcılığı həm janrlar - qəzəl və satirik şeirlər, həm də mövzular baxımından təhlil olunur. Şairin ideya-poetik inkişafını göstərmək məqsədilə müəllif əvvəlcə onun klassik üslubda qələmə aldığı qəzəlləri təhlil edir. C.Xəndan doğru olaraq bu qəzəllərdə, zəif də olsa, Sabir yaradıcılığının ümumi inkişafı üçün xarakterik cəhətlər görür və yazırdı: «Bir sıra qəzəllərdən fərqli olaraq, Sabirin qəzəllərində realizmin üstünlüyü, feodal-patriarxal mühitin mənfiliklərinə zəif də olsa satirik əlaqə, bəzi yerlərdə ictimai məzmunun özünü göstərməsi, şəxsilik və macəraları ümumiləşdirmək tendensiyası kimi cəhətlər bu qəzəllər müəllifinin gələcəkdə realist-satirik şeir yoluna gələcəyini göstərirdi». C.Xəndanın tədqiqatında olduqca qiymətli bir fikir diqqəti cəlb edir: Müəllif Sabirin əsərlərinin inqilabi satira səviyyəsinə yüksəlməsini göstərmək xatirinə heç də qəzəl yaradıcılığının əhəmiyyətini azaltmır, əksinə, bu qəzəllərdə «səmimi eşq aləmindən bəhs olunması», «eşq məfhumunun yüksək tutulması» kimi sağlam, qiymətli məziyyətlər müşahidə edir, bu keyfiyyətləri aşkara çıxarır. Bununla belə, monoqrafiyanın əsas problematikasını Sabir satirasının ideya mündəricəsi, ictimai-siyasi hadisələrlə əlaqəsi, bu satirada tarixiliyin qüvvətli olması kimi xüsusiyyətlər təşkil edir. Öz zəmanəsində baş verən mühüm hadisələrə çox həssaslıqla cavab verən Sabirin xalq mənafeyi mövqeyində dayanması, çarizmin milli və qırğın siyasətini ifşa etməsi Sabir poeziyasına xas ideyalılığın əsas cəhətləri sayılırdı. C.Xəndan şairin yaradıcılıq təkamülündən bəhs edərkən, onun xalqın kasıb, məzlum təbəqəsinin oyanışına inamını, sinfi mübarizədə yaranan yeni keyfiyyətləri mənimsədiyini, kəndlinin təbəqələşməsini dərk etdiyini ön plana çəkir. Tədqiqatçı Sabir yaradıcılığına xas realizmi səciyyələndirərkən obyektivliyi, siniflərin sosial təbiətinin doğru-dürüst müəyyən edilməsini onun başlıca məziyyətlərindən hesab edir. Tədqiqatda Sabirin böyüklüyü bir də onun gələcəyə inamı ilə, satiralarında müsbət idealın güclü olması ilə əlaqələndirilir. C.Xəndan Lunaçarskinin qüdrətli satirik Saltıkov-Şedrinin satirasında gördüyü «yaşayan bir idealı» eynilə Sabirdə də sezir və qiymtələndirirdi: «Belə bir ideal Sabirdə vardır. O, xalqını azad, qadınlarını bərabərhüquqlu, hamını savadlı görmək istəyirdi». Əlbəttə, şairin estetik idealının bu məzmunda müəyyən edilməsi bir qədər ümumi və sxematikdir; lakin satirada, tənqidi realist ədəbiyyatda müsbət idealdan bəhs açılmasının özü Sabir ədəbi irsinin tədqiqində müəyyən metodoloji irəliləyişin əlaməti idi. C.Xəndan Cənubi Azərbaycan mövzusunda qiymətli sənət nümunələri yaradan, İranda baş verən hadisələri əsl vətənpərvər kimi qiymətləndirən və müdafiə edən Sabir irsinə çox yüksək qiymət verir. O, Sabirin inqilaba, inqilabçılara realist münasibətini bütün təfərrüatı ilə işıqlandırmaq üçün rəsmi dövlət sənədlərindən, İran inqilabının rəhbərləri Səttar xanla Bağır xanın şücaətlərini tərənnüm edən şeirlərindən geniş, ətraflı bəhs edir. Müəllif, Sabirdə fanatizmi, yalançı ruhaniləri tənqidinin burjua-mülkədar quruluşunun tənqidi ilə əlaqəli olduğu üçün böyük ictimai-siyasi əhəmiyyət kəsb etdiyini göstərir. C.Xəndan şairin qadın azadlığı uğrunda mübarizəsi məsələsini də müfəssəl və ayrıca işləmişdir. Qadın problemində müxtəlif ideya-estetik cərəyanlara mənsub şairlərin görüşlərini müqayisəli təhlil edən müəllif, o zamankı dövri mətbuatın zəngin faktik materialı əsasında Sabirin eyni mövzudakı şeirlərinin ideya kəskinliyini bu problemə mütərəqqi cəbhənin aydın münasibətinin ifadəsi kimi mənalandırır. Məlumdur ki, Sabir ruhanilərin naqis əməllərini ifşa etsə də, dinin əsas mahiyyətinə toxunmurdu. Ancaq, təəssüf ki, C.Xəndanın, eləcə də Sabirin bütün digər tədqiqatçılarının əsərlərində şairin ateizmi haqqında şişirdilmiş, birtərəfli hökmlər verilmişdir. Monoqrafiyada Sabir poeziyasının mündəricəsi ilk dəfə inqilabi-satirik planda geniş şəkildə işıqlandırılmışdır. Lakin mündəricə müəyyən mövzular üzrə səciyyələndirildiyindən, bu da təbii olaraq, Sabir poeziyasının ideya zənginliyinin onun bütün bədii zənginliyi ilə vəhdətdə araşdırılmasına mane olmuşdur. C.Xəndan «Sabir nəyi tənqid etmişdir?» sualına cavab versə də necə tənqid etməsi və bu tənqidin estetik mündəricəsi kimi mühüm məsələlər tədqiqatdan kənarda qalmışdır ki, tədqiqatda məsələlərin bu şəkildə qoyuluşu, əslində o vaxtın ədəbi-estetik fikrinin səciyyəsi ilə bilavasitə əlaqədar idi. Monoqrafiyada Sabir şeirinin dil xüsusiyyətləri də tədqiq olunmuşdur. Müəllif, Sabirin şeir dili ilə danışıq dili arasındakı uyğunsuzluğu aradan qaldırmaq üçün tiplərə görə «dil yaratdığını» misallarla sübuta yetirmişdir. Onun fikrincə, «dilin oynaqlığı, axıcılığı və ritmikliyini təmin etmək üçün Sabir şeirin formal cəhətlərinə də çox fikir verir. Onun yaradıcılığında məzmun formaya yox, əksinə, forma məzmuna tabe etdirilir». Tipin nitq vasitəsilə, həmçinin şairin münasibətini bildirən ifadələrlə səciyyələndirilməsi də ətraflı araşdırılmışdır... Ümumiyyətlə, C.Xəndan 1930-40-cı illərdə M.Ə.Sabir yaradıcılığı ilə ciddi məşğul olan tədqiqatçılardan biri olmuşdur. O, bir tərəfdən Sabirə məqalələr həsr edir, digər tərəfdən də ali məktəblər üçün hazırladığı «XX əsr Azərbaycan ədəbiyyatı» dərsliyində Sabir yaradıcılığından geniş bəhs açırdı. Həmin dərsliyin yeni nəşrində isə M.Ə.Sabir haqqında oçerk əsaslı şəkildə işlənərək xeyli mükəmməlləşdirilmişdir. Azərbaycan ədəbiyyatşünaslığı bu işin müəyyən bir hissəsini 1940-cı illərdən etibarən görməyə başladı. Böyük Vətən Müharibəsi illərində Sabir ədəbiyyatşünaslığımızın tez-tez müraciət etdiyi klassiklərdən idi. Dövrün tələbinə uyğun olaraq, bu illərdə ədəbiyyatşünslıq klassik irsin müasirliyə cavab verən tərəflərini - vətənpərvərlik və qəhrəmanlıq ideyalarını ön plana çəkirdi. Belə bir şəraitdə Sabir haqqında ədəbi-tənqidi materaillarda vətənpərvərlik, milli-azadlıq hərəkatının inikası, müstəmləkəçiliyə və mütləqiyyətə qarşı mübarizə problemləri mühüm yer tuturdu. Belə tədqiqat istiqaməti ədəbiyyatşünas Cəfər Xəndanın Sabirə həsr etdiyi müharibə dövrü məqalələri üçün də xarakterik idi. Müəllif «Sabir və İranda demokratik hərəkat» mövzusunda silsilə məqalələrində Sabirin İranda milli-azadlıq və demokratik hərəkatı ardıcıl olaraq izlənməsini, irticanın azadlıq uğrunda mübarizəyə qalxmış insanlara qarşı fitnələrini, şah hakimiyyətinin imperialistlərlə birləşib azadlıq hərəkatını boğmaq cəhdlərini amansız satira atəşinə tutmasını onun poeziyasının əhəmiyyətli ideyalarından sayırdı. Məqalələrdə habelə «Molla Nəsrəddin» və «Hophopnamə»nin İranda yayılması, Sabir irsinin İran və Cənubi Azərbaycan ədəbiyyatına, xüsusilə realist şeirə təsiri, Sabir şeirlərinin farscaya tərcüməsi kimi aktual məsələlər də irəli sürülmüş və aydınlaşdırılmışdır. C.Xəndanın tədqiqatında mühüm yenilik bir də ondadır ki, o, Sabir şeirinin İran demokratik ədəbiyyatına təsirini bəzi konkret nümunələr əsasında (M.Etimad, S.Ə.Gilani) göstərilmişdir. Cəfər Xəndan xalq şairinin vəfatının 35-illiyi ilə əlaqədar yazdığı «Sabir və Şərq» məqaləsində Sabirin təsir dairəsini daha geniş miqyasda açmağa təşəbbüs etmişdir. Professor C.X.Hacıyev həm də ilk dəfə olaraq Sabirin klassiklərlə, xüsusən də, Füzuli irsi ilə əlaqələrinə dair düzgün mülahizələrlə çıxış etmişdir. Sabirin bir neçə parodiyasını nəzərdən keçirən müəllif bu əsərlərdə onun öz böyük sələfi Füzulidən bəhrələnməklə yeni, siyasi cəhətdən kəsərli şeirlər yarada bildiyini aydınlaşdırmışdır. C.Xəndan doğru qeyd etmişdir ki, «Sabir Füzulidən sənətkarlıq yolunu, ürəklərə yol tapa bilmək sirrini, yaradıcılığında orijinallığın əhəmiyyətini öyrənmişdir. 1960-cı illərin əvvəllərində professor Cəfər Xəndanın M.Ə.Sabir yaradıcılığının sənətkarlıq xüsusiyyətləri haqqında geniş tədqiqatı sabirşünaslıqda irəliyə doğru atılan mühüm addımlardan biri olmuşdur. O vaxta qədər, professor C.Xəndanın özünün də qeyd etdiyi kimi, «Sabirşünasların çoxu bu yaradıcılığının təhlilini... əsasən ideya istiqamətinə görə aparmış, «Hophopnamə»sinin bədii dəyərindən ötəri danışmışlar...». C.Xəndan bu əsəri ilə xalqın böyük şairinin ecazkar, öz zamanında misli-bərabəri olmayan həmişəyaşar irsinin zəngin sənətkarlıq xüsusiyyətlərini tam əhatə etməyi qarşısına məqsəd qoymasa da, onun poetikası, yaradıcılıq tendensiyası, ifşa üsulları, folklordan və xalq dilindən istifadəsi və s. kimi məsələlərdən ilk dəfə müfəssəl bəhs etmiş, geniş ideya-bədii təhlillər aparmışdır. C.Xəndan Sabir şeirlərini bədii-şəkli cəhətdən tədqiq edərkən əsərlərin süjet-kompozisiya, bədii dil, məcazlar sistemi və başqa xüsusiyyətləri baxımından araşdırmağa çalışmış və şairin «süjet qurmaq» prinsipini ön plana çəkmişdir. O, nümunələr gətirməklə inandırmağa çalışmışdır ki, Sabirin süjetli şeirləri süjet xətti baxımından sadə olduğu qədər də zəngin və çoxmənalıdır. «...Satiralarda bədii müqəddimə, düyünün bağlanıb açılması, kulminasiya nöqtəsinə çatdırılması, nəhayət, nəticədə məqsədin izahı...çox sadə, yığcamdır». Tədqiqatda Sabirin konkret əsərlərinin timsalında mövzu və tipseçmə prinsipi, üslub sadəliyi, müasirlik və aktuallıq, məntiqi əlaqələr kimi həm ideya, həm də poetika problemləri məharətlə əlaqələndirilib geniş təhlil olunmuşdur. Müəllif Sabirin mövzu və tiplər aləminin, tip və portret yaratmaq üsullarının zəngin və rəngarəngliyi, bunları şərtləndirən amillər və s. haqqında elmi mülahizələr söyləmiş, üslub sadəliyi, müasirlik və aktuallıq kimi poetik prinsipləri Sabir sənətkarlığının başlıca məziyyətləri kimi əsaslandırmışdır. Monoqrafiyada müəllif obrazlı təfəkkürün təsvir-ifadə vasitələri, üslub fiqurları kimi formalarının Sabir yaradıcılığında təzahürü istiqamətlərini də ətraflı araşdırmış, şairin sənətkarlıq xüsusiyyətləri haqqında geniş təsəvvür yaratmağa nail olmuşdur. Sabir şeirinin ilk baxışda «xırda» görünən və nəzərə çarpmayan, lakin dərin məna kəsb edən incəlikləri tədqiq edilmişdir. M.Ə.Sabir realist şeirində kinayə, tərz, eyham, bədii təyin, epitet, mübaliğə, təkrir və onun növləri, təzad, həmcins üzvlər, onların müxtəlfi çalarları, habelə məcazın digər növləri konkret nümunələrlə şərh və təhlil edilir. Əsərdə aparılan təhlillərdən aydın olur ki, bütün bu təsvir vasitələri Sabir satiralarında gəlişigözəl işlədilməmiş, bunlar tənqid və ifşa obyektlərinin mənəvi və zahiri eybəcərliklərinin ifadəsi üçün tutarlı vasitəyə çevrilmişdir. C.Xəndan burada həmçinin klassik ədəbiyyatımızdakı mövcud stilistik fiqurların (rücu, təkrir, təzad və s.) Sabir yaradıcılığında nəzərə çarpacaq yenilik kəsb etdiyini, başqa sözlə, Sabirin bu sahədə də «ədəbi ənənələrdən ayrılmaqla orijinal yaradıcılıq yolu tutduğunu aydınlaşdırır». «Sabir yaradıcılığının sənətkarlıq xüsusiyyətləri» monoqrafiyasının maraq doğuran problemlərindən biri Sabir romantikasının tədqiqidir. Təəssüf ki, C.Xəndana qədər ədəbiyyatımızda müəyyən mövqeyi olan böyük sənətkarların, o cümlədən Sabirin də yaradıcılığında romantika, romantik motivlər, realizm və romantizm ədəbi cərəyanları arasında qarşılıqlı əlaqə və təsir məsələləri əsaslı və ciddi şəkildə öyrənilməmişdir. Buna görə də, C.Xəndan öz tədqiqatında Sabir yaradıcılığında romantika məsələsini xüsusi olaraq araşdırmağa çalışır. Müəllif Xalq şairi S.Vurğuna əsaslanaraq deyir ki, «ən qüvvətli realist sənətkarlarda yüksək yaradıcılıq xəyalı və romantika olur. Əsl sənət əsərində bunlar ayrılmaz vəhdət təşkil edir». C.Xəndan hadisələrin mahiyyətini «bugünkü həyatdan» təcrid edilmiş şəkildə təsvir edən romantiklərdən fərqli olaraq Sabir romantikasını... yeni təsdiq, köhnəni inkardan doğan» bir romantika adlandırır. Müəllif Sabir yaradıcılığındakı bütün şeirlərdə romantika axtarmır. O, doğru olaraq romantikanı elə şeirlərlə bağlayır ki, onlar proletariatın konkret tarixi mübarizəsi və onun tamamilə real görünən qalib gələcəyi ilə bağlıdır. Sabir şeirlərini təcrid olunmuş halda deyil, Hadi, Şaiq, Səhhət kimi romantiklərin yaradıcılığında müxtəlif mövzulu məsələlərin qoyuluşu, mahiyyəti ilə müqayisəli şəkildə təhlil etməsi müəllifə öz qənaətlərini daha dərindən əsaslandırmaq imkanı vermişdir. Bu təhlil və müqayisələrdən tədqiqatçının çıxardığı başlıca nəticələr bunlardır: Böyük realist şair zəmanənin dəyişəcəyinə, azadlığın bərqərar olacağına qəti şəkildə inanır. M.Hadi, A.Səhhət, A.Şair kimi romantiklərdə gələcəyin xoş sədası müsbət niyyət və mütərəqqi xəyaldan doğursa, realist Sabirdə xoşbəxt gələcəyin cizgiləri real həqiqət kimi təsvir olunur. Əgər romantiklər «əsli olmayan istiqbalı» tərənnüm edirdilərsə, realist Sabir əlamətləri bu gün təzahür edən, özünü göstərən həqiqi istiqbalı əks etdirirdi. C.Xəndan Sabir sənətkarlığını bir də onun folklordan və canlı xalq ifadələrindən istifadə istiqamətində araşdırmışdır. Deməliyik ki, hələ 1940-cı ildə çap etdirdiyi «M.Ə.Sabir» monoqrafik əsərində C.Xəndan Sabir və folklor məsələsinə toxunmuşdur. Burada isə müəllif məsələni daha dərindən işləyib ciddi elmi nəticələrə gəlmişdir. Xalqa, onun təfəkkürü və bədii fikrinə bağlılığını öz xəlqilik mövqeyindən izah edən müəllif, bu cəhəti klassiklər üçün əsas meyar hesab etmişdir və Sabirin də öz xalqının şairi və böyük milli zəmini olan sənətkar kimi yetişməsini bununla izah etmişdir. C.Xəndanın nümunə və təhlillərlə əsaslandırdığı fikirlərindən biri də budur ki, folklor ayrılıqda kollektiv yaradıcılığın məhsulu olsa da, onun ilk özülünü ayrı-ayrı fərdlər yaradır. Bu mənada müəllif Sabirin xalq yaradıcılığına çox qiymətli əlavələr etdiyini göstərir, bir növ, şairin bəzi deyimlərini «folklorlaşdığı» fikrini irəli sürür. Bu fikrin izahı üçün C.Xəndan Sabirin artıq zərb-məsəl kimi xalq «təfəkkürünə» əbədi daxil olmuş «Mən gedərsəmsə, məramım yenə dünyada durar», «Mən günəşi göydə dana bilmirəm» kimi aforizmlərini misal gətirir. Beləliklə, Cəfər Xəndanın bu tədqiqatında dünyanın, ictimai gerçəkliyin bədii dərki, şairin özünəməxsusluğu, onu məktəbin banisi səviyyəsinə qaldıran sənətarlıq cəhətləri dərindən təhlil və tədqiq edilmişdir. Müəllif öz tədqiqatında Sabir sənətkarlığının mahiyyətini üzə çıxarmağa imkan verən bədii cizgiləri bütün incəlikləri ilə araşdırır və onun ümumi bədii sistemini tam şəkildə təqdim edə bilir.
|
|